ಹಿ ಖಬೊರ್ ಸಕ್ಟಾಂಕ್ ಆಸಾ. ತರೀ, ಸಂದರ್ಭಾ ಖಾತಿರ್ ಬರಂವ್ಕ್ ಪಡ್ತಾ. ಹ್ಯಾಚ್ ಸುಕ್ರಾರಾ, ಮುದರಂಗಡಿಂತ್ ‘ಪ್ರಿನ್ಸ್’ ಡೇವಿಡ್ ಡಿಸೋಜಾಚಿ ದಿಸಾ-ಉಜ್ವಾಡೆ ಹತ್ಯಾ ಜಾಲಿ. ಹಿ ಹತ್ಯಾ ಫಕತ್ ಏಕಾ ಮನ್ಶಾಚ್ಯೆರ್ ಜಾಲ್ಲೊ ಗುನ್ಯಾಂವ್ ನಹಿಂ. ಜಿಲ್ಲ್ಯಾಚ್ಯಾ ಆನಿಂ ರಾಜ್ಯಾಚ್ಯಾ ಕಾನೂನಿ ವೆವಸ್ತೆಚ್ಯೆರ್ ಜಾಲ್ಲೊ ಹಲ್ಲೊ ಜಾವ್ನಾಸಾ.
ಮುದರಂಗಡಿ ಆಮ್ಚ್ಯಾ ಈಟಾಳ್ ಕೃಷಿಪ್ರಧಾನ್ ಗಾಂವ್ಚಿ ಏಕ್ ಲ್ಹಾನ್ ಪೇಂಟ್. ಕೊಡ್ಯಾಳಾಂತ್ ಅಪ್ಪಣ್ಣ ಕಾಟ್ಯಾರ್ ಬಸ್ತಲೊ ಜಾಲ್ಲ್ಯಾನ್ ತೆಂ ಹಂಪನಕಟ್ಟೆ ಜಾಲೆಂ, ತಶೆಂ ಹಾಂಗಾ ‘ಮುದರ’ ಚಿ ಆಂಗಡ್ ಆಸ್ಲಿ ದೆಕುನ್ ಹೊ ಜಾಗೊ ಮುದರಂಗಡಿ ಜಾಲೊ.
‘ಮುದರಾ’ಚ್ಯಾ ಆಂಗ್ಡಿ ಭೊಂವಾರಿ ಸವ್ಕಾಸ್ ಹೆರ್ ಆಂಗ್ಡಿ ಉದೆಲ್ಯೊ, ಹಫ್ತ್ಯಾಚಿ ಸಾಂತ್ ಸುರು ಜಾಲಿ, ಮೊರ್ಗೊರ್ಲ್ಯಾಂನಿ ಮಾಸ್ಳಿ ವಿಕುಂಕ್ ಸುರು ಕೆಲ್ಲ್ಯಾನ್ ಮುದರಂಗಡಿ ಏಕ್ ಲ್ಹಾನ್ ಪಂಚಾಯ್ತ್ ಮಟ್ಟಾಚಿ ಪೇಂಟ್ ಜಾಲಿ. ಆಮ್ಚ್ಯಾ ಗಾಂವಾಂತೀ, ಪಂಚಾಯ್ತ್ ಮಟ್ಟಾಚ್ಯಾ ಪೆಂಟೆಂತ್ ವ್ಯಾವಸಾಯಿಕ್ ವಿವಾದ್ ಸುಪಾರಿಚ್ಯಾ ಗುಳ್ಯಾಂನಿ ಇತ್ಯರ್ಥ್ ಜಾಂವ್ಕ್ ಸುರು ಜಾಲೆ ತರ್, ವಿಶಯ್ ವ್ಹಡ್ ಆಕಾಂತಾಚೊ ಆನಿ ಸಮಾಜೆನ್ ಗಂಬೀರ್ಪಣಿ ಘೆಜೆ ಜಾಲ್ಲೊ.
ಸೀಸೀಟೀವಿ ಫುಟೇಜ್ಯಾಂತ್ ದಿಸ್ತಾ ಕಿ ಬೈಕಾರ್ ಬಸೊನ್ ಆಯಿಲ್ಲೊ ಗುಳೆ ಮಾರ್ಪಿ ಡಿಸೋಜಾಕ್ ಧರ್ನಿಕ್ ಆಪ್ಟುನ್, ತಾಚ್ಯಾ ಕಪಾಲಾರ್ ‘point blank’ ಗುಳೆ ಮಾರ್ತಾ. ಘಾಯೆಲ್ಲೊ ಡೇವಿಡ್ ಥಳಾಚ್ಯೆರ್ಚ್ ಮರಣ್ ಪಾವ್ಲೊ ಮ್ಹಣ್ತಾತ್.
ಬಿಜ್ನೆಸ್ ವಿವಾದಾಕ್ ಸುಪಾರಿ ನ್ಯಾಯ್ ?
ಹೆಂ ಕುಕೃತ್ಯ್ ಉಡುಪಿ ಪವರ್ ಕೊರ್ಪೋರೇಶನ್ ಲಿಮಿಟೆಡ್ (UPCL) ಕಂಪ್ಣೆಂತ್ ಬಾಂದ್ಕಾಮ್ ಕಂತ್ರಾಂಟಾಚ್ಯಾ ವಿವಾದಾಕ್ ಲಾಗೂನ್ ಜಾಲ್ಲಿ ‘ಸುಪಾರಿ’ ಕಿಲ್ಲಿಂಗ್ ಮ್ಹಣೊನ್ ಪೊಲಿಸಾಂನಿ ತಾತ್ಕಾಲೀಕ್ ಘೋಶಣ್ ಕೆಲಾಂ. ಜರ್ ಹೆಂ ರುಜು ಜಾಲೆಂ, ತರ್ ಹಿ ಚಿಂತುಂಕ್ ಜಾಯ್ ತಸ್ಲಿ ಗಜಾಲ್. ಹೆಂ ದಾಖಯ್ತಾ ಕಿ ವ್ಯಾವಸಾಯಿಕ್ ವಾದ್ ನ್ಯಾಯಾಲಯಾಂತ್ ವಾ ಚರ್ಚೇನ್ ಪರಿಹಾರ್ ಜಾಯ್ನಾಂತ್. ಬದ್ಲೆಕ್, ಭಾಡೋತ್ರಿ ಗುಳ್ಯಾಂನಿಂ ಠರಾಯ್ತಾತ್.
ಡೇವಿಡ್ ಡಿಸೋಜಾ ಸ್ಥಾನಿಕ್ ಕಾಂಗ್ರೆಸ್ ಪುಡಾರಿ; ಮಾಜಿ ಪಂಚಾಯತ್ ಅಧ್ಯಕ್ಷ್ ಆನಿ ಫಾಮಾದ್ ಸ್ತಾಪಿತ್ ಉದ್ಯಮಿ. ಸಿವಿಲ್ ಕೊಂಟ್ರಾಕ್ಟರ್ ಸಯ್ತ್. ಹಾಕಾ ಲಾಗೂನ್ ಹೆಂ ಪ್ರಕರಣ್ ರಾಜಕೀಯ್ ಥಳಾರ್ ಗಾಜ್ತಾ. ಸುರ್ವೇಚ್ಯಾ ಪುರಾವ್ಯಾಂ ಪ್ರಮಾಣೆಂ, ಹೆ ಕುಕೃತ್ಯ್ ರಾಜಕೀಯ್ ದುಸ್ಮಾನ್ಕಾಯೆ ಲಾಗೂನ್ ನಹಿಂ, ಬಗಾರ್ ದುಡ್ವಾ-ಪಾವ್ತಿಂಚ್ಯಾ ಕಾರಣಾಕ್ ಲಾಗೂನ್ ಜಾಲ್ಲೆಂ ಮ್ಹಳ್ಳೆಂ ಕಳೊನ್ ಆಯ್ಲಾಂ.
ಹಲ್ಲೊ ಸಂಪ್ತಚ್, ಗುಳೆ ಮಾರ್ಪಿ ಆನಿ ತಾಚ್ಯೆ ಹೆರ್ ದೋಗ್ ಸಾಂಗಾತಿ ಬೈಕಾರ್ ಫರಾರ್ ಜಾಲ್ಲೆ. ಹೆ ತೆಗೀ ಪೊಲಿಸಾಂಕ್ ಸಾಂಪಡ್ಲ್ಯಾತ್. ಹೆಂ ಪೋಲಿಸಾಂಚ್ಯೆ ಜಯ್ತ್. ಶೂಟರಾಂಕ್ ಕೈದ್ ಕರ್ಚ್ಯೆಂ ಗರ್ಜೆಚ್ಯೆಂ. ಪೂಣ್, ತಿತ್ಲೆಂ ಕೆಲ್ಯಾರ್ ಪಾವಾನಾಂ. ಖರೊ ನ್ಯಾಯ್ ಮ್ಹಳ್ಯಾರ್, ಸುಪಾರಿ ದಿವ್ಪಿ ವ್ಯಕ್ತಿಂಕ್ ಆನಿ ತಾಕಾ ಮಜತ್ ದಿಲ್ಲ್ಯಾ ಸಕ್ಟಾಂಕ್ ಕೊಡ್ತಿಂತ್ ಉಭೆಂ ಕರುಂಕ್ ಜಾಯ್.
ಆರೋಪಿ ಶೂಟರಾಂಚ್ಯಾ ಬ್ಯೇಂಕ್ ಖಾತ್ಯಾಂತ್ ದೋನ್ ಲಾಖಾ ಪ್ರಾಸ್ ಚಡ್ ರಕಮ್ ಜಮೊ ಜಾಲ್ಯಾ ಖಂಯ್. ಕೊಣೆಂ ಹಿ ಪಾವ್ತಿ ಕೆಲಿ? ಹ್ಯಾ ದುಡ್ವಾಚ್ಯಾ ಮಾಲಕಾ ಮೆರೆನ್ ಪಾವೊಂಕ್ ಜಾಯ್. ಜರ್ ಫಕತ್ ಭಾಡೋತ್ರಿ ಹಾತಾಂಕ್ ಶಿಕ್ಷಾ ಜಾಲಿ ಆನಿ ಮಾಸ್ಟರ್-ಮೈಂಡ್ ಮುಕ್ತ್ ಉರ್ಲೆ ತರ್ ಸಂದೇಶ್ ಸ್ಪಶ್ಟ್ ಆಸ್ತಾ : ಶ್ರೀಮಂತ್ ಆನಿ ತಾಕತ್ದಾರ್ ಜಣ್ murder outsource ಕರೂನ್ ನಿರ್ದೋಷ್ಪಣಾನ್ ಸುಟೊಂಕ್ ಸಕ್ತಾತ್. ಜಿಲ್ಲ್ಯಾಂತ್, ವ್ಯಾವಸಾಯಿಕ್ ವಿವಾದಾಂ ಖಾತಿರ್ ಸುಪಾರಿ ಖುನಿಯೊ shadow justice system ಜಾಂವ್ಕ್ ನಜೊ.
ಸೋಶಿಯಲ್ ಮೀಡಿಯಾಚೆರ್ ಸಂಭ್ರಮ್ ?
ಖಾಸ್ಗಿ ವಾಟ್ಸಪ್ ಗ್ರೂಪಾಂನಿಂ ತಶೆಂಚ್ ಫೇಸ್-ಬುಕ್ ತಸ್ಲ್ಯಾ free online social networking platformಚ್ಯೆರ್ ಥೊಡಿಂ ಹ್ಯಾ ಖುನ್ಯೆಕ್ ‘ದೈವಿಕ್ ನೀತ್’ ‘ಕಾವ್ಯಾತ್ಮಕ್ ನ್ಯಾಯ್’ (divine justice, poetic justice) ಅಶೆಂ ಬಿಲ್ಲೆ ದೀವ್ನ್ ಸಂತೋಸ್ತಾತ್. ಹ್ಯಾ ಪೋಸ್ಟಾಂಚ್ಯೆರ್ ಶೆಂಬೋರೋಂ ಜಣ್ ಕೊಮೆಂಟ್ಸ್ ದಾಕಲ್ ಕರ್ತಾತ್. ಹಿಂ ಸಂತೋಸಾಚಿಂ ಕೊಮೇಂಟ್ಸ್ ಕೋಣಾಚಿಂ ಮ್ಹಣ್ ತಪ್ಶೀಲ್ ಕೆಲಿಂ ತರ್, ತಿಂ ಚಡ್ತಾವ್ ಕತೊಲಿಕಾಂಚಿಂ, ತಾಂತೂಂಯಿ ಸ್ತ್ರೀಯೆಂಚಿಂ ಜಾವ್ನಾಸಾತ್. ಥೊಡ್ಯಾಂನಿಂ ಆಪ್ಣಾಕ್ ರುಚ್ತಾ ತಶೆಂ ವಾಂಜೆಲ್ ಸಯ್ತ್ ‘quote’ ಕೆಲಾಂ!
ಹೆ ಕತೊಲಿಕ್ ಭಾವಾಡ್ತಿ ಶಿರ್ವಾಂತ್ ಜಿವ್ಘಾತ್ ಕರ್ನ್ ಮರಣ್ ಪಾವ್ಲೆಲ್ಯಾ ಏಕಾ ಯಾಜಕಾಚಿಂ ಅಂಧ್ ಭಕ್ತ್ ಮ್ಹಣ್ಯೆತ್. ವ್ಹಯ್, ಡೇವಿಡ್ ಡಿಸೋಜಾ ವಯ್ರ್ ತ್ಯಾ ಯಾಜಕಾಕ್ ಜಿವ್ಘಾತ್ ಕರುಂಕ್ ಪ್ರಚೋದನ್ ಕೆಲೆಂ ಮ್ಹಣ್ ಆರೋಪ್ ಆಸ್ಲೊ. ತನ್ಕೆ ವೇಳಾರ್ ತೊ 50 ದೀಸ್ ಜೈಲಾಂತ್ ಆಸ್ಲೊ. ಕರ್ನಾಟಕ ಹೈ ಕೊಡ್ತಿನ್ ತಾಕಾ ಸಶರ್ತ್ ಜಾಮೀನ್ ದಿಲ್ಲೆಂ. ಚ್ಯಾರ್ ವರ್ಸಾಂಚ್ಯಾ ಸುನಾವ್ಣೆ ಉಪ್ರಾಂತ್ ತ್ಯಾಚ್ ಹೈ ಕೊಡ್ತಿನ್ ತಾಕಾ ನಿರ್ದೋಶ್ ಠರಾಯ್ಲೆಲೆಂ.
ಡೇವಿಡಾಚ್ಯೆಂ ಹೆಂ ಕಾನೂನಿ ಜಯ್ತ್ ‘ಸಂಸಾರಿ ನೀತ್’ ಶಿವಾಯ್ ‘ಸತಾಚಿ ನೀತ್’ ಮ್ಹಣೊನ್ ಬಹುಶ್ಯಾ ಹ್ಯಾ ಭಾವಾಡ್ತಿ ಜಣಾಂಕ್ ಭೊಗೊಂಕ್ ನಾಂ. ಸ-ಸಾತ್ ವರ್ಸಾಂ ಉಪ್ರಾಂತ್ ಸಯ್ತ್ ಹಿಂ ಭಾವಾಡ್ತಿಂ ಆಪ್ಲ್ಯಾ ಕೊಶೆಡ್ತಾಂತ್ ಡೇವಿಡಾಕ್ ಗುನೆಗಾರ್ ಮ್ಹಣ್ ಲೆಕ್ತಾತ್. ಅಸಲೆಂ ಚಿಂತಾಪ್ ಖರ್ಯಾ ಭಾವಾಡ್ತ್ಯಾಂಕ್ ಖಂಡಿತ್ ಸೊಭಾನಾಂ.
■ ಪಿಲಿಫ್ ಮುದಾರ್ತ್
