ಬೋವ್ ಥೊಡೆಚ್ ಕೊಂಕ್ಣಿ ಸಂಗೀತ್ ವೀಡಿಯೊ ತೆ ಸಂಪ್ಲ್ಯಾ ಉಪ್ರಾಂತೀ ಆಮ್ಚೆ ಸವೆಂಚ್ ಉರ್ತಾತ್. ತಾಂತುನ್ ಹೊ ಏಕ್. ಫಕತ್ ಆಪ್ಲ್ಯಾ ನಾಜೂಕ್ ತೆಲ್ತೆಪಣಾಕ್ ಲಾಗುನ್ ಮಾತ್ ನ್ಹಯ್ ಬಗಾರ್ ಆಪ್ಣಾಭಿತರ್ ವ್ಹಾಳ್ಚ್ಯಾ ಸತ್ತಿ ಭಗ್ಣಾಂಪಾಸತ್ ತೊ ಹೆರಾಂ ಥಾವ್ನ್ ಮೆಕ್ಳೊ ರಾವ್ತಾ. ಗೀತ್ಕಾರ್ ಜಾವ್ನ್ ಮ್ಹಜೊ ಆಮಿಗ್ ಫ್ಲೊಯ್ಡ್ ಕಿರಣ್ ನಿರ್ಕಾಣ್, ತಾಚೊ ಹೊ ಫುಡ್ಲದ್ ವೀಡಿಯೊ, ಏಕ್ ಕವಿ ಆನಿ ಬರವ್ಪಿ ಜಾವ್ನ್ ತಾಣೆಂ ಆಮ್ಚೆ ಥಂಯ್ ಕಿರ್ಲಾಯಿಲ್ಲ್ಯಾ ಭರ್ವಶ್ಯಾಕ್ ಪರತ್ ತಾಕ್ತೆಚಿಂ ವೊಕ್ತಾಂ ಭರಯ್ತಾ.ತೊ ಕಾಳ್ಜಾನ್ ಉಲಯ್ನಾಸ್ಚಿ ಭಾಸ್ ಬರ್ಯಾನ್ ಜಾಣಾಂ. ಹಾಂವೆ ಕೆನ್ನಾಂಯ್ ಪಾರ್ಕಿಲ್ಲೆಬರಿಂ, ವಿಶೇಸ್ ಗಜಾಲಿಂಕ್ ರಾಕಾನಾಸ್ತಾಂ, ತೊ ಜಿಣ್ಯೆಚ್ಯಾ ಸಾಧ್ಯಾ ಖಿಣಾನಿಂ ಕವಿತಾ ಸೊಧ್ತಾ ಆನಿ ಬರಯ್ತಾ. ತಾಚಿಂ ಉತ್ರಾಂ ಸೊಂಪಿ ಪೂಣ್ ಜೊಗಾಸಾಣೆನ್ ಮೆಜುನ್ ಮಾಪುನ್ ವಿಂಚ್ಲ್ಲಿಂ. ತಿಂ ವೆಗ್ಳಾಚಾರಾವಿಶಿಂ ಉಲಯ್ತಾತ್, ಜಾಪಿ ನಾತ್ಲ್ಲಿಂ ಸವಾಲಾಂ ಉಟಯ್ತಾತ್, ದಾಂಬುನ್ ಉರುಂಕ್ ನೆಗಾರ್ಚ್ಯಾ ಭಗ್ಣಾಂವಿಶಿಂ ಸಾಂಗ್ತಾತ್. ತಶಿಂ ಮ್ಹಣ್ ತಾಚಿಂ ಉತ್ರಾಂ ಬೊಬಾಟ್ ಮಾರುನ್ ಆಪ್ಣಾವಿಶಿಂ ಪರ್ಗಟ್ನಾಂತ್, ಬಗಾರ್ ನಾಜೂಕಾಯೆನ್ ಹಳ್ತಾರ್ ಆಮ್ಚೆರ್ ಚರ್ತಾತ್ ಆನಿ ಲಾಂಬ್ ತೆಂಪಾಕ್ ಠಿಕ್ತಾತ್.
ಆನಿ ಜೀವನ್ ವಾಜಾಚೊ ತಾಳೊ, ತಾಣೆಂ ಹ್ಯಾಚ್ ಪದಾಕ್ ರಚ್ಲ್ಲೊ ಆನಿ ಆಪ್ಣೆಂಚ್ ಗಾಯ್ಲಲೊ, ಹ್ಯಾ ಉತ್ರಾಂಕ್, ಭಗ್ಣಾಂಕ್ ಎಕ್ದಂ ಸಂಯ್ಬಿಕ್. ಉತ್ರಾಂ ಆನಿಂ ಭಗ್ಣಾಂ ಪಯ್ಲಿಂ, ಯಾ ತಾಳೊ ಪಯ್ಲೆಂ ಸಾಂಗುಂಕ್ ಜಾಯ್ನಾಶೆಂ. ರಸ್ಮಾಳ್ ಆನಿ ಮ್ಹೊಂವಾಳ್, ತೊ ತಾಳೊ ಜೂನ್ ಜಾಲ್ಲ್ಯಾ ಉಂಚ್ಲ್ಯಾ ಕಾಲೆತಿಚ್ಯಾ ವ್ಹಿಸ್ಕೆಭಾಶೆನ್ ಆಯ್ಕೊವ್ಪ್ಯಾಕ್ ಆಪ್ಣಾಂಥಂಯ್ ವೊಡ್ತಾ- ಇಲ್ಲಿಲೋಚ್ ಚಡುನ್ ಯೆಂವ್ಚ್ಯಾ ಉಬಾಳಾಬರಿಂ, ಅಮಾಲಾಬರಿಂ. ನಾಂ ಕಾಂಯ್ ಇಲ್ಲೊ ಉದ್ವೇಗ್, ಯಾ ನಾಂ ಕಾಂಯ್ ಗರ್ಜೆವೀಣ್ ಫುಲವ್ಣಿ. ತೊ ತಾಳೊ ಅಸೊಚ್ ಉತ್ರಾಂಸಾಂಗಾತಾ ಹಾತಾಕ್ ಹಾತ್ ಧರುನ್ ಚಲ್ತಾ ಆನಿಂ ತಾಂಕಾ ತಾಂಚೆಇತ್ಲ್ಯಾಕ್ ಖೆಳುಂಕ್ ಸೊಡ್ತಾ, ಭುರ್ಗ್ಯಾಂಕ್ ಪಾರ್ಕಾಕ್ ವ್ಹೆಲ್ಲ್ಯಾ ಬಾಪಯ್ಬರಿಂ. ರಸ್ಸೆಲ್ ರೊಡ್ರಿಗಸಾಚೆಂ ಸಂಗೀತ್ ಹೆಂ ವರ್ತುಲ್ ಪುರ್ತೆಂ ಕರ್ತಾ. ತೆಂ ಉತ್ರಾಂಕ್ ಆನಿ ತಾಳ್ಯಾಕ್ ಮಿಕ್ವುನ್ ವಚಾನಾಂ, ತಶೆಂ ಮ್ಹಣ್ ಬಿಲ್ಕುಲ್ ಪಾಟೀಂಯ್ ಪಡಾನಾಂ. ಬಗಾರ್ ತಿಂ ನಾಜೂಕ್ ಭಗ್ಣಾಂ ಉಕಲ್ನ್ ದಿಸ್ಚೆಬರಿಂ, ತ್ಯಾ ಸುರಾಕ್ ಇಲ್ಲೆಶೆಂ ಉಬಾರುನ್ ತೆಂಕೊ ದಿತಾ. ಹೆಂ ಗಾಣೆಂ ಕಾನಾಪಾಳ್ವಿ ಸೋಡ್ನ್ ವಚುಂಕ್ ಬಿಲ್ಕುಲ್ ಆಯ್ಕಾನಾಂ. ಆತಾಂ ಇತ್ಲ್ಯಾ ದಿಸಾ ಉಪ್ರಾಂತೀ, ಆಪ್ಲ್ಯಾ ತ್ಯಾಚ್ ದುಖಾವೊಜ್ಯಾಂಸವೆಂ ತೆಂ ಆಪ್ಶೆಂಚ್ ಪರತ್ ಪರತ್ ಪಾಟಿಂ ಯೆತಾ, ಧೊಸುನ್ಂಚ್ ರಾವ್ತಾ.
ಆನಿ ಹ್ಯಾ ಸಯ್ರಾಣಾಕ್ ಬರೊಚ್ ಸಾಂಗಾತ್ ದಿತಾ ಪಡ್ದ್ಯಾರ್ ಉಗ್ತಿ ಜಾಂವ್ಚಿ ಕಾಣಿ. ಏಕ್ ನಿತಳ್ ಸ್ಪಷ್ಟ್ ಸಿನೆಮ್ಯಾಟಿಕ್ ದಿಶ್ಟಾವ್ಯಾನ್, ನಿರ್ದೇಶಕ್ ಜೊಯೆಲ್ ಶಮನ್ ಆನಿ ಅರ್ಜುನ್ ಲುವಿಸ್, ಹ್ಯಾ ವೀಡಿಯೊಚ್ಯಾ ಹರ್ಯೇಕಾ ಫ್ರೇಮಾಕ್ ಅರ್ಥ್ ದಿತಾತ್. ನೆಂಟ್ಯಾ ಮುಗ್ಧ್ ಭಗ್ಣಾಂಕ್ ಭಾಯ್ರ್ ಯೆಂವ್ಕ್ ಬೊಳಾಯ್ನಾಸ್ತಾಂಚ್ ತಿಂ ಭಗ್ಣಾಂ ನಾಜೂಕಾಯೆನ್ ಕ್ಯಾಮರಾಂತ್ ಫಿಚ್ಯಾರ್ ಕರ್ತಾತ್, ಕಾಂಯ್ ತೊ ಕ್ಯಾಮರಾ ಆಪ್ಣಾಮುಕಾರ್ ಘಡುನ್ ಯೆಂವ್ಚೆಂ ಆಪ್ಣೆಂ ಸಾಂಗ್ಚೆಪ್ರಾಸ್, ಪಕತ್ ಪಳವ್ನ್ಂಚ್ ಉರ್ಲೊಶೇಂ. ವೆಗ್ಳಾಚಾರಾಚಿ ದೂಖ್ ಆನಿ ಸಾಂಗುಕ್ ಜಾಯ್ನಾತ್ಲ್ಲ್ಯಾ ಸಂಗ್ತಿಂಚ್ಯಾ ವೊಜ್ಯಾಂಚ್ಯಾ ಹ್ಯಾ ಕಾಣಿಯೆಚೆಂ ಪರಿಕಲ್ಪನ್, ಪದಾತಿತ್ಲ್ಯಾಚ್ ಪ್ರಾಮಾಣಿಕ್ಪಣಿಂ, ಮೊನೆಳಾಂತೀ ಪಡ್ದ್ಯಾರ್ ಪರ್ಗಟ್ ಜಾತಾ. ಆಂವ್ಸರಾಂತ್ ಆನಿ ‘ಕೊಂಕ್ಣೆಕ್ ಚಲ್ತಾ’ ಮ್ಹಳ್ಳ್ಯಾ ಮನಸ್ಥಿತೆರ್ ಸಗ್ಳೆಂ ಜಾಂವ್ಚ್ಯಾ ಹ್ಯಾ ತೆಂಪಾರ್, ಹೊ ವೀಡಿಯೊ ಆಪ್ಲೊಚ್ ಏಕ್ ನವೊ ‘ಅತ್ಮ್ಯಾಲಾಗ್ಪಿ ಮಾಪ್’ ಠರಾಯ್ತಾ. ಮುಕ್ಲ್ಯಾ ದಿಸಾಂನಿಂ ಹ್ಯಾ ಶೆತಾಂತ್ ಜಾಂವ್ಚ್ಯಾ ಕಾಮಾಂನಿಂ, ಉಣ್ಯಾರ್ ಉಣೆಂ ಹ್ಯಾ ಮಾಪಾ ಪರ್ಯಾಂತ್ ಪಾಂವ್ಚೊ ಯಾ ತೊ ಉತ್ರುನ್ ವೆಚೊ ಸತ್ತಿ ಶೆವೊಟ್ ವಿಂಚುಂಕ್ ಸವಾಲ್ ಘಾಲ್ತಾ. ಆತಾಂ ಹಿ ವಿಂಚವ್ಣ್ ಆನಿ ಸವಾಲ್, ಘೆಂವ್ಚೆಂ ಯಾ ಸೊಡ್ಚೆಂ ಹ್ಯಾ ಶೆತಾಂತ್ ವಾವುರ್ತೆಲ್ಯಾಂಚೆರ್. ಪೂಣ್ ದಯಾಕರುನ್ ಅರ್ದ್ಯೊ ಭಾಜ್ಲ್ಲ್ಯೊ ಯಾ ಕರ್ಪಾಲ್ಲ್ಯೊ ಭಾಕ್ರ್ಯೊ ಹಾಡ್ನ್ ಕೊಂಕ್ಣಿ ಲೊಕಾಚ್ಯಾ ರೂಚಿಕ್ ಮಾತ್ ಅಕ್ಮಾನ್ ಕರ್ನಾಕಾತ್. ತ್ಯೊ ತುಮ್ಕಾಂಚ್ ಆಸುಂ.
ಹಾಂವೆಂ ಹಾಚೆಂ ಆದೀಂಯ್ ಸಾಂಗ್ಲಾಂ, ಕ್ರಿಸ್ಟಿ, ಕೊಂಕ್ಣಿ ನಟನಾಶೆತಾಚೊ ‘ಕಾಳ್ ಬದ್ಲಾವ್ಪಿ’, -ಯುಗ ಪ್ರವರ್ತಕ್. ವ್ಹಡ್ಲ್ಯಾ ಪಡ್ದ್ಯಾರ್ ಎದೊಳ್ ಪರ್ಯಾಂತ್ ಸಾಂಗ್ಚೆ ತಿತ್ಲೊ ಅವ್ಕಾಸ್ ಮೆಳಾನಾತ್ಲೊ ತೊ, ಹ್ಯಾ ಮೆಳ್ಲ್ಲ್ಯಾ ಅವ್ಕಾಸಾಂತ್ ಆಪ್ಣಾಚೆಂ ತಾಲೆಂತ್ ಪೂರಾ ದಾಕಂವ್ಚ್ಯಾ ಹಾವೇಸಾಕ್ ಪಡಾನಾಸ್ತಾಂ ಏಕ್ ಅಪ್ರೂಪ್ ಸಯ್ರಾಣಾಚೆಂ ನಟನ್ ದೀವ್ನ್ ಕಥಾನಕಾಕ್ ಥೀರ್ ದವರ್ತಾ. ತೊ ನಟನ್ ಕರ್ಚ್ಯಾಪರಿಂ ದಿಸನಾ, ಬಗಾರ್ ತ್ಯಾ ಕಿರ್ದಾರಾಂತ್ಚ್ ಘುಸುನ್ ತಾಂತುಂಚ್ ಜಿಯೆತಾ. ಭಗ್ಣಾಂ ತಾಚ್ಯಾ ದೊಳ್ಯಾಂತ್, ತಾಣೆಂ ಉಸ್ವಾಸ್ ಘೆಂವ್ಚ್ಯಾ ಕುಂಪಾಸಾಂತ್, ಭುಜ್ಯಾಂಚ್ಯಾ ಠೆವ್ಣೆಂತ್ ಆನಿ ತಾಚ್ಯಾ ಮವ್ನಾಚ್ಯಾ ವಜನಾಂತ್ ಭಾಯ್ರ್ ಪಡ್ತಾತ್. ಥಂಯ್ ವ್ಹಡ್ ಹಾವ್ಭಾವ್ ನಾಂತ್. ಸಯ್ರಾಣಾಂತ್ಚ್ ತ್ರಾಣ್ ಆಸಾ.
ತಾಚ್ಯಾ ಸಾಂಗಾತಾ, ಶಾಯ್ನಿ ಪಿರೇರಾ, ಹ್ಯಾ ತೀವ್ರತಾಯೆಕ್ ತಿತ್ಲೊಚ್ ಸೊಂಪೊ ಆನಿ ಕುರ್ಪಾಳ್ ಸಾಂಗಾತ್ ದಿತಾ. ತಿಚೊ ಆಸ್ಪಾವ್ ಶಾಂತ್ ಪುಣ್ ಖೂಬ್ ಪ್ರಭಾವಿ. ಆಖ್ರೆಕ್ ಏಕ್ ಪಾವ್ಟಿಂ ತಾಣಿಂ ದೊಗಾಂಯ್ನಿ ಬದ್ಲುನ್ ಘೆಂವ್ಚ್ಯಾ ದಿಶ್ಟಿಂತ್ ತಾಣಿಂ ಕೆನ್ನಾಂಚ್ ಉಲಯ್ನಾತ್ಲ್ಲ್ಯಾ ಉತ್ರಾಂಚಿ ರಾಸ್ ಆಸಾ, ತಾಂಕ್ ಆಸಾ. ಕಾಳಿಜ್ ಕಿಸ್ಪರಾಂವ್ಚೆಂ ಹೆಂ ಖಿಣ್ ಪ್ರೇಕ್ಷಕಾಕ್ ಕಶೆಂ ಭೊಗುಂಕ್ ಜಾಯ್ ಮ್ಹಣ್ ಸಾಂಗ್ಚ್ಯಾ ಬದ್ಲಾಕ್, ತೆಂ ಭೊಗುಂಕ್ ಯೆವ್ಕಾರ್ ದಿತಾ, ದೆಕುನ್ ತೆಂ ಆಮ್ಚೆಸವೆಂಚ್ ಲಾಂಬ್ ಕಾಳಾಕ್ ಠಿಕ್ತಾ. ತಾಂಚಿ ದೊಗಾಂಯ್ಚಿ ಕೂಡಿಚಿ ಭಾಸ್ ಆನಿ ಶೀತಳ್ ಆಸ್ಪಾವ್, ಕಸಲ್ಯಾಯ್ ಉತ್ರಾಂನಿಂ ಸಾಂಗ್ಚೆಪ್ರಾಸ್ ಚಡ್, ಉಲಯ್ತೆ ಅರ್ಥ್ ವೆಕ್ತ್ ಕರ್ತಾತ್.
ಬಾಳ್ ಜಿಯಾನಾ ಫೀಬಾ ಡಿಸೋಜಾ ಫಕತ್ ಥೊಡ್ಯಾಚ್ ಘಡಿಯಾಂಕ್ ಝಳ್ಕಾತಾ ತರೀ, ತಾಚ್ಯಾ ಮೊವಾಳ್ ನೆಣ್ತ್ಯಾ ಹಾಶ್ಯಾನ್ ಆಪ್ಲೆಂಚ್ ಏಕ್ ಅಜ್ಯಾಪಿಂ ಥರ್ ಘಡ್ಸುಂಚೆ ಸವೆಂ ಲಾಂಬ್ ಕಾಳಾಚಿ ಮ್ಹೋರ್ ಮಾರ್ತಾ. ಬಾಪ್ ಸ್ಟೀವನ್ ಪಿರೇರಾಚೊ ಲ್ಹಾನ್ ‘ಕ್ಯಾಮಿಯೊ’ ಹ್ಯಾ ಕೃತಿಯೆಕ್ ಚಡಿತ್ ಪಾತ್ಯೆಣಿ ಹಾಡುನ್ ದಿತಾ.
ಅಶೆಂ ಜೊ ಉದೆಲಾ ತೊ ಫಕತ್ ಎಕ್ ಮ್ಯೂಸಿಕ್ ವಿಡಿಯೊ ನಂಯ್. ತೆಂ ಭೊಗ್ಣಾಂಚೆ ಎಕ್ ಲ್ಹಾನ್ಶೆಂ ಪುಣ್ ಪುರ್ತೆಂ ಕಾಮ್ — ಉತ್ರಾಂ, ತಾಳೊ, ಸಂಗೀತ್ ಆನಿ ದೃಶ್ಯಾಂ ಸಗ್ಳಿಂ ಎಕಾಮೆಕಾ ಹಾತ್ ಮೆಳವ್ನ್, ಸಾಂಗಾತಾ, ಘುಸ್ಪಡ್ ನಾಸ್ತಾಂ ವಾವುರ್ತಾತ್ ಆನಿ ದೊಳ್ಯಾಂಸಮೊರ್ ಏಕ್ ಅಜ್ಯಾಪ್ ಸಾದರ್ ಕರ್ತಾತ್. ಹೆಂ ಕಾಮ್ ಕರ್ನ್ ದಾಖಯಿಲ್ಲ್ಯಾ ಪಂಗ್ಡಾನ್ ಕಲೆಕ್ ಆನಿ ಪ್ರೇಕ್ಷಕಾಂಕ್ ದೊಗಾಂಯ್ಕೀ ಮಾನ್ ದಿಲಾ.
ಆಜ್ ಕಾಲ್ ಸಗ್ಳೆಂ ಆಂವ್ಸರಾನ್ ಚಲ್ಚ್ಯಾ ಹ್ಯಾ ಇಂಡಸ್ಟ್ರಿಂತ್, ತಾಣಿಂ ಸಯ್ರಾಣ್ ಘೆವ್ನ್, ಸವ್ಕಾಸ್, ಜೊಗಾಸಾಣೆನ್ ಆನಿ ಖಚಿತಾಯೆನ್ ಕಾಮ್ ಕೆಲಾಂ. ಹೊ ವಾವ್ರ್ ಫಕತ್ ದೋನ್ ದಿಸಾಂಚ್ಯಾ ಶಾಬಾಸ್ಕೆಕ್ ನ್ಹಯ್ — ಕೊಂಕ್ಣಿ ಕಥಾಸಾಂಗ್ಣೆಕ್ ಜರ್ ಕಾಳ್ಜೆನ್ ಆನಿ ಜಾಯ್ಪುರ್ತ್ಯಾ ಗಂಭೀರತಾಯೆನ್ ಪಳೆಲೆಂ ತರ್ ಕಿತೆಂ ಕರುಂಕ್ ಜಾಯ್ತ್ ಮ್ಹಳ್ಳ್ಯಾಚೊ ಎಕ್ ಬರೊ ದಾಖ್ಲೊ. ಪಡ್ದ್ಯಾರ್ ಸಂಪುನ್ ಆಯಿಲ್ಲ್ಯಾ ಉಪ್ರಾಂತೀ, ಹೆಂ ಕಾಮ್ ಜಾಯ್ತೊ ತೇಂಪ್ ಕಾಳ್ಜಾಮನಾಂತ್ ಗೂಂಡ್ ರೊಂಬುನ್ ಉರ್ತಾ.
■ ಕಿಶೂ, ಬಾರ್ಕೂರ್
3 comments
awesome write up Kishoo on a superb and unique presentation of musical video presentation..
yes, it’s indeed such a beautiful story presented, acted and directed wonderfully in regard to music, singing, acting…in this unique, though painful to be watch but everlasting to remember and admire… well written Kiran…amazing lines ….
Well deciphered Kishoo. Lovely album brought to life by all artists concerned
Thank you Kishoo Sir and Kittall for this. We really humbled with this appreciation.