ಭಾರತೀಯ್ ಪ್ರಜಾಪ್ರಭುತ್ವಾಂತ್ ಸರ್ಕಾರ್ ಬದ್ಲುಂಚ್ಯೆಂ (Regime Change) ಆನಿ ರಾಜಕೀಯ್ ಪಕ್ಷಾಂಚೊ ಪಾತ್ರ್ ಹ್ಯಾ ವಿಶಯಾಚೆರ್ ಸಬಾರ್ ಚರ್ಚಾ ಚಲ್ತಾ. ವಿರೋಧ್ ಪಾಡ್ತಿಚೆ ಮುಖೆಲಿ ಆನಿ ಭಾಜಪಾ ಆಪಾಪ್ಲೆ ಸವಿಸ್ತಾರ್ ವಾದ್ ಪ್ರಸ್ತುತ್ ಕರುನ್ ಆಸಾತ್.
ವಿರೋಧ್ ಪಕ್ಷಾಚೆ ಮುಖೆಲಿ, ಕಾನೂನ್ ಪಂಡಿತ್ ಜಶೆಂ ಕಪಿಲ್ ಸಿಬಲ್ ಆನಿ ಪ್ರಶಾಂತ್ ಭೂಷಣ್ ಹಾಂಚ್ಯೆ ಪ್ರಕಾರ್, ಲೋಕಶಾಹಿ ವ್ಯವಸ್ಥೆಂತ್ ಸರ್ಕಾರ್ ಬದ್ಲುಂಚ್ಯೆಂ ಏಕ್ ಸಾಮಾನ್ಯ್ ಆನಿ ಸಾಂವಿಧಾನಿಕ್ ಪ್ರಕ್ರಿಯಾ ಜಾವ್ನಾಸಾ. ತಾಣಿ ಆಪ್ಲ್ಯಾ ಉಲೊವ್ಪಾಂತ್ ಸಾಂಗ್ಲಾಂ ಕಿ ಪ್ರಜಾಪ್ರಭುತ್ವಚೊ ಮುಖ್ಯ್ ಉದ್ದೇಸ್‌ಚ್ ಲೋಕಾಕ್ ಆಪ್ಲೊ ಮತ್ ಚಲವ್ನ್ ಚುಕಿ ಕರ್ಚ್ಯಾ ಸರ್ಕಾರಾಕ್ ಬದ್ಲುಂಚ್ಯೆಂ ಹಕ್ಕ್ ದೀಂವ್ಚ್ಯೆಂ ಜಾವ್ನಾಸಾ. ಜರ್ ಏಕ್ ಸರ್ಕಾರ್ ಲೋಕಾಚ್ಯಾ ಹಕ್ಕಾಂಕ್ ಆಡ್ ಯೆತಾ, ತರ್ ತ್ಯಾ ಸರ್ಕಾರಾಕ್ ಕಾಡುಂಕ್ ಮಾಗ್ಣಿ ಕರ್ಚಿ ಹರ್ಯೇಕಾ ವಿರೋಧ್ ಪಕ್ಷಾಚ್ಯೆಂ ಹಕ್ಕ್ ಜಾವ್ನಾಸಾ ಮ್ಹಣ್ ತಾಂಚೊ ವಾದ್ ಆಸಾ.
ವಿರೋಧ್ ಪಕ್ಷಾಚೆ ಸಮರ್ಥಕ್ ಉದಾಹರಣ್ ದೀವ್ನ್ ಸಾಂಗ್ತಾತ್ ಕಿ ಭಾಜಪಾ ಜೆದ್ನಾಂ ವಿರೋಧ್ ಪಕ್ಷಾಂತ್ ಆಸ್ಲಿ, ತೆದ್ನಾಂ ತಾಂಚೊಚ್ ಇತಿಹಾಸ್ ವೆಗ್ಳೊ ಆಸ್ಲೊ. 1970 ಚ್ಯಾ ದಶಕಾಂತ್ ಜಯಪ್ರಕಾಶ್ ನಾರಾಯಣ್ ಹಾಂಚ್ಯಾ ಆಂದೋಲನಾಕ್ ತವಳ್ ಜನಸಂಘ್ ಪಾಡ್ತಿನ್ ಸಾಂಗಾತ್ ದಿಲ್ಲೊ. ತೆದ್ನಾಂಚ್ಯಾ ಇಂದಿರಾ ಗಾಂಧಿ ಸರ್ಕಾರಾಕ್ ಬದ್ಲುಂಚಿ ವ್ಹಡ್ ಮಾಗ್ಣಿ ಕೆಲ್ಲಿ. ತಶೆಂಚ್, 2011-2012 ವರ್ಸಾ ಭ್ರಷ್ಟಾಚಾರಾ ವಿರೋಧ್ ಆಂದೋಲನಾಂತ್ ( ಅಣ್ಣಾ ಹಾಜಾರೇ ನೇತೃತ್ವಾರ್ ) ಭಾಜಪಾನ್ ಯುಪಿಎ ಸರ್ಕಾರಾ ವಿರೋಧ್ ವ್ಹಡ್ ಪ್ರದರ್ಶನ್ ಕೆಲ್ಲೆಂ. ಹ್ಯಾ ಇತಿಹಾಸಾಚೊ ಉಗ್ಡಾಸ್ ಕರ್ನ್ ವಿರೋಧ್ ಪಕ್ಷಾಚೆ ಮುಖಲಿ ಆತಾಂಚ್ಯಾ ಭಾಜಪಾ ಸರ್ಕಾರಾಚ್ಯೆರ್ ದ್ವಿಮುಖಿ ನೀತಿಚೊ ಆರೋಪ್ ಲಾವ್ನ್ ಆಸಾತ್.
‘ದಿ ವೈರ್’ ವೆಬ್‌ಸಾಯ್ಟಿಚ್ಯಾ ವಿಶ್ಲೇಷಣಾ ಪ್ರಕಾರ್, ಭಾಜಪಾ ಆತಾಂ ಜಿ ಗಜಾಲ್ ಕರ್ತಾ ತಿ ಬೌದ್ಧಿಕ್ ರಿತಿನ್ ಅಪ್ರಾಮಾಣಿಕ್ ಜಾವ್ನಾಸಾ. ಭಾಜಪಾ, ಕೇಂದ್ರ ಸರ್ಕಾರ್ ಆನಿ ದೇಸ್ – ಹೆ ತೀನ್ ವೆವೆಗ್ಳ್ಯೊ ಗಜಾಲಿ ಜಾವ್ನಾಸಾತ್. ಪುಣ್, ಭಾಜಪಾ ಹ್ಯಾಂ ತೀನ್ ಗಜಾಲಿಂಕ್ ಏಕ್ ಕರ್ನ್ ಲೋಕಾಕ್ ಫಟಯ್ತಾ. ಭಾಜಪಾಕ್ ಅಧಿಕಾರಾಂತ್ಲ್ಯಾನ್ ಕಾಡ್ಚೆಂ ಮ್ಹಳ್ಯಾರ್ ದೇಸಾಕ್ ಲುಕ್ಸಾಣ್ ಕರ್ಚೆಂ ನ್ಹಂಯ್. ಕೇವಲ್ ಸರ್ಕಾರ್ ಚಲಂವ್ಚಿ ಪಾಡ್ತ್ ಬದ್ಲುಂಚ್ಯೆಂ ಜಾವ್ನಾಸಾ. ತಶೆಂಚ್, ಸುಪ್ರೀಂ ಕೋರ್ಟಾಚ್ಯಾ ಆದೇಶಾ ಪ್ರಕಾರ್ ಹಿಂಸಾತ್ಮಕ್ ಪ್ರದರ್ಶನ್ ನಾಸ್ತಾನಾ ಸರ್ಕಾರಾ ವಿರೋಧ್ ಅಸಮಾಧಾನ್ ದಾಕಂವ್ಚೆಂ ಖಂಡಿತ್ ಅಪ್ರಾಧ್ ನ್ಹಂಯ್. ಭಾರತೀಯ್ ಸಂವಿಧಾನಾಚ್ಯಾ ಅಡ್ತಿಗ್ 19 ಹರ್ಯೆಕಾ ಪರ್ಜ್ಯೆಕ್ ಶಾಂತಿಪೂರ್ವಕ್ ಪ್ರತಿಭಟನ್ ಕರ್ಚ್ಯೆಂ ಆನಿ ಉಲಂವ್ಚ್ಯೆಂ ಹಕ್ಕ್ ದಿತಾ. ಚುನಾವ್ ಮುಗ್ದಲ್ಯಾ ನಂತರ್ ಹ್ಯಾ ಹಕ್ಕಾಂಚ್ಯೆರ್ ಬಂಧನ್ ಘಾಲುಂಕ್ ಜಾಯ್ನಾ. ಸುಪ್ರೀಂ ಕೋರ್ಟಾಚ್ಯಾ ಆದೇಶಾ ಪ್ರಕಾರ್, ಹಿಂಸಾತ್ಮಕ್ ಪ್ರದರ್ಶನ್ ನಾಸ್ತಾನಾ ಸರ್ಕಾರಾ ವಿರೋಧ್ ಅಸಮಾಧಾನ್ ಉಬ್ಜಂವ್ಕ್ ಪ್ರೇತನ್ ಕರ್ಚ್ಯೆಂ ಕಾಂಯ್ ಗುನ್ಯಾಂವ್ ವ ದೇಶದ್ರೋಹ್ ನ್ಹಂಯ್.
ಭಾಜಪಾಚ್ಯೆ ಪ್ರವರ್ತಕ್ ಆನಿ ಮಂತ್ರಿ ಜಶೆಂ ರಕ್ಷಣಾ ಮಂತ್ರಿ ರಾಜನಾಥ್ ಸಿಂಗ್ ಹ್ಯಾ ‘ರೆಜಿಮ್ ಚೇಂಜ್’ ಉತ್ರಾಕ್ ಕಡಕ್ಕ್ ವಿರೋಧ್ ಕರ್ತಾತ್. ತಾಂಚ್ಯೆ ಪ್ರಕಾರ್, ಹಿ ಸೊಬ್ದಾವಳ್ ವಿದೇಶಿ ಷಡ್ಯಂತ್ರಾಂ ಆನಿ ಹಿಂಸಾತ್ಮಕ್ ಆಂದೋಲನಾಂ ಮುಖಾಂತ್ರ್ ಸರ್ಕಾರ್ ನಿಕ್ಳಾಂವ್ಕ್ ವಿರೋಧ್ ಪಾಡ್ತಿಚೊ ಖರೊ ಉದ್ದೇಸ್ ಜಾವ್ನಾಸಾ. ಜಶೆಂ ಬಾಂಗ್ಲಾದೇಶಾಂತ್ ಜಾಲ್ಲೆಂ. ಭಾಜಪಾ ವಾದ್ ಮಾಂಡ್ತಾ ಕಿ ಭಾರತಾಂತ್ ಸರ್ಕಾರ್ ಬದ್ಲುಂಚ್ಯೆಂ ಕೇವಲ್ ಚುನಾವಾ ಮುಖಾಂತ್ರ್ ಆನಿ ಲೋಕಾಚ್ಯಾ ಪವಿತ್ರ್ ವೋಟಾ ಮುಖಾಂತ್ರ್ ಮಾತ್ರ್ ಜಾಯ್ಜೆ. ರಸ್ತ್ಯಾರ್ ಹಿಂಸಾತ್ಮಕ್ ಪ್ರದರ್ಶನ್ ಕರ್ನ್ ವಾ ಅರಾಜಕತಾ ಹಾಡ್ನ್ ಸರ್ಕಾರ್ ಕಾಡ್ಚ್ಯೆಂ ಪ್ರಜಾಪ್ರಭುತ್ವಕ್ ಮಾರಕ್ ಜಾವ್ನಾಸಾ ಮ್ಹಣ್ ಉಳ್ಟೊ ವಾದ್ ಭಾಜಪಾಚೊ!
ನಿಶ್ಕರ್ಷ್ ಜಾವ್ನ್ ಸಾಂಗ್ಚೆಂ ತರ್, ಪ್ರಜಾಪ್ರಭುತ್ವಂತ್ ಜನಾಧಿಕಾರ್ ಕೇವಲ್ ಎಕಾಚ್ ದಿಸಾಚ್ಯಾ ಮತಾನ್ ಮುಗ್ದನಾ, ಬಗಾರ್ ತೊ ಚುನಾಯಿತ್ ಸರ್ಕಾರಾಚ್ಯಾ ನಿರಂತರ್ ಜವಾಬ್ದಾರೆಚ್ಯೆರ್ ಹೊಂದ್ವೊನ್ ಆಸ್ತಾ. ‘ದಿ ವೈರ್’ ಲೇಖನಾಂತ್ ಸಾಂಗ್ಲೆಲ್ಯಾ ಪ್ರಕಾರ್, ಆಡಳ್ತೆಂತ್ ಆಸ್ಚ್ಯಾ ಪಾಡ್ತಿಕ್ ದೇಶ್ ಮ್ಹಣ್ ಧರ್ನ್, ಸರ್ಕಾರ್ ಬದ್ಲಾವಣೆಚಿ ಮಾಗ್ಣಿ ಕರ್ಚ್ಯಾ ಆವಾಜಾಕ್ ದೇಶ್‌ದ್ರೋಹ್ ವಾ ಅರಾಜಕತಾ ಮ್ಹಣ್ ಲೆಕ್ಚೆಂ ಪ್ರಜಾಪ್ರಭುತ್ವಚ್ಯಾ ಮೂಳ್ ತತ್ತ್ವಾಂಕ್ ವಿರೋಧ್ ಜಾವ್ನಾಸಾ. ಭಾಜಪಾ ಜೆದ್ನಾಂ ವಿರೋಧ್ ಪಕ್ಷಾಂತ್ ಆಸ್ಲಿ, ತೆದ್ನಾಂ ತಾಣಿಂ ಚಲಯಿಲ್ಲ್ಯೊ ಚಳವಳಿಯೊ ಹ್ಯಾಚ್ ಪ್ರಜಾಪ್ರಭುತ್ವಾತ್ಮಕ್ ಹಕ್ಕಾಚೊ ವಾಂಟೊ ಜಾವ್ನಾಸ್ಲೊ. ತರ್, ಆತಾಂ ಕಿತ್ಯಾಕ್ ಶಾಂತಿಪೂರ್ವಕ್ ಆಂದೋಲನ್ ವಾ ರಾಜಕೀಯ್ ಬದಲಾವಣೆಚಿ ಮಾಗ್ಣಿ ದೇಶ್‌ದ್ರೋಹ್ ಜಾಲೊ? ಅಸಲ್ಯೊ ಚಳ್ವಳಿ ಕರುಂಕ್ ಸಂವಿಧಾನಾನ್ ದಿಲ್ಲೆಂ ಹಕ್ಕ್ ಜಾವ್ನಾಸಾ. ಪ್ರಜಾಪ್ರಭುತ್ವ್ ಜೀವ್ ಉರಾಜೆ ತರ್, ಲೋಕಾಕ್ ಆಪ್ಲ್ಯಾ ಮತಾ ಮುಖಾಂತ್ರ್ ಆನಿ ಶಾಂತಿಪೂರ್ವಕ್ ಪ್ರತಿಭಟನಾ ಮುಖಾಂತ್ರ್ ಜವಾಬ್ದಾರಿ ಹಿತಾ ಖಾತಿರ್ ಸರ್ಕಾರ್ ಬದ್ಲುಂಚ್ಯೆಂ ಸಾರ್ಕೆಂ ಹಕ್ಕ್ ಆಸ್ಚೆಂ ಗರ್ಜೆಚೆಂ ಜಾವ್ನಾಸಾ.
■ ಫಿಲಿಪ್ ಮುದಾರ್ತ್
