ಕಾಳ್ಕ್ಯಾ ರಾತಿಚಿ … ಮಿಸ್ತೆರಾ ಸಾವ್ಳಿ!

5

ತ್ಯಾ ಫಾಂತ್ಯಾರ್…ಸಾಡೆ ಪಾಂಚ್ ವೊರಾರ್…

‘ಕ್ರೀಂ….ಕ್ರೀಂ…’   

ಭುರ್ಗೊ ಲೈಜಿಲಾಚ್ಯಾ ಖಟ್ಲ್ಯಾ ದೆಗೆಲೆಂ ಮೊಬಾಯ್ಲ್ ಎಲಾರ್ಮ್ ವಯ್ರ್-ವಯ್ರ್ ವ್ಹಾಜೊಂಕ್ ಲಾಗ್ಲೆಂ. ಹಳ್ತಾರ್ ಜಾಗೊ ತೊ ಜಾಲೊ. ಆನಿ … 

ಲೈಜಿಲ್…ನಿದೆ ದೊಳೆ ಪುಸಿತ್ತ್ ಸವ್ಕಾಸ್ ಖಟ್ಲ್ಯಾ ಥಾವ್ನ್ ದೆವ್ಲೊ. ಉಪ್ರಾಂತ್ ಕಾಳಾಕಾಂತ್‌ಚ್ಚ್ ನಿದೆಚೆ ಪಾಂಯ್ ವೊಡಿತ್ತ್…ಸಿಂಕಾಲಾಗಿಂ ಗೆಲೊ. 

ತ್ಯಾಕಾಳಾಕಾಂತ್ ಉದ್ಕಾ ಆವಾಜ್ ಉಟ್ತಾಸ್ತಾಂ…ಸಿಂಕಾಂತ್ ತೊ ಆಪ್ಲೆ ತೋಂಡ್, ಹಾತ್ ಬರೆಚ್ಚ್  ಧುಂವ್ಕ್ ಲಾಗ್ಲೊ. ಉಪ್ರಾಂತ್ ತ್ಯಾ ಕಾಳಾಕಾಂತ್‌ಚ್ಚ್…

“ಮಾಮ್ಮೀ…” ಮ್ಹಣ್ ಉಲೊ ಮಾರಿಲಾಗ್ಲೊ. ಹಿ ತಾಚಿ ಸದಾಂಚಿ ಸವಯ್. ಕೆನ್ನಾಂಯೀ  ಉಟ್‌ಲ್ಲೊಚ್ಚ್, ತೊ ತಿಕಾ ಉಲೊ ಮಾರ್ತಾನಾಂ…ಕುಜ್ನಾಂತ್ ಸಕಾಳಿಂಚೆಂ ನಾಸ್ಟೊ ತಯಾರ್ ಕರುನ್ ಆಸ್ಚಿ ತಾಚಿ ಮಾಮ್ಮಿ…ಥಂಯ್ ಥಾವ್ನ್0ಚ್ಚ್ ಜಾಪ್ ದಿತಾಲಿ.

ಪೂಣ್ ಆಜ್…ಆಜ್ ನಾಂ!. ಆಜ್ ತಿಚೊ ತಾಳೊ ಆಯ್ಕಾಲೊಚ್ಚ್ ನಾಂ. ಆತಾಂ ತೊ ಜೊರಾನ್ ಉಲೊ ದೀಲಾಗ್ಲೊ…“ಮಾಮ್ಮಿ…ಮಾಮ್ಮೀ…”. 

ಪೂಣ್ ನಾಂ…ತಿಚಿ ಜಾಪ್ ನಾಂ!. 

ತ್ಯಾ ಶಿವಾಯ್ ಹರ್ಶೆಂ ತಿ ಪೆಟವ್ನ್ ಆಸ್ಚೆ ವೀಜ್ ದಿವೆ, ಆಜ್ ತಾಕಾ ದಿಸ್ಲೆನಾಂತ್. ಹ್ಯಾವೆಳಾ…ನಾಕಾ ನಾಕಾ ಮ್ಹಳ್ಯಾರೀ ಸೆಜಾರ್ಚ್ಯಾ ಕೆವಿನ್ ಅಂಕಲಾಚೊ ಉಗ್ಡಾಸ್ ತಾಕಾ ಜಗ್ಲೊಂಕ್ ಲಾಗ್ಲೊ. ಆನಿ ತ್ಯಾಚ್ಚ್ ವೆಳಾ…ಹ್ಯಾ ಆದಿಂ ತಾಣೆಂ ಚೊರಿಯಾಂ ದೆಕ್ಲೆಲಿ…

ಅಂಕಲ್ ಆನಿ ಮಾಮ್ಮಿ…ಎಕಾಮೆಕಾಚ್ಯಾ ವೆಂಗೆಂತ್ ಆಸ್ಚೆಂ ದೃಶ್ಯ್ …ತಾಕಾ ಕಾಂಟಾಳೊ ಹಾಡಿಲಾಗ್ಲೊ. ಆನಿ ತೊ ಕ್ರೋಧಾನ್ ಖಡ್ಕಡೊಂಕ್ ಲಾಗ್ಲೊ.   

ಆನಿ ಹ್ಯಾಚ್ಚ್ ಅಸಮಧಾನೆಕ್ ಲಾಗೊನ್ ತೊ ಕೆವಿನ್ ಅಂಕಲಾಚ್ಯಾ ಪುತಾ ಥಾವ್ನ್ ಪಯ್ಸಾ ಪಯ್ಸ್ ಆಸ್ತಾಲೊ. ಆನಿ ಆತಾಂ…

ಕೆವಿನ್ ಅಂಕಲಾಚ್ಯಾ ದುಬಾವಾರ್… ತೊ ಹಳ್ತಾರ್ ಮಾಮ್ಮಿಚ್ಯಾ ಕುಡಾಸರ್ಶಿಂ ಮಾಜ್ರಾ ಮೆಟಾಂ ಘಾಲಿಲಾಗ್ಲೊ.  ದಾರ್ ಅರ್ಧೆಕುರೆಂ ಉಗ್ತೆಂ ಆಸ್‌ಲ್ಲೆಂ. ಖಿಣಾನ್ ತ್ಯಾ ದಾರಾಂತ್ಲ್ಯಾನ್ ಭಿತರ್ ತಿಳುಂಕ್ ಲಾಗ್ಲೊ. ತಿತ್ಲೆಂಚ್ಚ್ ತೊ ಜಾಣಾಂ…

ಎಕಾಚ್ಚಾಣೆಂ ಯಾಂತ್ರಿಕ್ ಥರಾನ್…ತಾಚೆ ತೊಂಡಾ ಥಾವ್ನ್ ಕಠಿಣ್ ಬೋಬ್ ಉಟ್ಲಿ…

“ಮಾ…ಮ್ಮೀ!.” 

ಆನಿ ಹಿ ಬೋಬ್ ಘರ್ಚ್ಯಾ ಪಾಕ್ಯಾ ಥಾವ್ನ್ ಭಾಯ್ರ್ ಉಸ್ಳೊನ್, ಸೆಜಾರ್ಚ್ಯಾಚ್ಯಾಂಕ್, ಆಕಾಂತೆನ್ ಹಾಲಯ್ಲಾಗ್ಲಿ. ಆನಿ ಹಾಂಗಾಸರ್…ಆಪ್ಲ್ಯಾ ಮಾಮ್ಚಿಚ್ಯಾ ದಾರಾ ಲಾಗಿಂ ಆಸ್ಲೊಲೊ ಲೈಜಿಲ್ ಸಗ್ಳೊಚ್ಚ್ ಕಾಂಪೊನ್ ಆಸ್‌ಲ್ಲೊ. ಆನಿ ದುಸ್ರೆ ಘಡ್ಯೆ ತೊ…ಥಂಯ್ಚ್ ದಾರಾಕ್ ಧರುನ್‌ಚ್ ಧರ್ನಿರ್ ಗಳ್ಳೊ!

ಥಂಯ್ಸರ್ ಖಟ್ಲ್ಯಾರ್…ತಾಣೆಂ ಪಳೆಲ್ಲೆಂ…

ತಾಚಿ ಮಾಮ್ಮಿ…ರಗ್ತಾ ಕೊಂಡಾಂತ್…ನಿರ್ಜೀವ್ ಜಾವ್ನ್ ಪಡೊನ್ ಆಸ್‌‌ಲ್ಲಿ!

***

ಖುನ್ಯೆಚ್ಯಾ ಘರಾ ಭಾಯ್ರ್…ಲೊಕಾಚಿ ಖೆಟ್ ವಾಡಾತ್ತ್ ಆಸ್‌ಲ್ಲಿ. 

ಆನಿ ಘರಾ ಭಿತರ್…ಪೊಲಿಸ್ ಶಿಬಂಧಿ, ಖುನ್ಯೆ ಸಂಗ್ತಿಂಚ್ಯಾ ತಪಾಸಣೆಕ್ ಪಡ್‌ಲ್ಲೆ. 

ಹ್ಯಾಮಧೆಂ, ಎಂಬುಲೆನ್ಸಾರ್ ಲೈಜಿಲಾಚಿ ಆವಯ್… ಕ್ಯಾಥರಿನಾಚಿ ನಿರ್ಜೀವ್ ಕೂಡ್, ಪೋಸ್ಟ್ ಮಾರ್ಟಮ್ ಖಾತಿರ್ ಸಾಗ್ಸುನ್ ಆಸ್ತಾಂ…ಪೊಲಿಸ್ ಇನ್ಸ್‌ಪೆಕ್ಟರ್ ಕಾರ್ಲೊ, ಖುನ್ಯೆ ಸಂಬಂದಿತ್ ಗಜಾಲೆಚ್ಯಾ ತಪಾಸಣೆರ್ ಮಗ್ನ್ ಜಾವ್ನ್ ಆಸ್‌ಲ್ಲೊ. 

ಹ್ಯಾ ವೆಳಾ ತೊ, ಲೈಜಿಲಾಚ್ಯಾ ಶುಶ್ರೂಶೆರ್ ಆಸ್ಚ್ಯಾಂ ಪೈಕಿಚ್ಯಾ ಎಕಾ ಸ್ತೀಯೆಲಾಗಿಂ… “ಹ್ಯಾ ಘರಾ ಕೋಣ್ ಸಗ್ಳಿಂ ಆಸಾತ್.?”… ಮ್ಹಳ್ಳೆಂ ಸವಾಲ್ ಘಾಲಿಲಾಗ್ಲೊ. ತವಳ್ ತಿ…

“ಹ್ಯಾ ಘರಾ ಆಸ್ಚಿಂ ದೊಗಾಂಚ್ಚ್. ಕ್ಯಾಥರಿನ್ ಆನಿ ತಿಚೊ ಪೂತ್, ಭುರ್ಗೊ ಲೈಜಿಲ್ ಮಾತ್ರ್.”

“ತಶೆಂ ತರ್ ತಿಚೊ ದಾದ್ಲೊ…ಖಂಯ್ಸರ್ ಆಸಾ.?” 

ಹ್ಯಾ ಸವಾಲಾಕ್ ತಿ ಮಾತ್ಸೆಂ ನರ್ಗಾಲಾಗ್ಲಿ. ಪೂಣ್ ಇನ್ಸ್‌ಪೆಕ್ಟರ್ ಆಪ್ಲ್ಯಾ ಸವಾಲಾಚೆರ್   ದಬಾವ್ ಘಾಲ್ತಾಸ್ತಾಂ … ತಿಚೆ ಥಾವ್ನ್ ಆಯಿಲ್ಲಿ ಜಾಪ್…ಇನ್ಸ್‌ಪೆಕ್ಟರಾಕ್ ಥಟಕ್ಕ್ ಕರಿಲಾಗ್ಲಿ.

 “ಕ್ಯಾಥರಿನಾಚೊ ನೊವ್ರೊ, ಪೀಠರ್ ತಾವ್ರೊ. ತೊ ಜಯ್ಲಾಂತ್ ಆಸಾ!”. 

“ಜಯ್ಲಾಂತ್…?!…ಕಿತ್ಯಾ ಖಾತಿರ್…?!” 

“ಹೆಂ ಮಾತ್ರ್ … ಹಾಂಗಾಸರ್ ಆಸ್ಚಿಂ ಕೋಣ್ ನೆಣಾಂತ್!  ಮ್ಹಳ್ಯಾರ್ ಹಾಂಗಾಸರ್ ಆಸ್ಚಿಂ, ಚಡಾವತ್ ಸಗ್ಳಿಂ ತಿಚ್ಯಾ ಸಂಪರ್ಕಾ ಥಾವ್ನ್ ಪಯ್ಸ್‌ಚ್ಚ್ ಆಸ್ತಾಲಿಂ.”

“ಮ್ಹಳ್ಯಾರ್…?!…ಹಾಕಾ ಕಾರಾಣ್…?!”

“ಕ್ಯಾಥರಿನಾಚ್ಯಾ ವಾಯ್ಟ್ ಚಾಲಿವರ್ವಿಂ … ಹ್ಯಾ ಭಂವರಾರ್ ಆಸ್ಚಿಂ ಚಡಾವತ್ ಬಾಯ್ಲಾಂ,  ತಿಚೆ ಥಾವ್ನ್ ಪಯ್ಸಾ ಪಯ್ಸ್‌ಚ್ಚ್ ಆಸಾತ್. ತಶೆಂಚ್ಚ್ ತಿಚ್ಯಾ ತ್ಯಾ ವಾಯ್ಟ್ ಚಾಲಿಕ್  ಲಾಗೊನ್…ತಾಂಚ್ಯಾ ದಾದ್ಲ್ಯಾಂಕ್ ತಿಚೆ ಥಾವ್ನ್ ಪಯ್ಸಾ ಪಯ್ಸ್ ದವರ್ಚ್ಯಾವಿಶಿಂ ತಿಂ ಜಾಗೃತ್ ಆಸ್ತಾಲಿಂ.” 

ಹೆಂ ಆಯ್ಕಾಲ್ಲೊ ಇ.ಕಾರ್ಲೊ…ಖುನ್ಯೆವಿಶಿಂಚ್ಯಾ ಮಿಸ್ತೆರಾಂ ಗಜಾಲಿಂಚಿ ಚಡ್ತಿಕ್ ತನ್ಖಿ,  ಭಂವಾರಿಂ ಆಸ್ಚ್ಯಾ ದಾದ್ಲ್ಯಾಂ ಥಂಯ್ ಚುರುಕ್ ಕರಿಲಾಗ್ಲೊ.  ಅಸಲ್ಯಾವೆಳಾ ಎಕ್ಲ್ಯಾ ದಾದ್ಲ್ಯಾನ್ ದಿಲ್ಲಿ ಜವಾಬ್ ಆಯ್ಕೊನ್ ತಾಚಿ ಆತುರಾಯ್…ದೊಡ್ತಿ ಜಾಲಿ.

“ಸರ್ ತುಮ್ಕಾಂ ಹ್ಯಾ ಖುನ್ಯೆವಿಶಿಂ ಕಾಂಯ್ ನಾಂ ಕಾಂಯ್ ಮಾಹೆತ್ ಮೆಳಾಜಾಯ್ ತರ್…ಕ್ಯಾಥರಿನಾ ಸಂಗಿಂ ಸಳಾವಳೆರ್ ಆಸ್ಚ್ಯಾ ಸೆಜಾರಿ ಕೆವಿನಾ ಥಾವ್ನ್ ಮೆಳಾತ್.”  

“ಸಳಾವಳ್…?!…ಸಳಾವಳ್ ಮ್ಹಳ್ಯಾರ್ ಕಾಂಯ್ ತೊ ಆನಿ…ಕ್ಯಾಥರಿನ್…?…”  

“ಸರ್ ತ್ಯಾವಿಶಿಂ ಹಾಂವೆ ದೊಳ್ಯಾಂನಿಂ ಪಳೆಲ್ಲೆಂ ನಾಂ…ಪೂಣ್ ಲೋಕ್ ತಶೆಂ ಉಲಯ್ತಾ. ಪೂಣ್ ಏಕ್ ತರ್ ಖಂಡಿತ್…ಕ್ಯಾಥರಿನಾಚಿ ವಾಯ್ಟ್ ಚಾಲ್…ತಿಚ್ಯಾ ಭುರ್ಗ್ಯಾ ಲೈಜಿಲಾಚೆರ್, ನೆಗೆಟಿವ್ ಪ್ರಭಾವ್ ಘಾಲುಂಕ್ ಸಕ್ಲ್ಯಾ”. 

“ಹ್ಯಾ ವರ್ವಿಂ ಪಾಪ್ ಮುಗ್ಧ್ ಲೈಜಿಲ್ ಗೂಂಡ್ ಮಾನಸಿಕ್ ಆಘಾತೆರ್ ಆಸಾ. ಆನಿ ಹೆಂ ಸಬಾರಾಂಕ್ ಕಳಿತ್ ಆಸಾ.!.”

“ಒ.ಕೆ. ತೆಂ ಹಾಂವ್ ಮತಿಂ ದವರ್ತಾಂ. ಪೂಣ್ ಕ್ಯಾಥರಿನಾಚ್ಯಾ ಖುನ್ಯೆವಿಶಿಂ ತುಕಾ ಕೊಣಾಯ್ಚೆರ್ ತರೀ ದುಬಾವ್ ಆಸಾ?!”.   

“ಸರ್ ತಿಚಿ ಮೀತ್-ಮಿರ್ವಾಲ್ಲಿ ಲೈಂಗಿಕ್ ದುರಾಶಾಚ್ಚ್ ತಿಚ್ಯಾ ಹ್ಯಾ ಅನಿರೀಕ್ಶಿತ್ ಮರಣಾಕ್ ಕಾರಣ್ ಜಾಲ್ಯಾ ಮ್ಹಳ್ಳೆಂ ಖಂಡಿತ್. ಅಸಲ್ಯಾಂ ತಿಚ್ಯಾ ಲೈಂಗಿಕ್ ಹರ್ಭೊಶ್ಯಾಂ ಪೈಕಿ…ಖುನ್ಯೆವಿಶಿಂ ದುಬಾವೆಚೊ ಜಾವ್ನ್ ಆಸಾ ತೊಚ್ಚ್…

…ಕೆವಿನ್…ಸೆಜಾರಿ ಕೆವಿನ್!.”

***

ದುಸ್ರೆಚ್ಚ್ ಖಿಣಾಂ…ಇ.ಕಾರ್ಲೊಚಿಂ ಮೆಟಾಂ, ಕೆವಿನಾಚ್ಯಾ ಘರಾ ಮುಕಾರ್ ಪಾವ್ಲಿಂ. ಆನಿ ತಾಚೊ ಹಾತ್ ಕೋಲ್ ಬೆಲ್ಲಾಚೆರ್ ಬಸ್ಲೊ. ‘ಕ್ರೀಂ…ಕ್ರೀಂ…’.

ಪೂಣ್ ದಾರ್ ಉಗ್ತೆಂ ಜಾಲೆಂನಾಂ. ಹ್ಯಾಖಾತಿರ್ ಸೆಜಾರಾ ದೀಶ್ಟ್ ಬದ್ಲಿತಾನಾಂ, ಎಕಾ ತರ್ನಾಟ್ಯಾಚೆರ್ ತಾಚಿ ದೀಶ್ಟ್ ಪಡ್ಲಿ. ಆನಿ ತ್ಯಾ ತರ್ನಾಟ್ಯಾ ಥಾವ್ನ್ ತಾಕಾ ಲಾಭ್‌ಲ್ಲಿ ಖಬಾರ್…ತಾಚ್ಯಾ ಮರ್ಡರ್ ಕೇಜಿಕ್ ಚುರುಕ್ ಕರಿಲಾಗ್ಲಿ. 

‘ಆದ್ಲ್ಯಾ ಸಾಂಜೆ ಥಾವ್ನ್ ಕೆವಿನ್…ಆಪ್ಲ್ಯಾ ಘರಾ ಥಾವ್ನ್ ದುಬಾವಿ ಥರಾನ್, ನಪೈಂಚ್ಚ್ ಜಾಲ್ಲೊ.!.’

ತ್ಯಾಚ್ಚ್ ಖಿಣಾಂ ಕೆವಿನಾಚಿಂ ಸೊದ್ನಾಂ ಪ್ರಕ್ರಿಯಾ ಆರಂಭ್ ಜಾಲಿ. ಇ.ಕಾರ್ಲೊನ್…ಕೆವಿನಾಚಿ ಸೊದ್ನೆಂ ತನ್ಖಿ ಸಬ್ ಇನ್ಸ್‌ಪೆಕ್ಟರಾಕ್ ವಹಿಸುನ್ ದಿಲೆಂ. ಆನಿ ಆಪುಣ್, ಕ್ಯಾಥರಿನಾಚ್ಯಾ ಪತಿ ಪೀಠರಾಕ್ ಭೆಟ್ಚ್ಯಾ ಖಾತಿರ್, ತೊ ಜೈಲಾಚೆಂ ಮೇಟ್ ಚಡಾಲಾಗ್ಲೊ.  

ಆನಿ ಥಂಯ್ಸರ್ ಇ.ಕಾರ್ಲೊಕ್…ಕ್ಯಾಥರಿನಾಚ್ಯಾ ಖುನ್ಯೆ ಗಜಾಲಿಕ್ ಸಂಭಂಧ್ ಜಾಲ್ಲಿ ಗರ್ಜೆಚಿ ಚಾವಿ ಸಾಂಪಡ್ಲಿ.!. ಆನಿ ತಿ ಚಾವಿ ಜಾವ್ನ್ ಆಸ್‌ಲ್ಲಿ…

‘ಜೈಲಾಂತ್ ಆಸ್‌ಲ್ಲೊ…ಪೀಟರ್ ತಾವ್ರೊ…ಕ್ಯಾಥರಿನಾಚಿ ಖುನಿ ಜಾಲ್ಲ್ಯಾ ಅವ್ದೆರ್…ಪೆರೋಲಾಚೆರ್ ಜೈಲಾ ಭಾಯ್ರ್ ಆಸಾ!.’  

ಹ್ಯಾ ಮಾಹೆತೆ ವರ್ವಿಂ ಖಿಣಾನ್…ಇನ್ಸ್‌ಪೆಕ್ಟಾರಾಚಿ ಖುನ್ಯೆ ತನ್ಖಿಚಿ ಶಿಕಾರಿ…ದುಸ್ರ್ಯಾಚ್ಚ್ ಘುಂವ್ಡೆಕ್ ಪಾವ್ಲಿ. 

ಪೆರೋಲಾರ್ ಜೈಲಾ ಭಾಯ್ರ್ ಆಸ್ಲೊಲೊ ಕೈದಿ ಪತಿ…‘ಪೀಟರ್ ತಾವ್ರೊಚ್ಚ್…90% ಆಪ್ಲ್ಯಾ ಪತಿಣ್ ಕ್ಯಾಥರಿನಾಚೊ ಖುನ್ಯೆಗಾರ್.!.’      

ಆನಿ ತ್ಯಾ ಘಡ್ಯೆ ಥಾವ್ನ್…ಪೀಠರ್ ತಾವ್ರೊಚ್ಯಾ ಸೊದ್ನೆಕ್ ತೊ ಚುರುಕ್ ಜಾಲೊ. ಆತಾಂ  ಇನ್ಸ್‌ಪೆಕ್ಟರಾಚ್ಯಾ ಮರ್ಡರ್ ಲಿಸ್ಟಿಂತ್ … ದೋಗ್ ದಾದ್ಲೆ … ಖುನ್ಯೆಚ್ಯಾ ದುಬಾವೆ ಖಿಳ್ಯಾಂಚೆರ್ ಉಮ್ಕಾಳೊಂಕ್ ಲಾಗ್ಲೆ.   

ಎಕ್ಲೊ…ಸೆಜಾರಿ ಕೆವಿನ್!. ದುಸ್ರೊ ತಿಚೊ ಕೈದಿ ಪತಿ…ಪೀಟರ್!! 

***

ಇ.ಕಾರ್ಲೊಚೆಂ ಮರ್ಡರ್ ತನ್ಖಿ ಆತಾಂ ರುಜ್ವಾತ್ ಸೊದ್ಚ್ಯಾ ಹಂತಾಕ್ ಪಾವ್‌ಲ್ಲಿ. ಆನಿ ತ್ಯಾ ರುಜ್ವಾತಿ ವರ್ವಿಂ, ನೀಜ್ ಖುನಿಗಾರಾಕ್ ಕೊರ್ಟಾಂತ್ ಜಡ್ಜಾ ಮುಕಾರ್ ರಾವೈತೊಲೊಂ,  ಮ್ಹಳ್ಳೊ ಭರ್ವೊಸೊ ತಾಚೆ ಥಂಯ್ ಬರೊಚ್ಚ್ ರೊಂಬೊನ್ ಆಸ್‌ಲ್ಲೊ.  

ಆನಿ ತೊ ತ್ಯಾ ರುಜ್ವಾತ್ ಸೊದ್ನೆಂ ಪ್ರಕ್ರಿಯೆರ್ ಪಡ್ಲೊ. ಅಸಲ್ಯಾವೆಳಾ…ಸಟ್ಟ್ ಕರುನ್ ತಾಚಿ ನದರ್…ಕ್ಯಾಥರಿನಾಚ್ಯಾ ಘರಾ ಮುಕ್ಲ್ಯಾ ಫ್ಲ್ಯಾಟಾಂಚ್ಯಾ ಬಿಲ್ಡಿಂಗಾಚ್ಯಾ ಸಿ.ಸಿ. ಟಿವಿಚೆರ್ ಬದ್ಲಾಲಿ. ಆನಿ ದುಸ್ರೆಚ್ಚ್ ಘಡ್ಯೆ…

ಪೊಲಿಸ್ ಕಾರ್ … ಕ್ಯಾಥರಿನಾಚ್ಯಾ ಘರಾ ಮುಕ್ಲ್ಯಾ ಬಿಲ್ಡಿಂಗಾ ಮುಕಾರ್ ಉಬೆಂ ಜಾಲೆಂ. ಆನಿ ತೊ, ಕಾರಾ ಥಾವ್ನ್ ದೆಂವ್ತಾಸ್ತಾಂ … ತಾಚಿ ದೀಶ್ಟ್ ತ್ಯಾ ಬಿಲ್ಡಿಂಗಾಚ್ಯಾ ಸೆಕ್ಯೂರಿಟಿ ಮಧುಕರಾಚೆರ್ ಬದ್ಲಾಲಿ. 

ಆತಾಂ ತಾಚ್ಯಾ ಮತಿಂ ಖುನ್ಯೆ ಸಂಬದಿತ್ ಏಕ್ ಚಿಂತಾಪ್ ಉದೆಲೆಂ. ತ್ಯಾ ನಿಮ್ತಿಂ ತಾಣೆಂ, ತ್ಯಾ ಬಿಲ್ಡಿಂಗಾಚ್ಯಾ ಸಿಸಿ.ಟಿವಿ ಫುಟೇಜ್ ತಪಾಸುಂಕ್, ತಾಚ್ಯಾ ದೊಗಾಂ ಕಾನ್ಸ್‌ಟೇಬಲಾಂಕ್ ಧಾಡ್ಲೆಂ. ಆನಿ ಆಪುಣ್…

ಬಿಲ್ಡಿಂಗಾಚ್ಯಾ ಸೆಕ್ಯೂರಿಟಿ ಮಧುಕರ್ ಕುಶಿನ್ ಮೆಟಾಂ ಘಾಲುಂಕ್ ಲಾಗ್ಲೊ. ಮಧುಕರಾಕ್ ಭೆಟ್ಲೊಚ್ಚ್…ಮುಕ್ಲ್ಯಾ ಘರ್ಚ್ಯಾ ಕ್ಯಾಥರಿನಾವಿಶಿಂ ತಾಚೆ ಲಾಗಿಂ ವಯ್ರ್ ವಯ್ರ್ ಸವಾಲಾಂ ಘಾಲುಂಕ್ ಲಾಗ್ಲೊ. ಅಸಲ್ಯಾ ಹರ್ಯೆಕ್ ಸವಾಲಾಕ್…

‘ತೊ ಜಾಪಿ ಖಾತಿರ್ ಪಾದ್ದೆತಾಲೊ. ಹಿ ತಾಚಿ ರೀತ್…ತಶೆಂ ಭಿರಾಂತೆನ್ ಭರ್ಲೆಲೆ ತಾಚೆ   ದೊಳೆ…ಆನಿ ಘುಸ್ಪೊಡೆಂ ವರ್ತನ್ ಪಳೆತಾಂ,  ಇ.ಕಾರ್ಲೊ ತಾಚೆರ್ ಮಾತ್ಸೆಂ ದುಬಾವ್ಲೊ. ತ್ಯಾಶಿವಾಯ್ ತೊ ಏಕ್ ಆಂಕ್ವಾರ್…ತಶೆಂ ಏಕ್ ಧಡಂಗ್ ತರ್ನಾಟೊ, ಹೆಂ ಪಾರ್ಕಿತಾನಾಂ…

ಕ್ಯಾಥರಿನಾಚ್ಯಾ ಮರ್ಡರ್ ಕೇಜಿಚ್ಯಾ ಲಿಸ್ಟಿಂತ್…ಕೆವಿನ್ ಆನಿ ಪೀಠರ್…ಆನಿ ತ್ಯಾನಂತರ್,  ತಿಸ್ರೊ ಜಾವ್ನ್ ಆತಾಂ…ಸೆಕ್ಯೂರಿಟಿ ಮಧುಕರ್ ಸೆರ್ವಾಲೊ.! 

ಅಶೆಂ ಮಧುಕರಾಚಿ ತನ್ಖಿ ಚಾಲಾತ್ತ್ ಆಸ್ತಾನಾಂ, ತ್ಯಾ ಮಧೆಂ ಥಟ್ಟ್ ಕರುನ್…ತಾಣೆಂ ನಿರೀಕ್ಶಿತ್ ಕರಿನಾತ್ಲೆಲೆಂ, ಸವಾಲ್ ಇನ್ಸ್‌ಪೆಕ್ಟರ್ ತಾಕಾ ಘಾಲಿಲಾಗ್ಲೊ…

“ಮಧುಕರ್…ತುಜೆಂ ಮೊಬಾಯ್ಲ್ ಖಂಯ್ಸರ್ ಆಸಾ.?…ಹೆವ್ಶಿನ್ ದಿ.” ಅನಿರೀಕ್ಶಿತ್ ಜಾವ್ನ್  ಮೊಬಾಯ್ಲ್ ವಿಚಾರ್ಲೆಲೆಂ ಆಯ್ಕಾತಾನಾಂ…ಎಕಾಚ್ಚಾಣೆಂ ಮಧುಕರಾಚೊ ಮುಖಮಳಾಚೊ  ಛಾರೊ ಬದ್ಲಾಲೊ.!. 

ದುಸ್ರ್ಯಾ ಘಡ್ಯೆ…

ಇನ್ಸ್‌ಪೆಕ್ಟರಾಚ್ಯಾ ಹಾತಿಂ ಮಧುಕರಾಚ್ಯೆಂ ಮೊಬಾಯ್ಲ್ ಬದ್ಲಾತಾನಾಂ, ತಾಚಿಂ ಬೊಟಾಂ ತಾಚೆರ್ ಖೆಳುಂಕ್ ಲಾಗ್ಲಿಂ. ಹೆಂ ಮಧುಕರಾಚೆ ಧಡ್ಧಡೆ ದೊಡ್ತೆ ಕರಿಲಾಗ್ಲೆ. ತವಳ್‌ಚ್ಚ್ ಎಕಾಚ್ಚಾಣೆಂ…

‘ಛಟ್ಟ್…!’ ಕರುನ್, ಇನ್ಸ್‌ಪೆಕ್ಟರಾಚೆಂ ಥಾಪಾಡ್, ಮಧುಕರಾಚ್ಯಾ ಕಾನ್ಸುಲಾರ್ ಬಸ್ಲೆಂ!. ಆನಿ ತೊ ಥಾಪ್ಡಾ ಹುಲೊಪ್ ಸಾರ್ಕೊ ನಿಂವ್ಚ್ಯಾಫುಡೆಂ…ಇನ್ಸ್ಪೆಕ್ಟರಾಚೊ ತೊಚ್ಚ್ ಹಾತ್ ಮಧುಕರಾಚ್ಯಾ ಶರ್ಟಾಚ್ಯಾ ಕೊಲಾರಾರ್ ಬಸ್ಲೊ! 

ಥಂಯ್ಸರ್ ತ್ಯಾ ಮೊಬಾಯ್ಲಾರ್…ಮಧುಕರಾನ್ ಚೊರಿಯಾಂ ಕಾಡ್ಲೆಲ್ಯೊ ತಸ್ವ್ವೀರ‍್ಯೊ ಆಸ್‌ಲ್ಲ್ಯೊ. ಆನಿ ತ್ಯೊ…

‘ಕ್ಯಾಥರಿನಾಚ್ಯೊ …ವಿವಿಧ್ ವಿಣ್ಘಿಂ ತಸ್ವೀರ‍್ಯೊ!’

ದುಸ್ರೆ ಘಡ್ಯೆ…ಮಧುಕರಾಕ್ ಧರ್ನ್ ಭುರ್ಬುರಿತ್ತ್ ತೊ ವೊಡ್ನ್ ವ್ಹರುನ್, ಪೊಲಿಸ್ ಕಾರಾರ್ ಬಸೈಲಾಗ್ಲೊ!. ಹೆಂ ಪಳೆವ್ನ್ ಆಸ್ಲೆಲಿಂ, ತ್ಯಾ ಬಿಲ್ಡಿಂಗಾಚ್ಯಾ ಫ್ಲ್ಯಾಂಟಾಂತ್ಲಿ ಸಗ್ಳಿಂ… ತಾಂತಾಂಚಿಂ ಬಾಗ್ಲಾಂ ಜನೆಲಾಂ ಎಕಾಪಾಟ್ ಏಕ್ ಧಾಂಪುಂಕ್ ಲಾಗ್ಲಿಂ.. ಪೂಣ್ ತ್ಯಾ ಪೈಕಿ…

ಫ್ಲ್ಯಾಟ್ ನಂ. 13 ಚ್ಯಾ ಜನೆಲಾಚ್ಯಾ ಕರ್ಟನಾ ಆಡೊಸಾಂತ್ಲೆ …ಏಕ್ ಜೊಡಿ  ದೊಳೆ…ಪೊಲಿಸ್ ಕಾರಾಚೆರ್ ದೀಶ್ಟ್ ಖಂಚುನ್ ಆಸ್‍‌ಲ್ಲೆ!  

***

ಪೊಲಿಸ್ ಸ್ಟೇಶನಾಂತ್…ಮಧುಕರಾಚೆಂ ಮೊಬಾಯ್ಲಾಚೆಂ ಸಾರ್ಕಿ ತಪಾಸ್ಣಿ ಜಾತೆಚ್ಚ್,  ಇನ್ಸ್‌ಪೆಕ್ಟರ್, ಕ್ಯಾಥರಿನಾಚ್ಯಾ ಮುಕ್ಲ್ಯಾ ಬಿಲ್ಡಿಂಗಾಚ್ಯಾ ಸಿ.ಸಿ.ಕ್ಯಾಮರಾ ಫುಟೇಜ್ ಥಾವ್ನ್ ಆರಾಯ್ಲೆಲ್ಯಾ ತಸ್ವೀರ‍್ಯಾಂಕ್ ತಪ್ಶೀಲ್ ಜಾವ್ನ್ ತಪಾಸುಂಕ್ ಆರಂಭ್ ಕೆಲೆಂ. 

ಆನಿ ತ್ಯಾವೆಳಾ ಮತಿಂ ಝಳ್ಕಾಲ್ಲ್ಯೊ… ವಿವಿಧ್ ದುಬಾವಿ ಗಜಾಲ್ಯೊ, ತೊ ‘ನೋಟ್’ ಕರಿತ್ತ್  ಗೆಲೊ.  ಅಸಲ್ಯಾ ತ್ಯಾಎಕಾ ಘಡ್ಯೆ…ಫಲಾಣ್ಯಾ ಗಜಾಲಿಚ್ಯಾ ವಿಚಾರಣೆಕ್…ಸೆಕ್ಯೂರಿಟಿ ಮಧುಕರಾಕ್…ಸರಳಾಂ ಪಾಟ್ಲ್ಯಾನ್ ಥಾವ್ನ್ ಆಪ್ಣಾ ಮುಕಾರ್ ಹಾಡುಂಕ್ ಆಜ್ಞಾ ದಿಲಿ.

ಆನಿಂ ಇ.ಕಾರ್ಲೊ ಮುಕಾರ್ ಮಧುಕರಾಕ್ ಉಬೊ ಕೆಲ್ಲೊಚ್ಚ್ …ಸಿಸಿ .ಕ್ಯಾಮರಾ ಫುಟೇಜ್ ತೊ ತಾಕಾ ದಾಕಯ್ ಲಾಗ್ಲೊ. ತಾಂತುನ್ ಆಸ್ಲೆಲ್ಯಾ ಖುನ್ಯೆ ಸಂಭಂಧಿ ದುಬಾವಿ ಗಜಾಲ್ಯಾಂಚೆರ್…ಸವಾಲಾಂ ಕರಿತ್ತ್ ರಾವ್ಲೊ.      

ಅಸಲ್ಯಾ ಎಕಾ ಸವಾಲಾ ಮಧೆಂ…ತಾಚೊ ಝಡ್ತೆ ಖಿಳೊ ಖುನ್ಯೆ ದುಬಾವೆಚ್ಯಾ ಎಕಾ ವೆಕ್ತಿಚೆರ್ ರೊಂಬ್ಲೊ. ಆನಿ ತಾಣೆಂ ಮಧುಕರಾಕ್ ಸವಾಲ್ ಕೆಲೆಂ… “ಹೊ ವೆಕ್ತಿ ಕೋಣ್…?!”

ಥಂಯ್ಸರ್ ತ್ಯಾ ಸ್ಕ್ರೀನಾರ್..ಏಕ್ ವ್ಯಕ್ತಿ ರಾತಿಂಚ್ಯಾ ಕಾಳಾಕಾಂತ್, ದುಬಾವೆ ಮೆಟಾಂನಿಂ ಸಮ್ಕೊನ್ ಆಸ್ಚೆಂ ತೆಂ ಸಾರ್ಕೆಂ ದಿಸ್ತಾಲೆಂ.!. ತಿ ವೆಕ್ತಿ ಕ್ಯಾಥರಿನಾಚ್ಯಾ ಮುಕ್ಲ್ಯಾ ಬಿಲ್ಡಿಂಗಾಚ್ಯಾ ಗೆಟಿ ಥಾವ್ನ್ ಭಾಯ್ರ್ ಆಯ್ಲಿ. ಪೂಣ್ ಖಿಣಾನ್ ತಿ ಮಾಜ್ವಾಲಿ. ಥೊಡೊಚ್ಚ್ ವೇಳ್. 

ನಂತರ್ ಕಾಳಾಕಾಂತ್ಲಿ ತಿ ಸಾವ್ಳಿ…ಲಾಯ್ಟಾ ಉಜ್ವಾಡಾಂತ್ ಪರತ್ ಝಳ್ಕಾಲಿ. ಆನಿ ತಕ್ಶಣಾಂಚ್ಚ್…ರುಕಾ ಝಡಾಂ ಮಧೆಂ ಪಾದ್ದೆವ್ನ್ ಪಾದ್ದೆವ್ನ್, ಕ್ಯಾಥರಿನಾಚ್ಯಾ ಘರಾ ಪಾಟ್ಲ್ಯಾ ಕುಶಿನ್ ಚಮ್ಕೊಂಕ್ ಲಾಗ್ಲಿ. 

ಆನಿ ತ್ಯಾ ನಂತರ್ ಸಿ.ಸಿ.ಟಿ.ವಿ. ಥಾವ್ನ್ ಎಕಾಚ್ಚಾಣೆಂ ತೊ ಚುಕ್ಲೊ. ಆನಿ ತ್ಯಾ ಉಪ್ರಾಂತ್ ತೊ ದಿಸಾಚ್ಚ್ ನಾಂ ಜಾಲೊ.!.

ಆತಾಂ ಇನ್ಸ್‌ಪೆಕ್ಟರ್… ಹಿ ಸಿ.ಸಿ ಫುಟೇಜಾಂತ್ಲಿ ತಸ್ವೀರ‍್ಯೊ, ಲ್ಯಾಪ್ಟೋಪ್ ಸ್ಕ್ರೀನಾರ್ ಆಸ್ಚ್ಯಾ ತ್ಯಾ ಮಿಸ್ತೆರಾ ವೆಕ್ತಿಕ್, ಪರತ್ ಪರತ್ ಮಧುಕರಾಕ್ ದಾಕೊಂವ್ಕ್ ಲಾಗ್ಲೊ. ಆನಿ ವಿಚಾರಿಲಾಗ್ಲೊ…

“ಸಾರ್ಕೆಂ ಪಳೆ…ಕೋಣ್ ಹೊ?!”  

ಆನಿ ಥೊಡೊ ವೇಳ್ ಪರತ್-ಪರತ್ ಪಳೆತ್ತ್ ಆಸ್ಲೊಲೊ ಮಧುಕರ್…ತ್ಯಾ ಎಕಾ ಘಡ್ಯೆ ಸವ್ಕಾಸ್ ದುಬಾವಿ ತಾಳ್ಯಾನ್ ಪುಸ್ಪುಸ್ಲೊ…

“ಹೊ…ಕಾಂಯ್…ಸ್ಟೀವನ್. ಫ್ಲ್ಯಾಟ್ ನಂ.13…ಚೊ ಸ್ಟೀವನ್ .?! ಮ್ಹಳ್ಳೊ ದುಬಾವ್ ಮಾರ್ತಾ.”

ಹೆಂ ಆಯ್ಕಾಲ್ಲೆಂಚ್ಚ್ ಇನ್ಸ್‌ಪೆಕ್ಟರ್  ಚುರುಕ್ ಜಾಲೊ. ಘಡ್ಯೆನ್ ದೋಗ್ ಕಾನ್ಸ್‌ಟೇಬಲ್ ಸಂಗಿ ಮಧುಕರಾಕ್ ಧಾಡುನ್, ಫಲಾಣ್ಯಾ ಸ್ಟೀವನಾಕ್ ಆಪವ್ನ್ ಹಾಡುಂಕ್ ಆಜ್ಞಾ ದೀಲಾಗ್ಲೊ. 

ಆನಿ ತೆ ಥಂಯ್ಸರ್ ಸ್ಟೀವನಾಚ್ಯಾ ಫ್ಲ್ಯಾಟಾಕ್ ಪಾವ್ತಾಸ್ತಾಂ…ತಾಚ್ಯಾ ಪ್ಲ್ಯಾಟಾ ಥಾವ್ನ್ ಯೆದೊಳ್‌ಚ್ ತೊ ನಪೈಂಚ್ಚ್ ಜಾಲ್ಲೊ.!.

ಹೆಂ ತಾಚೆಂ ನಪೈಂಚ್ಪಣ್…ಆನಿ ತಾಚ್ಯಾ ಫ್ಲ್ಯಾಟಾಕ್ ಘಾಲುನ್ ಆಸ್ಚೆಂ ಬೀಗ್…ಇ. ಕಾರ್ಲೊಕ್…‘ತೊಚ್ಚ್ ಖುನ್ಯೆಗಾರ್!’ ಮ್ಹಳ್ಳೊ ದುಬಾವ್ ಮತಿಂ ಖೆಳೊಂಕ್ ಲಾಗ್ಲೊ. ಆನಿ ತ್ಯಾ ಘಡ್ಯೆ ಥಾವ್ನ್ ತೊ ತಾಚ್ಯಾ ತುರ್ತ್ ಸೊದ್ನೆಕ್ ಪೊಲಿಸಾಂಕ್ ಧಾಡಿಲಾಗ್ಲೊ.  

ಆತಾಂ, ಬಸ್ ಸ್ಟೋಪಾಂನಿಂ…ರೈಲ್ವೇ ಸ್ಟೇಶನಾಂತ್, ಹರ್ಯೆಕಾ ಲೋಡ್ಜಾಂನಿಂ,  ಅಶೆಂ ದುಬಾವ್ ಆಸ್ಚ್ಯಾ ಹರ್ಯೆಕಾ ಜಾಗ್ಯಾಂನಿಂ ಪೋಲಿಸ್ ಅಧಿಕಾರಿಂಚ್ಯಾ ನಿರ್ದೇಶನಾಂ ಪರ್ಮಾಣೆಂ ಶಹರಾಚ್ಯಾ ವಿವಿಧ್ ಜಾಗ್ಯಾಂನಿಂ…ಪೊಲಿಸ್ ಸ್ಟೀವನಾಚ್ಯಾ ಸೊದ್ನೆಂಕ್ ಲಾಗ್ಲೆ.   

ಆನಿ ಅಕ್ರೇಕ್ ಗೂಂಡ್ ಸೊದ್ನಾಂಚೊ ಫಳ್ ಜಾವ್ನ್…ಸಾಂಜ್ ಜಾತಾಸ್ತಾನಾಂ…

ಸ್ಟೀವನಾಕ್…ಇನ್ಸ್‌ಪೆಕ್ಟರಾ ಮುಕಾರ್ ಹಾಜರ್ ಕೆಲೊ. ಹ್ಯಾವೆಳಾ ಇ.ಕಾರ್ಲೊ ಆಪ್ಲ್ಯಾ ಪೊಲಿಸ್ ಬೆತಾಚೆರ್ ಮೂಟ್ ಅರ್ನುನ್…ಶೀದಾ ಖುನ್ಯೆ ಗಜಾಲೆಕ್ ದೆವ್ಲೊ… 

“ಸ್ಟೀವನ್…ಕ್ಯಾಥರಿನಾಕ್ ಕಿತ್ಯಾಕ್ ಮಾರ್ಲೆಂಯ್?!”    

“ಸ…ಸರ್…ಖರೆಂಚ್ಚ್ ಸಾಂಗ್ತಾಂ…ಹಾಂವೆಂ ತಿಕಾ ಮಾರುಂಕ್ನಾ…!”.

“ಸ್ಟೀವನ್ ಏಕ್ ದೋನ್ ಸೆಕುಂದಾಂ ಪಳೆತಾಂ …ನಂತರ್ ತುಕಾ ಲಾಟ್ಯಾರ್ ಉಮ್ಕಾಳಾವ್ನ್…”

“ಸ…ಸರ್…ನಾಂ ಸರ್…”…ಕಠಿಣ್ ಬಿರಾಂತೆನ್ ಮಧೆಂಚ್ಚ್ ಬಡ್ಬಡ್ಲೊ ಸ್ಟೀವನ್…“ತಿಚ್ಯಾ ಕುಡಿಕ್ ಆಶೆವ್ನ್, ತಿಚ್ಯಾ ಘರಾ ವೆತಾಲೊಂ ವ್ಹಯ್. ಪೂಣ್ ದಿಸಾಕ್ ತಿಚೊ ಪೂತ್ ಇಸ್ಕೊಲಾಕ್ ಗೆಲ್ಲ್ಯಾವೆಳಾ. ಪೂಣ್ ರಾತಿಂ ಗೆಲ್ಲೊಂ ಮ್ಹಳ್ಯಾರ್ ಫಕತ್ತ್ ಏಕ್ ಪಾವ್ಟಿಂ ಮಾತ್ರ್.”

“ಕೆದಾಳಾ…?!”  

“ತೆಂ …ತೆಂ…ತಿಚಿ ಖುನ್ ಜಾಲ್ಲ್ಯಾ ರಾತಿಂ!.”

“ಫಟಿಂಗಾ…ಖುನ್ ಜಾಲ್ಲೆಲ್ಲ್ಯಾ ರಾತಿಂ…?!… ತ್ಯಾ ರಾತಿಂ ಕಿತೆಂ ಘಡ್ಲೆಂ ಆನಿ ಕಿತ್ಯಾ ತುಂವೆಂ ತಿಕಾ ಮಾರ್ಲೆಂಯ್?!”…ಮೇಜ್ ಬಡವ್ನ್ ಪರತ್ ಬೊಬಾಟ್ಲೊ…ಇ.ಕಾರ್ಲೊ.

ಆತಾಂ ಎಕಾಚ್ಚಾಣೆಂ ಉಡೊನ್ ಪಡ್ಲೊಲೊ ಸ್ಟೀವನ್…“ನಾಂ…ಸರ್…ಖ…ಖರೆಂಚ್ಚ್ ಸರ್… ಹಾಂವೆಂ ತಿಕಾ ಮಾರುಂಕ್ನಾಂ…”

ತವಳ್‌ಚ್ಚ್… ‘ಛಟಾರ್…!’…ಇನ್ಸ್ಪೆಕ್ಟರಾಚೆಂ ದಾವ್ಯಾ ಹಾತಾಚೆಂ ಥಾಪಡ್, ಸ್ಟೀವನಾಚ್ಯಾ ಮುಸ್ಕಾರಾರ್ ಬಸ್ಲೆಂ!. “ ಸಾಂಗ್…ತ್ಯಾರಾತಿಂ ಕಿತೆಂ ಘಡ್ಲೆಂ.?!” 

ತವಳ್‌ಚ್ಚ್ ಸ್ಟೀವನ್ ಉಸ್ಮಡ್ಲೊ…“ಖ…ಖರೆಂಚ್ಚ್ ಸರ್…ಖಂಯ್ ತರೀ ಸೊಪುತ್ ಘಾಲುನ್ ಸಾಂಗ್ತಾಂ…ಹಾಂವೆಂ ಕ್ಯಾಥರಿನಾಕ್ ಮಾರುಂಕ್ ನಾಂ…ಸರ್.” 

“ತುಂವೆಂ ನ್ಹಂಯ್ ತರ್…ಆನಿ ಕೊಣೆಂ ಮಾರ್ಲೆಂ?!”…ತಕ್ಶಣಾಂಚ್ಚ್ ಸ್ಟೇಶನ್ ಹಾಲ್ಚ್ಯಾಪರಿಂ ಬೊಬಾಟ್ ಘಾಲಿ ಇನ್ಸ್‌ಪೆಕ್ಟರಾನ್ ಆನಿ ಹ್ಯಾ ಕಠಿಣ್ ಭೆಶ್ಟಾವ್ಣೆ ಬೊಬೆಕ್ …ಎಕಾಚ್ಚಾಣೆಂ ಸ್ಟೀವನಾಚಿಂ ಜಾಂಗಾಂ ಭಿಜೊಂಕ್ ಲಾಗ್ಲಿಂ.!.

“ಹಾಂ…ಹಾಂವ್…ತೆಂ ಕಾಂಯ್ಚ್ ನೆಣಾಂ ಸರ್…ಪೂಣ್ ತ್ಯಾ…ತ್ಯಾರಾತಿಂ…ಹಾಂವ್ ತಿಚೆಂ ವೆಂಗೆಂತ್ ಆಸ್ಲೆಲ್ಯಾ, ತ್ಯಾಎಕಾ ಆಯಿನ್ನ್ ಘಡ್ಯೆ…ಎಕಾಎಕಿ ಬಾಗ್ಲಾಲಾಗಿಂ ಲ್ಹಾನ್ ಆವಾಜ್ ಜಾಲೊ!. ಖಿಣಾನ್ ದುಬಾವೆರ್ ಮ್ಹಜಿ ನದರ್ ತ್ಯಾ ಕುಶಿನ್ ಬದ್ಲಾಲಿ. 

ತವಳ್ ಥಂಯ್ಸರ್…

ತ್ಯಾ ಮಂದ್ ಕಾಳೊಕಾಂತ್…ಹಾತಿಂ ಝಳ್ಜಳ್ಚಿ ಸುರಿ ಘೆವ್ನ್ ಆಸ್ಲೆಲಿ ಏಕ್ ಸಾವ್ಳಿ, ಹಾಂವೆಂ ದೆಕ್ಲಿ.!

ಹೆಂ ಪಳೆಲ್ಲೆಂಚ್ಚ್…ಆಕಾಂತಾನ್ ಎಕಾಚ್ಚಾಣೆಂ ಹಾಂವ್ ಖಟ್ಲ್ಯಾ ಥಾವ್ನ್ ಉಡ್ಲೊಂ…ಆನಿ ಜೀವ್ ಹಾತಿಂ ಧರುನ್…ಅಮ್ಸರಿಂ-ಅಮ್ಸರಿಂ ಅರ್ಧೆಂ ಕುರೆಂ ನ್ಹೆಸೊನ್ ಆಸ್ತಾಂ ಆಸ್ತಾನಾಂಚ್ಚ್ … ಹಾಂವ್ ತ್ಯಾ ಕಾಳಾಕಾಂತ್, ಕ್ಯಾಥರಿನಾಚ್ಯಾ ಕುಡಾಕ್ ಚೊರಿಯಾಂ ಭಿತರ್ ಆಯ್ಲೆಲ್ಯಾ ಜನೆಲಾಸರ್ಶಿಂ ಧಾಂವೊಂಕ್ ಲಾಗ್ಲೊಂ. ಆನಿ ಸೆಕುಂದಾಂನಿಂ ಜನೆಲಾಂತುನ್ ಭಾಯ್ರ್ … ” 

“ತಶೆಂ ತರ್…ಹಾಂಗಾ ಥಾವ್ನ್ ತುಂ ಕಿತ್ಯಾ ಪೋಳ್ನ್ ಧಾಂವ್ಲೊಯ್?!” ಮಧೆಂಚ್ಚ್ ಧೆಂಕ್ಣೊಂ ಘಾಲೊ ಇನ್ಸ್‌ಪೆಕ್ಟರಾನ್.  

“ಸರ್…ದುಸ್ರೆ ದೀಸ್ ತಿಚಿ ಖುನ್ ಜಾಲ್ಲಿ ಆಯ್ಕಾತಾನಾಂ…ಆದ್ಲ್ಯಾ ರಾತಿಂ ಪಳೆಲ್ಲಿ ಸುರಿ ಮಾಕಾ ಝಗ್ಲಾಲಿ. ಆನಿ ‘ಕ್ಯಾಥರಿನಾಚ್ಯಾ ಖುನ್ಯೆ ರಾತಿಂ ಮ್ಹಜೆಂ ಹಾಜರ್ಪೊಣ್…!!.’ ಮಾಕಾ ತಿ ಸುರಿ ಆನಿ ಪೊಲಿಸಾಂಚೆಂ ಭೆಂ ಬರೆಂಚ್ಚ್ ಭೆಶ್ಟಾಂವ್ಕ್ ಲಾಗ್ಲೆಂ. ತ್ಯಾಘಡ್ಯೆ ಥಾವ್ನ್ ಹ್ಯಾ ಘಡ್ಯೆ ಪರ್ಯಾಂತ್…

‘ತೊ ವೆಕ್ತಿ ಕೋಣ್?!…ಆನಿ ತಿ ಸುರಿ ಕಾಂಯ್ ಮಾಕಾಯೀ ಸೊಧಿತ್ತ್ ಆಸಾ?!’ ಮ್ಹಳ್ಳ್ಯಾ ಭಿರಾಂತೆಚ್ಯಾ ಧೆಧೆಸ್ಪರಾಚೆರ್ ಹಾಂವ್ ಆಸಾಂ.!. 

ಆನಿ… ‘ತಿ ಸುರಿ…ಆನಿ ಪೊಲಿಸ್…!’ ಮ್ಹಳ್ಯಾ ಭಿರಾಂತೆರ್ ಹಾಂವ್ ಹಾಂಗಾ ಥಾವ್ನ್ ಪೋಳ್ನ್ ಧಾಂವ್‌ಲ್ಲೊಂ. ಪ್ರತ್ಯೇಕ್ ಜಾವ್ನ್ ಹಾಂವ್ ತ್ಯಾ ಸುರಿಚ್ಯಾ ಸಾವ್ಳೆ ಭಿರಾಂತೆನ್ ಲಿಪೊನ್ ರಾವ್‌ಲ್ಲೊಂ.”    

“ಆತಾಂ ಹೆಂ ಸಾಂಗ್…ತೊ ಸುರಿ ಧರ್ನ್ ಆಸ್‌ಲ್ಲೊ ವೆಕ್ತಿ, ತುಕಾ ಕೋಣ್ ಮ್ಹಣ್ ಭೊಗ್ತಾ. ಸೆಜಾರ‍್ಯಾಂ ಪೈಕಿ ಕೋಣ್ ತರೀ …ಮ್ಹಳ್ಯಾರ್ ಕೆವಿನ್, ಮಧುಕರ್…ಯಾ ತಿಚೊ ಪತಿ…?!”  

“ಸ…ಸರ್… ತೊ ತಿಚೊ ಪತಿ ಪೀಠರ್, ಪೆರೋಲಾರ್ ಜೈಲಾ ಭಾಯ್ರ್ ಆಸಾ ಮ್ಹಳ್ಳೆಂ ಆಯ್ಕಾಲ್ಲ್ಯಾ ನಂತರ್ …ಮಾಕಾ ತಿಚೊ ಪತಿಚ್ಚ್ ತೊ ಜಾವ್ನ್ ಆಸ್ಯೆತ್ ಮ್ಹಳ್ಳೊ ದುಬಾವ್ ಧೊಸುನ್ ಆಸಾ!.” 

“ಒ.ಕೆ. ತಾಚೆ ಶಿವಾಯ್… ಹೆರ್ ಕೋಣ್ ತರೀ ತುಜ್ಯಾ ದುಬಾವಾಂತ್ ಆಸಾ…?!”   

“ಮಟ್ವ್ಯಾ ಜಿವಾಚೊ  ಕೆವಿನ್…?!”…ಪುಸ್ಪುಸ್ಲೊ ಸ್ಟೀವನ್. “ ತಶೆಂಚ್ಚ್ ತಿಚ್ಯಾ ಫ್ಱೆಂಡ್ಸಾಂ ಪೈಕಿ ಕೋಣ್ ತರೀ ಜಾವ್ಯೆತ್ …”

“ತುಂಯೀ ತಿಚೊ ಎಕ್ಲೊ ಫ್ರೆಂಡ್ !.”

ಹೆಂ ಆಯ್ಕಾತಾಂ …ಎಕಾಚ್ಚಾಣೆಂ ತಾಚೆ ದೊಳೆ ರುಂದಾಲೆ. “ಸರ್ ಮ್ಹ…ಮ್ಹಜೆರ್ ಪಾತ್ಯೆಯಾ … ಖರೆಂಚ್ಚ್ ಸರ್…ಹಾಂವೆ ಖುನ್ ಕರುಂಕ್ನಾಂ…”

“ತುಂವೆಂ ನ್ಹಂಯ್ ತರ್, ತಿಚ್ಯಾ ಫೆಂಡ್ಸಾಂ ಮಧ್ಲೊ ಕೋಣ್ ಮ್ಹಣ್ ತುಕಾ ಭಗ್ತಾ?!”…ಘುಂವೊನ್ ಘುಂವೊನ್ ಪರತ್ ತೆಂಚ್ಚ್ ಸವಾಲ್ ಖಿಳಾಯ್ಲೆಂ, ಇ. ಕಾರ್ಲೊನ್.   

“ಸರ್…ಹಾಂವ್ ತೆಂ ನೆಣಾಂ ಸರ್… ಪೂಣ್ ತಿಚ್ಯಾ ಫ್ರೆಂಡ್ಸಾ ಮದ್ಲ್ಯಾ ಖುನಿಗಾರಾಕ್ ಸೊದಿಜಾಯ್ ತರ್…ತ್ಯಾ ತುಮ್ಚ್ಯಾ ಸೊದ್ನೆಕ್…

ತಿಚೊ ಪೂತ್ ಲೈಜಿಲ್‌ಚ್ಚ್…ಸಾರ್ಕೊ ವಿಂಚವ್ಣ್ ಮ್ಹಣ್ ಮಾಕಾ ಭೊಗ್ತಾ.” 

“ಲೈಜಿಲ್…?…ಲೈಜಿಲ್ ಕಿತ್ಯಾ…?”.

“ಏಕ್… ಲೈಜಿಲ್ ತಿಚೆ ಫ್ರೆಂಡ್ಸ್ ಕೋಣ್ ಮ್ಹಣ್ ವಳ್ಕುನ್ ಆಸ್ತೊಲೊ. “ದುಸ್ರೆಂ…ನೈಜಿಲಾಕ್ ‘ಸೋಮ್ನಾಮ್ ಬಿಯೆಲಿಸಮ್…’ ಮ್ಹಳ್ಳಿ ನಿದೆ ಸಂಚಾರಾಚಿ ಪಿಡಾ ಆಸಾ. ತಶೆಂ ರಾತಿಂ  ಉಟೊನ್, ತೊ ಥಂಯ್-ಹಾಂಗಾ ಚಲಾತ್ತ್ ಆಸ್ತಾ. 

ಆನಿ ಹ್ಯಾ ಮಧೆಂ ಎಕಾಚ್ಚಾಣೆಂ ತೊ ಜಾಗೊ ಜಾಲ್ಲೊಯೀ ಆಸಾ. ಕಾಂಯ್ ಖುನ್ಯೆ ರಾತಿಂ ತಶೆಂ ಘಡ್ ಲ್ಲೆಂ ತರ್…ತಾಣೆಂ ಖುನ್ಯೆಗಾರಾಕ್ ಪಳೆಂವ್ಚೆಂ ಸಾಧ್ಯತಾ ಆಸಾ. ”.

ಹೆಂ ಆಯ್ಕಾಲ್ಲೆಂಚ್ಚ್ ಇ.ಕಾರ್ಲೊ ಏಕ್ ಘಡಿ ತಾಕಾಚ್ಚ್ ಪಳೆಲಾಗ್ಲೊ. ನಂತರ್ ಪೊಲಿಸಾ ಲಾಗಿಂ ಸಾಂಗಾಲಾಗ್ಲೊ… “ಸ್ಟೀವನಾಕ್ ಕಸ್ಟಡಿಂತ್ ಘಾಲಾ!.”  ಆನಿ ದುಸ್ರೆ ಘಡ್ಯೆ…

“ಸರ್… ಸರ್… ಮಾಕಾ ಕಿತ್ಯಾ…ಮಾಕಾ ಕಿತ್ಯಾ ?!” ಮ್ಹಣ್ ತೊ ಬೊಬಾಟುನ್ ಆಸ್ತಾಂ…ಇ. ಕಾರ್ಲೊ ತಾಚ್ಯಾ ಪೊಲಿಸ್ ಕಾರಾರ್ ಚಡ್ಲೊ. ಆನಿ ತಾಚೆಂ ಕಾರ್, ಮಾನಸಿಕ್ ಪಿಡೆ ಚಿಕೆತ್ಸೆಚ್ಯಾ ದಾಕ್ತೆರಾಕ್ (ಸೈಕ್ಯಾಟ್ರಿಸ್ಟ್) ಭೆಟ್ಚ್ಯಾ ವಾಟೆಕ್ ಲಾಗ್ಲೆಂ.

***

ದುಸ್ರೆ ದೀಸ್…

ಮಾನಸಿಕ್ ದಾಕ್ತೆರ್ ದೀಪಕ್ ವೊರಾ …ಆನಿ ಇ.ಕಾರ್ಲೊ. ಆನಿ ಹಾಂಚ್ಯಾ ಮುಕಾರ್…ಬಸೊನ್ ಆಸ್‌ಲ್ಲೊ…

ಲೈಜಿಲ್…ಕ್ಯಾಥರಿನಾಚೊ ಪೂತ್ ಲೈಜಿಲ್. 

ಹ್ಯಾವೆಳಾ…ಇನ್ಸ್‌ಪೆಕ್ಟರ್ ಕಾರ್ಲೊ…ಲೈಜಿಲಾಕ್ ಸವಾಲಾಂ ಘಾಲುನ್ ತಾಚೊ ಉಗ್ಡಾಸ್ ಉಸ್ತುನ್ ಆಸ್‌ಲ್ಲೊ. ಆನಿ ತ್ಯಾವೆಳಾ…

ದಾಕ್ತೆರ್ ದೀಪಕ್ ವೋರಾ ಮೌನ್ ರಾವೊನ್…ಲೈಜಿಲಾಚಿ ಜಾಪಿ ಆಯ್ಕಾತ್ತ್ ಆಸ್‌ಲ್ಲೊ. ಆನಿಂ ತ್ಯಾ ತಾಚ್ಯಾ ಜಾಪಿ ಮಧೆಂ…ಖುನ್ಯೆಗಾರ್ ಗರಿಯೆಕ್ ಸಾಂಪಡ್ಚ್ಯಾ ಆವ್ಕಾಸಾಕ್, ದಾವ್ಲಿ ಮಾರುಂಕ್, ರಾಕೊನ್ ಆಸ್‌ಲ್ಲೊ.

ಪೂಣ್ ಇ.ಕಾರ್ಲೊಚ್ಯಾ ತನ್ಕೆ ಪ್ರೇತನಾರ್…ಲಾಂಬ್ ವೆಳಾ ಪರ್ಯಾಂತ್…ನಿರೀಕ್ಶಿತ್  ಫಾಯ್ದೊ- ಲಾಭೊಂಕ್ ನಾಂ. ತರೀ…ಸವಲಾಂ ಮಧೆಂ, ಲೈಜಿಲಾನ್ ಆಪ್ಲ್ಯಾ  ಆವಯ್ಚ್ಯಾ ವಾಯ್ಟ್ ನಡ್ತ್ಯಾ ವಿಶಿಂ ಆಪ್ಲೆಂ ವೊಂಟ್ ವೆಗ್ಳೆ ಕೆಲ್ಲೆ. ಆನಿ ಆಫ್ಣೆಂ ಮತಿಂ ದಾಂಬೊನ್ ದವರ್ಲೆಲೆಂ ಸಗ್ಳೆಂ ಉಗ್ತ್ಯಾನ್ ಸಾಂಗಿಲಾಗ್ಲೊ.  

ಆನಿ ಅಶೆಂ ತೊ ಸಾಂಗಿತ್ತ್ ಆಸ್ತಾಂ…ತ್ಯಾ ಎಕಾ ಆಯಿನ್ನ್ ಘಡ್ಯೆ ಸಟ್ಟ್ ಕರುನ್ ಡೊ.ವೋರಾ ಜಾಗೊ ಜಾಲೊ. ಆತುರಿತ್ ಜಾಲೊ. ಆನಿ ಆತಾಂ ಆಪ್ಣಾಚ್ಯಾ ಮತಿಂತ್ ಉದೆಲ್ಲ್ಯಾ …ಮಾನಸಿಕ್ ಪಿಡೆ ಸಂಬಂಧಿತ್ ಸವಾಲಾಂ ವಿಚಾರುಂಕ್ ತೊ ಅಮ್ಸರಿಲಾಗ್ಲೊ. 

ಆಪ್ಲ್ಯಾ ಮಾನಸಿಕ್ ಪಿಡೆ ಸಂಬಂಧಿತ್ ಸವಲಾಂಕ್… ಲೈಜಿಲಾನ್ ದಿಂವ್ಚ್ಯಾ ಜಾಪಿನಿಂ, ಖಂಡಿತ್ ಜಾವ್ನ್ ಲಿಪೊನ್ ಆಸ್ಚ್ಯಾ ಖುನ್ಯೆಗಾರಾಕ್ ಉಗ್ತಾಡಾಕ್ ಹಾಡ್ಯೆತ್ ಮ್ಹಳ್ಳ್ಯಾ ಭರ್ವಾಶ್ಯಾರ್…ಇ.ಕಾರ್ಲೊಕ್ ಮೌನ್ ರಾಂವೊಂಕ್ ತಾಣೆಂ ಹಿಶಾರೊ ಕೆಲೊ. ಆನಿ ತೊ  ಆಪ್ಲೆ ವೊಂಟ್ ವೆಗ್ಳೆ ಕರಿಲಾಗ್ಲೊ.

“ಲೈಜಿಲ್…ಮಾಮ್ಮಿಚಿ ಖುನ್ ಜಾಲ್ಲ್ಯಾ ತ್ಯಾರಾತಿಂ, ತುಂ ನಿದೆಕ್ ವೆಚ್ಯಾ ಆದಿಂ ಕಿತೆಂ ಕರುನ್ ಆಸ್‌ಲ್ಲೊಯ್?”

“ತ್ಯಾ ರಾತಿಂ…” ಪುಸ್ಪುಸ್ಲೊ ತೊ…ಫಲಾಣ್ಯಾ ತ್ಯಾ ಉಗ್ಡಾಸಾ ಮಧೆಂ ಘುಸೊನ್.  “ಮಾಮ್ಮಿಕ್ ತ್ಯಾರಾತಿಂ ಏಕ್ ಕೋಲ್ ಆಯಿಲ್ಲೆಂ. ಮೊಬಾಯ್ಲ್ ಪಳೆಲ್ಲೆಂಚ್ಚ್ ಸಟ್ಟ್ ಕರುನ್ ತಿಣೆಂ ಹಾತಿಂತ್ಲೊ ‘ಜಿನ್ನ್’ ಗ್ಲಾಸ್ ಮೆಜಾರ್ ದವರ್ಲೊ.  

ಆನಿ ಮ್ಹಜ್ಯಾ ಕಾನಾಂ ಥಾವ್ನ್ ವೆಗ್ಳೆಂ ಜಾಂವ್ಕ್, ತಿ ಮ್ಹಜೆ ಥಾವ್ನ್ ವಿಂಗಡ್ ಗೆಲಿ…ಆನಿ  ಮೊಬಾಯ್ಲಾರ್ ಪುಸ್ಪುಸೊನ್ ಉಲೊಂವ್ಕ್ ಲಾಗ್ಲಿ. ತಸಲ್ಯಾ ಗುಪಿತ್ ಉಲೊಣ್ಯಾ ವೆಳಾ ತಿಚ್ಯಾ ಮುಖಮಳಾರ್ ಖೆಳುನ್ ಆಸ್ಚೊ ವಿಭಿನ್ನ್ ಛಾರೊ ಪಾರ್ಕಿತಾನಾಂ…

ಮಾಕಾ ತಿಚೊ ದುಬಾವ್ ಮಾರ್ಲೊ. ತ್ಯಾ ದುಬಾವೆ ಚಿಂತ್ಪಾಂನಿಂ…ದಾದ್ಲ್ಯಾಸಂಗಿ ಆಸ್ಚಿ ತಿಚಿ ಸಳಾವಳ್. ಆನಿ ತ್ಯಾ ಸಂಗ್ತಿಂಚೆರ್ ಮಾಕಾ ಇಸ್ಕೊಲಾಂತ್ ಭುರ್ಗೆ ಟೋಂಟ್ ದಿಂವ್ಚೆ ತೆಂ ಧೊಶಿಲಾಗ್ಲೆಂ.!. ಆನಿ ಹಾಂವ್ ಸಗ್ಳೊಚ್ಚ್ ರಾಗಾನ್ ಖಡ್ಕಡ್ಲೊಂ. ಆನಿ…” 

“ತ್ಯಾರಾತಿಂ ಮಾಮ್ಮಿ ಸಂಗಿಂ ಉಲೊವ್ನ್ ಆಸ್ಲೊಲೊ ದಾದ್ಲೊ ಕೋಣ್.?!”. ಮಧೆಂಚ್ಚ್ ಸವಾಲ್ ಘಾಲೆಂ ದಾಕ್ತೆರಾನ್ 

“ತೆಂ ಹಾಂವ್ ನೆಣಾಂ…ಪೂಣ್ ತ್ಯಾ ರಾತಿಂ ಮಾಮ್ಮಿಲಾಗಿಂ ಕಠಿಣ್ ರಾಗಾರ್ ಆಸ್ತಾನಾಂ…

ಸಟ್ಟ್ ಕರುನ್, ಮೆಜಾರ್ ಆಸ್ಲೊಲೊ ಮಾಮ್ಮಿಚೊ ಜಿನ್ನ್ ಗ್ಸಾಸ್ ಹಾಂವೆಂ ವೊಂಟಾಂಕ್ ಧರ್ಲೊ. ಆನಿ ಪಯಿಲ್ಲೆ ಪಾವ್ಟಿಂ ‘ಜಿನ್ನ್’ ಗಟ ಗಟ ಕರುನ್ ಪಿಯೆಲೊಂ.” 

“ರಾವ್ ಲೈಜಿಲ್…” ಪರತ್ ತಾಚಿಂ ಉತ್ರಾಂ ಕುಡ್ಕೆ ಕರಿಲಾಗ್ಲೊ ದಾಕ್ತೆರ್. “ಹ್ಯಾ ರಾಗಾ ವೆಳಾ ತುಜ್ಯಾ ಮತಿಂತ್ ಕೋಣ್…ಆನಿ ಕಸಲ್ಯೊ ಗಜಾಲಿ ಘುಂವೊನ್ ಆಸ್‌ಲ್ಲ್ಯೊ?.

ಹೆಂ ಆಯ್ಕಾತಾಂ ಲೈಜಿಲಾಚ್ಯಾ ಮತಿಂತ್ ಉದೆಲ್ಲೆಂ ಸರ್ವ್ ತೊ ವಿವರಿಲಾಗ್ಲೊ…

‘ಆಪುಣ್ ಕಾಂಟಾಳೊನ್ ಆಸ್ಚ್ಯೊ ಆವಯ್ಚ್ಯೊ ಕಾಂಟಾಳಾಚ್ಯೊ ವಾಯ್ಟ್ ಕರ್ನ್ಯೊ…ತಿಚಿ ವಾಯ್ಟ್ ಚಾಲ್ ಸಳಾವಳ್…ತ್ಯಾಶಿವಾಯ್ ಇಸ್ಕೊಲಾಂತ್ಲೆ ಥೊಡೆ ಭುರ್ಗೆ, ತಾಚ್ಯಾ ಮಾಮ್ಮಿವಿಶಿಂ ವ್ಯಂಗ್ ಉತ್ರಾಂ ಉಚಾರುನ್, ತಾಕಾ ಕೆಂಡುನ್ ದುಕೊವ್ನ್ ಆಸ್ಚೆಂ. 

ತ್ಯಾಖಾತಿರ್ ತಾಣೆಂ ಗಳಯಿಲ್ಲಿಂ ಗುಪಿತ್ ದುಖಾಂ…ಆನಿ ಹ್ಯಾ ಮನೊದಬಾವೆನ್ ಘರಾ ಯೇವ್ನ್ ಆಪ್ಲ್ಯಾ ಮಾಮ್ಮಿಲಾಗಿಂ ಝಗಡ್ನ್-ಆಸ್ಚೆಂ ಹೆಂ ಸರ್ವ್ ತೊ ಸಾಂಗಿಲಾಗ್ಲೊ. 

ತ್ಯಾ ಶಿವಾಯ್…‘ಆಪ್ಣಾಚೊ ಜಿವಾ ವರ್ತೊ ಮೋಗ್ ಕರ್ಚ್ಯಾ ಡ್ಯಾಡಿಕ್ ಜೈಲಾಕ್ ಧಾಡುಂಕ್  ಆಪ್ಲಿ ಆವಯಿಚ್ಚ್ ಕಾರಾಣ್ ಮ್ಹಳ್ಳೊ ವಿಶಯ್ ತಾಕಾ ಧೆಧೆಸ್ಪರ್ ಕರಿತ್ತ್ ಆಸ್‌ಲ್ಲೆಂ. ಹ್ಯೊ ಸರ್ವ್ ಸಂಗ್ತಿಂ ವಿವರಿತ್ತ್ ಆಸ್ತಾಂ…

ತೇಗ್ ದಾದ್ಲೆ ತಾಚ್ಯಾ ಮತಿಂತ್ ಘುಂವಾತ್ತ್ ಆಸ್‌ಲ್ಲೆ. ಅಸಲ್ಲ್ಯಾ ವೆಳಾ…ಏಕ್ ಸ್ತ್ರೀಯೀ ತಾಚ್ಯಾ ಮತಿಂ ಜಗ್ಲೊಂಕ್ ಲಾಗ್ಲಿ.  

‘ಜಲೀಲಾ…’

ಆನಿ ತಿ ತಾಂಚ್ಯಾ ಘರಾ ಬಾಗ್ಲಾರ್ ತಾಚ್ಯಾ ಮಾಮ್ಮಿ ಲಾಗಿಂ ಗಲಾಟೊ ಕರುನ್ ಆಸ್‌ಲ್ಲಿ. ಅಸಲ್ಯಾ ವೆಳಾ ಏಕ್ ಪಾವ್ಟಿಂ ತಿಚ್ಯಾ ಹಾತಿಂ ಕೊಯ್ತಿ ಆಸ್‌ಲ್ಲಿ!’ 

ಹ್ಯೊ ಸಂಗ್ತಿಂ…ಲೈಜಿಲ್ ದಾಕ್ತೆರಾಲಾಗಿಂ ಸಾಂಗೊನ್ ಆಸ್ತಾನಾಂ… ತ್ಯಾಮಧೆಂ ದಾಕ್ತೆರ್ ಪರತ್ ತಾಕಾ ಸವಾಲ್ ಘಾಲಿಲಾಗ್ಲೊ…

“ಜಲೀಲಾ ಲಡಾಯ್ ಕರುನ್ ಆಸ್ತಾನಾಂ…ಘರಾ ಬಾಗ್ಲಾರ್ ಲೋಕ್ ಕುಡ್ಸಾಲ್ಲೊಮೂ?”

“ವ್ಹಯ್…!…ತಾಂಚೆ ಮಧ್ಲೆ ಥೊಡೆ ಜಣ್ ಮಾಮ್ಮಿಕ್ ವ್ಯಂಗ್ ಖೆಳ್ಳುಳ್ಯಾಂ ಉತ್ರಾಂನಿಂ ದುರ್ಸೊನ್ ಆಸ್‌ಲ್ಲೆ.”

ಹೆಂ ಸಾಂಗ್ತಾಸ್ತಾಂ ಲೈಜಿಲಾಚೊ ಕ್ರೋಧಾಚೊ ಛಾರೊ ಪಾರ್ಕೊನ್ ದಾಕ್ತೆರ್ ವಿಚಾರಿಲಾಗ್ಲೊ…

“ಲೈಜಿಲ್…ಅಸಲ್ಯಾ ಸರ್ವ್ ಗಜಾಲೆವೆಳಾ ತುಕಾ ಮಾಮ್ಮಿಚೊ ರಾಗ್ ಯೆವುನ್, ತುಂ ಮಾಮ್ಮಿ ಲಾಗಿಂ ಝಗಡ್ತೊಲೊಯ್ ನ್ಹಂಯ್.?” 

“ವ್ಹಯ್…” ಪುಸ್ಪುಸ್ಲೊ ತೊ.

“ಅಸಲ್ಯಾ ತುಮ್ಚ್ಯಾ ಮಧ್ಲ್ಯಾ ಝಗ್ಡ್ಯಾಂ ಮಧೆಂ ಕೆನ್ನಾಂತರೀ…ತುಂವೆಂ ರಾಗಾನ್ ತಿಕಾ ಮಾರುಂಕ್ ಹಾತ್ ಉಬಾರ್ಲೊಲೊ ಆಸಾ.?!”

ಹೆಂ ಆಯ್ಕಾತಾಂ ಲೈಜಿಲ್ ಸಗ್ಳೊಚ್ಚ್ ತಾಂಬ್ಡೊ-ತಾಂಬ್ಡೊ ಜಾಲೊ. ಆನಿ ತೊ ದಾಕ್ತೆರಾಕ್‌ಚ್ಚ್ ಪಳೆವ್ನ್, ಗೂಂಡ್ ಮೌನಾಂತ್ ಬುಡ್ಲೊ. ಆನಿ ತ್ಯಾ ಮೊನೆಪಣಾಚ್ಯಾ ಗುಂಡಾಯೆಂತ್… ದಾಕ್ತೆರಾನ್ ಸಟ್ಟ್ ಕರುನ್ ಪರತ್ ಏಕ್ ಸವಾಲ್ ಘಾಲೆಂ. 

“ತೆಂ ಆಸೊಂ. ತುಂವೆಂ ಜಿನ್ನ್ ಪಿಯೆಲ್ಲ್ಯಾ ರಾತಿಂ…ತ್ಯಾ ಉಪ್ರಾಂತ್ ಕಿತೆಂ ಘಡ್ಲೆಂ.?!.”  

“ಜಿನ್ನ್ ಪಿಯೆಲ್ಯಾ ನಂತರ್ ಮತಿಂತ್ಲ್ಯಾ ಕಠಿಣ್ ಅಮಾಲಾ ದಬಾವೆನ್…ವೆವೆಗ್ಗಿಂ ಹಾಂವ್ ಮ್ಹಜ್ಯಾ ಖಟ್ಲ್ಯಾಲಾಗಿಂ ಗೆಲೊ. ಆನಿ ಧಡ್ ಕರುನ್ ಆಡ್-ಪಡ್ಲೊಂ. ಆನಿ ತ್ಯಾನಂತರ್ ಖಿಣಾನ್ ನಿದೆಕ್ ಸಾಂಪಡ್ಲೊಂ. ತ್ಯಾ ಸಕಾಳಿಂ…” 

“ರಾವ್…” ತಕ್ಶಣಾಂಚ್ಚ್ ಮಧೆಂಚ್ಚ್ ಉಲಯ್ಲೊ ದಾಕ್ತೆರ್…“ತ್ಯಾ ರಾತಿಂ ತುಕಾ ಕಾಂಯ್ ಸ್ವಪಾಣ್ ಪುಣಿಂ ಪಡ್‌ಲ್ಲೆಂ…? ”

“ಸ್…ಸ್ವಪಾಣ್…?” ಏಕ್ ಘಡಿ ತೊ ಆಪ್ಲೊ ಉಗ್ಡಾಸ್ ಉಸ್ತೊಂಕ್ ಲಾಗ್ಲೊ. … “ಹಾಂ…ವ್ಹಯ್…ಸ್ವಪಾಣ್ ಪಡ್‌ಲ್ಲೆಂ, ವ್ಹಯ್.”

“ಕಸಲೆಂ ಸ್ವಪಾಣ್?!” ಆತಾಂ  ದಾಕ್ತೆರ್ ಲೈಜಿಲಾಚ್ಯಾ ನಿದೆಚ್ಯಾ ಮನೋರೊಗಾಚೆರ್ ಜಾಳ್ ಘಾಲುನ್…ತಾಂತುನ್ ಕ್ಯಾಥರಿನಾಚ್ಯಾ ಹಂತಕಾಕ್ ಜಾಳಾಕ್ ಘಾಲ್ಚ್ಯಾ ಹಂತಾಕ್ ತೊ ಪಾವ್‌ಲ್ಲೊ.!  

“ತ್ಯಾ ಸ್ಪಪ್ಣಾಂತ್…ಹಾಂವೆ ದೆಕ್ಲೆಲ್ಯಾ ಎಕಾ ಇಂಗ್ಲಿಶ್ ಫಿಲ್ಮಾಂತ್ಯಾ ದೃಶ್ಯಾ ತಸಲೆಂ ದೃಶ್ಯ್ ಚಲೊನ್ ಆಸ್‌ಲ್ಲೆಂ.” ಉತ್ರಾಂ ಬರಾಬರ್…ತಾಚ್ಯಾ ಮತಿಂ ತೆಂ ಸ್ವಪ್ಣಾ ದೃಶ್ಯ್ ಜಗ್ಲೊಂಕ್ ಲಾಗ್ಲೆಂ…

‘ಫಿಲ್ಮಾಂತ್…ತಾಚ್ಯಾ ಆವಯ್ ತಸಲಿ…ಅನೀತ್ ಚಾಲೆಚಿ ಸ್ತ್ರೀ ಆಸ್‌ಲ್ಲಿ. ತಶೆಂಚ್ಚ್ ತಾಚ್ಯಾ ಡ್ಯಾಡಿ ತಸಲೊ ಏಕ್ ದಾದ್ಲೊ ಆಸ್‌ಲ್ಲೊ. ಫಿಲ್ಮಾಂತ್ಲ್ಯಾ ಡ್ಯಾಡಿನ್…ಏಕ್ಪಾವ್ಟಿಂ ಆಪ್ಲಿ ಪತಿಣ್ ದುಸ್ರ್ಯಾ ದಾದ್ಲ್ಯಾಸಂಗಿ…ಬೆಡ್ಡಾರ್ ಆಸ್ಚೆಂ ಪಳೆಲೆಂ!. ಖಿಣಾನ್ ಉಚಾಂಬಳಿತ್ ಜಾಲೊ.  

ಕ್ರೋಧಾನ್ ಧೆದೆಸ್ಪರ್ ಜಾಲ್ಲೊ ತೊ…ಕುಜ್ನಾಕ್ ಧಾವ್ಲೊ. ಸುರಿ ವಿಂಚಿಲಾಗ್ಲೊ. ಆನಿ ಅಕ್ರೋಶಾಚ್ಯಾ ಆವೇಶಾನ್ ತೊ ಬೆಡ್ ರುಮಾ ಕುಶಿನ್ ಧಾಂವೊನ್ ಆಯ್ಲೊ. ಆನಿ ಹೊ ತಾಚೊ ಆವಾಜ್ ರುಮಾಚ್ಯಾ ದಾರಾರ್ ಪಾವ್ತಾಸ್ತಾನಾಂ…

ಖಟ್ಲ್ಯಾರ್ ಸ್ತ್ರೀಯೆ ಸಂಗಿಂ ಆಸ್ಲೊಲೊ ದಾದ್ಲೊ, ಹಾಚೆ ಕುಶಿನ್ ಪಳೆವ್ನ್, ಖಿಣಾನ್…ಖಟ್ಲ್ಯಾ ಥಾವ್ನ್ ಉಡ್ಲೊ ಆನಿ ಪಾಟ್ಲ್ಯಾ ಬಾಗ್ಲಾಂತುನ್ ಧಾಂವಾಲಾಗ್ಲೊ. ತವಳ್… 

ಕ್ರೋಧಾನ್ ಪಿಸೊಚ್ಚ್ ಜಾಲ್ಲೊ…ಸ್ತ್ರೀಯೆಚೊ ಪತಿ…ಖಿಣಾನ್ ಆಪ್ಲಿ ಸುರಿ…

ಪತಿಣೆಚ್ಯಾ ಹರ್ದ್ಯಾರ್ ರೊಂಬಿಲಾಗ್ಲೊ.!  ಕ್ಶಣಾನ್ ತಿ…ರಗ್ತಾ ವ್ಹಾಳಾಂತ್ ಹುಳ್ವಳೊಂಕ್ ಲಾಗ್ತಾನಾಂ…

ರಗಾತ್ ಉಸ್ಳೊನ್ ಆಸ್ಲೆಲ್ಯಾಪರಿಂ, ತೊ ಸುರಿಯೆನ್…ಕ್ರೂರ್ ಥರಾನ್ ತಿಚ್ಯಾ ಆಂಗಾರ್ ವಯ್ರ್ ವಯ್ರ್ ಕೊಚಾಂವ್ಕ್ ಲಾಗ್ಲೊ.!.’

ಲೈಜಿಲ್ ಆಪ್ಣಾಚೆಂ ಹೆಂ ಸ್ವಪಾಣ್…ದಾಕ್ತೆರಾಕ್ ವಿವರಿತ್ತ್ ಆಸ್ತಾನಾಂ…ತ್ಯಾಎಕಾ ಘಡ್ಯೆ ಸಟ್ಟ್ ಕರುನ್…

ದಾಕ್ತೆರಾಚ್ಯಾ ಮತಿಂ…ಕ್ಯಾಥರಿನಾಚೊ ಖುನ್ಯೆಗಾರ್ ಸಾಂಪಡ್ಲೊ.!.

***

ಆನಿ ದಾಕ್ತೆರಾಚ್ಯಾ ಮತಿಂ ತೊ ಖುನ್ಯೆಗಾರ್ ಜಗ್ಲಾತ್ತ್ ಆಸ್ತಾಂ…ತಾಚ್ಯಾ ಮತಿಂ…

ಕೊಯ್ತಿ ಧರ್ನ್ ಆಯಿಲ್ಲಿ ಜಲೀಲಾ … ಸ್ಟೀವನ್ ಆನಿ ಕ್ಯಾಥರಿನಾಚೊ ಪತಿ ಪೀಟರ್… ಜಗ್ಲೊಂಕ್ ಲಾಗ್ಲಿಂ.!.

ಹ್ಯಾಘಡ್ಯೆ ದಾಕ್ತೆರ್…ಇನ್ಸ್‌ಪೆಕ್ಟರಾಕ್ ದೆಗೆನ್ ಆಪವ್ನ್…“ ಪೀಟರಾಚೆ ಫಿಂಗರ್ ಪ್ರಿಂಟ್ಸ್ …” ತವಳ್‌ಚ್ಚ್ ಮಧೆಂಚ್ಚ್… “ಪೀಟರ್ ಯೆದೊಳ್ ಆಮ್ಕಾಂ ಮೆಳುಂಕ್ ನಾಂ.” ಇ. ಕಾರ್ಲೊ ಮ್ಹಣಾಲೊ.

“ಒ.ಕೆ. ತೆಂ ಮುಕಾರ್ ಪಳೆಂವ್ಯಾ.” ತಕ್ಶಣಾಂಚ್ಚ್ ಮ್ಹಣಾಲೊ ಡೊ. ವೋರಾ. ಆನಿ … “ತಶೆಂ ತರ್ ಆತಾಂ ಲೈಜಿಲ್, ಸ್ಟೀವನ್…ಆನಿ ಜಲೀಲಾ ಆನಿ ತಿಚ್ಯಾ ಘರ್ಚ್ಯಾಂಚ್ಯೆ ಫಿಂಗರ್ ಪ್ರಿಂಟ್ಸ್ ಆರಾಯ್….ಕ್ವಿಕ್ಕ್ …!” ಅಮ್ಸರಿ ಸಾಂಗಿಲಾಗ್ಲೊ ಖುನ್ಯೆಗಾರಾಚಿ ರುಜ್ವಾತ್ ಆರಾಂವ್ಚ್ಯಾ ಕುತೂಹಲಾನ್.!.

ತಿಸ್ರ್ಯಾ ದೀಸಾ…

ಫಿಂಗರ್ ಪ್ರಿಂಟ್ಸಾಂಚೊ ವಿವರ್…ಇ.ಕಾರ್ಲೊ ಆನಿ ದಾಕ್ತೆರಾಚ್ಯಾ ಮುಕಾರ್ ಆಸ್ಲೊ. ಹೊ ವಿವರ್ ಸುರಿಯೆ ವಯ್ಲ್ಯಾ ಫಿಂಗರ್ ಪ್ರಿಂಟ್ಯಾಂಕ್ ತಾಳ್ ಕರುನ್ ಪಳೆತಾಂ ಪಳೆತಾಂ…ಯೆದೊಳ್ ನಿರೀಕ್ಶಿತ್ ಕರಿನಾತ್ಲೊಲೊ ಖುನ್ಯೆಗಾರ್ ಇ. ಕಾರ್ಲೊಚ್ಯಾ ಮತಿಕ್ ಆಪ್ಟಾಲೊ!. ಆನಿ ತೊ ಉದ್ಗಾರ್ಲೊ…

 “ಮೈ ಗಾಡ್…! ” 

ಆನಿ ಇ. ಕಾರ್ಲೊ…ದಾಕ್ತೆರಾಕ್  ಯೆಕಾಚ್ಚಾಣೆಂ ವಿಜ್ಮಿತೆನ್ ಪಳೆತಾಸ್ತಾಂ…

“ಯೆದೊಳ್ ಚ್ಚ್ ಹೊ ಖುನ್ಯೆಗಾರ್ ಮಾಕಾ ಧೊಸುನ್ ಆಸ್ ಲ್ಲೊ.!.”  

***

ಕ್ಯಾಥರಿನಾಚಿ ಖುನ್ ಘಡ್ಲೆಲ್ಯಾ ರಾತಿಂ…  

ಆವಯ್ಚ್ಯಾ ಅನೀತ್ ಚಾಲಿಚ್ಯಾ ಧೆಧೆಸ್ಪರಾರ್…ಮನೋಖಿನ್ನತೆಂತ್ ಆಸ್‌ಲ್ಲೊ … ಲೈಜಿಲ್…

ತ್ಯಾ ರಾತಿಂ ಆವಯ್ಕ್ ಆಯ್ಲೆಲ್ಯಾ ತಿಚ್ಯಾ ಪ್ರೇಮಿಚ್ಯಾ ಫೊನಾವರ್ವಿಂ ಕಠಿಣ್ ಕ್ರೋಧಾಕ್ ಒಳಗ್ ಜಾಲೊ. ಆನಿ ಹ್ಯಾ ಧೆಧೆಸ್ಪರಾರ್ ತೊ ನಿದೊಂಕ್ ವೆತಾಸ್ತಾಂ…ಆವಯ್ನ್ ಮೆಜಾರ್ ದವರ್ಲೊಲೊ ‘ಜಿನ್ನ್ ಗ್ಲಾಸ್’ ಆಪ್ಲ್ಯಾ ವೊಂಟಾಂಕ್ ವ್ಹೆಲೊ. ಆನಿ…

ತ್ಯಾ ರಾತಿಂ…ಅಮಾಲ್ ಭರಿತ್ ಘಾಢ್ ನಿದೆಂತ್ ಮಿಸ್ಳೊನ್ ಆಸ್ಲೊಲೊ ತೊ…ತಾಚ್ಯಾ ನಿದೆ ಪಿಡೆಚ್ಯಾ ಪ್ರಭಾವಾನ್ ತೊ ಅನಿರೀಕ್ಶಿತ್ ಆಕಾಂತೆಚ್ಯಾ ವರ್ತನಾಕ್ ಒಳಗ್ ಜಾಲೊ. ಆನಿ ಪರಿಣಾಮ್ ಜಾವ್ನ್…  

ಸ್ವಪ್ಣಾಂತ್ಲ್ಯಾ ಇಂಗ್ಲಿಶ್ ಫಿಲ್ಮಾಂಚ್ಯಾ ತ್ಯಾ ಡ್ಯಾಡಿನ್ ಕೆಲ್ಲೆಂ ಭಯಾನಕ್ ಕರ್ತುಬ್…ಹಾಂಗಾಸರ್…ಲೈಜಿಲಾಚ್ಯಾ  ಸೊಮ್ನಾಮ್ ಬಿಯೆಲಿಸಮ್ ನಿದೆ ಪಿಡೆಚ್ಯಾ ಹಾತಾನಿಂ ಘಡುನ್ ಗೆಲೆಂ.!. ಆನಿ…

ಲೈಜಿಲಾಚ್ಯಾ ನಿದೆಪಿಡೆಚ್ಯಾ ಹಾತಾಂತ್ಲಿ ಸುರಿ…ಆವಯ್ಚ್ಯಾ ಹರ್ಧ್ಯಾರ್ ರೊಂಬ್ಲಿ!. ರಗಾತ್ ಉಸಳ್ಳೆಂ.!! 

ಆನಿ ಯೆದೊಳ್ ತ್ಯಾ ಖಟ್ಲ್ಯಾರ್…ಲೈಂಗಿಕ್ ಉದ್ರೇಕಾಚ್ಯಾ ಹುಳ್ವೊಳೆರ್ ಆಸ್ಲೆಲಿ ಕ್ಯಾಥರಿನ್…

ಆತಾಂ ತ್ಯಾಚ್ಚ್ ಖಟ್ಲ್ಯಾರ್…ರಗ್ತಾ ಕೊಂಡಾಂತ್ ವಳ್ವೊಳೊನ್…ವಳ್ವೊಳೊನ್…ಆಪ್ಲ್ಯಾ ಮರ್ಣಾಕ್ ದಾವ್ಲಿ ಮಾರುಂಕ್ ಲಾಗ್ಲಿ.!. 

ಆನಿ ತಿಚೆ ತೆ ಅನಿರೀಕ್ಶಿತ್ ಆಕಾಂತೆನ್ ರುಂದಾಲ್ಲೆ ದೊಳೆ…ಆತಾಂ…ತಿಚ್ಯಾ ಪಾತ್ಕಿ ಜಿವಿತಾವಿಶಿಂ ಪಶ್ಚ್ಯಾತ್ತಾಪ್ ಉಚಾರ್ನ್ ಆಸ್‌ಲ್ಲೆ.!. 

ಆನಿ ತಶೆಂಚ್ಚ್ ತ್ಯಾಚ್ಚ್ ಪರಿಂ…ಸವ್ಕಾಸ್ ತೆ ನಿರ್ಜೀವ್ ಜಾಯ್ತ್ ಗೆಲೆ.!!. 

ಸ್ವಪ್ಣಾಂತ್ಲ್ಯಾ ಫಿಲ್ಮಾಂತ್ ಘಡ್ಲೆಲೆಂ ಭಯಾನಕ್ ಘಡಿತ್…ಹಾಂಗಾಸರ್…ಲೈಜಿಲಾಚ್ಯಾ  ನಿದೆಂತ್ಲ್ಯಾ ಮನೋರೊಗಾಚ್ಯಾ ವಿಭಿನ್ನ್ ವರ್ತನಾವರ್ವಿಂ…ತ್ಯಾಚ್ಚ್-ಪರಿಂ…ತಶೆಂಚ್ಚ್ ಘಡುನ್ ಗೆಲೆಂ!

ಫಿಲ್ಮಾಂತ್ ಅನಯ್ತಿಕ್ ಪತ್ನಿಚೊ ಖುನ್ಯೆಗಾರ್ ತಿಚೊ ಪತಿ ಜಾಲ್ಲೊ ತರ್…

ಹಾಂಗಾಸರ್ ನೀಜ್ ಜಿವಿತಾಂತ್…ವಾಯ್ಟ್ ಚಾಲಿಚ್ಚ್ಯಾ ಕ್ಯಾಥರಿನಾಚೊ…ಖುನಿಗಾರ್…

ತಿಚೊಚ್ಚ್ ಪೂತ್…ಲೈಜಿಲ್…!!…

ಮುಗ್ಧ್ ಭುರ್ಗೊ ಲೈಜಿಲ್‌ಚ್ಚ್…ತಿಚೊ ಮಿಸ್ತೆರಾ ಖುನ್ಯೆಗಾರ್ ಜಾವ್ನ್ ಬದ್ಲಾಲ್ಲೊ.!!!.

                                       ■ ರೋನ್ ರೋಚ್ ಕಾಸ್ಸಿಯಾ