‘ಕೊಂಕಣ್ ಲ್ಹಾರಾಂ’ ಯ್ಯೂ ಟ್ಯೂಬ್ ಚಾನೆಲಾಚಿ ಸುತಾರಿ ನೆಲ್ಲಿ ಪೇರಿಸ್, ಮನಿಶಾ ಲೋಬೊಚೆಂ ಸಂದರ‍್ಶನ್ ಪ್ರಸ್ತುತ್ ಕರ‍್ತಾಲಿ.
“ಬಾಯ್ ಮನಿಶಾ….” ನೆಲ್ಲಿ ಪೇರಿಸ್ ಉಲಯ್ಲಿ. ” ತುಂ ಏಕ್ ಶಾತೆವಂತ್ ಸ್ತ್ರಿ ಮ್ಹಣ್ ಯೆದೊಳ್‌ಚ್ಚ್ ತುಂವೆ ರುಜು ಕೆಲಾಂಯ್… ತುಜ್ಯಾ ಜಿವಿತಾಂತ್ ತುಂವೆ ಎಕ್ಲ್ಯಾನ್‌ಂಚ್ಚ್ ಕೊಣಾಯ್ಚಿಯ್ ಕುಮಕ್ ನಾಸ್ತಾನಾ ವಿಶೇಸ್ ಜಯ್ತ್ ಜೊಡ್ಲಾಂಯ್… ಶಾತೆವಂತ್ ಸ್ತ್ರಿ ಮ್ಹಣ್ ರುಜು ಕೆಲಾಂಯ್… ಸಮಾಜಿಕ್ ಜಾಳಿ ಜಾಗ್ಯಾನಿಂ ಲಾಖಾಂನಿ ಪಾಟ್ಲಾವ್ದಾರ್ ತುಕಾ ಆಸಾತ್… ತುಜ್ಯೊ ವಿಡಿಯ್ಯೊ ಪಳಂವ್ಕ್ ಲೋಕ್ ರಾಕೊನ್ ರಾವ್ತಾ… ತುಕಾ ದುಬಾಯ್ ಶ್ಹೆರಾಂತ್ಲಿ ‘ಶ್ರೇಷ್ಟ್ ಸೋಶಿಯಲ್ ಇನ್ಪ್ಲುಯೆನ್ಸರ್’ ಮ್ಹಳ್ಳೆಂ ಬಿರುದ್ ಸಯ್ತ್ ಮೆಳ್ಳಾಂ… ಆಕಾಸ್‌ಚ್ಚ್ ತುಜಿ ಗಡ್ ಮ್ಹಳ್ಳಿಂ ಸ್ವಪ್ಣಾಂ ಕಾಳ್ಜಾಂತ್ ಆರಾವ್ನ್ ಜಿಯೆತಾಯ್… ತುಜ್ಯಾ ಜಯ್ತಾ ವಿಶಿಂ ವಿಕ್ಷಕಾಂನಿ ಜಾಯ್ತೆಂ ಆಯ್ಕಾಲೆಂ… ತರ್ ಬಾಯ್ ಮನಿಶಾ, ಆತಾಂ ತುಜ್ಯಾ ಜಿವಿತಾಚ್ಯಾ ಕೊಡು ವಾಂಟ್ಯಾಚೆರ್ ಇಲ್ಲಿ ನದರ್ ಘುಂವ್ಡಾಂವ್ಯಾಂಗೀ… ಗ್ರೇಸ್ತ್ ಚಲ್ಯಾಲಾಗಿಂ ತುಜೆಂ ಲಗ್ನ್ ಜಾಲ್ಲೆಂ… ದೊಗಾಂ ಭುರ‍್ಗಿಂ ಜಾಲ್ಲಿಂ… ಉಪ್ರಾಂತ್ ತುಜೆಂ ಕುಟಾಂಬ್ ತುಟ್ಲೆಂ… ವಿಚ್ಚೇದನ್ ಜಾಲೆಂ… ಕಿತೆಂ ಜಾಲೆಂ..? ಹ್ಯಾ ವಿಶ್ಯಾಂತ್ ವಿಕ್ಷಕಾಂಕ್ ಸಾಂಗ್ಶಿಗೀ ?”
“ಖಂಡಿತ್ ಜಾವ್ನ್…” ಮನಿಶಾ ಲೋಬೊ ಉಲಂವ್ಕ್ ಲಾಗ್ಲಿ. ” ಮ್ಹಜ್ಯಾ ಜಿವಿತಾಚ್ಯಾ ತ್ಯಾ ಕಟಿಣ್ ದುಖಾಚ್ಯಾ ವಾಂಟ್ಯಾಕ್ ಮ್ಹಜ್ಯಾ ಮೊಗಾಳ್ ವಿಕ್ಷಕಾಂ ಸವೆಂ ವಾಂಟುಂಕ್ ಹಾಂವ್ ಕಿತೆಂಚ್ಚ್ ದಾಕ್ಷೆಣ್ ಕರಿನಾ… ಸತ್ ತಾಂಕಾ ಕಳಾಜಯ್‍ಚ್ಚ್… ವಿಚಾರ್ ತುಜೆಂ ಸವಾಲ್…”
“ತರ್… ಹೆಂ ಶೀದಾ ಸವಾಲ್… ತುಂ ಲೋಬೊ ಆಸ್‌ಲ್ಲೆಂಯ್ ಮಥಾಯಸ್ ಜಾಲೆಂಯ್ ಆನಿ ಉಪ್ರಾಂತ್, ಮಥಾಯಸ್ ಅಲ್ಕುಂಜ್ ಕಾಡ್ನ್ ಉಡವ್ನ್ ಪರತ್ ಲೋಬೊ ಜಾಲಾಂಯ್… ಮೋಗ್, ಲಗ್ನ್ ಆನಿ ವಿಚ್ಚೇದನ್ … ತರ್ ಹ್ಯಾ ಸರ‍್ವ್ ಬದ್ಲಾವಣೆಕ್ ಕಸಲಿಂ ಕಾರಣಾಂ ಆಸ್‌ಲ್ಲಿಂ…”
“ಮ್ಹಜ್ಯಾ ಜಿವಿತಾಂತ್ ಜಾಲ್ಲೆಂ ಸರ‍್ವ್ ಮ್ಹಜ್ಯಾ ಬರ‍್ಯಾಕ್‌ಚ್ಚ್ ಮ್ಹಣ್ ಹಾಂವ್ ಚಿಂತ್ತಾಂ… ತ್ಯಾ ಬದ್ಲಾವಣೆ ವರ‍್ವಿಂ ಹಾಂವ್ ಆತಾಂ ಎಕಾ ಸುಕ್ಣ್ಯಾಬರಿ ಆಕಾಸಾಕ್ ಆಪಡ್ನ್ ಜಿಯೆತಾಂ…” ಮನಿಶಾ ಲೊಬೊನ್ ಉಲಂವ್ಕ್ ಸುರು ಕೆಲೆಂ. ” ಮ್ಹಜ್ಯಾ ಜಿವನಾಂತ್ಲ್ಯಾ ಬದ್ಲಾವಣೆಕ್ ಕಾರಣ್ ಇತ್ಲೆಂಚ್ಚ್ ದಾದ್ಲ್ಯಾಚೊ ಮೊಸೊರ್… ಪತಿಣ್ ವ್ರತಿಪರ್ ಜಿವಿತಾಂತ್ ಜಯ್ತ್ ಜೊಡುನ್, ಸ್ವತಂತ್ರ್‌ಪಣಿ ಜಿಯೆಂವ್ಕ್ ಸುರು ಕರ‍್ತಾನಾ ಪತಿಕ್ ಜಾಂವ್ಚೊ ಪೊಟಾ ಉಜೊ… ಆನಿ ಮ್ಹಜ್ಯಾ ‘ಎಕ್ಸಾ’ಕ್ ಜಾಲ್ಲೆಂ ತಿತ್ಲೆಂಚ್ಚ್…
“ಮ್ಹಾಕಾ ತಾಚ್ಯಾಲಾಗಿಂ ಕಾಜಾರ್ ಜಾಂವ್ಕ್ ಮನ್‌ಂಚ್ಚ್ ನಾತ್‌ಲ್ಲೆಂ ತರ್‌ಯ್ ಮ್ಹಜ್ಯಾ ವ್ಹಡಿಲಾಂನಿ ವತ್ತಾಯೆನ್ ಮ್ಹಜೆಂ ಕಾಜಾರ್ ತಾಚ್ಯಾಲಾಗಿಂ ಕೆಲ್ಲೆಂ.
“ಲ್ಹಾನ್ಪಣಾ ಥಾವ್ನ್ ಮ್ಹಾಕಾ ಜಾಯ್ ಜಾಲ್ಲೆಂ ಮ್ಹಜ್ಯಾ ಖುಶೆ ಪ್ರಮಾಣೆಂಚ್ಚ್ ಕರ‍್ಚಿ ಮ್ಹಾಕಾ ಸವಯ್… ಖಂಯ್ಸರ್ ವಚೊಂಕ್‌ಯ್ ಮ್ಹಾಕಾ ಬಂಧಡ್ ನಾತ್‌ಲ್ಲಿ…
“ಕಾಜಾರ್ ಜಾಲ್ಯಾ ಉಪ್ರಾಂತ್ ಹಾಂವ್ ದುಬಾಯ್ ಆಯ್ಲಿಂ… ತಾಕಾ ಬರೆಂ ಕಾಮ್ ಆಸ್‌ಲ್ಲೆಂ. ದುಡು ಆಸ್ಲ್ಲೊ… ತಾಚಿಂ ಆವಯ್ – ಬಾಪೊಯ್ ಜಾಯ್ತ್ಯಾ ವರ್ಸಾಂ ಥಾವ್ನ್ ದುಬಾಯ್‌ಚ್ಚ್ ಆಸ್‌ಲ್ಲಿಂ… ಆಯಿಲ್ಲೆಂಚ್ಚ್ ತಾಣಿಂ ಮ್ಹಾಕಾ ಕಾಮ್ ಕರುಂಕ್ ಸಾಂಗ್ಲೆಂ ಪಯ್ಶಾಂಚ್ಯಾ ಅಬ್ಲೆಸಾನ್… ಹಾಂವೆ ಕಾಮ್ ಕೆಲೆಂ… ಪಯ್ಲೆಂಚ್ಯಾ ಚಾರ್ ವರ್ಸಾಂನಿ ಪಾಟಾಪಟ್ ದೊಗಾಂ ಭುರ‍್ಗಿಂ ಜಾಲಿಂ… ಚೆಡ್ವಾಂಚ್ಚ್… ಭುರ‍್ಗಿಂ ಲ್ಹಾನ್ ಆಸ್ತಾನಾ ಮ್ಹಾಕಾ ಭಾಯ್ಲ್ಯಾ ಸಂಸಾರಾಕ್ ಪಳಂವ್ಕ್ ಆವ್ಕಾಸ್ ಮೆಳ್ಳೊನಾ… ಕಾಮ್ ಆನಿ ಭುರ‍್ಗ್ಯಾಂಚೆಂ ಪೊಸಾಪ್‌ಚ್ಚ್ ಜಾಲೆಂ…
“ಭುರ‍್ಗಿಂ ವ್ಹಡ್ ಜಾತಾನಾ ಆನಿ ಆರ‍್ತಿಕ್ ಮಟ್ಟಾರ್ ಸ್ವತಂತ್ರ್ ಜಾತಾನಾ ಹಾಂವ್ ಭಾಯ್ರ್ ವಚೊಂಕ್ ಲಾಗ್ಲಿಂ …. ಮ್ಹಜ್ಯಾ ಸೊಭಾಯೆಕ್… ಹುಶಾರ‍್ಗಾಯೆಕ್ ಲಾಗೊನ್ ಮ್ಹಾಕಾ ಎಕಾ ವೊರ‍್ನಿ ಏಕ್ ಬರೆಂ ಕಾಮ್ ಮೆಳ್ಳೆಂ. ಹಾಂವ್ ತಾಚ್ಯಾ ವೊರ‍್ನಿ ಚಡ್ ಜೊಡುಂಕ್ ಲಾಗ್ಲಿಂ… ಕಾರಾಚೆಂ ಲೈಸನ್ಸ್ ಆಸ್‌ಲ್ಲೆಂ ಜಾಲ್ಲ್ಯಾನ್ ಮ್ಹಾಕಾ ಖಂಯ್ ಜಾಯ್ ಥಂಯ್ ವಚೊಂಕ್ ಸಾಧ್ಯ್ ಜಾಲೆಂ….
“ತ್ಯಾಚ್ ವೆಳಾರ್ ಮ್ಹಜ್ಯಾ ‘ಎಕ್ಸಾ’ ಥಾವ್ನ್ ಆನಿ ತಾಚ್ಯಾ ಕುಟ್ಮಾ ಥಾವ್ನ್ ವಿಶೇಸ್ ರಿತಿಚಿ ಬಂಧಡ್ ಯೇಂವ್ಕ್ ಸುರು ಜಾಲಿ. ಹಫ್ತ್ಯಾಚ್ಯಾ ರಜೆಚ್ಯಾ ದಿಸಾಂನಿಂಯ್ ಘರಾಚ್ಚ್ ರಾವಾಜಯ್… ಭುರ‍್ಗ್ಯಾಂ ಸಾಂಗಾತಾ ರಾವಾಜಯ್ ಮ್ಹಣ್ ತಾಚಿ ಆಶಾ… ಕಿತ್ಯಾಕ್ ಹಾಂವೆ ಭಾಯ್ಲೊ ಸಂಸಾರ್ ಪಳಂವ್ಕ್‌ಚ್ಚ್ ನಜೊ ಮ್ಹಣ್ ತೊ ಚಿಂತ್ತಾಲೊ… ಪುಣ್, ಮ್ಹಾಕಾ ಮಾತ್ರ್ ಮ್ಹಜ್ಯಾ ಖುಶೆ ಪ್ರಮಾಣೆ ಖಂಯ್ ಜಾಯ್ ತೆಂ ವಚೊಂಕ್ ಜಾಯ್ ಆಸ್‌ಲ್ಲೆಂ … ಮ್ಹಜ್ಯಾ ಕಂಪ್ಣೆಚ್ಯಾ ಸಹ-ಕಾಮೆಲ್ಯಾಂ ಸಾಂಗಾತಾ ಸಾಂಜೆಚ್ಯಾ ಪಾರ‍್ಟೆಕ್ ವೆತಾನಾ ಘರಾಂತ್ ಅಸಮಧಾನ್ ಸುರು ಜಾಲೆಂ…
“ತರ‍್ನಾಟಿಂ ಆಸ್ತಾನಾ ಥಾವ್ನ್ ಮ್ಹಾಕಾ ಪಾರ‍್ಟ್ಯೊ ಮ್ಹಳ್ಯಾರ್ ಭಾರಿ… ಮ್ಹಜ್ಯಾ ಕಂಪ್ಣೆಚ್ಯಾ ಇಷ್ಟಾಂ-ಇಷ್ಟಿಂಣ್ಯಾಂ ಸಾಂಗಾತಾ ಪಾರ‍್ಟ್ಯಾಂಕ್ ಗೆಲಿಂ ತರ್ ಪಾಟಿಂ ಯೆತಾನಾ ಫಾಂತೆಂ ಜಾತಾಲೆಂ. ತ್ಯಾ ವೆಳಿಂ, ಘರಾಂತ್ ಲಡಾಯ್‌ಚ್ಚ್… ಹಾಂವ್ ಪಾಟಿಂ ಉಲಯ್ಲಿಂ ತರ್ ಮ್ಹಾಕಾ ಮಾರ್‌ಚ್ಚ್ ಮಾರ್…
“ಸಮಾಜಿಕ್ ಜಾಳಿಜಾಗ್ಯಾಂನಿ ಹಾಂವ್ ಪ್ರಖ್ಯಾತ್ ಜಾಂವ್ಕ್ ಸುರು ಜಾಲ್ಲಿಂ… ಮ್ಹಜ್ಯೊ ತಸ್ವಿರ‍್ಯೊ ಉದೆವ್ನ್ ಆಯ್ಲ್ಯೊ… ಖಂಚಾಯ್ ಪಾರ‍್ಟೆಂತ್ ನಾಚ್ಲಿಂ ತರ್ ಕೊಣ್ ಪುಣಿ ತ್ಯೊ ತಸ್ವಿರ‍್ಯೊ ಜಾಳಿ ಜಾಗ್ಯಾರ್ ಘಾಲ್ತಾಲೆ ಆನಿ ತ್ಯೊ ತಸ್ವಿರ‍್ಯೊ ಪಳವ್ನ್ ‘ತೊ’ ಉಂಚಾಂಬಳ್ ಜಾತಾಲೊ… ತಾಚ್ಯಾ ಆವಯ್ ಬಾಪಾಯ್ನ್‌ಯ್ ತಾಕಾ ಸಾಂಗಾತ್ ದಿಲೊ….
“ಸೊಸ್ಚೆಂ ತರ್‌ಯ್ ಕಿತ್ಲೆಂ ಸೊಸ್ಚೆಂ ???? ಮ್ಹಾಕಾ ಸೊಸುಂಕ್ ಜಾಲೆಂ ನಾ… ಆಖ್ರೇಕ್ ಹಾಂವ್ ತ್ಯಾ ಬಂಧಡೆ ಥಾವ್ನ್ ಸುಟ್ಲಿಂ… ಲಗ್ನಾ ವಿಚ್ಚೇದನ್ ದಿಲೆಂ… ಭುರ‍್ಗಿಂ ಮ್ಹಜ್ಯಾ ಥಾವ್ನ್ ಪಯ್ಸ್ ಗೆಲಿಂ … ಕಾಂಯ್ ಪರ‍್ವಾ ನಾ… ಆನಿ ಹಾಂವ್ ಮ್ಹಜ್ಯಾ ಖುಶೆ ಪ್ರಮಾಣೆ ಜಿಯೆಲಿಂ… ಪ್ರಖ್ಯಾತ್ ಜಾಲಿಂ… ದುಡು ಕೆಲೊ…. ಆತಾಂಯ್ ತಶೆಂಚ್ಚ್ ಜಿಯೆತಾಂ… ಆನಿ ದೆಕುನ್‌ಂಚ್ಚ್, ಸಮಾಜೆಂತ್ ಮ್ಹಾಕಾ ಮಾನ್ ಆಸಾ… ನಾಂವ್ ಆಸಾ…”
♣ ♣ ♣
ರಾಹುಲ್ ಮಥಾಯಸ್ ‘ಯ್ಯೂ ಟ್ಯೂಬಾ’ಚೆರ್ ತೆಂ ಸಂದರ‍್ಶನ್ ಪಳವ್ನ್ ಆಸ್ಲ್ಲೊ. ಮುಖಾರ‍್ಸುನ್ ಪಳಂವ್ಕ್ ತಾಕಾ ಸಾಧ್ಯ್ ಜಾಲೆಂ ನಾ. ಅರ‍್ಧ್ಯಾರ್‌ಚ್ಚ್ ರಾವಯ್ಲೆಂ ಆನಿ ದೊಳೆ ದಾಂಪ್ಲೆ. ಕಾಣಿಯೆಚಿಂ ತಾಚ್ಯಾ ವಯಕ್ತಿಕ್ ಕುಸಿಂಚಿಂ ಘಡಿತಾಂ ತಾಚ್ಯಾ ಮತಿಂತ್ ಎಕಾ ಪಾಟ್ಲ್ಯಾನ್ ಏಕ್ ಉದೆವ್ನ್ ಆಯ್ಲಿಂ.
ತೆದ್ನಾಂ, ಥೊಡ್ಯಾ ವರ್ಸಾಂ ಪಯ್ಲೆಂ ಹೆಂ ಘಡ್‌ಲ್ಲೆಂ. ತಾಂಚೆ ಲಗ್ನ್ ನಖ್ಖಿ ಜಾಲ್ಲೆಂ.
“ತುಂ ಮ್ಹಜ್ಯಾ ಲಾಗಿಂ ಕಿತ್ಯಾಕ್ ಕಾಜಾರ್ ಜಾತಾಯ್? ” ಮನಿಶಾ ಲಾಗಿಂ ರಾಹುಲಾನ್ ವಿಚಾರ್‌ಲ್ಲೆಂ.
ಶ್ಹೆರಾಂತ್ಲ್ಯಾ ಗಿರೆಸ್ತ್ ವರ‍್ಗಾಚ್ಯಾ ರೆಸ್ಟೊರೆಂಟಾಂತ್ ಮೆಜಾ ಭಂವಾರಿಂ ತಿಂ ಬಸ್‌ಲ್ಲಿಂ.
ರಾಹುಲ್ ಜವಾಬೆಕ್ ಆಶೆತಾಲೊ. ಪುಣ್, ಮನಿಶಾ ಥೊಡೊ ವೇಳ್ ಉಲಯ್ಲೆಂ ನಾ.
“ತುಂ ಉಲಯ್ನಾಂಯ್… ದಾಕ್ಷೆತಾಯ್ ಆಸ್ತೆಲೆಂ…” ರಾಹುಲ್ ಮುಖಾರ‍್ಸುನ್ ಮ್ಹಣಾಲೊ. “ಹಾಂವ್ ತುಜ್ಯಾ ಲಾಗಿಂ ಕಿತ್ಯಾಕ್ ಕಾಜಾರ್ ಜಾತಾಂ ಮ್ಹಣ್ ಸಾಂಗ್ತಾಂ… ತುಜ್ಯಾ ಸೊಭಾಯೆಕ್ ಲಾಗೊನ್ ನ್ಹಯ್ ಬಗರ್ ತುಜ್ಯಾ ಬರ‍್ಯಾ ಗುಣಾಂಕ್ ಮೆಚ್ವೊನ್ … ಪಪ್ಪ ಮಮ್ಮಕ್‌ಯ್ ತುಂ ಭಾರಿಚ್ಚ್ ಪಸಂಧ್ ಜಾಲಾಂಯ್…”
” ತುಂ ದುಬಾಯ್ ಆಸಾಯ್ ಮ್ಹಣ್ ಹಾಂವ್ ತುಜ್ಯಾಲಾಗಿಂ ಕಾಜಾರ್ ಜಾತಾಂ…” ಮನಿಶಾ ಸಟ್ಟ್ ಕರ‍್ನ್ ಮ್ಹಣಾಲೆಂ. ” ದುಬಾಯ್ಚ್ಯಾ ಗ್ರೇಸ್ತ್ ಸಂಸಾರಾಂತ್ ಮ್ಹಾಕಾ ಜಿಯೆಂವ್ಕ್ ಜಾಯ್… ಜಾಯ್ ತಿತ್ಲೆ ಪಯ್ಶೆ ಜೊಡುಂಕ್ ಜಾಯ್… ಹಾಂವೆ ಲ್ಹಾನ್ ಥಾವ್ನ್ ದುಬ್ಳಿಕಾಯ್ ಮಾತ್ರ್ ದೆಖ್ಲ್ಯಾ… ಮ್ಹಾಕಾ ಗ್ರೇಸ್ತ್ ಜಾಯ್ಜಯ್… ದುಬಾಯ್ ತಸಲ್ಯಾ ಶ್ಹೆರಾಂತ್ ನಾಚೊನ್ ಉಡೊನ್ ಜಿಯೆಜಯ್… ಮ್ಹಜ್ಯಾ ಖುಶೆ ಪ್ರಮಾಣೆ ಜಿಯೆಜಯ್…”
ವಾಯ್ನಾಚೊ ಗ್ಲಾಸ್ ಮನಿಶಾಚ್ಯಾ ಹಾತಿಂ ದೀವ್ನ್ ರಾಹುಲ್ ಮ್ಹಣಾಲೊ “ದುಬಾಯ್ ಶ್ಹೆರ್ ಏಕ್ ವಿಚಿತ್ರ್ ಭುಮಿಂ ವೈಕುಂಟ್… ಹರ‍್ಯೆಕಾ ರಿತಿಚ್ಯಾ ಮನ್ಶಾಂಕ್ ಸ್ವಾಗತ್ ಕರ‍್ತಾ ಆನಿ ಜಿಯೆಂವ್ಕ್ ಆವ್ಕಾಸ್ ದಿತಾ. ಆಮ್ಕಾಂಯ್ ಜಾಯ್ ತೆಂ ಸರ‍್ವ್ ಮೆಳ್ತೆಲೆಂ…”
♣ ♣ ♣
“ದುಬಾಯಾಂತ್ ಚಲಿಯಾಂಕ್ ಕಾಮಾಂ ಮೆಳೊಂಕ್ ಭಾರಿಚ್ಚ್ ಸುಲಭ್ ಮ್ಹಣ್ ಹಾಂವೆ ಆಯ್ಕಾಲಾಂ. ” ಕಾಜಾರ್ ಜಾವ್ನ್ ದುಬಾಯ್ ಆಯಿಲ್ಲ್ಯಾ ದಿಸಾ‌ಚ್ಚ್ ಮನಿಶಾ ರಾಹುಲಾ ಲಾಗಿಂ ಮ್ಹಣಾಲೆಂ. “ಮ್ಹಾಕಾ ಜಾತಾ ತಿತ್ಲ್ಯಾ ವೆಗ್ಗಿಂ ಕಾಮ್ ಕರುಂಕ್ ಸುರು ಕರಿಜಯ್ ಆನಿ ಜಾತಾತಿತ್ಲೆ ಪಯ್ಶೆ ಜೊಡಿಜಯ್…”
“ಮನಿಶಾ ತುಂ ಆಯ್ಲಾಂಯ್ ಮಾತ್ರ್ … ಏಕ್-ದೋನ್ ಮ್ಹಹಿನೆ ಆರಾಮ್ ಕರ್ … ಉಪ್ರಾಂತ್ ಕಾಮಾಚೆ ವಿಶ್ಯಾಂತ್ ಆಲೋಚನ್ ಕರ‍್ಯಾಂ … ಪಯ್ಶೆ ಜೊಡುಂಕ್ ಆನಿಕ್‌ಯ್ ಜಾಯ್ತೊ ತೇಂಪ್ ಆಸಾ…”
“ತಶೆಂ ವೇಳ್ ವಿಭಾಡುಂಕ್ ಮ್ಹಾಕಾ ಭಿಲ್ಕುಲ್ ಮನ್ ನಾ ರಾಹುಲ್… ತುಜ್ಯಾ ಪಪ್ಪ – ಮಮ್ಮಕ್ ಮೊಸ್ತು ಜಣಾಂಚಿ ವಳಕ್ ಆಸಾ ಆನಿ ತಶೆಂ ಮ್ಹಾಕಾ ಕಾಮ್ ಮೆಳೊಂಕ್ ಭಾರಿಚ್ಚ್ ಸುಲಭ್ …”
ರಾಹುಲ್ ಆನಿ ತಾಚ್ಯಾ ವ್ಹಡಿಲಾಂನಿ ಪ್ರೆತನ್ ಕೆಲ್ಲ್ಯಾನ್ ಮನಿಶಾಕ್ ಕಾಮ್ ಮೆಳ್ಳೆಂಚ್ಚ್… ಅಂತರಾಷ್ಟ್ರೀಯ್ ವಸ್ತು ಸಂಚಾರ್ ಸವ್ಲತ್ಯೊ ದಿಂವ್ಚ್ಯಾ ವ್ಹಡಾ ಕಂಪ್ಣೆಂತ್ ವಿಕ್ರ್ಯಾ ವಿಭಾಗಾಂತ್.
♣ ♣ ♣
“ದೆವಾಚ್ಯಾ ದಯೆನ್ ಆಮ್ಕಾಂ ದೊಗಾಂ ಸೊಭಿತ್ ಚೆಡ್ವಾಂಚ್ಚ್ ಜಾಲಿಂ… ಮನಿಶಾ….” ಮನಿಶಾ ದುಸ್ರ್ಯಾ ಚೆಡ್ವಾಕ್ ಬಾಳಾಂತ್ ಜಾಲ್ಲ್ಯಾ ವೆಳಿಂ ದುಬಾಯ್ಚ್ಯಾ ಆಸ್ಪತ್ರೆಂತ್ ಖಟ್ಲ್ಯಾರ್ ನಿದ್‌ಲ್ಲ್ಯಾ ಮನಿಶಾಚೊ ಹಾತ್ ಧರುನ್ ರಾಹುಲಾನ್ ಮ್ಹಳ್ಳೆಂ. ” ದೆವಾಕ್ ಅರ‍್ಗಾಂ ದಿಂವ್ಕ್ ಫಾವೊ …”
“ಪುಣ್, ಮ್ಹಾಕಾ ಇತ್ಲ್ಯಾ ವೆಗ್ಗಿಂ ದೊಗಾಂ ಭುರ‍್ಗಿಂಚ್ಚ್ ನಾಕಾ ಆಸ್‌ಲ್ಲಿಂ ಆನಿ ತಿಂಯ್ ಚೆಡ್ವಾಂ ಭುರ‍್ಗಿಂ… ತುಜ್ಯಾ ವತ್ತಾಯೆಕ್ ಲಾಗೊನ್ ಜಾಲ್ಯಾಂತ್… ತಾಂಕಾ ಸಾಂಬಾಳುಂಕ್ ಹಾಂವ್ ಪುಣಿ ಘರಾ ರಾಂವ್ಚಿ ನಾ… ಮ್ಹಜೆಂ ಕಾಮ್ ಸಾಂಡ್ಚಿಂ ನಾ… “
ರಾಹುಲಾನ್ ಮನಿಶಾಕ್ ಸಮಧಾನ್ ಕೆಲೆಂ. ತಾಚ್ಯಾ ವ್ರತಿಪರ್ ಜಿವನಾಕ್ ಕಾಂಯಿಂಚ್ಚ್ ಬಾಧಕ್ ಯೆಂವ್ಚೆಂ ನಾ ಮ್ಹಣ್ ಭರ‍್ವಸೊ ದಿಲೊ.
ಬಾಂಳ್ತಿಚೊ ಸುಟ್ಕೆಚೊ ವೇಳ್ ಜಾಲ್ಲೊಚ್ಚ್ ಮನಿಶಾ ಕಾಮಾಕ್ ಗೆಲೆಂ.
ಆತಾಂ ತಾಣೆ ಕಾರ್ ಚಲಂವ್ಚೆಂ ಲೈಸನ್ಸ್ ಜೊಡ್ಲೆಂ. ತಾಚೆಂಚ್ಚ್ ಕಾರ್ ತಾಣೆಂ ಮೊಲಾಕ್ ಘೆತ್ಲೆಂ.
♣ ♣ ♣
“ಆಜ್ ಸಾಂಜೆರ್ ಮ್ಹಾಕಾ ಕಂಪ್ಣೆಚಿ ಪಾರ‍್ಟಿ ಆಸಾ… ರಾಹುಲ್…”ಬ್ರೆಸ್ತಾರಾ ಸಕಾಳಿಂ ದಫ್ತರಾಕ್ ಭಾಯ್ರ್ ಸರ‍್ತಾನಾ ಮನಿಶಾ ಮ್ಹಣಾಲೆಂ. ” ಆನಿ ಹಾಂವ್ ಪಾಟಿಂ ಯೆತಾನಾ ತಡವ್ ಜಾಂವ್ಕ್ ಆಸಾ…”
“ಕಿತ್ಲೊ ವೇಳ್ ಜಾಂವ್ಕ್ ಆಸಾ ಮನಿಶಾ..? ಹರ‍್ಯೆಕಾ ಬ್ರೆಸ್ತಾರಾ ಸುಕ್ರಾರಾ ತುಜ್ಯೊ ಪಾರ‍್ಟ್ಯೊ ಚುಕಾನಾಂತ್‌ಗೀ?” ರಾಹುಲಾನ್ ಸಮಧಾನೆನ್ ವಿಚಾರ‍್ಲೆಂ.
ಪಾಟ್ಲ್ಯಾ ಥೊಡ್ಯಾ ತೆಂಪಾ ಥಾವ್ನ್ ಹರ‍್ಯೆಕಾ ಬ್ರೆಸ್ತಾರಾ ಆನಿ ಸುಕ್ರಾರಾ ಹಿಚ್ಚ್ ಗಜಾಲ್. ಚೆಡ್ವಾಂ ಭುರ‍್ಗಿಂ ಲ್ಹಾನ್ ಆಸ್‌ಲ್ಲಿಂ ವಾಡೊನ್ ಯೆತಾನಾ ರಜೆಚ್ಯಾ ದಿಸಾನಿಂ ತಾಂಕಾ ಆವಯ್-ಬಾಪಾಯ್ಚ್ಯಾ ಸಾಂಗಾತಾಚಿ ಗರ‍್ಜ್ ಆಸ್‌ಲ್ಲಿಚ್ಚ್ ತೆಂ ರಾಹುಲ್ ಜಾಣಾ ಆಸ್ಲ್ಲೊ. ಪಾರ‍್ಟೆಕ್ ಮ್ಹಣ್ ಗೆಲ್ಲೆಂ ಮನಿಶಾ ಮಧ್ಯಾನೆ ಉಪ್ರಾಂತ್‌ಚ್ಚ್ ಘರಾ ಯೆತಾಲೆಂ. ಪಾಟಿಂ ಯೆತಾನಾ ಸೊರ‍್ಯಾಚ್ಯಾ ಅಮಾಲಾರ್‌ಯ್ ಆಸ್ತಾಲೆಂ.
“ಹರ‍್ಯೆಕ್ ಪಾವ್ಟಿಂ ಭಾಯ್ರ್ ವೆತಾನಾ ತುಂವೆ ವಿಚಾರ‍್ಚೆಂ ಹೆಂಚ್ಚ್ ಸವಾಲ್ … ಕಿತ್ಲೊ ವೇಳ್ ಜಾತಲೊ ಮ್ಹಣ್ ಆತಾಂ ಕಶೆಂ ಸಾಂಗ್ಚೆಂ ಹಾಂವೆ ? ಕಂಪ್ಣೆಚಿ ಪಾರ‍್ಟಿ ತಿ… ಸಕ್ಡಾಂ ಸಾಂಗಾತಾ ಮೆಳೊನ್ ಗಮ್ಮತ್ ಕರ‍್ತಾನಾ ಮಧ್ಯಾನ್ ಜಾಂವ್ಕ್‌ಯ್ ಆಸಾ… ಫಾಂತೆಂ ಜಾಂವ್ಕ್‌ಯ್ ಆಸಾ…”
” ತುಜ್ಯಾ ಕುಟ್ಮಾಕ್ ಸಾಂಡುನ್, ತುಜ್ಯಾ ನೆಣ್ತ್ಯಾ ಭುರ‍್ಗ್ಯಾಂಕ್ ಘರಾಂತ್ ದವರ‍್ನ್ ತುಂ ಫಾಂತೆಂ ವರೇಗ್ ಪಾರ‍್ಟೆಂತ್ ಹರ‍್ಯೆಕಾ ಬ್ರೆಸ್ತಾರಾ ಆನಿ ಸುಕ್ರಾರಾ ರಾತಿಂ ಗಮ್ಮತ್ ಕರುಂಕ್ ವೆತಾಯ್ ? ಹೆಂ ಸಾರ‍್ಕೆಂ ಮ್ಹಣ್ ತುಕಾ ದಿಸ್ತಾಗೀ?”
“ಸಾರ‍್ಕೆಂ ವ ಚೂಕ್ ತೆಂ ಮ್ಹಾಕಾ ಕಳಿತ್ ನಾ… ಆಮ್ಚಿ ಅಂತರಾಷ್ಟ್ರಿಯ್ ಕಂಪ್ಣಿ … ಕಂಪ್ಣೆಂಚಿ ಸರ‍್ವಾಂ ಯೆತಾತ್. ಆಮ್ಚ್ಯಾ ಕಂಪ್ಣೆಂತ್ ಭಾರತೀಯ್ ಮಾತ್ರ್ ನ್ಹಯ್ ಯೂರೊಪಿಯನ್ಸ್, ಪಿಲಿಫಿನೊ ಆನಿ ಆಫ್ರಿಕಾಚಿಂ ಆಸಾತ್… ಸರ‍್ವಾಂ ಪಾರ‍್ಟಿ ಆಕೇರ್ ಜಾತಾ ಮ್ಹಣಾಸರ್ ರಾವ್ತಾತ್… ಮ್ಹಾಕಾಯ್ ರಾವಾಜಯ್ ಪಡ್ತಾ… ತುಂ ಭುರ‍್ಗ್ಯಾಂಕ್ ಕಾಣ್ಘೆವ್ನ್ ಶೋಪಿಂಗ್ ಮ್ಹೊಲಾಕ್ ವಚ್… ಭುರ‍್ಗ್ಯಾಂಕ್ ಇಲ್ಲೆಂ ಗಮ್ಮತ್ ಕರಯ್…”
“ಪುಣ್… ತುಂ ನಾಂಯ್…. ಮನಿಶಾ… ತಾಂಚಿ ಆವಯ್ ಆಸ್ಲ್ಯಾರ್ ಕಿತ್ಲೆಂ ಬರೆಂ… ನ್ಹಯ್‌ಂಗೀ?”
“ಮ್ಹಾಕಾ ಜಾಂವ್ಚೆಂ ನಾ… ಮ್ಹಾಕಾ ಮ್ಹಜ್ಯಾ ಕಂಪ್ಣೆಚ್ಯಾ ಪಾರ‍್ಟೆಕ್ ವಚೊಂಕ್ ಆಸಾಚ್ಚ್…”
ರಾಹುಲಾನ್ ಮುಕಾರ್ ಕಿತೆಂಚ್ಚ್ ಉಲಂವ್ಚ್ಯಾ ಪಯ್ಲೆಂ ಮನಿಶಾ ಥಂಯ್ ಥಾವ್ನ್ ಕಾಮಾಕ್ ಗೆಲ್ಲೆಂಚ್ಚ್.
♣ ♣ ♣
“ಸಮಾಜಿಕ್ ಮಾಧ್ಯಮಾಚೆರ್ ತುಜ್ಯೊ ತಸ್ವಿರ‍್ಯೊ ಆಯ್ಲ್ಯಾತ್ ಮನಿಶಾ…” ರಾಹುಲಾನ್ ಸಕಾಳಿಂ ನಾಸ್ಟೊ ಜಾವ್ನ್ ದಫ್ತರಾಕ್ ಭಾಯ್ರ್ ಸರ‍್ತಾನಾ ಮ್ಹಳೆಂ.
ಮನಿಶಾಯ್ ದಫ್ತರಾಕ್ ವಚೊಂಕ್ ಭಾಯ್ರ್ ಸರ‍್ತಾಲೆಂ. ರಾಹುಲಾಚಿಂ ಉತ್ರಾಂ ಆಯ್ಕಾಲಿಂ ತರ್‌ಯ್ ಆಯ್ಕಾನಾತ್‌ಲ್ಲ್ಯಾ ಬರಿಚ್ಚ್ ಕೆಲೆಂ.
“ಅಸಲ್ಯೊ ತಸ್ವಿರ‍್ಯೊ ಎಕಾ ಕಾಜಾರಿ ಸ್ತ್ರಿಯೆಕ್ ಸಾರ‍್ಕ್ಯೊ ನ್ಹಯ್ ಮನಿಶಾ… ತುಂ ಕಾಜಾರಿ ಸ್ತ್ರಿ ಆನಿ ದೊಗಾಂ ಭುರ‍್ಗ್ಯಾಂಚಿ ಆವಯ್…”
ಮನಿಶಾ ಪರತ್ ಉಲಯ್ಲೆಂ ನಾ.
“ಹಾಂವ್ ತುಜ್ಯಾ ಲಾಗಿಂ ಉಲಯ್ತಾಂ… ಮನಿಶಾ… ತುಜ್ಯೊ ಶೆಂಬರಾಂನಿ ತಸ್ವಿರ‍್ಯೊ ವಾಳೊನ್ ಆಸಾತ್… ತ್ಯೊ ಪಳಯ್ತಾನಾ ಮ್ಹಾಕಾಚ್ಚ್ ಲಜ್ ದಿಸ್ತಾ… ಕಾಲ್ ಪಪ್ಪ-ಮಮ್ಮನ್‍ಂಯ್ ಮ್ಹಾಕಾ ಹ್ಯಾ ವಿಶ್ಯಾಂತ್ ಸಾಂಗ್ಲೆಂ…” ಮನಿಶಾನ್ ಆಪ್ಲ್ಯಾ ಉತ್ರಾಂಕ್ ಜವಾಬ್ ದಿನಾತ್‌ಲ್ಲಿ ಪಳವ್ನ್ ರಾಹುಲ್ ಮ್ಹಣಾಲೊ.
“ಹಾಂವ್ ಪಾರ‍್ಟೆಂತ್ ನಾಚ್ತಾನಾ ಕೊಣೆಂಗಿ ತಸ್ವಿರ‍್ಯೊ ಕಾಡ್ನ್ ಸಮಾಜಿಕ್ ಜಾಳಿ ಜಾಗ್ಯಾರ್ ಮೊಸ್ರಾನ್ ಘಾಲ್ಯಾತ್ ತರ್ ಹಾಂವೆಂ ಕಿತೆಂ ಕರಿಜಯ್… ಅಸಲ್ಯಾ ಲ್ಹಾನ್ ವಿಶಯಾಚೆರ್ ತುಮಿಂ ಉಂಚಾಂಬಳ್ ಜಾಲ್ಯಾರ್ ಕಸಲೊ ಫಾಯ್ದೊ? ಹಾಂವ್ ಸೊಭಿತ್ ಆಸಾಂ… ಸರ‍್ವಾಂಕ್ ಪಸಂಧ್ ಜಾತಾಂ… ತರ್… ಹಾಂವ್ ಉಟ್ತಾನಾ ಬಸ್ತಾನಾ ಆನಿ ನಾಚ್ತಾನಾ ತೆ ತಸ್ವಿರ‍್ಯೊ ಕಾಡ್ತಾತ್ ಆನಿ ಜಾಳಿ ಜಾಗ್ಯಾನಿಂ ಘಾಲ್ತಾತ್… ತೆಂ ಪಳವ್ನ್ ತುಂ ಖುಬಳ್ತಾಯ್… ” ಮನಿಶಾ ಸಟ್ಟ್ ಕರ‍್ನ್ ಮ್ಹಣಾಲೆಂ.
“ತುಂವೆ ತಶೆಂ ಕೆಲ್ಯಾ ಶಿವಾಯ್ ಕೊಣೆಂಯ್ ಕಶೆಂ ತಸ್ವಿರ‍್ಯೊ ಕಾಡ್ಚ್ಯೊ… ತುಂ ತ್ಯಾ ದಾದ್ಲ್ಯಾಂಕ್ ಆರಾವ್ನ್ ಧರ‍್ನ್ ನಾಚ್ತಾಯ್… ಪೊಟ್ಲುನ್ ಧರ‍್ತಾಯ್… ಕೀಸ್ ದಿತಾಯ್… ತೆಂ ಪಳವ್ನ್ ತುಮಿಂ ಘೊವ್ – ಬಾಯ್ಲ್ ಮ್ಹಣ್‌ಂಚ್ಚ್ ಕೊಣೀ ಚಿಂತಿಜಯ್…”
“ಲೋಕ್ ಕಿತೆಂ ಚಿಂತ್ತಾ ತೆಂ ಮ್ಹಾಕಾ ಪಡೊನ್ ವಚೊಂಕ್ ನಾ… ” ಮನಿಶಾ ಕಡಾಕಡ್ ಮ್ಹಣಾಲೆಂ. ” ಹಾಂವ್ ಮ್ಹಜೆಂ ಜಿವಿತ್ ಜಿಯೆತಾಂ… ಹೆಂ ಜಿವಿತ್ ಮ್ಹಾಕಾ ಮೆಳ್ಚೆಂ ಎಕ್‌ಚ್ಚ್ ಆನಿ ತೆಂ ಬರ‍್ಯಾನ್ ಜಿಯೆಂವ್ಕ್ ಆಶೆತಾಂ… ತಿತ್ಲೆಂಚ್ಚ್…”
“ಜಾಂವ್ಕ್ ಪುರೊ ತುಜೆಂ ಎಕ್‌ಚ್ಚ್ ಜಿವಿತ್ ಆನಿ ತೆಂ ತುಂ ಜಿಯೆಂವ್ಕ್ ಆಶೆತಾಯ್ … ಪುಣ್, ತುಕಾ ಏಕ್ ಘೊವ್ ಆಸಾ ಆನಿ ದೊಗಾಂ ಭುರ‍್ಗಿಂ ಆಸಾತ್ ಮ್ಹಳ್ಳೆಂ ಉಡಾಸ್ ದವರ್… ಅಶೆಂ ತುಂವೆ ಮೆಳ್‌ಲ್ಲ್ಯಾ ದಾದ್ಲ್ಯಾಂಕ್ ಪೊಟ್ಲುನ್ ಧರ‍್ನ್, ತಾಂಚ್ಯಾ ಆಂಗಾರ್ ಪಡೊನ್ ಆಸ್ಚೆಂ ಕೊಣಾಕ್ ಬರೆಂ ದಿಸ್ತಾ ?”
“ಕೊಣಾಯ್ಕಿ ಬರೆಂ ದಿಸಾನಾ ಜಾಂವ್ಕ್ ಪುರೊ ಪುಣ್ ಮ್ಹಾಕಾ ಬರೆಂ ದಿಸ್ತಾ… ಮ್ಹಜೆಂ ಜಿವಿತ್ ತೆಂ ಹಾಂವ್ ಜಿಯೆತಾಂ… ಆನಿ ಜೆಂ ಹಾಂವ್ ಕಿತೆಂ ಕರ‍್ತಾಂ ಮ್ಹಜ್ಯಾ ಖುಶೆನ್ ಕರ‍್ತಾಂ… ತುಂ ಕೋಣ್ ಮ್ಹಾಕಾ ಆಡಾಂವ್ಕ್ ?”
ಆತಾಂ ರಾಹುಲಾಕ್ ರಾಗ್ ಆಯ್ಲೊ. ತೊ ಉಬೊ ಜಾಲೊ ಆನಿ ಬೊಬಾಟ್ಲೊ – ” ಹಾಂವ್ ತುಜೊ ಘೊವ್ ಆನಿ ತುಂ ಮ್ಹಜಿ ಬಾಯ್ಲ್… ಹಾಂವ್ ತುಕಾ ಸಾಂಗೊಂಕ್ ಸಕ್ತಾಂ… ಯೆಂವ್ಚ್ಯಾ ಬ್ರೆಸ್ತಾರಾ ಥಾವ್ನ್ ತುಂ ಪಾರ‍್ಟೆಕ್ ವೆಚೆಂ ನಾಂಯ್… ಪಾರ‍್ಟೆಕ್ ವಚಾಜಯ್‌ಚ್ಚ್ ತರ್ ತುಂ ಕಾಮ್ ಸೊಡ್ ಆನಿ ಘರಾ ಬಸ್….”
“ಹಾಂವ್ ವೆತೆಲಿಂ … ಆನಿ ತುಂವೆ ಆಡಾಯ್ಲ್ಯಾರ್‌ಯ್ ಹಾಂವ್ ವೆತೆಲಿಂಚ್ಚ್… ತುಂ ಕೋಣ್ ಮ್ಹಾಕಾ ಆಡಾಂವ್ಕ್ ಮ್ಹಣ್ ಹಾಂವ್ ಪಳೆತಾಂ… “
ರಾಹುಲಾನ್ ಹಾತ್ ಉಬಾರ‍್ಲೊ ಆನಿ ಮನಿಶಾಚ್ಯಾ ಮುಸ್ಕರಾಕ್ ಮಾರ‍್ನ್ ಸೊಡ್ಲೊ…
ಮನಿಶಾ ಏಕ್ ಪಾವ್ಟಿಂಚ್ಯಾಕ್ ಕಾಣ್ಸಿರ‍್ಲೆಂ… ಕಟಿಣಾಯೆನ್ ಉಂಚಾಂಬಳ್ ಜಾಲೆಂ. “ಹೆಂಚ್ಚ್ ಪಯ್ಲೆಂ ಥಾಪಾಡ್ ಆನಿ ಆಖ್ರೆಚೆಂ… ಉಡಾಸ್ ದವರ್… ಆನಿ ಮುಖಾರ್ ಮ್ಹಾಕಾ ಮಾರ‍್ಶಿ ತರ್ ಹಾಂವ್ ತುಕಾ ಪೊಲಿಸಾಂಚ್ಯಾ ಅಧೀನ್ ದಿತೆಲಿಂ ಆನಿ ಹಾಂಗಾಚೆ ಕಾಯ್ದೆ ಕಾನೂನಾಂ ತುಕಾ ಕಳಿತ್ ಆಸಾತ್ ಮ್ಹಣ್ ಪಾತ್ಯೆತಾಂ…”
ಮನಿಶಾ ಥಂಯ್ ಥಾವ್ನ್ ಗೆಲೆಂ.
ರಾಹುಲಾಚ್ಯಾ ದೊಳ್ಯಾಂನಿ ದುಖಾಂ ದೆಂವ್ಲಿ… ದಾದ್ಲ್ಯಾಪಣಾಚ್ಯಾ ಅಸಹಾಯಕ್‌ಪಣಾಚಿಂ…
♣ ♣ ♣
ತ್ಯಾ ಕಾಳಾರ್ ದುಬಾಯಾಂತ್ ಸುಕ್ರಾರಾ ಆನಿ ಸನ್ವಾರಾ ರಜಾ ಆಸ್ತಾಲಿ.
ಮನಿಶಾ ಬ್ರೆಸ್ತಾರಾ ಕಾಮಾಕ್ ಗೆಲ್ಲೆಂ ಸನ್ವಾರಾ ದೊನ್ಪಾರ್ ಜಾಲ್ಯಾರ್‌ಯ್ ಪಾಟಿಂ ಆಯ್ಲೆಂ ನಾ …
ಸನ್ವಾರಾ ದೊನ್ಪಾರಾಂ, ರಾಹುಲ್, ತಾಚಿಂ ವ್ಹಡಿಲಾಂ ಆನಿ ದೊಗಾಂಯ್ ಭುರ‍್ಗಿಂ ಘರ‍್ಚ್ಯಾ ಸಾಲಾಂತ್ ಬಸೊನ್ ಆಸ್‌ಲ್ಲಿಂ. ಕೋಣ್‍ಂಯ್ ಕಿತೆಂಚ್ಚ್ ಉಲಯ್ನಾತ್‌ಲ್ಲಿಂ.
ದೊನ್ಪಾರಾಂ ತೀನ್ ಜಾತಾನಾ ಮನಿಶಾ ಆಯ್ಲೆಂ. ಆಯಿಲ್ಲೆಂಚ್ಚ್ ಕುಡಾಕ್ ವಚೊಂಕ್ ಆಮ್ಸೊಂರ‍್ತಾನಾ ರಾಹುಲಾನ್ ತಾಕಾ ಆಡಾಯ್ಲೆಂ. ಹಾತಾಕ್ ಧರ‍್ನ್ ಉಬೆಂ ಕೆಲೆಂ.
“ಮ್ಹಾಕಾ ಸೊಡ್… ಆತಾಂ ತುಜ್ಯಾ ಲಾಗಿಂ ವೊದ್ದು ವೊರಾಂಟ್ ಕರ‍್ಚ್ಯಾ ಸ್ಥಿತೆರ್ ಹಾಂವ್ ನಾ…” ತೆಂ ಸಣ್ಸಣ್ಲೆಂ. ” ಮ್ಹಾಕಾ ನಿದಾಜಯ್… ದೋನ್ ರಾತಿಂ ಮ್ಹಾಕಾ ನೀದ್ ಸಾರ‍್ಕಿ ನಾ…”
“ಖಂಯ್ ಮ್ಹಿರೊಂಕ್ ಗೆಲ್ಲೆಂಯ್ ಆನಿ ತುಕಾ ನೀದ್ ನಾ ?” ರಾಹುಲ್ ಬೊಬಾಟ್ಲೊ. “ಆಜ್ ತುಜ್ಯಾ ಲಾಗಿಂ ಉಲಂವ್ಚ್ಯಾಕ್‌ಚ್ಚ್ ಮ್ಹಣ್ ಆಮಿಂ ರಾಕೊನ್ ರಾವ್ಲ್ಯಾಂವ್ ಆನಿ ತುಂವೆ ಉಲಯ್ಜಯ್‌ಚ್ಚ್…”
“ತರ್ ಸಾಂಗ್… ಪಾಟಾಪಟ್ ಸಾಂಗ್… ಉಲಂವ್ಕ್ ಆಸ್‌ಲ್ಲೆಂ ಮಟ್ವ್ಯಾನ್ ಸಾಂಗ್…”
ರಾಹುಲ್ ದೋನ್ ಘಡಿಯ್ಯೊ ಮೌನ್ ರಾವ್ಲೊ ಆನಿ ಉಪ್ರಾಂತ್ ಮ್ಹಣಾಲೊ – ” ತುಕಾ ತುಜೊ ನೊವ್ರೊ ನಾಕಾ … ತುಕಾ ತುಜಿಂ ಭುರ‍್ಗಿಂ ನಾಕಾತ್… ಪಕತ್ತ್ ಗಮ್ಮತ್ ಕರುಂಕ್ ಆನಿ ಪಾರ‍್ಟ್ಯೊ ಕರುಂಕ್ ಜಾಯ್… ಜೆದ್ನಾಂ ಆಮಿಂ ಕಾಜಾರ್ ಜಾತಾನಾ ವ್ಹಡಿಲಾಂ ಆಸ್‌ಲ್ಲಿಂ ತಶೆಂಚ್ಚ್ ಆಜ್, ಹೆಂ ಕಾಜಾರ್ ತುಟ್ತಾನಾಂಯ್ ತಿಂ ಆಸಾತ್… ಹ್ಯಾ ಘಡಿಯ್ಯೆ ಥಾವ್ನ್ ಹಾಂವ್ ತುಜೊ ನೊವ್ರೊ ನ್ಹಯ್ ತುಂ ಮ್ಹಜಿ ವೊಕಾಲ್ ನ್ಹಯ್…”
“ತುಜ್ಯಾ ನಿರ‍್ಧಾರಾಕ್ ಮ್ಹಜಿ ಸಮ್ಮತಿ ಆಸಾ… ಹಾಂವ್‌ಂಯ್ ತೆಂಚ್ಚ್ ಆಶೆತಾಲಿಂ…” ಮನಿಶಾ ಘುವ್ಲೆಂ.
“ಆನಿ ಆಖ್ರೇಚೆಂ ಉತರ್ ಆಯ್ಕ್… ತುಕಾ ಏಕ್ ದೀಸ್ ಆಸಾ… ಫಾಲ್ಯಾಂ ಸಾಂಜೆ ಭಿತರ್ ತುಂವೆ ಹೆಂ ಘರ್ ಸೊಡಿಜಯ್…”
“ಫಾಲ್ಯಾಂ ಕಿತ್ಯಾಕ್… ಆಯ್ಚಿ ರಾತ್‌ಯ್ ಹಾಂವ್ ಹಾಂಗಾಸರ್ ಜಿಯೆಂವ್ಚಿ ನಾ… ಅಸಲೊ ದೀಸ್ ಯೆತಾ ಮ್ಹಣ್ ಹಾಂವ್ ಜಾಣಾಸ್‌ಲ್ಲಿಂ ಪುಣ್ ಇತ್ಲ್ಯಾ ವೆಗ್ಗಿಂ ನ್ಹಯ್… ಕಾಂಯ್ ವ್ಹಡ್ ನಾ… ಮ್ಹಜ್ಯಾ ಜಯ್ತಾಚ್ಯಾ ಜಿಣಿಯೆಕ್ ಎಕ್ಸುರ್‌ಪಣ್ ಭಾರಿಚ್ಚ್ ಗರ‍್ಜೆಚೆಂ…”
ಸರ‍್ವಾಂ ಪಳವ್ನ್ ಆಸ್ತಾನಾಂಚ್ಚ್ ಮನಿಶಾ ಭಿತರ್ ಗೆಲೆಂ ಆನಿ ಥೊಡ್ಯಾಚ್ಚ್ ವೆಳಾನ್ ಆಪ್ಲ್ಯೊ ಪೆಟಿಯ್ಯೊ ಘೆವ್ನ್ ಘರ್ ಸಾಂಡುನ್ ಗೆಲೆಂ…
■ ಕ್ಲೆರೆನ್ಸ್, ಕೈಕಂಬ
