ಹೆನ್ರಿ ಡಿ’ಸೊಜಾ ಪದಾಂನಿ ಸಮಾಜಿಕ್ ಜಾಗ್

55

ಸಂಗೀತ್ ಸಾಮ್ರಾಟ್ ಖ್ಯಾತೆಚೊ ಹೆನ್ರಿ ಡಿಸೋಜಾ ಆದ್ಲ್ಯಾ ಹಫ್ತ್ಯಾಂತ್ ಮ್ಹಣ್ಜ್ಯೆ ಆಗಸ್ಟಾಚ್ಯೆ 15 ತಾರಿಕೆರ್ ಆಪ್ಲ್ಯೆ 83 ವ್ಯೆ ಪ್ರಾಯೆರ್ ಆಮ್ಕಾಂ ಸಾಂಡುನ್ ಗೆಲೊ – ‘ಆಪ್ಲೊ ಉಸ್ವಾಸ್ ಆನಿ ತುಮಿ ಮ್ಹಜ್ಯಾ ಉತ್ರಾಂನಿ, ತಾಳ್ಯಾಂನಿ ಆನಿ ಸಂಗೀತಾಂನಿ ಮಾತ್ರ್ ಆಯ್ಕೊವ್ಯಾ’ ಮ್ಹಳ್ಳೆಬರಿ. ಹೆನ್ರಿ ಡಿಸೋಜಾ ಮ್ಹಣ್ತಾನಾ ಚಡಾವತ್ ಜಣಾಂಕ್ ಉಡಾಸ್ ಯೆಂವ್ಚಿಂ ದೋನ್ ಪದಾಂ ಮ್ಹಳ್ಯಾರ್ ‘ಆಮಿ ದೊಗೀ ಸೆಜಾರಾ’ ಆನಿ ‘ಯೇ ಯೇ ಕಾತ್ರಿನಾ’.

‘ಆಮಿ ದೊಗೀ ಸೆಜಾರಾ’, ‘ಯೇ ಯೇ ಕಾತ್ರಿನಾ’ ಹಿಂ ಪದಾಂ ಕಾನಾರ್ ಸೊಭಯ್ನಾಸ್ತಾಂ ಲ್ಹಾನ್‍ಪಣ್ ಉತ್ರೊನ್ ಆಯಿಲ್ಲೆ ಮ್ಹಜ್ಯೆ ಪ್ರಾಯೆಚೆ ಕೊಣೀ ಆಸ್ಚೆನಾಂತ್. ಮ್ಹಜ್ಯೆ ಪ್ರಾಯೆಚೆಚ್ ಕಿತ್ಯಾಕ್ ಆತಾಂಯ್ ಆಮ್ಚ್ಯಾ ಕಾಜರ್- ಸೊಭಾಣಾಂನಿ ಹ್ಯಾ ಪದಾಂಕ್ ಪ್ರಾಯ್ ಜಾಂವ್ಕ್ ನಾ. ಹಿಂ ಪದಾಂ ಆಜೂನ್ ತರ್ನಾಟಿಂಚ್ ಆಸಾತ್ ಆನಿ ಸಾಲಾಂನಿ, ಘರಾಂನಿ ಸಗ್ಳ್ಯಾಂನಿ ನಾಚೊನ್ ಖೆಳೊನ್‍ಚ್ ಆಸಾತ್. ಫಕತ್ ತರ್ನಾಟಿಂ ನ್ಹಯ್, ಪ್ರಾಯೆಚಿಂ ಮನ್ಶಾಂ ಸಯ್ತ್ ಹಿಂ ಪದಾಂ ವ್ಹಾಜ್ತಾನಾ ಹಳೂ ತಕ್ಲಿ ಹಾಲಯ್ತಾತ್. ಎಕಾಚ್ ಉತ್ರಾನ್ ಸಾಂಗ್ಚೆಂ ತರ್ ಹ್ಯಾ ಪದಾಂನಿ ಕೊಂಕ್ಣೆಂತ್ ದೋನ್- ತೀನ್ ಪಿಳ್ಗೆಂಕ್ ಧರ್ನ್ ದವರ್ಲಾಂ.

ಮಹಾರಾಷ್ಟ್ರ, ಗೊಂಯ್ ತಶೆಂ ಕರ್ನಾಟಕ ಹ್ಯಾ ತೀನ್ ರಾಜ್ಯಾಂಚ್ಯಾ ಆನಿ ಸಗ್ಳ್ಯಾ ಸಂಸಾರಾಂತ್ ಖಂಯ್ಸರ್ ಕೊಂಕ್ಣಿ ಲೋಕ್ ಆಸಾ ತ್ಯಾ ಸರ್ವ್ ಗಾಂವಾಂಕ್ ಹ್ಯಾ ಪದಾನ್ ಸಾಂಗಾತಾ ಗುಂತ್ಲಾಂ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ರೇಡಿಯೋ ಸಿಲೋನಾಂತ್ ಭಾರಿಚ್ ನಾಂವಾಡ್ದಿಕ್ ಜಾಲ್ಲ್ಯಾ ‘ಯೇ ಯೇ ಕಾತ್ರಿನಾ’ ಪದಾಕ್ ಗಾಂವಾಂತ್ ಆನಿ ಪರ್ಗಾಂವಾಂತ್ ಕೊಂಕ್ಣಿ ಕಳಿತ್ ನಾತ್ಲ್ಯಾ ಮನ್ಶ್ಯಾಂಚಿಂ ಕಾಳ್ಜಾಂ ಫಿದಾ ಜಾಲ್ಯಾಂತ್. ಗಾಂವ್, ದೇಶ್, ಭಾಸ್, ಪ್ರಾಯ್ ಕಸಲಿ ಗಡ್ ಆನಿ ಬಂದಡ್ ನಾಸ್ತಾಂ ಹ್ಯಾ ಪದಾಂನಿ ಸಂಗೀತ್ ಮೊಗಿಂಚ್ಯಾ ಕಾಳ್ಜಾಂನಿ ಜಾಗೊ ಆಪ್ಣಾಯಿಲ್ಲಿ ಲ್ಹಾನ್ ಗಜಾಲ್ ಬಿಲ್ಕುಲ್ ನ್ಹಯ್. ದೆಕುನ್‍ಚ್ ಬೊವ್ಶಾ ಹೆನ್ರಿಯಾಬಾಕ್ ‘ಸಾಮ್ರಾಟ್’ ಮ್ಹಳ್ಳೆಂ ಬಿರುದ್ ಲಾಬ್ಲಾಂ.

ಹೆನ್ರಿ ಡಿಸೋಜಾಚೆಂ ‘ಯೇ ಯೇ ಕಾತ್ರಿನಾ’ ಪದ್ ಮೊಕ್ಳಿಕ್ ಜಾಲ್ಲೆಂ 1971 ಇಸ್ವೆಂತ್. ಮ್ಹಳ್ಯಾರ್ ಆತಾಂ ತ್ಯಾ ಪದಾಚಿ ಪ್ರಾಯ್‍ಚ್‌ ಲಾಗಿಂ ಲಾಗಿಂ ಸಾಟ್ ವರ್ಸಾಂ ಜಾತಾತ್. ಬೊವ್ಶಾ ‘ಆಮಿ ದೊಗೀ ಸೆಜಾರಾ’ ಪದಾಚಿಯ್ ಪ್ರಾಯ್ ಚಡುಣೆಂ ಹಿಚ್ ಆಸೊಂಕ್ ಪುರೊ. ಏಕ್ ಖಿಣ್ ಬಸೊನ್ ಚಿಂತ್ತಾನಾ ಅಜ್ಯಾಪ್ ಭೊಗ್ತಾ – ಹ್ಯಾ ದೋನ್ ಪದಾಂನಿ ಕಾಳಾತೆಕೀದ್ ಬದ್ಲಲ್ಲಿಂ ಕಿತ್ಲಿಂ ಕಾಜಾರಾಂ ದೆಕ್ಲ್ಯಾಂತ್ ಆಸ್ತಲಿಂ. ಹ್ಯಾ ಪದಾಂನಿ ಗ್ರೇಸ್ತ್‌ಕಾಯೆತೆಕೀದ್ ಬದ್ಲಲ್ಲೆ ಕಿತ್ಲೆ ಮಾಟೊವ್, ಸಾಲ್ ಆನಿ ಆತಾಂ ಟ್ರೆಂಡಾರ್ ಆಸ್ಚಿಂ ಡೆಸ್ಟಿನೆಶನನಾಂ ದೆಕ್ಲ್ಯಾಂತ್ ಆಸ್ತಲಿಂ. ಸಾಟ್ ವರ್ಸಾಂಥಾವ್ನ್ ನಾಚೊವ್ನ್ ನಾಚೊವ್ನ್ ಪ್ರಾಯೆಸ್ತ್, ತರ್ನಾಟಿಂ, ಭುರ್ಗಿಂ, ಬಾಯ್ಲಾಂ ಕಿತ್ಲ್ಯಾ ಜಣಾಂಚ್ಯಾ ಆಂಗಾಚೊ ಘಾಮ್ ಹ್ಯಾ ಪದಾಂನಿ ಸುಟಯ್ಲಾ ಆಸ್ತಲೊ. ಪುಣ್ ಆಜೂನ್ ಹ್ಯಾ ಪದಾಕ್ ಕಿತ್ಲೆಂ ವ್ಹಾಜಯ್ಲ್ಯಾರೀ, ನಾಚಯ್ಲ್ಯಾರೀ ಪುರಾಸಾಣ್ ಭೊಗುಂಕ್ ನಾ. ಮಾಟ್ವಾಂನಿ, ಸಂಭ್ರಮಾಂನಿ, ವೆದಿಂನಿ, ರೀಮಿಕ್ಸಾಂನಿ, ರೀಲ್ಸಾಂನಿ ಆಜೂನ್ ಕಾಳಾತೆಕೀದ್ ಹಿಂ ಪದಾಂ ನವಿಂ ನವಿಂ ಟ್ರೆಂಡಾಂ ಆಪ್ಣಾವ್ನ್ ತೆಂಚ್ ನಾಸ್ತಲ್ಜಿಕ್ ಭೊಗಪ್ ದೀವ್ನ್‌ಚ್ ಆಸಾತ್. ಆನ್ಯೇಕ್ ಗಜಾಲ್ ಮ್ಹಳ್ಯಾರ್ ಹ್ಯಾ ಪದಾಂನಿ ಕೆನ್ನಾಂಚ್ ಆಪ್ಲ್ಯಾ ರಚ್ನಾರಾಕ್ ಸೊಡ್ನ್ ಘಾಲುಂಕ್ ನಾ. ಕೆನ್ನಾ ಕೆನ್ನಾ ಹಿಂ ಪದಾಂ ಉಡಾಸ್ ಯೆತಾತ್ ವಾ ಆಯ್ಕೊಂಕ್ ಮೆಳ್ತಾತ್ ತೆನ್ನಾ ಹ್ಯಾ ಪದಾಂ ಪಾಟ್ಲ್ಯಾನ್ ಹೆನ್ರಿ ಡಿಸೋಜಾ ಮ್ಹಳ್ಳೆಂ ನಾಂವ್ ಆಪಾಪಿಂಚ್ ವೊಂಟಾರ್ ಯೆತಾ.

ದೋನ್ ಹಜಾರಾಂವಯ್ರ್ ಪದಾಂ ಘಡ್‍ಲ್ಲ್ಯಾ ಹೆನ್ರಿ ಡಿಸೋಜಾಚ್ಯಾ ತಾಳ್ಯಾಕ್ ತಾಚಿಚಿ ಮ್ಹಳ್ಳಿ ಏಕ್ ಸೊಭಾಯ್ ಆಸ್ಲಿ. ತಾಚೊ ತಾಳೊ ‘ಆಮಿ ದೊಗೀ ಸೆಜಾರಾ’, ‘ಯೇ ಯೇ ಕಾತ್ರಿನಾ’, ‘ಆಮ್ಶ್ಯಾನ್ ತಿಕ್ಶೆಂ ಲೊಣ್ಚೆಂ’, ‘ಬೊಂಬಯ್ ಶೆರ್’, ತಸಲ್ಯಾ ಉಡ್ತ್ಯಾ ಪದಾಕ್ ಕಸೊ ಸಾರ್ಕೊ ತಾಳ್ ಪಡ್ತಾಲೊ ಕೀ ತಸೊಚ್ ‘ಅಲಿಸ್ ಬಾಯ್’, ‘ಚಂದ್ರೆಮ್ ಉದೆವ್ನ್ ಆಯ್ಲೊ’, ‘ಫುಲ್ ವಾಲಿ’, ‘ಝೀನಾ’ –  ತಸ್ಲ್ಯಾ ನಾಜೂಕ್ ಮೊಗಾಳ್ ಸಿಂತಿಮೆಂತಾಳ್ ಪದಾಂಕ್‍ಯೀ ಸಾರ್ಕೊ ವೊಂಬ್ಬಾತಾಲೊ. ತಾಣೆಂ ತಾಳೆ ಬಸಯಿಲ್ಲಿಂ ಆನಿ ಸಾಂಗಾತಾ ಹೆಲೆನ್ ಡಿಕ್ರುಜ್, ಅಪರ್ಣಾ ಮಾಯೆಕರ್ ಹಾಣಿಂ ಗಾಯ್ಲಲಿಂ ಕಿತ್ಲಿಂಗೀ ಪದಾಂ ಆಜೂನ್ ಆಮ್ಚ್ಯಾ ಕಾಳ್ಜಾಚ್ಯಾ ತಡಿರ್ ಲ್ಹಾರಾಂ ಖೆಳಯ್ತಾತ್. ತಾಂತುಂಯ್ ‘ದರ್ಯಾಚ್ಯಾ ದರ್ಯಾಚ್ಯಾ ಲ್ಹಾರಾರಿ’, ‘ಸಾಂಜೆಚ್ಯಾ ವೆಳಾರ್’ ತಸಲಿಂ ಪದಾಂ ಆನಿಕೀ ಮ್ಹಜೆತಸಲ್ಯಾಂಚ್ಯಾ ಪ್ಲೇ ಲಿಸ್ಟಿಂತ್ ವ್ಹಾಜ್ತಾತ್.

ಪುಣ್ ಸರ್ವ್ ಉಡ್ತ್ಯಾ ಆನಿ ಸಿಂತಿಮೆಂತಾಳ್ ಪದಾಂ ಮದೆಂಯ್ ಹೆನ್ರಿ ಡಿಸೋಜಾನ್ ಘಡ್‌ಲ್ಲಿಂ ಸಮಾಜಿಕ್ ಆನಿ ರಾಜಕೀಯ್ ಜಾಗೃತಿ ಹಾಡೊಂವ್ಚ್ಯಾ ಪದಾಂಕ್ ಬಿಲ್ಕುಲ್ ವಿಸ್ರೊಂಕ್ ನ್ಹಜೊ. ಹೆನ್ರಿ ಡಿಸೋಜಾಚ್ಯಾ ಪದಾಂಚಿಂ ಉತ್ರಾಂ ಸಾದಿಂ. ಸಾದಿಂ ಮ್ಹಳ್ಯಾರ್ ತಿಂ ಅಸ್ಕತ್ ಮ್ಹಣ್ ಅರ್ಥ್ ನ್ಹಯ್. ತಾಚ್ಯಾ ‘ದುಬ್ಳೆ’ ಮ್ಹಳ್ಳ್ಯಾ ಎಕಾ ಪದಾಂತ್ ಯೆಂವ್ಚ್ಯೊ ವೊಳಿ ಪಳಯಾ. ಧರ್ಮಾಚ್ಯಾ ನಾಂವಾನ್ ದುಬ್ಳ್ಯಾಂ ವಯ್ರ್ ಆನಿ ಉಣ್ಯಾಸಂಖ್ಯಾತಾಂಚ್ಯಾ ವಯ್ರ್ ಜಾಂವ್ಚ್ಯಾ ಹಲ್ಲ್ಯಾ ವಿರೋಧ್ ತಾಣೆಂ ಕಿತ್ಲ್ಯಾಗೀ ವರ್ಸಾಂ ಪಯ್ಲೆಂ ಬರಯಿಲ್ಲಿಂ ಉತ್ರಾಂ ಆತಾಂಚ್ಯಾ ಕಾಳಾಕ್‍ಯೀ ಸಾರ್ಕ್ಯಾನ್ ಲಾಗು ಜಾತಾತ್.

ಹೊ ಸಗ್ಳೊ ದೇಶ್ ಆಮ್ಚೊ
ಹೊ ಸಗ್ಳೊ ಗಾಂವ್ ಆಮ್ಚೊ
ರಾವೊಂಕ್ ಮಾತ್ರ್ ಘರ್ ನಾ
ಹೊ ಸಗ್ಳೊ ದೇಶ್ ಆಮ್ಚೊ

ಹ್ಯಾ ಉತ್ರಾಂನಿ ಎಕೆ ರಿತಿಚೆಂ ವೆಂಗ್ಯ್ ಆಮಿ ಪಾರ್ಕಿಯೆತ್ ತರ್ ಹ್ಯಾಚ್ ಪದಾಚ್ಯಾ ಮುಕ್ಲ್ಯಾ ಕಡ್ವ್ಯಾಂತ್ ಯೆಂವ್ಚ್ಯೊ ವೊಳಿ ಅಶ್ಯೊ ಆಸಾತ್:

ಆಮ್ಗೆರ್ ಕೊಣ್ಣೀ ಯೇನಾ
ಚೋರ್‌ಯೀ ಆಮ್ಗೆರ್ ಯೇನಾ
ಆಮ್ಚ್ಯಾ ಘರಾ ಭಿತರ್
ಧನ್ ದಿರ್ವೆಂ ಮೆಳ್ನಾ.

ಇಸ್ಕೊಲ್ ಬಾಂದ್ತಲೆ
ಇಗರ್ಜ್ ಬಾಂದ್ತಲೆ ಕೊಣ್ಣೀ ಆಮ್ಗೆರ್ ಯೇನಾ
ವೋಟ್ ಮಾಗ್ತಲೆ
ಆಮ್ಗೆರ್ ಆಯ್ಲಲೆ ಖಂಯ್ ಗೆಲ್ಯಾತ್ ಕೊಣ್ಣಾ!

ಹಕ್ಕಾಂಖಾತಿರ್ ಝುಜೊಂಕ್ ಪುಸ್ಲಾಂವ್ಚ್ಯಾ ತಾಚ್ಯಾ ‘ಊಟ್ ಊಟ್ ಕೊಂಕ್ಣ್ಯಾ’ ಪದಾಚಿಂ ಉತ್ರಾಂ:

ಅರೆ ಊಟ್ ಊಟ್ ಕೊಂಕ್ಣ್ಯಾ
ಆನಿ ನಿದೊನ್ ಪಡೊಂಕ್ ಜಾಯ್ನಾ
ಲಡಾಯ್ ಕರಿನಾಸ್ತಾಂ ಆಮ್ಕಾಂ
ಆಮ್ಚೆಂ ಹಕ್ಕ್ ಮೆಳ್ನಾ

ಮುಕಾರುನ್ ಹೆಂ ಪದ್ ಸಾಂಗ್ತಾ :

ಕುವೆಯ್ಟ್ ದುಬಾಯ್ ಕಾಮಾಕ್ ಗೆಲ್ಯಾರ್ ಮಾತ್ರ್ ಪಾವನಾ
ಆಮ್ಚಿ ಸಮಾಜ್ ಕೊಂಕ್ಣ್ಯಾಂನಿ ಆಮಿ ಉಕಲ್ನ್ ಧರಿಜೆ

ಸಮಾಜ್ ಆಮ್ಚಿ ಕಶಿ ಭಾವಾ ಯೆಂವ್ಚಿ ಮುಕಾರ್?
ವೊಗೆಚ್ ಆಮಿ ಘರಾ ಭಿತರ್ ಘಟ್ಟ್ ಬಸ್ಲ್ಯಾರ್

ತವಳ್‍ಚ್ ಹೆನ್ರಿ ಡಿಸೋಜಾನ್ ಕೊಂಕ್ಣಿ ಸಮುದಾಯ್ ಖಂಯ್ಚ್ಯೆ ದಿಶೆನ್ ಚಮ್ಕತಾ ಮ್ಹಣ್ ಸಾರ್ಕೆಂ ಪಾರ್ಕಿಲಾಂ ಮ್ಹಣ್ಚ್ಯಾಕ್ ಹ್ಯೊ ವೊಳಿ ಸಾಕ್ಸ್ ದಿತಾತ್. ಫಕತ್ ಆಪ್ಣಾಚೊ ಆನಿ ಆಪ್ಲ್ಯಾ ಕುಟ್ಮಾಚೊ ಫುಡಾರ್ ಚಿಂತ್ಲ್ಯಾರ್ ಪಾವನಾ ಬಗಾರ್ ಸಮಾಜೆವಿಶ್ಯಾಂತ್‍ಯೀ ಆಮಿ ಚಿಂತಿಜೆ ಆನಿ ರಾಜಕೀಯಾಂತ್‍ಯೀ ಆಮ್ಚಿ ಅಸ್ಮಿತಾಯ್ ದಾಕಯ್ಜೆ ಮ್ಹಣ್ ಹೆನ್ರಿ ಡಿಸೋಜಾ ಹ್ಯಾ ಪದಾಂತ್ ಚತ್ರಾಯ್ ಸಾಂಗ್ತಾ. ಕ್ರಿಸ್ತಾಂವ್ ಸಮುದಾಯ್ ಸೊಭಾಣಾಕೇಂದ್ರಿತ್, ಸಂಭ್ರಮಾಕೇಂದ್ರಿತ್ ಮ್ಹಳ್ಳೆಂ ಆಜಿಕ್‌ಯೀ ಕೊಡು ಸತ್. ದೆಕುನ್ ಕೊಣ್ಣಾ ಹೆನ್ರಿ ಡಿಸೋಜಾಚಿಂ ‘ಯೇ ಯೇ ಕಾತ್ರಿನಾ’ ಆನಿ ‘ಆಮಿ ದೊಗೀ ಸೆಜಾರಾ’ ಪದಾಂವಿಶಿಂ ಉಲಯಿಲ್ಲೆತಿತ್ಲೆಂ ಆಮಿ ತಾಚ್ಯಾ ರಾಜಕೀಯ್ ಆನಿ ಸಮಾಜಿಕ್ ಜಾಗೃತಿ ಹಾಡೊಂವ್ಚ್ಯಾ ಪದಾಂವಿಶಿಂ ಉಲಯ್ನಾಂವ್.

ಪಾಟ್ಲ್ಯಾ ವರ್ಸಾಂನಿ ಮಾರ್ ಖಾವ್ನ್ ಹೆರ್ ಸಮುದಾಯ್ ಜಾಗೃತ್ ಜಾಲ್ಯಾರೀ ಆಜೂನ್ ಕ್ರಿಸ್ತಾಂವ್ ಸಮುದಾಯಾಥಂಯ್ ಹಿ ಜಾಗ್ ದಿಸೊಂಕ್ ಮೆಳಾನಾ. ಚಡ್ ಇಸ್ಕೊಲಾಂ ಆಸ್ಚ್ಯಾ, ಹ್ಯಾ ಮಾರಿಫಾತ್ ಹೆರಾಂಕ್ ಶಿಕಪ್ ದಿಂವ್ಚ್ಯಾ ಕ್ರಿಸ್ತಾಂವ್ ಸಮುದಾಯಾಕ್ ಕಾಂಯ್ ಶೋಶಣ್ ಜಾಲ್ಯಾರ್, ಹಲ್ಲೊ ಜಾಲ್ಯಾರ್ ಭಾಯ್ರ್ ಯೇವ್ನ್ ಉಲೊಂವ್ಚೆ ಬೊವ್ ಉಣೆ. ಎಕಾವೆಳಾ ಆನಿಕೀ ಆಮಿ ವೈಚಾರಿಕ್ ಥರಾನ್ ಪೊಕೊಳ್ ಜಾವ್ನ್‌ಚ್ ಉರ್ಲ್ಯಾರ್ ಫುಡೆಂ ಆಮ್ಚಿ ಅಸ್ಮಿತಾಯ್ ಹೊಗ್ಡಾವ್ನ್ ಘೆತಾಂವ್ ಮ್ಹಳ್ಳೆಂ ಹೆನ್ರಿ ಡಿಸೋಜಾನ್ ತ್ಯಾ ಕಾಳಾರ್‌ಚ್ ಆಪ್ಲ್ಯಾ ಪದಾಂತ್ ಸಾಂಗ್ಲಾಂ. ವಯ್ರ್ ಉಲ್ಲೇಖ್ ಕೆಲ್ಲ್ಯಾ ತಾಚ್ಯಾ ‘ಊಟ್ ಉಟ್ ಕೊಂಕ್ಣ್ಯಾ’  ಪದಾಚ್ಯೊ ವೊಳಿಚ್ ಉಲ್ಲೇಖ್ ಕರ್ನ್ ಹೆಂ ಬರಪ್ ಸಂಪೊಂವ್ಚೆಂ ತರ್…

ಅರೆ ಊಟ್ ಊಟ್ ಕೊಂಕ್ಣ್ಯಾ
ಆನಿ ನಿದೊನ್ ಪಡೊಂಕ್ ಜಾಯ್ನಾ
ಲಡಾಯ್ ಕರಿನಾಸ್ತಾಂ ಆಮ್ಕಾಂ
ಆಮ್ಚೆಂ ಹಕ್ಕ್ ಮೆಳ್ನಾ

ತೆಣೆಂ ರಾಜೇಶ್ ಖನ್ನಾ
ಹೆಣೆಂ ಶತ್ರುಘನ್ ಸಿನ್ಹಾ
ಥೊಡ್ಯಾಚ್ ತೆಂಪಾನ್ ಆಮಿ
ಮಾಯಾಗ್ ಜಾತಾಂವ್ ಕೊಣ್ಣಾ!

■ ವಿಲ್ಸನ್ ಕಟೀಲ್