ತ್ಯಾ ರಾತಿಂ…
ಒಜ್ವಲ್ಡ್ ಪ್ರೇಮಾಚೆಂ ಫೋರ್ಡ್ ಐಕೊನ್…ವಾರ್ಯಾ ಪಾವ್ಸಾಕ್ ಚೀರ್ನ್, ತಾಚ್ಯಾ ಫಾರ್ಮ್ ಹೌಸಾ ಕುಶಿನ್ ಧಾಂವಾತ್ತ್ ಆಸ್ಲ್ಲೆಂ. ಹ್ಯಾವೆಳಾ ಸ್ಟಿಯರಿಂಗಾ ವಯ್ಲೊ ದಾವೊ ಹಾತ್ ಮೆಕ್ಳೊ ಕರುನ್, ರಿಸ್ಟ್ ವೊಚಾಚೆರ್ ನದರ್ ಘಾಲಿ.
ವೊರಾಂ ರಾತಿಚಿಂ ಸಾಡೆಇಕ್ರಾ.
ಮಧ್ಯಾನೆ ರಾತ್…!.
ಹೆಂ ತಾಕಾ ಮತಿಂ ಧೊಸ್ತಾಸ್ತಾಂ…ಎಕಾಎಕಿ ತಾಚಿ ನದರ್, ಭಂವ್ತಿಚ್ಯಾ ಘಾಢ್ ಅಂದ್ಕಾರಾಂತ್ ಚರೊಂಕ್ ಲಾಗ್ಲಿ. ನರ್-ಮನಿಸ್ ದಿಶ್ಟೆಕ್ ಪಡಾನಾತ್ಲೆಲ್ಲೆಂ ನಿಶಬ್ಭ್ ವಾತಾವರಣ್!
ಅವ್ಯಕ್ತ್ ಭಿರಾಂತ್ ಹಾಡ್ಚೆಂ ಹೆಂ ವಾತಾವರಣ್ ತಾಕಾ…ವಿವಿಧ್ ಹೊರರ್ ಫಿಲ್ಮಾಂಚೊ ಉಗ್ಡಾಸ್ ಹಾಡ್ತಾಸ್ತಾಂ…ತೊ ಹ್ಯಾ ಭೆಂಭರಿತ್ ವಾತಾವರಣಾ ಥಾವ್ನ್ ಭಾಯ್ರ್ ಯೇಂವ್ಕ್…ಕಾರಾಚೊ ವೇಗ್ ಚಡಯ್ಲಾಗ್ಲೊ!
ಥೊಡ್ಯಾಚ್ ವೆಳಾನ್ ಕಾರ್…ಅಂದ್ಕಾರಾ ಥಾವ್ನ್ ವೀಜ್ ಲಾಯ್ಟಾಚ್ಯಾ ಪ್ರಕಾಸಾಕ್ ಪಾವ್ತಾಸ್ತಾಂ… ಎಕಾಚ್ಚಾಣೆಂ ತ್ಯಾ ಶಿರಾಂಧಾರೆಚ್ಯಾ ಪಾವ್ಸಾಚೊ ಭೊರ್ ಬೊರೊಚ್ಚ್ ವಾಡೊಂಕ್ ಲಾಗ್ಲೊ. ತ್ಯಾಘಡ್ಯೆ…ಪಾವ್ಸ್…ಆನಿ ಹಿಂವ್ ಹೆಂ ದೊನೀ ತಾಕಾ ಕಾರಾಚ್ಯಾ ಸಿಟಿರ್ ಆಸ್ಲೆಲ್ಯಾ, ಸೂಟ್ಕೇಸಿಂತ್ಲಿ ಸ್ಕೋಚ್ ಬರಿಚ್ಚ್ ತಾಳ್ನಿ ಹಾಡ್ತಾಸ್ತಾಂ…
ತಾಣೆಂ ಕಾರ್ ಥಂಯ್ಚ್ ದೆಗೆನ್ ರಾವಯ್ಲೆಂ. ಆನಿಂ ಸೂಟ್ಕೇಸಿಂತ್ಲಿ, ಬ್ಲ್ಯಾಕ್-ಲೇಬಲ್ ಸ್ಕೋಚಾಚಿ ಬೋತ್ಲ್ ಭಾಯ್ರ್ ಕಾಡ್ಲಿ. ಬರೆ ಲಾಂಬ್ ಚಾರ್ ಘೋಟ್ ತಾಣೆಂ ಘೊಟ್ಲೆ. ಆತಾಂ ತಾಳೊ ಆನಿ ಪೋಟ್ ಮಾತ್ಸೆಂ ಲಾಸುನ್, ಸ್ಕೋಚಾಚಿ ಊಬ್ ಮತಿಕ್ ಊಬ್ ದೀವ್ನ್ ಆಸ್ತಾಂ…ತಾಣೆಂ ಧೀರ್ಘ್ ಸ್ವಾಸ್ ಸೊಡ್ಲೊ. ಆನಿ ಪರತ್ ಕಾರ್ ಸ್ಟಾರ್ಟ್ ಕರಿಲಾಗ್ಲೊ.
ಸುಮಾರ್ ಸಾತಾಟ್ ಮಿನುಟಾಂನಿಂ ಪರತ್ ಕಾರ್ ಘಾಢ್ ಅಂದ್ಕಾರಾಂತ್ ಧಾಂವೊಕ್ ಲಾಗ್ಲೆಂ. ಅಶೆಂ ಧಾಂವಾತ್ತ್ ಆಸ್ತಾಂ… ತ್ಯಾಎಕಾ ಘಡ್ಯೆ ಎಕಾಚ್ಚಾಣೆಂ ಕಾರ್, ರಸ್ತ್ಯಾ ಮಧೆಂಚ್ಚ್ ಬಂದ್ ಪಡ್ಲೆಂ!
‘ಅರೆ ಕಿತೆಂ ಜಾಲೆಂ?!’ ಮ್ಹಣ್ ಪರತ್ ಕೀ ಘುಂವ್ಡಾವ್ನ್, ಸ್ಟಾರ್ಟ್ ಕರುಂಕ್ ಪ್ರೇತನ್ ಆಸ್ತಾನಾಂಚ್ಚ್, ಭಾಯ್ಲ್ಯಾನ್…‘ಡಭ್ಭ್…ಢಭ್ಭ್’…!…ಕಾರಾಚೆಂ ದಾರ್ ಬಡಂವ್ಚೊ ಆವಾಜ್ ಜಾಲೊ!. ಆತಾಂ …ಸಟ್ಟ್ ಕರುನ್ ತಾಣೆಂ ದೆಗೆನ್ ಪಳೆಲೆಂ.
ಥಂಯ್ಸರ್ ಪಳೆತಾಂ…ಖಿಣಾನ್ ತಾಚೆ ದೊಳೆ ರುಂದಾಲೆ. ದಾರಾ ಭಾಯ್ರ್…ಶಿರಾಂಧಾರಿ ಪಾವ್ಸಾ ಮಧೆಂ ಏಕ್ ಅಪರಿಚಿತ್ ವೆಕ್ತಿ ಉಬಿ ಆಸ್ಲ್ಲಿ!
ತ್ಯಾಘಡ್ಯೆ…‘ಕೋಣ್ ಹೊ?!’ ಮ್ಹಳ್ಳ್ಯಾ ಮಿಸ್ತೆರಾಕ್ ಸಾಂಪೊಡ್ಲೊ. ತವಳ್ಚ್ಚ್ …ಎಕಾಚ್ಚಾಣೆಂ ಕಾರಾಚೆಂ ದಾರ್ ಉಗ್ತೆಂ ಜಾಲೆಂ!. ಆನಿ ತೊ ಅಪರಿಚಿತ್ ವೆಕ್ತಿ, ಜಬರ್ದಸ್ತೆನ್ ಮ್ಹಳ್ಳೆಪರಿಂ ಕಾರಾ ಭಿತರ್ ರಿಗ್ಲೊ!!
‘ಕಸೆಲೆಂ ಹೆಂ?!. ಕಾರಾಚೆಂ ದಾರ್ ಲೋಕ್ ಕರ್ನ್ ಆಸ್ಲ್ಲೆಂ! ತಶೆಂ ತರ್ ಹೊ ಕಸೊ ಭಿತರ್ ರಿಗ್ಲೊ?!’ ಮ್ಹಳ್ಳ್ಯಾ ಗೊಂದೊಳಾಂತ್ ಓಜ್ವಲ್ಡ್ ಮಿಸ್ಳೊನ್ ಆಸ್ತಾನಾಂಚ್ಚ್… ಅಪರಿಚಿತಾಚೊ ತಾಳೊ ಉಟ್ಲೊ…
“ಮಾಕಾ ಹಾಂಗಾಚ್ಚ್ ದೋನ್ ಕಿಲೊಮೀಟರ್ ಪಯ್ಸ್ ಆಸ್ಚ್ಯಾ ಸಾಂ. ಆಂತೊನಿಚ್ಯಾ ಇಗರ್ಜೆಕ್ ವಚುಂಕ್ ಜಾಯ್.”
ತ್ಯಾ ಘಡ್ಯೆ , ತಾಕಾ…ತಾಚಿ ಹಿ ವಿನಂತಿಗೀ ಯಾ ಆಜ್ನಾಂಗೀ ಮ್ಹಣ್ ಹಾಕಾ ಪಾರ್ಕುಂಕ್ ಜಾಲೆಂನಾಂ. ತರೀ ತಾಚೆ ಥಾವ್ನ್ ಚುಕಾರಿ ಮಾರ್ಚ್ಯಾ ಪ್ರೇತನಾರ್ ವಿಚಾರಿಲಾಗ್ಲೊ…“ಇಗರ್ಜೆಕ್ ?!… ಹ್ಯಾ ಮದ್ಯಾನೆ ರಾತಿಂ…?!”.
“ಮದ್ಯಾನೆ ರಾತ್.?!…ಕಿತೆಂ ಮ್ಹಣ್ತಾಯ್ ತುಂ. ವೊರಾಂ ಪಳೆ…” ಮ್ಹಣಾಲೊ ತೊ.
ಖಿಣಾನ್ ಹಾಣೆಂ ವೊರಾ ಪಳೆಲಿಂ. ‘ವ್ಹಯ್…! ವೊರಾಂ ಧಾ!.’ ಓಜ್ವಲ್ಡ್ ಮಿಸ್ತೆರಾ ವಿಜ್ಮಿತೆಕ್ ಶಿರ್ಕಾಲೊ.
ತವಳ್ಚ್ ಅಪರಿಚಿತಾಚೊ ತಾಳೊ ಪರತ್ ಉಟ್ಲೊ…“ಆತಾಂ ಯಾ. ಮಾಕಾ ತುರ್ತಾನ್…ಕುಮ್ಸಾರ್ ಜಾಂವ್ಕ್ ಜಾಯ್!.” ಅಮ್ಸರಿಲಾಗ್ಲೊ ತೊ.
“ಹ್ಯಾರಾತಿಂ…ಕುಮ್ಸಾರ್?!” ಪರತ್ ಉಧ್ಗಾರ್ಲೊ ಹೊ ಯಾಂತ್ರಿಕ್ ಥರಾನ್.
“ರಿಸ್ಕೆಂತ್ಲ್ಯಾ ಕುಮ್ಸಾರಾಕ್, ರಾತ್ ಆನಿ ದೀಸ್ ಮ್ಹಣ್ ನಾಂ. ಆತಾಂ ತುಂ ಘಳಾಯ್ ಕರಿನಾಕಾ.”
ಹ್ಯಾಘಡ್ಯೆ ತಾಚೆ ಕುಶಿಕ್ ದೀಶ್ಟ್ ಘಾಲೊಂಕೀ ಧೈರ್ ನಾಸ್ತಾಂ…ಏಕ್ ಪಾವ್ಟಿಂ ಹಾಕಾ ಪಾವೊವ್ನ್, ಸುಟ್ಕಾ ಜೊಡ್ಯಾಂ ಮ್ಹಣ್ ಕಾರ್ ಸ್ಟಾರ್ಟ್ ಕರಿಲಾಗ್ಲೊ.
***
ಉಪ್ರಾಂತ್ಲ್ಯಾ ಪಂದ್ರಾ ಮಿನುಟಾಂನಿ…ಇಗರ್ಜೆ ಮುಕ್ಲ್ಯಾ ಕಾಳಾಕಾಂತ್, ಓಜ್ವಲ್ಡಾಚೊ ಪಾಂಯ್ ಬ್ರೇಕಿಚೆರ್ ಬಸ್ಲೊ. ತವಳ್ಚ್ ತಾಚೊ ತಾಳೊ ಪರತ್ ಉಟ್ಲೊ…
“ಕಶೆಂಯೀ ಜಾಲೆಂ. ಆನ್ಯೇಕ್ ಅರ್ದೊ ಘಂಟೊ ಹಾಂಗಾಸರ್ ರಾವ್. ಪ್ಲೀಜ್…!” ಉತ್ರಾಂ ಬರಾಬರ್ ಓಜ್ವಲ್ಡಾಚ್ಯಾ ಜಾಪೆಕ್ ರಾಕಾನಾಸ್ತಾಂ…ಅಪರಿಚಿತ್ ಕಾರಾ ಥಾವ್ನ್ ದೆವ್ಲೊ. ಆನಿಂ ಮುಕಾರ್ಚ್ ಆಸ್ಲೆಲ್ಯಾ ವಿಗಾರಾಚಾ ವಸ್ತೆ ಘರಾಚ್ಯಾ ಬಾಗ್ಲಾ ಕುಶಿನ್, ಅಮ್ಸರಿಂ ಮೆಟಾಂ ಘಾಲಿಲಾಗ್ಲೊ.
ಹ್ಯಾವೆಳಾ ಮಿಸ್ತೆರಾಂತ್ ಬುಡ್ಲೊಲೊ ಓಜ್ವಲ್ಡ್ ಪ್ರೇಮ್…ವಚೊಂಕೀ ನ್ಹಂಯ್ ರಾವೊಂಕೀ ನ್ಹಂಯ್ ಮ್ಹಳ್ಳ್ಯಾ ಗೊಂದೊಳಾರ್ ಆಸ್ತಾಂ…
“ಫಾದರ್…ಫಾದರ್…” ಮ್ಹಣೊನ್ ತೊ ಮಿಸ್ತೆರಾಚೊ ಅಪರಿಚಿತ್ ವೆಕ್ತಿ , ಪಾದ್ರ್ಯಾಬಾಚೆಂ ಬಾಗಿಲ್ ಬಡೊವ್ನ್ ಆಸ್ಲ್ಲೊ. ಥೊಡ್ಯಾಚ್ಚ್ ವೆಳಾನ್ ವೆರಾಂಡಾಚೊ ಮಂದ್ ಲೈಟ್ ಪೆಟ್ಲೊ. ತ್ಯಾ ಬರಾಬರ್…
“ಕೋಣ್?” ಮ್ಹಳ್ಳ್ಯಾ ಆಕಾಂತೆ ತಾಳ್ಯಾನ್, ಪಾದ್ರ್ಯಾಬಾಚೆಂ ಬಾಗ್ಲಾ ದೆಗೆಲೆಂ ಜನೆಲ್ ಉಗ್ತೆಂ ಜಾಲೆಂ. ಖಿಣಾನ್ ಜನೆಲಾಲಾಗಿಂ ಗೆಲ್ಲೊ ಅಪರಿಚಿತ್…ಶೀದಾ ವಿಶಯಾಕ್ಚ್ಚ್ ದೆಂವ್ಲೊ.
“ಫಾದರ್…ಮಾಕಾ ತುರ್ತಾನ್ ಕುಮ್ಸಾರ್ ಜಾಂವ್ಕ್ ಜಾಯ್.”
“ಕುಮ್ಸಾರ್?!…ಹ್ಯಾ ಮ್ಹದ್ಯಾನೆ ರಾತಿಂ?! ”
“ಕಿತೆಂ ಮ್ಹಣ್ತಾತ್ ಫಾದರ್ ತುಮಿಂ. ಕಸಲಿ ಮಧ್ಯಾನೆರಾತ್…ವೊರಾಂ ಪಳೆಯಾ…”
ತವಳ್ ಯೆಕಾಚ್ಚಾಣೆಂ ಘುಂವೊನ್ ಘಡಿಯಾಳ್ ಪಳೆಲ್ಲೊ ವಿಗಾರ್ ವಿಜ್ಮಿತೆನ್ ಬುಡ್ಲೊ.
‘ವೊರಾಂ ಧಾ ಜಾವ್ನ್ ಧಾ ಮಿನುಟಾಂ.!.’
ತ್ಯಾ ಘಡ್ಯೆ…ಭಿರಾಂತೆಚ್ಯಾ ಮಿಸ್ತೆರಾಂತ್ ಬುಡ್ಲೊಲೊ ವಿಗಾರ್ ಮ್ಹಣಾಲೊ…
“ಕಿತೆಂ ತರೀ…ಆತಾಂ ಇಗರ್ಜ್ ಧಾಂಪ್ಲ್ಯಾ ನೈಂವೇ…ತುಂ ಫಾಲ್ಯಾಂಚ್ಚ್ ಯೆ.”
“ಪ್ಲೀಜ್ ಫಾದರ್…ಇಗರ್ಜೆಂತ್ ಜಾಯ್ನಾಂ ತರ್…ಹಾಂಗಾಚ್ ಕುಮ್ಸಾರ್ ಕರಾ…ಹಾಂವ್ ತುಮ್ಕಾಂಚ್ ಮ್ಹಣ್ ಸೊದುನ್ ಆಯ್ಲಾಂ.!” ಅಪರಿಚಿತಾನ್ ಹಟ್ಟ್ ಸೊಡ್ಲೆಂನಾಂ. “ ಫಾದರ್ ಜಿಣಿ ಭರ್ ಹಾಂವ್ ‘ಆಜ್ ನಾಕಾ ಫಾಲ್ಯಾಂ ಜಾವ್ಯೆತ್.! ’ ಮ್ಹಣ್ ಸಾಂಗೊನ್ ಕುಮ್ಸಾರಾವಿಶಿಂ ಬೆಫಿಕೆರ್ ಕರುನ್, ದೀಸ್ ಲೊಟುನ್ ಆಸ್ಲ್ಲೊಂ.
ಆತಾಂ ಅಚಾನಕ್ ಅವ್ಘಡಾಕ್ ಶಿರ್ಕಾಲ್ಲ್ಯಾ ವೆಳಾ…ಯೆದೊಳ್ ಚುಕೊವ್ನ್ ಘೆತ್ಲೆಲ್ಯಾ ಕುಮ್ಸಾರಾ ವಿಶಿಂ ಹಾಂವ್ ಚುರ್ಚುರ್ಲೊಂ. ಆನಿ ‘ಮಾರ್ಟೀನಾ ಹಾಸ್ಪಿಟಲಾ’ ಥಾವ್ನ್ ಶೀದಾ ಹಾಂಗಾಸರ್ಚ್ಚ್ ಆಯ್ಲಾಂ! ಆನಿ ನಿತಳ್ ಕಾಳ್ಜಾಚ್ಯಾ, ತುಮ್ಚ್ಯಾ ಸರ್ಶಿಂಚ್ಚ್ ಕುಮ್ಸಾರ್ ಜಾಂವ್ಕ್ ಜಾಯ್!.” ಮ್ಹಳ್ಳ್ಯಾ ನಿರ್ಧಾರಾನ್ ತುಮ್ಚೆಲಾಗಿಂ ಆಯ್ಲಾಂ”. ಮ್ಹಣ್ ತುರ್ತ್ ಕರಿಲಾಗ್ಲೊ ಅಪರಿಚಿತ್.
ಆತಾಂ ಪಾದ್ರ್ಯಾಬ್ ತಾಚಾ ದಬಾವೆಕ್ ಶರಾಣಾಗತ್ ಜಾಲೊ. “ಜಾಯ್ತ್ ತರ್…” ಪುಸ್ಪುಸ್ಲೊ ತೊ. ಪೂಣ್ ಕಸಲ್ಯಾಗೀ ದುಬಾವಾನ್ ತಾಣೆಂ ಬಾಗಿಲ್ ಉಗ್ತೆಂ ಕೆಲೆಂನಾಂ. ಬದ್ಲಾ ಥಂಯ್ಚ್ ತ್ಯಾ ಜನೆಲಾಂತುನ್ಚ್ …ತೊ ಕುಮ್ಸಾರಾಕ್ ಆಯ್ತೊ ಜಾಲೊ!. ಆನಿ ದುಸ್ರ್ಯಾಚ್ಚ್-ಘಡ್ಯೆ…ಪಿಸ್ಪಿಸ್ಯಾ ಉತ್ರಾಂಚೆಂ ಕುಮ್ಸಾರ್ ಆರಂಭ್ ಜಾಲೆಂ.
ಆನಿ ತೀನ್ ಚಾರ್ ಮಿನುಟಾಂಚೆಂ ಕುಮ್ಸಾರ್ ಅಕೇರ್ ಜಾಲೆಂ. ಆನಿ ಆತಾಂ ಅಪರಿಚಿತ್, ಪಾದ್ರ್ಯಾಬಾಕ್ ಪಾಟ್ ಕರುನ್ ಕಾರಾ ಸರ್ಶಿಂ ಅಮ್ಸರಾಲಾಗ್ಲೊ. ತವಳ್ಚ್ಚ್ ಭಾಯ್ರ್ ಮೆಟಾಂ ಲಾಗಿಂ ಪಾದ್ರ್ಯಾಬಾಚೊ ತಾಳೊ ಆಯ್ಕೊಂಕ್ ಲಾಗ್ಲೊ. ತ್ಯಾ ಘಡ್ಯೆ ಮೆಟಾಲಾಗಿಂ ಪಾದ್ರ್ಯಾಬ್ ಆನಿ ಅಪರಿಚಿತ್ ಮುಖಾಮಖಿ ಉಬೆ ಆಸ್ಲ್ಲೆ.
“ಆತಾಂ ಕಠಿಣ್ ರಿಸ್ಕೆ ಸ್ತಿತಿಚೆರ್ ಆಸ್ಚೊ ತುಂ…ಶೀದಾ ಮಾರ್ಟೀನಾ ಹಾಸ್ಪಿಟಲಾಕ್ಚ್ಚ್ ವೆತಾಯ್ ಮೂ?. ತುಜಿ ಭಲಾಯ್ಕಿ ಸ್ಥಿತಿ ಬೋವ್ ಭಿಗಡ್ಲ್ಯಾ. ಹಾಂಗಾ ಥಾವ್ನ್ ಆನಿ ಖಂಯ್ಸರೀ ವಚಾನಾಕಾ . ತುಂ ಅಸಲ್ಲ್ಯಾ ಸ್ಥಿತೆರ್ ಇತ್ಲೆ ಪಯ್ಸ್ ಯೆಂವ್ಚ್ಯಾ ಬದ್ಲಾ…ವಾಟೆರ್ ಫಾತಿಮಾ ಇಗರ್ಜ್ ಆಸ್ಲ್ಲಿ ನೈಂವೇ. ತುಕಾ ಥಂಯ್ಚ್…”
“ಫಾದರ್ ಹಾಂವ್ ತ್ಯಾ ಯಾಜಾಕಾವಿಶಿಂ ಬರೆಂಚ್ಚ್ ಜಾಣಾಂ. ತಾಚೆಲಾಗಿಂ ಜಾಂವ್ಚ್ಯಾ ಕುಮ್ಸಾರಾಂ ವರ್ವಿಂ ಮ್ಹಜ್ಯಾ ಸಾಲ್ವಾಸಾಂವಾವಿಶಿಂ ಮಾಕಾ ದುಬಾವ್ ಮಾರ್ತಾ. ದೆಕುನ್… ” .
“ತೆಂ ಫಟ್.” ಮಧೆಂಚ್ಚ್ ತಾಳೊ ಕಾಡ್ಲೊ ವಿಗಾರಾನ್…“ಹೆಂ ತುಜೆಂ ರಾಜಾಂವ್!. ಹಾಂವ್ ತೆಂ ಮಾಂದಿನಾಂ!!. ಯಾಜಕ್ ತೊ ಕಸಲೊಯೀ ಜಾಂವ್ದಿ. ಕುಮ್ಸಾರಾವಿಶಿಂ ತೊ ಯೋಗ್ಯ್ಚ್ಚ್ ಜಾವ್ನ್ ಆಸ್ತಾ.”
“ತೆಂ ಕಿತೆಂಯೀ ಜಾಂವ್. ಜೆಜು ಭೋವ್ ಕಾಕುಳ್ದಾರ್ ಪಾತ್ಕಾಂ ಭೊಗ್ಸುಂಚೊ ಸೊಮಿ ಮ್ಹಳ್ಳೆಂ ಹಾಂವ್ ಭರ್ವಸ್ತಾಂ. ಕಶೆಂಯೀ ಆಸೊಂ. ತುಮ್ಚೆಂ ರಾಜಾಂವ್ ತುಮ್ಕಾಂ ಸಾರ್ಕೊ. ಮ್ಹಜೊ ವಾದ್ ಮಾಕಾ ಸಾರ್ಕೊ!”.
“ಹಾಂವ್ ಸಾಂಗ್ತಾಂ…ಜರ್ ಯಾಜಕ್ ಪಾತ್ಕಿ ತರ್…ತಾಚೆಂ ಲೇಖ್ ತೊ ದಿತೊಲೊ. ಯಾಜಕ್ ಕಸೊಲೊಯೀ ಜಾಂವ್…ಕುಮ್ಸಾರಾಚಾ ಫಳಾಕ್ ಯಾಜಕಾಚಿ ಜಿಣಿ ಲಾಗು ಜಾಯ್ನಾಂ.”.
“ತರೀ ಫಾದರ್…‘ತೊಯೀ ರಗ್ತಾ ಮಾಸಾಚೊ. ತಾಚೆಂ ಲೇಕ್ ತೊ ದಿತಾಲೊ.’ ಮ್ಹಣ್ ತಾಚೆ ಜಿಣ್ಯೆವಿಶಿಂ ತುಮ್ಚ್ಯಾ ತಸಲ್ಯಾ ನಿತಳ್ ನಿಸ್ಕಳ್ ಪ್ರಾಮಾಣಿಕ್ ಯಾಜಕಾಂನಿಂ , ತಸಲ್ಯಾಂಚ್ಯಾ ಜಿಣಿಯೆಕ್ ಬೆಫಿಕೆರ್ ಕರುನ್ ಮೌನ್ ಬಸ್ತಿತ್ ತರ್…ಕ್ರೀಸ್ತೀ ಲೊಕಾಚೊ, ಕ್ರಿಸ್ತೀ ಭಾವಾಡ್ತ್ ಧಂಡಳುಂಕ್, ತುಮಿಂ ಕಾರಣ್ ಜಾತೆಲ್ಯಾತ್. ಹ್ಯಾಖಾತಿರ್ ತುಮ್ಚ್ಯಾ ತಸಲ್ಯಾಂ ಯಾಜಕಾಂನಿಂ ದೆವಾಕ್ ಲೇಕ್ ದೀಂವ್ಕ್ ಆಸ್ತಾಲೆಂ!.”
ಕಾಳ್ಜಾಕ್ ಜಾಗಂವ್ಚಿ ತಾಚಿ ಹಿಂ ಉತ್ರಾಂ, ವಿಗಾರಾಕ್ ಮಾತ್ಸೆಂ ಚಿಂತುಂಕ್ ಕರ್ತಾನಾಂ…ಹೊ ಅಪರಿಚಿತ್ ವಿಗಾರಾಚಾ ಪ್ರತಿಕ್ರಿಯೆಕ್ ರಾಕಾನಾಸ್ತಾಂ…ಕಾರಾಸರ್ಶಿಂ ಸರಾರಾಂ ಮೆಟಾಂ ಘಾಲುಂಕ್ ಲಾಗ್ಲೊ.
ಉಪ್ರಾಂತ್ಲ್ಯಾ ಥೊಡ್ಯಾ ವೆಳಾನ್…ತೊ ಅಪರಿಚಿತ್ ವೆಕ್ತಿ ಕಾರಾ ಭಿತರ್ ರಿಗ್ತಾಸ್ತಾನಾಂ. ಮ್ಹಣಾಲೊ…“ಭಾವಾ ಮಾಕಾ ಆನ್ಯೇಕ್ ಲ್ಹಾನ್ ಉಪ್ಕಾರ್ ತುಂವೆ ಕರುಂಕ್ ಜಾಯ್…ಪ್ಲೀಜ್…ಆಯ್ಕ್…”
‘ಆತಾಂ ಆನಿ ಕಸಲೆಂ ಹಾಚೆಂ?’…ಮ್ಹಣ್…ಓಜ್ವಳ್ಡ್ ಪ್ರೇಮ್ ಮತಿಂ ನಾಖುಶಿ ದಾಕಯ್ತ್ ವಿಚಾರಿಲಾಗ್ಲೊ…
“ಕಸಲೆ…ತೆಂ?!”.
“ಹಾಂವ್…‘ಆಜ್ ನಾಕಾ ಫಾಲ್ಯಾಂ’ ಮ್ಹಣ್ ಮ್ಹಜೆಂ ಕುಮ್ಸಾರ್ ಚುಕಯ್ತ್ ಆಸ್ಲ್ಲೊಂ. ತ್ಯಾವರ್ವಿಂ…ಮ್ಹಜ್ಯಾ ಕುಮ್ಸಾರಾ ವಿಶಿಂ ಮ್ಹಜಿ ಪತಿಣ್ ಕೆನ್ನಾಂಯೀ ದೆವಾಲಾಗಿಂ ಮಾಗಾತ್ತ್ ಆಸ್ಲ್ಲಿ. ಹ್ಯಾವಿಶಿಂ ತವಳ್ ತವಳ್ ಮಾಕಾ ಜಾಗಯ್ತ್, ತಿ ಮ್ಹಜ್ಯಾ ಸಲ್ವಾಸಾಂವಾಚ್ಯಾ ಖಂತಿರ್ಚ್ಚ್ ಆಸ್ತಾಲಿ”.
“…ಆನಿ ಆತಾಂ ಹಾಂವ್ ಅವ್ಘಡಾಕ್ ಶಿರ್ಕಾಲ್ಲ್ಯಾವೆಳಾ…‘ಹಾಂವ್ ಕುಮ್ಸಾರ್ ಜಾಂವ್ಕ್ ಸಖಾನಾಂ!’ ಮ್ಹಳ್ಳ್ಯಾವಿಶಿಂ ತಿ ಮನೋ ಆಘಾತೆರ್ ಆಸಾ. ಆತಾಂ ತಿಚ್ಯಾ ಭಲಾಯ್ಕೆವಿಶಿಂ… ಹಾಂವ್ ಖಂತೆರ್ ಆಸಾಂ. ತ್ಯಾದೆಕುನ್… ದಯಾಕರುನ್ ತುಂವೆಂ ವಚೊನ್ ತಿಕಾ ಖುಧ್ದ್ ಮೆಳೊಂಕ್ ಜಾಯ್. ಆನಿ… ‘ಹಾಂವ್ ಕುಮ್ಸಾರ್ ಜಾಲೊಂ!’ ಮ್ಹಳ್ಳ್ಯಾವಿಶಿಂ ತಿಕಾ ತಿಳ್ಸುನ್ ಸಮಧಾನ್ ಕರುಂಕ್ ಜಾಯ್…ಪ್ಲೀಜ್…” ಇತ್ಲೆಂ ಸಾಂಗ್ಲ್ಲ್ಯಾಚ್ಚ್ ಖಿಣಾ, ತೊ ಕಾರಾ ಥಾವ್ನ್ ಸಕ್ಲಾ ದೆವ್ಲೊ. ಆನಿ ಕಾರಾ ಥಾವ್ನ್ ವೆಗ್ಳೊ ಜಾಲೊ!.ಆನಿ ತೊ ಚಲಾತ್ತ್ ರಾವ್ಲೊ. ಹೆಂ ಪಳೆವ್ನ್ ಹೊ ಆಜಾಪ್ಲೊ. ಆನಿ ಬೊಬಾಟ್ಲೊ…
“ಹಲೋ…ರಾವ್. ತುಂವೆಂ ತುಜೊ ಘರ್ಚೊ ವಿಳಾಸ್ ಸಾಂಗ್ಲೊನಾಂಯ್.!”
ಪೂಣ್ ಹೆಂ ತಾಕಾ ಆಯ್ಕಾಲೆಂ ಯಾ ನಾಂ…ಪೂಣ್ ತೊ ಚಲ್ತೇ ಆಸ್ಲ್ಲೊ!. ಆತಾಂ ಸಟ್ಟ್ ಕರುನ್ ಪ್ರೇಮ್ ಕಾರಾ ಥಾವ್ನ್ ದೆಂವ್ಲೊ. ಆನಿ ವ್ಹಡಾನ್ ತಾಳೊ ಕಾಡ್ಲೊ…
“ಹಲೊ….ತುಜೆಂ ನಾಂವ್ ಕಿತೆಂ…ನಾಂವ್ ತರೀ ಸಾಂಗ್.”
ಆತಾಂ ಎಕಾಚ್ಚಾಣೆಂ ತೊ ರಾವ್ಲೊ. ಆನಿ ಘಂವೊನ್ ಮ್ಹಣಾಲೊ…
“ಮಾರ್ಕ್…ಮಾರ್ಕ್ ಕರ್ನೆಲಿಯೊ.”
***
ತಿ ಸಗ್ಳಿ ರಾತ್, ಪ್ರೇಮ್ ತ್ಯಾ ಅಪರಿಚಿತಾಚ್ಯಾ ಮಿಸ್ತೆರಾ ಘಡಿತಾಂ, ಮತಿಂತ್ ಆಟಾವ್ನ್ ನಿದೆಕ್ ಶರಣಾಗತ್ ಜಾತಾಸ್ತಾಂ, ಫಾಂತೆಂ ಜಾಲ್ಲೆಂ.!.
ಆನಿಂ ದುಸ್ರೆ ಸಕಾಳಿಂ…ಸೊ ವರಾರ್ ತಾಚೆಂ ‘ಎಲಾರ್ಮ್’ ತಾಕಾ ಖೊಟಾವ್ನ್ ಜಾಗಯ್ತಾಸ್ತಾಂ…ಸಟ್ಟ್ ಕರುನ್ ತಾಚ್ಯಾ ಉಗ್ಡಾಸಾಕ್ ಆಯ್ಲೊ…ಮಾರ್ಕ್ ಕರ್ನೆಲಿಯೊ.!. .
‘ಮ್ಹಜಾ ಪತಿಣೆಕ್, ಹಾಂವ್ ಕುಮ್ಸಾರ್ ಜಾಲ್ಲೊ ವಿಶಯ್ ದಯಾಕರುನ್ ತಿಳ್ಸಿ!.’.ಆತಾಂ ಹ್ಯಾ ಗಜಾಲೆಕ್ ದೆಂವ್ತಾಸ್ತಾಂ…ಓಜ್ವಲ್ಡ್ ಪ್ರೇಮಾಕ್ ದೋನ್ ಗಜಾಲಿ ಧೊಸುಂಕ್ ಲಾಗ್ಲ್ಯೊ. ಏಕ್…ತೊ ಅಪರಿಚಿತ್ ಮಾರ್ಕ್ ಕಿತ್ಯಾ ಖುದ್ ಪತಿಣೆಕ್ ತಿಳ್ಸುಂಕ್ ವೊಚೊಂಕ್ನಾಂ?!. ದುಸ್ರೆಂ…ಮಾರ್ಕಾಚ್ಯಾ ಘರ್ಚೊ ವಿಳಾಸ್.!…
ಪೂಣ್ ಕಿತೆಂ ತರೀ ಹ್ಯಾವಿಶಿಂ ಚಿಂತುಂನ್ ವೊಗೊ ರಾಂವ್ಚೆಂ ಸಾರ್ಕೆಂ ನ್ಹಂಯ್. ಕಸಲಿ ತರೀ ಆಕಾಂತೆರ್ ತೊ ಆಸಾ ಜಾಯ್ಜಾಯ್. ಕಿತೆಂಯೀ ಜಾಂವ್ ಆತಾಂ ಏಕ್ ಪಾವ್ಟಿಂ, ಮಾರ್ಕಾಚಿ ಆಶಾ ಸುಫಳ್ ಕರ್ಯಾಂ ಮ್ಹಳ್ಳ್ಯಾ ನಿರ್ಧಾರಾನ್, ಪ್ರಥಮ್ ಜಾವ್ನ್ ಮಾರ್ಕಾಚೆಂ ಘರ್ ಸೊದ್ಚ್ಯಾ ಪ್ರಕ್ರಿಯೆರ್ ತೊ ವೆಸ್ತ್ ಜಾಲೊ.
ಹ್ಯಾವೆಳಾ ಸಟ್ಟ್ ಕರುನ್ ಫಿರ್ಗಜ್ ವಿಗಾರಾನ್, ಅಪರಿಚಿತಾಕ್ ಜಾಗಯಿಲ್ಲ್ಯಾ ಹಾಸ್ಪಿಟಲಾಚೆಂ ನಾಂವ್ ಮತಿಕ್ ಝಳ್ಕಾಲೆಂ.
‘ಮಾರ್ಟೀನಾ ಹಾಸ್ಪಿಟಲ್’
ಖಿಣಾನ್ ತೊ…ಮಾರ್ಟೀನಾ ಹಾಸ್ಪಿಟಲಾಕ್ ಭೆಟ್ ದಿಂವ್ಚ್ಯಾ ಅಮ್ಸರೆರ್ ಪಡ್ಲೊ. ಸುಮಾರ್ ಮುಕ್ಕಾಲ್ ವೊರಾನ್, ಮಾರ್ಟಿನಾ ಹಾಸ್ಪಿಟಲಾಂತ್ ತಾಕಾ ಜಾಯ್ ತಿ ಮಾಹೆತ್ ಮೆಳ್ಳಿ. ತ್ಯಾ ಮಾಹೆತೆ ಪರ್ಮಾಣೆಂ…
‘ರಿಯೆಲ್ ಎಸ್ಟೇಟ್’ ವೆವಹಾರಾಂತ್ ಆಸ್ಲೊಲೊ ಮಾರ್ಕ್ ಕರ್ನೆಲಿಯೊ…ತಾಚೆಂ ಬಾಂದ್ಪಾ ಕಾಮ್ ಚಲುನ್ ಆಸ್ಚ್ಯಾ ಎಕಾ ಕಟ್ಟೋಣಾಚಾ ತಿಸ್ರ್ಯಾಮಾಳಿಯೆ ಥಾವ್ನ್…ಅಚಾನಕ್ ಜಾವ್ನ್ ಪಡ್ಲೊ. ಆನಿ ಮಾರ್ಟೀನಾ ಹಾಸ್ಪಿಟಲಾಂತ್ ದಾಖಲ್ ಜಾಲೊ.
ಥಂಯ್ಸರ್ ‘ಕೋಮಾ’ ಸ್ಥಿತೆರ್ ತೊ ಆಸ್ಲೆಲ್ಯಾ ತಾಕಾ…ತಾಚಾ ಭಲಾಯ್ಕೆ ಸುದ್ರಾಪಾಚಾ ಆಶೆನ್, ಪಾಂಚ್ ದಿಸಾಂ ಆದಿಂ ತಾಚಾ ಕುಟ್ಮಾದಾರಾಂನಿಂ ಮಾರ್ಟೀನಾ ಹಾಸ್ಪಿಟಲಾ ಥಾವ್ನ್ ದುಸ್ರ್ಯಾ ಹಾಸ್ಪಿಟಲಾಕ್ ಶಿಫ್ಟ್ ಕೆಲಾಂ. ತ್ಯಾನಂತರ್… ‘ಖಂಯ್…ಕಿತೆಂ ಜಾಲೆಂ?!’ ಮ್ಹಳ್ಳಿ ಮಾಹೆತ್ ಪ್ರೇಮಾಕ್ ಥಂಯ್ಸರ್ ಮೆಳ್ಳಿನಾಂ. ತರೀ ಥಂಯ್ಸರ್ ಮಾರ್ಕಾಚ್ಯಾ ಘರ್ಚೊ ವಿಳಾಸ್ ಮೆಳ್ಳೊ.
***
‘ಬ್ಲೋಸಮ್…ವಿಲ್ಲಾ’.
ತ್ಯಾ ದೊನ್ಪಾರಾಂ ಪ್ರೇಮ್… ‘ಬ್ಲೋಸಮ್ ವಿಲ್ಲಾ’ ಚ್ಯಾ ಗೆಟಿ ಮುಕಾರ್ ಪಾವ್ಲೊ.
ಥಂಯ್ಸರ್ ಗೆಟಿಲಾಗಿಂ…ಏಕ್ ಚಲಿ ಉಬಿ ಆಸ್ಲ್ಲಿ. ಆತಾಂ ತೊ ಕಾರಾ ಥಾವ್ನ್ ದೆಂವ್ಲೊ. ಆನಿ ತಿಂ ದೊಗೀಂ ಮುಖಾಮಖಿ ಜಾಲ್ಲ್ಯಾವೆಳಾ…
‘ಹೊ…ಕೋಣ್?!’ ಮ್ಹಣ್ ತಿ ಚಲಿ ಚಿಂತ್ತಾಸ್ತಾಂ…ಪ್ರೇಮಾನ್ ಆಪ್ಲೆ ವೋಂಟ್ ವೆಗ್ಳೆ ಕೆಲೆ…
”ಮಾರ್ಕ್ ಕರ್ನೆಲಿಯೊಚೆಂ ಘರ್ ಹೆಂಚ್ಚ್ಗೀ?”
“ವ್ಹಯ್…ಹಾಂವ್ ತಾಚಿ ಧುವ್.”.
ಹೆಂ ಆಯ್ಕಾಲ್ಲೆಂಚ್ಚ್ ಪ್ರೇಮಾನ್… “ ತುಜಿ ಮಾಮ್ಮಿ ಘರಾ ಆಸಾ?” ಮ್ಹಣ್ ವಿಚಾರಿಲಾಗ್ಲೊ.
“ತಿ ಘರಾ ನಾಂ. ಥಂಯ್ಸರ್ ಆಸಾ ” ಮ್ಹಣೊನ್ ತಿ ಚಲಿ ಉಜ್ವ್ಯಾ ಕುಶಿಕ್ ಬೋಟ್ ಜೊಕುನ್ ಮ್ಹಣಾಲಿ. ಪಾಗೊರಾ ದೆಗೆಲ್ಯಾ ಆನ್ಯೇಕಾ ಗೆಟಿ ಕುಶಿನ್ ಪಳೆಲಾಗ್ಲೊ ಓಜ್ವಳ್ಡ್. ಥಂಯ್ಸರ್ ತಾಣೆಂ ಪಳೆಲಿ…
‘ಸಿಮೆಸ್ತ್ರ್…!’
ಹೆಂ ಪಳೆಲ್ಲೆಂಚ್ಚ್…ಹೊ ಥಟಕ್ಕ್ ಜಾಲೊ. ಆತಾಂ ಆದ್ಲ್ಯಾರಾತಿಂ ಮಿಸ್ತೆರಾಂತ್ ಶಿರ್ಕಾಲ್ಲ್ಯಾಪರಿಂ ಆತಾಂಯೀ ತೊ ಮಿಸ್ತೆರಾನ್ ಭರ್ಲೊ. ಆನಿ ತ್ಯಾ ಸಿಮೆತ್ರೆ ಗೆಟಿ ಕುಶಿನ್ ಮೆಟಾಂ ಘಾಲುಂಕ್ ಲಾಗ್ಲೊ.
ಗೆಟಿಲಾಗಿಂ ಪಾವ್ತಾ… ತಾಚಿ ದೀಶ್ಟ್ ಸಿಮೆಸ್ತ್ರೆ ಭಿತರ್ಲ್ಯಾ ಎಕಾ ಫೊಂಡಾ ಕುಶಿನ್ ಖಂಚೊನ್ ರಾವ್ಲಿ. ಥಂಯ್ಸರ್…
ಉಬಿ ಆಸ್ಲ್ಲಿ ಏಕ್…ಸ್ತ್ರೀ.!.
‘ತಿಚ್ಚ್ ಮಾರ್ಕಾಚಿ ಸ್ತ್ರೀ?!’…ಖಂಡಿತ್ ಕೆಲೆಂ ಹಾಣೆಂ. ಆನಿ ತ್ಯಾ ಬರಾಬರ್ ತಾಚೆ ಪಾಂಯ್ ಚುರುಕ್ ಜಾಲೆ. ಆನಿ ತಿ ಸ್ತ್ರೀ ಉಬಿ ಆಸ್ಚ್ಯಾ ಫೊಂಡಾ ಸರ್ಶಿಂ ಅಮ್ಸರ್ಲೆ.
ಥೊಡ್ಯಾ ಸೆಕುಂದಾಂನಿಂ ತಿಚ್ಯಾ ಸಮ್ಕೊರ್ ಮ್ಹಳ್ಳೆಪರಿಂ, ಥೊಡ್ಯಾಚ್ಚ್ ಅಂತರಾರ್ ತೊ ಉಬೊ ಜಾಲೊ. ತಿ ಮಾಗ್ಣೆಂ ಕರಿತ್ತ್ ಆಸ್ಲ್ಲಿ. ಆನಿ ತ್ಯಾಚ್ಚ್ ಘಡ್ಯೆ… ಹಾಚಿ ಆತುರಾಯೆಚೆ ದೀಶ್ಟ್ ತ್ಯಾ ನವ್ಯಾಚ್ಚ್ ಫೊಂಡಾರ್ ಉಬೊ ಕೆಲ್ಲ್ಯಾ ಕಾಳ್ಯಾ ಖುರ್ಸಾಚೆರ್ ಬಸ್ಲಿ. ಆನಿ ತಾಚೆರ್ ಆಸ್ಚ್ಯಾ ಧೊವ್ಯಾ ಪೈಂಟಾಚ್ಯಾ ಬರ್ಪಾಂ ಥಂಯ್ ಖಂಚ್ಲಿ. ವಾಚ್ತಾಂ ವಾಚ್ತಾಂ…
ಯಾಂತ್ರಿಕ್ ಥರಾನ್ ತಾಚೆ ದೊಳೆ ರುಂದಾಲೆ!. ಆನಿ ತೊ ವಾಚ್ತಾಂ ವಾಚ್ತಾಂ…ಎಕಾಎಕಿ ತೊ ಉಬಿ ಆಸ್ಲೆಲಿ ಧರ್ನ್ ಕೊಸ್ಳಾತಾ ಪರಿಂ ತಾಕಾ ಭೊಗಾಲಾಗ್ಲೆಂ!!.
ಥಂಯ್ಸರ್…ಖುರ್ಸಾರ್ ಬರವ್ನ್ ಆಸ್ಲ್ಲೆಂ…
‘ಮಾರ್ಕ್ ಕರ್ನೆಲಿಯೊ…!’… ‘ಆನಿ ತಿ ತೀನ್ ದಿಸಾಂ ಆದ್ಲಿ ತಾರೀಕ್!!.’
ಹೆಂ..ಪಳೆತಾಂ ತಾಚೆ ಧಡ್ಧಡೆ ದೊಡ್ತೆ ಜಾಲೆ.! ಆನಿ ತಾಚ್ಯಾ ಪಾಟಿಂಚ್ಯಾ ಕಣಾಂತ್ಲ್ಯಾನ್ ಬರ್ಫ್ ಧಾಂವಾಲಾಗ್ಲೆಂ.! ಆದ್ಲ್ಯಾ ರಾತಿಂ ಭೆಟ್ಲೊಲೊ ತೊ ಅಪರಿಚಿತ್ ಸೈರೊ ಮಾರ್ಕ್…
‘ತೀನ್ ದಿಸಾಂ ಆದಿಂಚ್ ಹ್ಯಾ ಫೊಂಡಾಕ್ ಪಾವ್ಲಾ.!’.
ಹೆಂ ಮತಿಂತ್ ವಯ್ರ್ ವಯ್ರ್ ಜಗ್ಲಾತ್ತ್ ಆಸ್ತಾಂ…ಆಜಾಪಾಂತ್ ಬುಡ್ಲೊಲೊ ತೊ ಧಿಗ್ಭ್ರಾಂತ್ ಜಾವ್ನ್, ಏಕ್ ಘಡಿ ತಸೊಚ್ಚ್ ಉಬೊ ಜಾಲೊ.!! ತಾಚ್ಯಾ ಮತಿಂ ಆದ್ಲ್ಯಾ ರಾತಿಂಚಿಂ ತಿಂ ಘಡಿತಾಂ ಎಕಾಪಾಟ್ ಏಕ್ ಜಗ್ಲೊಂಕ್ ಲಾಗ್ಲಿಂ…
‘ಶಿರಾಂದಾರಿ ಪಾವ್ಸಾ ಮಧೆಂ…ಕಾರಾಕ್ ಲೋಕ್ ಘಾಲ್ನ್ ಆಸ್ಲೆಲೆಂ ತರೀ, ಕಾರಾಚೆಂ ಬಾಗಿಲ್ ಉಗ್ತೆಂ ಕರುನ್ ಭಿತರ್ ರಿಗ್ಲೊಲೊ ಮಾರ್ಕ್!… ಮಧ್ಯಾನೆ ರಾತಿಂ ಸಾಡೆ ಇಕ್ರಾ ವೊರಾರ್, ಆಪ್ಲೆಂ ರಿಸ್ಟ್-ವಾಚ್, ಫಕತ್ತ್ ಧಾ ವೊರಾಂ ದಾಕವ್ನ್ ಆಸ್ಲೆಂಲೆಂ…
ಇಗರ್ಜೆಕ್ ಪಾವ್ಲೆಲ್ಯಾ ತ್ಯಾ ಮಧ್ಯಾನೆಂ ರಾತಿಂ, ವಿಗಾರಾಕ್ ಯೀ ವಿಜ್ಮಿತೆನ್ ಬುಡೊವ್ನ್ …ತೊ ಕುಮ್ಸಾರ್ ಜಾಲ್ಲಿ ರೀತ್…!.’
ಹಿಂ ಸರ್ವ್ ಮಿಸ್ತೆರಾಂ ಘಡಿತಾಂ, ಮತಿಂ ಧಾಂವೊನ್ ಆಸ್ತಾಂ…ತೊ ಬಾರೀಕ್ ಕಾಂಪಾಲಾಗ್ಲೊ.!. ಆನಿ ಅಸಲ್ಲ್ಯಾ ಭಯಾನಕ್ ಚಿಂತ್ನಾನಿಂ ತೊ ಆಸ್ತಾಂ…ಫೊಂಡಾ ಮುಕ್ಲಿ ಸ್ತ್ರೀ…ಕೆನ್ನಾಂ ಥಂಯ್ ಥಾವ್ನ್ ವೆಗ್ಳಿ ಜಾಲಿ ಆನಿ ಕೆನ್ನಾಂ ತಿ ಸಿಮೆಸ್ತ್ರಿ ಭಾಯ್ರ್ ಪಾವ್ಲಿ ಮ್ಹಳ್ಳೆಂ ತೆಂ… ಹಾಕಾ ಕಳಿತ್ಚ್ಚ್ ಜಾಲೆಂನಾಂ. ಆತಾಂ ತ್ಯಾಘಡ್ಯೆ…
ಸಟ್ಟ್ ಕರುನ್ ತಾಕಾ ಧೊಸುಂಕ್ ಲಾಗ್ಲೆಂ…‘ತ್ಯಾ ಸಿಮೆತ್ರೆಂತ್…ಫಕತ್ತ್… ಆಮಿ ದೋಗ್!…’
ಎಕ್ಲೊ ಹಾಂವ್! ದುಸ್ರೊ…ಫೊಂಡಾಂತ್ಲೊ ಮಾರ್ಕ್!!.
‘ಜೀವಂತ್ ಆಸ್ಚೊ ಹಾಂವ್…ಆನಿ ಮರಣ್ ಪಾವ್ಲೊಲೊ…ಮಾರ್ಕ್…!!!.’
ಆತಾಂ ನಿಶಭ್ತೆತೆಚ್ಯಾ ತ್ಯಾ ನಿಗೂಢ್ ಘಡ್ಯೆ…ತಾಕಾ ತ್ಯಾ ಸಿಮೆತ್ರೆಚ್ಯಾ ಭಂವಾರಿ ದೀಶ್ಟ್ ಘಾಲುಂಕ್ಯೀ ಭಿರಾಂತ್.!. ಥಂಯ್ಸರ್ ರಾವೊಂಕೀ…ಭೆಂ. !.
ತ್ಯಾ ಘಡ್ಯೆ… ‘ಖಿಣಾನ್ … ಏಕ್ ಪಾವ್ಟಿಂ ಆಪ್ಲ್ಯಾ ಕಾರಾಸರ್ಶಿಂ ಪಾಂವ್ಯಾ…!’ ಮ್ಹಳ್ಳ್ಯಾ ಧಡ್ಧಡ್ಯಾ ಕಾಳ್ಜಾಚ್ಯಾ ಚಿಂತ್ಪಾನ್ …ಥಂಯ್ಸರ್ ಸಿಮೆತ್ರೆಂತ್ಲ್ಯಾ ತ್ಯಾ ಸಬಾರ್ ಫೊಂಡಾಂ ಮಧೆಂ…ವಿವಿಧ್ ಖುರ್ಸಾಂ ಮಧೆಂ…ತಾಣೆಂ ಧಾಂವ್ ಸುರು ಕೆಲಿ.
ತ್ಯಾ ಸಬಾರ್ ಫೊಂಡಾ ಮಧೆಂ ಧಾಂವಾತ್ತ್ ಆಸ್ತಾಂ..‘ಆಪುಣ್ ಕಾಂಯ್ ಫೊಂಡಾಂಕ್…ಖುರ್ಸಾಂಕ್ ಆಪ್ಟೊನ್ ಪಡ್ಲೊಂ…ತರ್?!.’… ಮ್ಹಳ್ಳೆಂ ಮರ್ಣಾ ಭೆಶ್ಟಾವ್ಣೆಚಿಂ ಚಿಂತ್ಪಾಂ ತಾಚ್ಯಾ ಪಾವ್ಲಾಂಕ್ ಕಠಿಣ್ ಕಾಂಪೊಂವ್ಕ್ ಕರ್ತಾಸ್ತಾಂ…‘ಆಪುಣ್ ಕಸೊ ತರೀ ಸಿಮೆತ್ರೆ ಭಾಯ್ರ್ ಪಡ್ತಾಂ’ ಮ್ಹಳ್ಳೆಲ್ಲ್ಯಾ ಕಠಿಣ್ ಭಿರಾಂತೆನ್ ಧಾಂವಾತ್ತ್ ರಾವ್ಲೊ.!
ಆನಿಂ ಧಾಂವೊನ್ ಧಾಂವೊನ್… ಕಸೊಯೀ ಗೆಟಿ ಲಾಗಿಂ ಪಾವ್ಲೊ. ಗೇಟ್ ಉತರ್ಲೊ. ಆನಿ ಭಾಯ್ರ್ ಪಡ್ಲೊ. ತ್ಯಾ ನಂತರೀ ತಾಚಿ ಧಾಂವ್ ರಾವ್ಲಿನಾಂ. ತ್ಯಾ ಭೆಂ ಭಿರಾಂತೆ ಧಾಂವ್ಣೆಂತ್ ತಾಕಾ…ಮಾರ್ಕಾಚೆಂ ಘರ್ ಉತ್ರೊನ್ ಗೆಲ್ಲೆಂಯೀ ಕಳಿತ್ ಜಾಲೆನಾಂ.!.
ತಶೆಂಚ್ಚ್ ತ್ಯಾವರ್ವಿಂ …ಮಾರ್ಕಾನ್ ಆಪ್ಲ್ಯಾ ಪತಿಣೆಕ್ ಸಾಂಗೊಂಕ್ ಸಾಂಗ್ಲೆಲೆಂ ‘ಆಪುಣ್ ಕುಮ್ಸಾರ್ ಜಾಲೊಂ!’ ಮ್ಹಳ್ಳೆಂ ತೆಂ…ಮಾರ್ಕಾಚ್ಯಾ ಪತಿಣೆಕ್ ಸಾಂಗೊಂಕೀ ತೊ ವಿಸ್ರಾಲ್ಲೊ!
ಆನಿ ನಿಮಾಣೆ ಕಸೊಯೀ ತೊ ಕಾರಾಲಾಗಿಂ ಪಾವ್ಲೊ. ಆನಿ ಅಮ್ಸರಿಂ ಅಮ್ಸರಿಂ ಕಾರಾಚೆಂ ದಾರ್ ಉಗ್ತೆಂ ಕರಿಲಾಗ್ಲೊ. ನಂತರ್ ಕಾರಾಚೊ ದಾರ್ ಧಾಂಪ್ಚೊ ಆವಾಜ್ ಉಟ್ತಾಸ್ತಾಂ…ತ್ಯಾಚ್ಚ್ ಘಡ್ಯೆ ಎಕಾಚ್ಚಾಣೆಂ ತಾಕಾ…
ತ್ಯಾ ದನ್ಪರಾಚ್ಯಾ ಕಠಿಣ್ ಧಗಿಕ್ಯೀ, ಕಾರಾ ಭಿತರ್, ಕಠಿಣ್ ಹಿಂವ್ ಧೊಸುಂಕ್ ಲಾಗ್ಲೆಂ.!. ಘಡ್ಯೆನ್ ತಾಚೆಂ ಆಂಗ್ ಕಠಿಣ್ ಹಿಂವಾನ್ ಕಡ್ಕಡುಂಕ್ ಲಾಗ್ಲೆಂ. ತವಳ್ಚ್ಚ್ ತಾಚಾ ಗಮನಾಕ್ ಆಯ್ಲೆಂ…
ಕಾರಾ ಭಿತರ್ ಭರೊನ್ ಆಸ್ಚೊ…ದಾಟ್ಟ್ ದೋವ್!
‘ಕಸಲೆಂ ಹೆಂ?!…ಕಿತೆಂ…ಕಸಲೆಂ ಹೆಂ?!’ ಮ್ಹಣ್ ತೊ ಸಗ್ಳೊಚ್ಚ್ ಮಿಸ್ತೆರಾಂತ್ ಸಾಂಪಡ್ನ್ ಆಸ್ತಾಂ…ತ್ಯಾ ದಾಟ್ಟ್ ದೊವಾ ಮಧೆಂ ಏಕ್ ತಾಳೊ ಆಯ್ಕಾಲೊ.!. ಘಡ್ಯೆನ್ ತಾಣೆಂ ತೊ ತಾಳೊ ಪಾರ್ಕಿಲೊ…
ಮಾರ್ಕ್!…ಮರಣ್ ಪಾವ್ಲೆಲ್ಯಾ ಮಾರ್ಕ್ ಕರ್ನೆಲಿಯೊಚೊ ತಾಳೊ!!.
“ಪ್ರೇಮ್…ಮ್ಹಜಾ ಪತಿಣೆಕ್…ಮ್ಹಜ್ಯಾ ಕುಮ್ಸಾರಾ ವಿಶಿಂ ತಿಳ್ಸೊಂಕ್ಚ್ಚ್ ನಾಂಯ್ ನ್ಹಂಯ್ವೆ…!”.
ಹೆಂ ಆಯ್ಕಾತಾಂ…ಏಕ್ ಪಾವ್ಟಿಂ ತಾಚ್ಯಾ ಕಾಳ್ಜಾಕ್ ಧೊಮೊಸ್ ಮಾರ್ಲೆಲ್ಯಾಪರಿಂ ಜಾಲೆಂ! ಆನಿ ದೋವ್ ಭರ್ಲೆಲ್ಯಾ ತ್ಯಾ ಕಠಿಣ್ ಥಂಡಾಯೆಂತ್ ಯೀ, ತೊ ಬರೊಚ್ಚ್ ಘಾಮೆಂವ್ಕ್ ಲಾಗ್ಲೊ.!!. ಆನಿ ಪಾಟಿಂ ಪಳೆವ್ಕ್ಯೀ ಧೈರ್ ನಾತ್ಲೆಲ್ಯಾ ತ್ಯಾಘಡ್ಯೆ… ಕಿತ್ಯಾಕ್ಗೀ ತಾಕಾ ತಾಚೆಂ ಮರಣಾ ಭೆಂ ಧೊಸುಂಕ್ ಲಾಗ್ಲೆಂ.!!!
ಆನಿ ಸಟ್ಟ್ ಕರುನ್ ಕಾರಾಚೆಂ ಬಾಗಿಲ್ ಉಗ್ತೆಂ ಕರುಂಕ್ ಉರ್ಡಾಲೊ. ಪೂಣ್ ನಾಂ…ಬಾಗಿಲ್ ಉಗ್ತೆಂ ಜಾಲೆಂನಾಂ! ಪರತ್ ಪರತ್ ತೊ ಉರ್ಡಾಲೊ…ಆನಿ ಉರ್ಡಾಲೊ…
ಆನಿ ತ್ಯಾ ಉರ್ಡೊವ್ಣೆಂತ್…ಕಾರಾಕ್ ಹಾತ್ ಪಾಂಯ್ ಮಾರುನ್ ತೊ ಧಡ್ಭಡೊಂಕ್ ಲಾಗ್ಲೊ!…ಧಡ್ಭಡುನ್ ಧಡ್ಭಡುನ್ ರಾವ್ಲೊ!!…
ಆನಿ ಕಾರಾ ಭಿತರ್ ಜಾವ್ನ್ ಆಸ್ಚೊ ತಾಚೊಚ್ಚ್ ತೊ, ಜೀವನ್ಮರಣಾ ಮಧೆಂ ಧಡ್ಭಡುನ್ ಆಸ್ಚೊ ಆವಾಜ್…ಪ್ರೇಮಾಕ್ ನಿಸ್ತೇಜ್ ಕರಿತ್ತ್ ಗೆಲೊ. ಆನಿ ತೊ ನಿಸ್ತೇಜ್ ಜಾಯ್ತ್ ಗೆಲೊ!!!.
■ ರೋನ್ ರೋಚ್ ಕಾಸ್ಸಿಯಾ
