ಆಕ್ತೋಬರ್ ಮಹಿನೊ ಆಯ್ಲೊ ಮ್ಹಣ್ತಾನಾ ಆಮ್ಕಾಂ ಕಿರಿಸ್ತಾಂವಾಂಕ್ ಮಿಸಾಂವ್ ಆಯ್ತಾರಾಚೊ ಉಗ್ಡಾಸ್ ಯೆತಾ.ಮಿಸಾಂವ್ ವಾವ್ರಾಕ್ ಆಮಿ ಸರ್ವಾಂನಿ ಸಾಂಗಾತಾ ಮೆಳೊನ್ ಆಧಾರ್ ದೀಂವ್ಕ್ ಜಾಯ್ ಮ್ಹಣೊನ್ ವಿಶೇಷ್ ಇಜ್ಮೊಲಾಚೊ ಐವಜ್ ಮಾತ್ರ್ ನಂಯ್ ಆಸ್ತಾಂ ವಿವಿಧ್ ವಸ್ತುಂಚೊ ವಿಕ್ರೊ , ಫುಡ್ ಫೆಸ್ಟಿವಲ್ , ಏಲಂ ತಶೆಂಚ್ ಆನಿಕೀ ಸಭಾರ್ ಸ್ಪರ್ದ್ಯಾಂ ರುಪಿಂ ಪಯ್ಶೆ ಜಮೊವ್ನ್ ಆಮ್ಚಿ ಫಿರ್ಗಜ್ ಪಯ್ಲಿ ಯೆಜೆ , ಆಮ್ಚಿ ಫಿರ್ಗಜ್ ಪಯ್ಲಿ ಯೇಜೆ ಮ್ಹಣೊನ್ ಎಕ್ ಅಘೋಷಿತ್ ಸ್ಪರ್ದ್ಯಾಕ್ ದೆಂವವ್ನ್ ಎಕಾ ಬರ‍್ಯಾ ಕಾಮಾಂಕ್ ಪಯ್ಶೆ ಜಮೊ ಕರ್ತಾತ್. ಭೊವ್ ಸಂತೊಸಾಚಿ ಗಜಾಲ್. ಆಮಿ ಲ್ಹಾನ್ ಆಸ್ತಾನಾ ಆಮ್ಕಾಂ ಲ್ಹಾನ್ ಲ್ಹಾನ್ ಕಂರ್ಡೆ ವಾಂಟ್ತಾಲೆ ವರ್ಸಾಚ್ಯಾ ಸುರ್ವೆರ್. ಆನಿ ಆಮಿ ಭುರ್ಗೆ ವ್ಹಡಾ ಉಮೇದಿನ್ ಏಕ್ ಪಯ್ಸೊ, ದೋನ್ ಪಯ್ಶೆ, ತೀನ್ ಪಯ್ಶೆ (ತಾಚ್ಯಾಕೀ ಚಡ್ ಭೊವ್ ಕಷ್ಟಾಂಚೆಂ) ಅಶೆಂ ಘಾಲುನ್ ಮಿಸಾಂವ್ ಆಯ್ತಾರಾ ಪರ್ಯಾಂತ್ 2-3 ಕಂರ್ಡೆ ತರೀ ಕರುನ್ ವಿಗಾರಾ ಲಾಗಿಂ ಹಾಡ್ನ್ ದಿತೆಲ್ಯಾಂವ್.
ಕಾಳ್ ಬದಲ್ಲೆಲ್ಯಾ ಬರಿ ಪಯ್ಶೆ ವಚೊನ್ ನೋಟ್ ಆಯ್ಲೆ. ವ್ಹಡ್ ನೋಟ್ ಆಯ್ಲೆ. ಹಜಾರಾಂನಿ ಜಮೊ ಜಾಂವ್ಚೊ ಐವಜ್ ಲಾಖಾಂನಿ ಬದ್ಲಾಲೊ. ದಿಯೆಸೆಜೆಚ್ಯಾ ಪತ್ರಾಂನಿ ರ‍್ಯಾಂಕಿಂಗ್ ಸುರು ಜಾಲೆಂ. ವಿವಿಧ್ ಥರಾಂಚೆಂ ರ‍್ಯಾಂಕಿಂಗ್. ಆತ್ಯಧಿಕ್ ಐವಜ್ ಜಮೊ ಕೆಲ್ಲಿ ಫಿರ್ಗಜ್, ಕುಟ್ಮಾಂ ಲೇಖಾರ್ ಆತ್ಯಧಿಕ್ ಐವಜ್ ಜಮೊ ಕೆಲ್ಲಿ ಫಿರ್ಗಜ್, ಆದ್ಲ್ಯಾ ವರ್ಸಾಂಚೊ ದಾಖ್ಲೊ ಮೊಡ್‍ಲ್ಲಿ ಫಿರ್ಗಜ್ ಆನಿ ಕಿತೆಂ ಆನಿ ಕಿತೆಂ… ಜಾಂವ್ದಿ… ಸ್ಪರ್ಧಾತ್ಮಾಕ್ ರಿತಿನ್ ಪಯ್ಶೆ ಜಮೊವ್ನ್ ತರೀ ಬರ‍್ಯಾ ಉದ್ದೇಶಾಕ್ ಉಪಯೋಗ್ ಜಾತಾತ್… ಸಂತೊಸ್‌ಚ್!
ಪೂಣ್ ಮ್ಹಜೊ ವಿಶಯ್ ವ್ಹಯ್ಲೊ ನಂಯ್. ಹ್ಯಾ ವರ್ಸಾಚಿಂ ಮಿಸಾಂವ್ ಆಯ್ತಾರಾಚಿಂ ಕವರಾಂ ಹಾವೆಂ ಪಳಯ್ಲಿಂ. National Director – Pontifical Mission Organizations ಹಾಣಿಂ ಛಾಪ್‍ಲ್ಲಿಂ ಕವರಾಂ. ಬಹುಶಾ: ಸರ್ವ್ ಫಿರ್ಗಜಾಂಕ್ ಪಾವ್ಲ್ಯಾಂತ್ ಆಶೆಂ ಹಾಂವ್ ಭರ್ವಾಸ್ತಾಂ. ಹ್ಯಾ ಕವರಾಂ ವಯ್ರ್ ಮಿಸಾಂವಾಂ ಆಯ್ತಾರಾಕ್ ಧಾನ್ ದಿಲ್ಲ್ಯಾಂಚೆಂ ನಾಂವ್ ಆನಿ ದಿಲ್ಲೊ ಐವಜ್ ದೊನೀ ಬೊರೊಂವ್ಕ್ ಆಸಾ. ದೋನ್ ಫಿರ್ಗಜಾಂನಿ Details Compulsory ಬೊರೊಂವ್ಕ್ ಜಾಯ್ ಮ್ಹಣೊನ್ ವಿಗಾರಾ ಥಾವ್ನ್ ಆದೇಶ್ ಮೆಳ್ಳಾ ಮ್ಹಳ್ಳೆಂಯ್ ಆಯ್ಕೊಂಕ್ ಮೆಳ್ಳೆಂ. ಎಕಾ ಕುಶಿನ್ ಹ್ಯಾಚ್ಚ್ ಕವರಾ ವಯ್ರ್ ಬರವ್ನ್ ಆಸಾಕೀ “ಹಾಸ್ತ್ಯಾ ತೊಂಡಾನ್ ದಿತಲೊ ದೆವಾಕ್ ಮೊಗಾಚೊ” ಮ್ಹಣೊನ್. ಆಸಲೊ ಎಕ್ ಆಘೊಷಿತ್ ಸ್ಪರ್ಧೊ ಚಲಾಯ್ತಾನಾ ಥೊಡೆ ದಾಕ್ಷೆಣೆಕ್ ಪಡೊನ್ ಆಪ್ಲ್ಯಾ ತಾಂಕಿ ಭಾಯ್ಲೆಂ ಧಾನ್ ದಿತಾನಾ ಕಸೊ ತೊ ಹಾಸ್ತ್ಯಾ ತೊಂಡಾನ್ ದಿತಾಲೊ ?
ಹಾಂಗಾ ಕವರಾಂ ವಯ್ರ್ ನಾಂವ್ ಆನಿ ಐವಜ್ ಬರೊಂವ್ಕ್ ಛಾಪ್‍ಲ್ಲೊ ಉದ್ದೇಶ್ ತರೀ ಕಿತೆಂ ? ಕಾಂಯ್ ವ್ಹಯ್ಲೊ ಸಂಸ್ಥೊ ಧಾನ್ ದಿಲ್ಲ್ಯಾಂಕ್ ಸರ್ಟಿಫಿಕೆಟ್ಸ್ ದಿತಾ ? ಮ್ಹಜ್ಯಾ ಸಮ್ಜೊಣೆ ಪ್ರಕಾರ್ ಹಿಂ ಕವರಾಂ ಫಿರ್ಗಜೆಂತ್‌ಚ್ ಉಗ್ತಿಂ ಕರುನ್ ಸಂಪೂರ್ಣ್ ಐವಜ್ ಮಾತ್ರ್ ತ್ಯಾ ಸಂಸ್ಥ್ಯಾಕ್ ಪಾವಿತ್ ಜಾತಾ. ಆಶೆಂ ಆಸ್ತಾಂ ಕೊಣೆ ಚಡ್ ದಾನ್ ದಿಲಾಂ, ಕೊಣೆ ಉಣೆಂ ದಿಲಾಂ ಆನಿ ಕೊಣೆಂ ದಿಂವ್ಕ್ ನಾ ಮ್ಹಳ್ಳೊ Data ಹರ್ಯೆಕ್ ಫಿರ್ಗಜೆಚ್ಯಾ ವ್ಹಡಿಲಾಂಕ್ ಮೆಳ್ತಾ ಆನಿ ಫಿರ್ಗಜ್‍ಗಾರಾಂಕ್ ಮಾನಸಿಕ್ ದಬಾವ್ ಹಾಡುಂಕ್ ಸಕ್ತಾ.
“ಪುಣ್ ತುಂ ದಾನ್ ಧರ್ಮ್ ಕರ್ತಾನಾ ತುಜೊ ಉಜ್ವೊ ಹಾತ್ ಕಿತೆಂ ಕರ‍್ತಾ ತೆಂ ತುಜ್ಯಾ ದಾವ್ಯಾ ಹಾತಾಕ್ ಕಳನಾ ಜಾಂವ್. ಆಶೆಂ ತುಜೆಂ ದಾನ್ ಧರ್ಮ್ ಘುಟಾನ್ ಜಾಂವ್ “( ಮಾತೆವ್ 6 : 3-4 ) , ಫಾರಿಜೆವ್ ಆನಿ ಸುಂಕಾಗಾರಾಚಿ ವೊಪಾರ್ ( ಲೂಕ್ 18 : 10-14 ) ಮಾತ್ರ್ ನಂಯ್ ಆಸ್ತಾಂ ಮಾತೆವ್ 6 : 1 , ಮಣ್ಣ್ಯೊ 19 : 17, ಲೂಕ್ 14 : 13-14 , 2 ಕೊರಿಂಥ್ 9:7 ಆಸಲೆ ಬೈಬಲಾಂತ್ಲ್ಯಾ ಉತ್ರಾಂನಿ ಆನಿ ವೊಪಾರಿಂನಿ ವರ್ಸ್‍ಭರ್ ಪ್ರಸಂಗ್ ದಿಂವ್ಚೆ ಹಾಣಿಂಚ್ ಆನಿ ವೇಳ್ ಯೆತಾನಾ “ಫಾರಿಜೆವಾಂಕ್” ರಚ್ಚೆಂಯ್ ಹಾಣಿಂಚ್.
ಎದೊಳ್‌ಚ್ ಆಮ್ಕಾಂ ಆಮ್ಚ್ಯಾ ಪವಿತ್ ಸಭೆಚ್ಯಾ ಮುಕೆಲ್ಯಾಂ ವಿಶಿಂ ಜಾಯ್ತೆಂ ಆಯ್ಕೊಂಕ್ ಮೆಳೊನ್ ಆಸಾ ತರೀ ಆಸಲಿಂ ವಿವಿಧ್ ಘಡಿತಾಂ ಪುನರಾವರ್ತಿತ್ ಜಾಂವ್ಚಿಂ ಪಳೆತಾನಾ ಆಮ್ಚ್ಯಾ ಮುಖೆಲ್ಯಾಂಕ್ ಲಾಯಿಕಾಂಚೆಂ ಪಡೊನ್ಂಚ್ಚ್ ವಚೊಂಕ್ ನಾ. ಆನಿ ಆಸಲ್ಯಾ ಪ್ರಯತ್ನಾಂ ವರ್ವಿಂ ಗ್ರೇಸ್ತ್ ಆನಿ ದುಬ್ಳೊ ಮ್ಹಳ್ಳೊ ಸಾಂಕೊವ್ ಆಮ್ಚೆ ಮುಕೆಲಿಚ್ ಬಾಂದ್ತಾತ್. ನಾಂವಾಂಕ್ ಮಾತ್ರ್ “ಲಾಯಿಕಾಂಚಿ ಪವಿತ್ರ್ ಸಭಾ” ಮುಣೊನ್ ಸಿನೋದಾಂತ್ ನಿರ್ಧಾರ್ ಘೆತ್ಲಾ ವ್ಹಯ್ ತರೀ ಆಮ್ಚಿ ತಕ್ಲಿ ಮಾತ್ರ್ ಭಾಯ್ರ್ ಆಸಾ ಆನಿ ಗೊಮ್ಟಿ ಧಾರ್ಮಿಕಾಂಚ್ಯಾ ಮುಟಿ ಭಿತರ್‌‌ಚ್ ಆಸಾ ಆನಿ ಹೆಂ ಕೊಣೀ ನೆಗಾರ್ ಕರುಂಕ್ ಜಾಯ್ನಾತ್‍ಲ್ಲೆಂ ಸತ್ ಜಾವ್ನಾಸಾ. (ಥಂಯ್ ಹಾಂಗಾ ಥೊಡೆ ಆಪವಾದ್ ಆಸ್ತಿತ್ ).
ಆತಾಂ ಜಾಲ್ಲೆಂ ಜಾವ್ನ್ ಜಾಲಾಂ. ಮುಕ್ಲ್ಯಾ ವರ್ಸಾಂನಿ ತರೀ ಫಿರ್ಗಜ್‍ಗಾರಾಂ ಮಧೆಂ ಆಸಲೆ ಅಘೋಷಿತ್ ದೊರೆ ಬಾಂದ್ಚೆಂ ಕಾಮ್ ಜಾಯ್ನಾ ಜಾಂವ್ ಮ್ಹಣ್ ಆಶೆತಾಂ.
■ ನಾನು ಮರೋಲ್ , ತೊಟ್ಟಾಮ್
