ಭಾರತಾಚ್ಯಾ ಪ್ರಧಾನ್ ನ್ಯಾಯಾಧೀಶಾನ್ ಅನುಚಿತ್ ಜಾವ್ನ್ ನಿರುದ್ಯೋಗಿ ಯುವಜಣಾಂಕ್ ಜರ್ಲೆ ಮ್ಹಣ್ ಕೆಲ್ಲ್ಯಾ ಟೀಕಾಥಾವ್ನ್ ಸುರು ಜಾಲ್ಲಿ ಚಳ್ವಳ್ ಡಿಜಿಟಲ್ ಮಾಧ್ಯಮಾಕ್ ಸೀಮಿತ್ ಜಾವ್ನ್ ಉರತ್ಗೀ ಮ್ಹಣ್ ಚಿಂತುನ್ ಆಸ್ತಾನಾ ‘ಜರ್ಲೆ’ ಸಕ್ಕಡ್ ಸಾಂಗಾತಾ ಯೇವ್ನ್, ಸರ್ಕಾರಾನ್ ಶಿಕ್ಷಣಾ ತೆವ್ಶಿಂ ದಾಕೊಂವ್ಚ್ಯಾ ಬೇಪಾರ್ವಾಚ್ಯಾ ವಿರೋಧ್ ಶಾಂತ್ಪಣಿ ಖಂಡನ್ ಕರುಂಕ್ ಆಜ್ ಜಂತರ್ ಮಂತರ್ ಪಾವ್ಲ್ಯಾತ್.
ಅಸಲ್ಯೊ ಚಳ್ವಳ್ಯೊ ಆರ್ವಿಲ್ಲ್ಯಾ ದಿಸಾನಿಂ ವೆಳಾಕಾಳಾಕ್ ಸರಿ ಜಾವ್ನ್ ಸರ್ಕಾರಾಚ್ಯಾ ಧೋರಾಣಾಂಕ್ ಲಾಗುನ್ ಜಾಯ್ತೆ ಚಲ್ಲ್ಯಾತ್. ಸುರು ಜಾಲ್ಲೆ ಚಳ್ವಳಿ ವೆಗ್ಗಿಂ ಎಕಾ ಪೊಂತಾಕ್ ಪಾವಾನಾಸ್ತಾನಾ ಮಹಿನ್ಯಾಗಟ್ಲ್ಯಾನ್ ಚಲ್ಲ್ಯಾತ್. ಆಜ್ ಭಾರಾತಾಚ್ಯಾ ಶಿಕ್ಪಾ ಮಂತ್ರಿಕ್ ತಾಚ್ಯಾ ಹುದ್ದ್ಯಾಥಾವ್ನ್ ಸಕಯ್ಲ್ ದೆವಯ್ಜೆ ಮ್ಹಳ್ಳೊ ಏಕ್ ಉದ್ದೇಶ್ ಘೆವ್ನ್ ಸಬಾರ್ ಯುವಜಣಾಂ ಸಾಂಗಾತಾ ಯೇವ್ನ್ ಪ್ರತಿಭಟನ್ ಕರ್ನ್ ಆಸಾತ್. ಸರ್ಕಾರಾಕ್ ಥೊಡೆಶ್ಯಾಪಾವ್ಟಿಂ ಹ್ಯಾ ವಿಶ್ಯಾಂತ್ ವಿನಂತಿ ಕೆಲ್ಯಾರೀ ಕಸಲೀಯ್ ಜಾಪ್ ಮೆಳೊಂಕ್ ನಾತ್ಲಿ. ಆಯ್ಚ್ಯಾ ದಿಸಾ ಕಾಂಯ್ ಸರ್ಕಾರಾಚ್ಯಾ ವರ್ತನಾಂತ್ ಬದ್ಲಾವಾಣ್ ಯೇವ್ನ್ ಜೊಕ್ತೊ ಪರಿಹಾರ್ ಮೆಳತ್ ? – ಪಳಯ್ಜೆ.
ಆಜ್ ಆಮಿ ಸಕ್ಕಡ್ ಸಾಂಗಾತಾ ಆಯ್ಲ್ಯಾತ್
ಕೊಣೆಂ ಸಾಂಗ್ಲೆ ವಿವಿಧತೆಂತ್ ಎಕ್ವಟ್ ನಾ ಮ್ಹಣ್
ಎಕ್ವಟಾಕ್ ಜಾಯ್ ಆಸ್ಲೆಂ ಏಕ್ ಘಟ್ ಏಕ್ ಕಾರಣ್
ನಾಂವ್ ತುಮಿ ದಿಲೆಂ ಆಮ್ಕಾಂ ಜರ್ಲೊ ಮ್ಹಣ್ ಆಪವ್ನ್
ಪರಿಶ್ರಮಾಕ್ ಮೆಳಾನಾ ಜಾಲೆಂ ಫಾವೊತೆಂ ಫಳ್
ಶಿಕೊನ್ ಬರಯಿಲ್ಲ್ಯೊ ಪರೀಕ್ಷಾ ಜಾಲ್ಯೊ ವ್ಯರ್ಥ್
ಖಂಯ್ ವೆಚೆಂ ಕರ್ಚೆಂ ಕಿತೆಂ ಆಸ್ಲ್ಯಾಂವ್ ಖಂತಿನ್
ಗೆಲ್ಲ್ಯಾಂವ್ ಸಾಂಡುನ್ ವೆವೆಗ್ಳೆ ಕಡೆ ಶಿಂಪ್ಡೊನ್
ಉಮೇದಿನ್ ಭರ್ಲೆಲಿ ಪರ್ಜಾ ಆಮಿ ಯುವಾ
ಪಳೆವ್ನ್ ಆಸಾಂವ್ ಫುಡಾರಾಂಚಿಂ ಸಪ್ಣಾಂ
ವ್ಯವಸ್ಥೆಚ್ಯಾ ಫುಟೊಳ್ಯಾಂನಿ ಭಾನಾಯ್ಲೆಂ ತುಮಿ
ಆತಾಂ ಭಿಯೆತಾತ್ ಪಳೆವ್ನ್ ಫುಲ್ಲೆಲಿ ಆಮ್ಚಿ ಮಿಶಿ
ಪರ್ಜೆರಾಜ್ ಹೆಂ, ಸೊಶಿನಾಂವ್ ಸರ್ವಾಧಿಕಾರ್
ನಾಕಾತ್ ಆಮ್ಕಾಂ ಜಾಪಿ ದಿನಾತ್ಲೆ ರಾಯ್
ಮುಕೆಲಿ ಆಸುಂಕ್ ಜಾಯ್ ಪರ್ಜೆಕ್ ಜವಾಬ್ದಾರ್
ನಾಕಾತ್ ಆಮ್ಕಾಂ ಫಟ್ಕಿರೆ, ಭಾನಾವಟಿ ಸುಬೇದಾರ್
ಜರ್ಲೆ ಆಮಿ – ವ್ಹಡ್ಲೆ, ಧಾಕ್ಟೆ, ಉಬ್ಚೆ, ಚಲ್ಚೆ
ಜರ್ಲೆ ಆಮಿ – ಆದ್ಲೆ ಆನಿ ಆತಾಂಚೆಂ
ಜರ್ಲೆ ಆಮಿ – ವೆವಸ್ತೆಕ್ ಜಲ್ಲಲ್ಲೆ
ಜಮ್ಲ್ಯಾಂವ್ ದೀಂವ್ಕ್ ತುಮ್ಕಾಂ ಚತ್ರಾಯ್
ದಿಸಾನಾ ಆತಾಂ ಆಮ್ಕಾಂ ದುಸ್ರಿ ವಾಟ್
■ ವಿಯೊಲಾ ರೊಡ್ರಿಗಸ್
