ನ್ಯಾಯ್ ಜಾಯ್!

18

ಹಾಂವ್ ಯುವಪ್ರಾಯೆಂತ್‌ಚ್ ಸಂಸಾರ್ ಪಳೆವ್ನ್ ಆಸ್ಚೊ ಯುವಕ್. ಯುವಜಣಾಂಚೆ ಕಶ್ಟ್ ಆನಿ ಆಟೆವಿಟೆ ಲಾಗ್ಶಿಲ್ಯಾನ್ ಪಳೆವ್ನ್ ಅಸ್ಲೆಲ್ಯಾನ್ ಆಜ್ ಯುವಜಣಾಂ ಥಂಯ್ ಉಮೆದ್ ಆನಿ‌ ಹುರುಪ್ ಭರ್ಚೆಂ‌ ಕಶೆಂ? ಮ್ಹಳ್ಳೆಂ ಸವಾಲ್ ಭೊವ್ ವ್ಹಡ್ ಜಾವ್ನ್ ಉಬೆಂ ಜಾಲಾಂ. ಸಬಾರ್ ಯುವಜಣಾಂ ಜಾಯ್‌ ಪುರ್ತೆಂ ಶಿಕಪ್‌ ಜೊಡುನ್‌ಯಿ ಕಾಮ್ ನಾಸ್ತಾನಾ ಕಶ್ಟತಾತ್. ಮಾನಸಿಕ್ ದಬಾವಾಕ್ ವಳಗ್ ಜಾತಾತ್. ಹಾಂಚೆ ಕಶ್ಟ್‌ ಸಮ್ಜೊಂಚೆ ಕೊಣೆಂ?

ಸಬಾರ್ ಪ್ರೇತನಾಂ ಕರುನ್‌ಯಿ ನಿರ್ಫಳ್‌ ಜಾತಾನಾ ಕಿತ್ಲೆಂ ಬೆಜಾರ್ ಜಾಯ್ತ್ ತರ್ನ್ಯಾ‌ ಮನಾಕ್? ಅಶೆಂಚ್ ಬೆಜಾರಾಯೆಚ್ಯಾ ತಾಪಾನ್ ಆಂಗ್ ಶಿಜ್ತಾನಾ, ಯುವಜಣಾಂಕ್ ಹಿಣ್ಸುನ್ ದೆಶಾಚ್ಯಾ ಉಂಚ್ಲ್ಯೆ ಪಂಗ್ತೆರ್ ಬಸೊನ್ ಖೆಳ್ಕುಳಾಂ ಕರ್ತಾನಾ, ಯುವಜಣಾಂಚೊ ತಾಪ್ ಸುಟೊನ್, ಕ್ರಾಂತಿ ಜಾವ್ನ್ ಬದಲ್ತಾ. ಯುವಜಣಾಂಚಿ‌ ಖೆಳ್ಕುಳಾಂ‌ ಊಂಚ್ ಸ್ಥಾನಾರ್ ಬಸ್ಲೆಲ್ಯಾಂನಿಂಚ್ ಕರಿಜೆ ಮ್ಹಣ್ ನಾ, ಆಮ್ಚ್ಯಾ ಕುಟ್ಮಾಂನಿ‌ ಸಯ್ತ್ ಅಸಲೆಂಚ್ ವಾತಾವರಣ್ ದಿಸ್ತಾನಾ ಯುವಜಣಾಂಚೊ ಹುರುಪ್ ವಾಡೊನ್ ಯೆಜೆ ಮ್ಹಳ್ಳೆ ದಿಶೆನ್ ಹಿ ಕವಿತಾ ಕುಟ್ಮಾಂತ್ ಜಲ್ಮೊನ್, ರಾಜಕೀಯಾಂತ್ ವಿಸ್ತಾರುನ್ ರಾವ್ಲ್ಯಾ. ಯುವಜಣಾಂಕ್ ಹಲ್ಕ್ ಕರ್ತಾನಾ, ತಾಣಿಂಚ್ ಖುದ್ದ್ ಕ್ರಾಂತಿಕಾರಿ ಜಾವ್ನ್ ಉದೆಜೆ ಮ್ಹಳ್ಳಿ ಖತ್ಕತಿ ಆಶಾ ಮ್ಹಜಿ ಜಾವ್ನಾಸಾ.

ಮಾಂಕ್ಡಾ ಥಾವ್ನ್ ಮನಿಸ್ ಮ್ಹಣ್ಚ್ಯಾಂಕ್
ಪಾಟ್ ಬಾಗ್ವಾನಾತ್ಲಲ್ಯಾ ತರ್ನಾಟ್ಯಾಂಕ್
ಘರ್ಚ್ಯಾ ವ್ಹಡಿಲಾಂನಿ ತಾಳೊ ಉಬಾರ್ನ್
ಮಾಂಕ್ಡಾಂಚೊಚ್‌ ಬಿಲ್ಲೊ ದಿತಾನಾ
ಖಾಂವ್ಕ್ ಚಾರ್ ಕೆಳಿಂ ಮೆಳ್ಳಲೆ ಪರಿಂ
ತೊಂಡಾರ್ ಆಟ್ ಹಾಸೊ ಯೆತಲ್ಯೊ ತರಿ‌ ಕಶ್ಯೊ?

ನವ್ಕರಿ ನಾಸ್ತಾಂ ಮತ್ ಸ್ತಬ್ದ್ ಜಾತಾನಾ
ಬಸುನ್‌ಚ್ ಕಿತೆಂಯ್ ಕರ್ಯಾಂ ಮ್ಹಳ್ಯಾರ್
ಕಶ್ಟ್ ಕಾಡ್ನ್ ಶಿಕಪ್ ದಿಲ್ಲ್ಯಾಂ ಥಾವ್ನ್
ಕಾಂಬ್ಳಾ‌-ಗಾದ್ಯಾಂನಿ ಧಾಂವ್ಚ್ಯಾ ರೆಡ್ಯಾಂಚೊಚ್‌ ಜೋಪ್
ಕಾಂಯ್ ವರ್ಸಾಂ ಥಾವ್ನ್ ಆಯ್ಕಲ್ಯಾರಿ
ಕುಳಿತ್ ದಿಲ್ಲ್ಯಾ ಪರಿಂ ಸುಶೆಗ್‌ ಮೆಳ್ತಲೊ‌ ತರಿ ಕಸೊ?

ಕಾಮ್ ಮೆಳ್ಳ್ಯಾರಿ permanent ಜಾತಾ ಪರ್ಯಾನ್
ಶಿರ್ಪುಟ್ಯಾ ವದನಾರ್ ಇಲ್ಲೆಂ ವಾಡ್ಚೆಂ ಪೋಟ್ ದಿಸ್ತಾನಾ
ಘರ್ ತೆಂ ಘರ್ ಜಾವ್ನ್ ಉರನಾಸ್ತಾಂ
ಮಾಸಾಚಿ ಆಂಗಡ್ ಜಾವ್ನ್ ಪೆಂಕ್ಡಾರ್ ಗಾಬ್ಳಾಂ ದೆಂವಸರ್
‘ಅಳೆರೆ ದುಕ್ರಾ!’ ಉಲೊ ಕರ್ತಾನಾ
ಆಯ್ಕೊನ್‌ಯಿ ಕಾನ್‌‌ ಕೆಪ್ಪೆ ಜಾತಾಲೆ ತರಿ ಕಶೆ?

ಮಾಂಕ್ಡಾಂಚೆಂ, ರೆಡ್ಯಾಂಚೆಂ ಆನಿ ದುಕ್ರಾಂಚೆಂ ಸಯ್ನ್
ಎಕಾ ಮಹಾಝುಜಾಕ್ ದೆಂವ್ಚಿ
ಸಗ್ಳಿ ತಯಾರಾಯ್ ಕರುನ್
ನ್ಯಾಯ್ ವಿಚಾರುಂಕ್ ಭಾಯ್ರ್ ಸರ್ಲಾಂ
ಕೊಡ್ತಿಂತ್ಲ್ಯಾ ಮುಕೆಲ್ ನಿತಿಕರ್ತಾನ್
ಆಪ್ಲ್ಯಾಚ್ ದೊಳ್ಯಾಂಕ್ ಕಾಳಿ‌ ಪಟ್ಟಿ ರೆವ್ಡಾಯ್ಲ್ಯಾ
ಕಾನಾಂಕ್ ಕಾಪುಸ್ ಮೂಟ್ ಬಾಂದುನ್ ಭರ್ಲಾ
ತಾಚ್ಯೆ ಭೊಂವ್ತಿ ಜರ್ಲ್ಯಾಂಚಿ ರಾಸ್ ಜಮ್ಲ್ಯಾ
ಧವ್ಯಾ ಖೊಮಿಸಾರ್ ಜರ್ಲ್ಯಾಂಚಿಂ ತಾಂತ್ಯಾಂ
ತುತ್ತುರೆಂಚ್ಯಾ ಗಾಜೆಕ್ ನಾಚ್ತಾತ್ ಪುರ್ಸತ್ ನಾಸ್ತಾಂ
ಕಾಳ್ಯಾ ಕೊಟಾರ್ ಉಂದ್ರಾಂನಿ ಕಾಂತಯ್ಲಲ್ಯಾ
ಸಬಾರ್ ದೊಂಪ್ಳ್ಯಾಂನಿ ಜರ್ಲ್ಯಾಂಚಿಚ್ ಧಾಂವಟ್
ದೊಳ್ಯಾಂಕ್ ದವರ್ಲಲ್ಯಾ ಓಕ್ಲಾಕ್ ಸೊಡಿನಾಸ್ತಾನಾ
ಜರ್ಲ್ಯಾಂಚೊ‌ ಚಲ್ತಾ ಸರ್ಕಸ್!

ನಿತಿಕರ್ತಾಚ್ಯಾ ಮಾತ್ಯಾ ವಯ್ರ್
Post Mortemಚೊ ಗೀದ್ ಸರ್ದಾರ್
ಭೊಂವಾಡೊ ಕಾಡ್ನ್ ಘುಂವೊನ್‌ ಆಸಾ
ದೆಂವುನ್ ಚಾರ್ ಮಾಸಾಂ ಬೊಂಚಿನ್ ನಿಕ್ಳಾಂವ್ಕ್
ತಾಕಾಯ್ ಖಂಯ್ ಥಾವ್ನ್ ಧಯ್ರ್ ಪಾವನಾ
ಮಾಂಕ್ಡಾಂಕ್, ರೆಡ್ಯಾಂಕ್ ಆನಿ ದುಕ್ರಾಂಕ್‌
ಆತಾಂ‌ ಮೆಳ್ಚೊ ನ್ಯಾಯ್ ನ್ಹಯ್
ಬಗಾರ್ ನ್ಯಾಯ್‌ ಕರುನ್ ದಿವ್ಪ್ಯಾಚೆಂ ಮಾಸ್
ಕಿತ್ಲೆಂ ತುಕ್ತಾ ತೆಂ ಪಳೆಂವ್ಕ್
ನ್ಯಾಯ್ ಮಾತೆನ್ ಧರ್ಲಲಿ ತಕ್ಡಿ
ನಿರ್ವೋಗ್ ನಾಸ್ತಾಂ ಖಾಲಿ‌ ಆಸಾ

ಮಾಂಕ್ಡಾ, ರೆಡ್ಯಾ, ದುಕ್ರಾಂಕ್ ಆತಾಂ ಏಕ್‌ಚ್ ಸವಾಲ್
‘ಹೆಂ ಜರ್ಲ್ಯಾಂಚೆಂ ಸಯ್ನ್ ಕಾಂಯ್ ಆಮ್ಚ್ಯೆ ಪಾಡ್ತಿಚೆಂ?’

■ ಗ್ಲ್ಯಾನಿಶ್ ಮಾರ್ಟಿಸ್, ಅಲಂಗಾರ್