ವಿಲ್ಫಿಕ್ ಜಿಣ್ಯೆಂತ್ ಕೊಣಾಯ್ಚಿ ವಾ ಕಿತ್ಯಾಚಿಯೀ ಖೊಡ್ ಕಾಡ್ಚಿ ಸವಯ್ ನಾತ್ಲ್ಲಿ. ಕಾಳ್ಯಾ ಮೊಡಾಂ ಭಂವ್ತಿಂ ಆಸ್ಚ್ಯಾ ರುಪ್ಯಾಳ್ಯಾ ದೆಗೆಚ್ಯೆರ್ ಚಡಿತ್ ಗಮನ್ ದಿಂವ್ಚೊ ಮನಿಸ್ ತೊ. ಕುಟ್ಮಾಚಿಂ ವ್ಹಡಿಲಾಂ ಬರಿಂ ಜಾಲ್ಯಾರ್, ಭುರ್ಗಿಂಯೀ ಬರಿಂ ಜಾತಾತ್ ಮ್ಹಳ್ಳ್ಯಾ ಸಾಂಗ್ಣೆಕ್ ತಾಂಚ್ಯೆಂ ಕುಟಾಮ್ ಏಕ್ ರುಜ್ವಾತ್.
ವಿಲ್ಫಿಚೊ ಬಾಪಯ್, ಕೊಣೀ ದಾಂಟ್ಟೊನ್ ಪಡ್ಲೊ ತರ್, ಹಾಸ್ಚ್ಯಾ ಬದ್ಲಾಕ್ ಹಾತ್ ದೀವ್ನ್ ಉಟೊಂಕ್ ಕುಮಕ್ ಕರ್ಚೊ, ಘರಾಂತ್, ಚುಕೊನ್ ಏಕ್ ಗ್ಲಾಸ್ ಫುಟ್ಲೊ ತರ್, ಗೊವ್ಜಿ ಕರ್ಚ್ಯಾ ಬದ್ಲಾಕ್, ವ್ಹಡ್ನಾ ನವೊ ಹಾಡ್ಲ್ಯಾರ್ ಸಯ್ ಮ್ಹಣ್ ಮ್ಹಣ್ಚೊ ಮನಿಸ್.
ವಿಲ್ಫಿಕ್ ಹೈಸ್ಕೂಲಾಂತ್ ಆಸ್ತಾನಾ, ಜೊರ್ಜ್ ಮ್ಹಳ್ಳ್ಯಾ ಎಕಾ ಉಪ್ರಾಳಿ ಚೆರ್ಕ್ಯಾಚಿ ವೊಳೊಕ್ ಜಾಲ್ಲಿ. ವಿಲ್ಫಿಕ್ ಬಾಸ್ಕೆಟ್ ಬೋಲ್ ಖೆಳ್ಚ್ಯಾಂತ್ ಬರಿಚ್ ಉರ್ಭಾ ಆಸ್ಲ್ಲಿ ಆನಿ ತಾಚ್ಯಾ ಉರ್ಭೆಕ್ ಲಾಗೊನ್, ತಾಂಚ್ಯಾ ಶಾಳೆಚ್ಯೆಂ ಟೀಮ್ ತವಳ್-ತವಳ್ ರಾಜ್ಯ್ ಮಟ್ಟಾಚ್ಯಾ ಸ್ಪರ್ಧ್ಯಾಂನಿ ಟ್ರೊಫಿ ಆಪ್ಣಾಯ್ತಾಲೆಂ.
ತಾಂಚ್ಯಾ ಟೀಮಾಚ್ಯೆಂ ಪ್ರೆಕ್ಟಿಸ್ ಪಳೆಂವ್ಕ್ ಯೆಂವ್ಚ್ಯಾ ಭುರ್ಗ್ಯಾಂ ಮಧೆಂ, ಜೊರ್ಜಿ ನಾಂವಾಚೊ ಏಕ್ ಉಪ್ರಾಳಿ ಚೆರ್ಕೊ, ಖೆಳಾಂತ್ ಕಸಲಿಯ್ ಉರ್ಭಾ ದಾಕಂವ್ಚ್ಯಾ ಬದ್ಲಾಕ್, ಕೊಣಾಚ್ಯೆಂ ಪುಣಿ ಜೆವಣ್ ಚೊರುನ್, ಕೊಣಾಕ್ ಪುಣಿ ಲೊಟುನ್ ಘಾಲುನ್, ಟಿಚೆರಾಕ್ ಕರಂದಾಯ್ ದೀವ್ನ್ ಮಝಾ ಭೊಗ್ತಾಲೊ.
ಪುಣ್ ಏಕ್ ದೀಸ್, ಜೊರ್ಜಿಚಿಂ ಅನ್ನಾಡ್ಪಣ್ ಮೀತ್ ಮಿರ್ವಾಲೆಂ ಆನಿ ತೊ ಎಕ್ಸುರೊ ಆಸ್ಲ್ಲ್ಯಾ ವೆಳಾರ್ ಥೊಡ್ಯಾ ಭುರ್ಗ್ಯಾಂನಿ ಮೆಳೊನ್ ತಾಕಾ ಬರೊಚ್ ಧಾಡಾಯ್ಲೊ. ಆಪ್ಲ್ಯಾ ಮಿತ್ರಾಂ ಸಂಗಿಂ ದರ್ಬಾರ್ ಉಲಂವ್ಚೊ ಜೊರ್ಜಿ, ಆಪ್ಲೆಸ್ತಕಿಂ ಪೊಳ್ಕುರೊ ಜಾವ್ನಾಸ್ಲ್ಲೊ. ಸಗ್ಳೊಚ್ ಥರ್ಥರೊನ್ ಉಟೊಂಕ್ ವದ್ದಾಡ್ಚ್ಯಾ ತಾಕಾ ಕುಮಕ್ ಕರುಂಕ್, ವಿಲ್ಫಿ ತ್ಯಾ ವಾಟೆನ್ ಆಯಿಲ್ಲೆಂ ಏಕ್ ನಿರ್ಮೊಣೆಂಚ್ ಮ್ಹಣ್ಯೆತೆಂ.
“ಅರೆ ಜೊರ್ಜಿ, ಕಿತೆಂ ಜಾಲೆಂ?” ವಿಲ್ಫಿನ್ ವಿಚಾರ್ಲೆಂ, ಧರ್ನಿ ವಯ್ಲೊ ಉಟೊಂಕ್ ವದ್ದಾಡ್ಚ್ಯಾ ಜೊರ್ಜಿಲಾಗಿಂ.
“ತುಕಾ ಕಿತೆಂ ಪಡೊನ್ ಗೆಲಾಂ, ನಿಕಳ್ ಹಾಂಗಾಚೊ,” ಜೊರ್ಜಿ ಮ್ಹಣಾಲೊ, ರಾಗಾನ್. ಜಾಲ್ಲ್ಯಾ ಅಕ್ಮಾನಾನ್, ತಾಚ್ಯೆ ವ್ಹಡ್ಲೆ ದೊಳೆ ತಾಂಬ್ಡೆ ಜಾಲ್ಲೆ ಮಾತ್ರ್ ನ್ಹಯ್, ಮಾರಾಂಚ್ಯಾ ದುಕಿನ್ ದುಕಾಂ ದೆಂವೊನ್ ಆಸ್ಲ್ಲಿಂ.
“ಕೊಣಾ ಕೊಣಾಕ್ ಉಪದ್ರ್ ಕೆಲ್ಯಾರ್ ಅಶೆಂಚ್ ಜಾಂವ್ಚೆಂ,” ವಿಲ್ಫಿ ಮ್ಹಣಾಲೊ, ರಾಜಾಂವ್ ಉಲವ್ನ್. “ತುಂ ಆಮ್ಚೆ ಸಾಂಗಾತಾ ಬಾಸ್ಕೆಟ್ ಬೋಲ್ ಕಿತ್ಯಾಕ್ ಖೆಳಾನಾಂಯ್? ತುಜಿ ಬಹಾದುರಿ ದಾಕಂವ್ಕ್ ಥಂಯ್ಸರ್ ಬರೊಚ್ ಆವ್ಕಾಸ್ ಆಸಾ, ಕಿತೆಂ ಮ್ಹಣ್ತಾಯ್?”
ಜೊರ್ಜಿ ಉಲಂವ್ಚ್ಯಾ ಸ್ಥಿತೆರ್ ನಾತ್ಲ್ಲೊ.
“ಕಾಂಯ್ ನಾಕಾ, ಏಕ್ ಚ್ಹಾ ಪಿಯೆಂವ್ಕ್ ಪುಣಿ ಯೆತಾಯ್?” ವಿಲ್ಫಿ ಮ್ಹಣಾಲೊ, ವತ್ತಾಯ್ ಕರುನ್.
ಚ್ಹಾ ಪಿಯೆತಾನಾ, ಜೊರ್ಜಿ ಚಿಕ್ಕೆ ಸುಡಾಳ್ ಜಾಲೊ ಆನಿ ಮ್ಹಣಾಲೊ, “ತುಕಾ ಸಮ್ಜನಾ, ವಿಲ್ಫಿ, ಹಾಂವ್ ಬಾಸ್ಕೆಟ್ ಬೋಲ್ ಖೆಳ್ತಾಂ ಮ್ಹಣ್ ಕಳ್ಳ್ಯಾರ್, ಘರಾ ಹಾಸೊಂಕ್ ಆಸಾತ್.”
“ಕಿತ್ಯಾಕ್?”
“ಮ್ಹಜ್ಯಾ ಬಾಪಾಯ್ಕ್ ಬಿಸ್ನೆಸ್ ಆಸಾ. ಹಾಂವೆಂಯೀ ತಾಚ್ಯೆಬರಿಚ್ ಜಾಯ್ಜೆ ಮ್ಹಣ್ ತಾಣೆ ಸಾಂಗ್ಲಾಂ.”
“ಆಯ್ಕ್, ಜೊರ್ಜಿ, ತುಂವೆಂ ಬಾಸ್ಕೆಟ್ ಬೋಲ್ ಖೆಳ್ಚ್ಯಾಕ್ ಆನಿ ಬಿಸ್ನೆಸ್ಮೆನ್ ಜಾಂವ್ಚ್ಯಾಕ್ ಕಸಲೊ ಸಂಬಂದ್? ತುಂ ತುಜಿ ಸಕತ್ ಉಪ್ಕಾರಾಕ್ ಪಡಾನಾತ್ಲ್ಲಿಂ ಕಾಮಾಂ ಕರುನ್ ಪಾಡ್ ಕರ್ತಾಯ್. ಹಾಂವ್ ಖೆಳ್ತಾಂ ಪುಣ್ ಮ್ಹಾಕಾ ಶಿಕೊಂಕ್ ಕಾಂಯ್ ತೊಂದ್ರೆ ಜಾಯ್ನಾಂತ್. ಕಿತೆಂ ಮ್ಹಣ್ತಾಯ್?”
ವಿಲ್ಫಿಚ್ಯಾ ಹಟಾಕ್ ಲಾಗೊನ್, ಜೊರ್ಜಿ ಬಾಸ್ಕೆಟ್ ಬೋಲ್ ಟಿಮಾಂತ್ ಸೆರ್ವಾಲೊ ಮಾತ್ರ್ ನ್ಹಯ್, ತಾಚ್ಯಾ ಮತಿಂತ್ಲ್ಯಾ ಉಚಾಂಬಳ್ ಚಿಂತ್ನಾಂಕ್ ಭಾಯ್ರ್ ಯೇಂವ್ಕ್ ಏಕ್ ವಾಟ್ ಮೆಳ್ಚ್ಯಾ ಸಂಗಿಂ ತಾಚ್ಯಾ ಜಿಣ್ಯೆಂತ್ ಶಿಸ್ತ್ಯೀ ಆಯ್ಲಿ.
ವಿಲ್ಫಿನ್ ಕೆಲ್ಲೆಂ ಹೆಂ ಕಾಮ್, ಹೆರ್ ಭುರ್ಗ್ಯಾಂಕ್ ಕಳನಾಸ್ತಾಂ ವಚೊಂಕ್ ನಾ. ತ್ಯಾ ಭುರ್ಗ್ಯಾಂ ಪಯ್ಕಿ, ವಿನ್ನಿ ಎಕ್ಲೆಂ. ವಿಲ್ಫಿನ್ ಕೆದಳಾಯ್ ದಾಕಂವ್ಚೊ, ಜಿಣ್ಯೆಂತ್ ಹರ್ಯೆಕೀ ಬರ್ಯಾಕ್ಚ್ ಘಡ್ತಾ ಮ್ಹಣ್ಚೊ ಸ್ವಭಾವ್ ಪಳೆವ್ನ್, ಹೈಸ್ಕೂಲಾಂತ್ಚ್ ವಿಲ್ಫಿಚ್ಯಾ ಮೊಗಾರ್ ಪಡ್ಲ್ಲೆಂ ತೆಂ.
ಪುಣ್ ಆತಾಂ, ತಾಂಚ್ಯೆಂ ಕಾಜಾರ್ ಜಾವ್ನ್ ಪಂಚ್ವೀಸ್ ವರ್ಸಾಂ ಜಾಲ್ಯಾಂತ್ ಆಸ್ತಾಂ, ತ್ಯಾಚ್ ಸ್ವಭಾವಾಕ್ ಲಾಗೊನ್, ವಿಲ್ಫಿಚ್ಯೆ ಕಾನ್ ವೊಳಾಯ್ಜೆ ಮ್ಹಣ್ಚ್ಯೆ ತಿತ್ಲೊ ವಿನ್ನಿಕ್ ರಾಗ್ ಯೆತಾಲೊ.
ಭುರ್ಗಿಂ ಲ್ಹಾನ್ ಆಸ್ತಾನಾ, ಭುರ್ಗ್ಯಾಂನಿ ಏಕ್ ಪೆಟೊ ಜಾಯ್ ಮ್ಹಣ್ ಹಟ್ ಕೆಲ್ಲ್ಯಾಕ್, ವಿಲ್ಫಿನ್ ಲಾಬ್ರಾಡೊರ್ ಪೆಟೊ ಹಾಡುನ್ ದಿಲ್ಲೊ. ವಿನ್ನಿಕ್ ಝಡಾಂಚೊ ಮೋಗ್ ಆನಿ ಪೆಟ್ಯಾಕ್ ಝಡಾಂ ಉಸ್ತುಂಚಿ ಖೊರೊಜ್. ಝಡಾಂಚಿ ದೆಸ್ವಾಟ್ ಆನಿ ಸಗ್ಳ್ಯಾನ್ ಪೆಟ್ಯಾನ್ ಹಾಗೊನ್ ಘಾಲ್ಚ್ಯೆಂ ಪಳೆವ್ನ್, ವಿನ್ನಿ ಬರೆಂಚ್ ಖುಬಾಳ್ಲ್ಲೆಂ.
“ಪೆಟ್ಯಾಕೀ ತುಜ್ಯೆ ಸಾಂಗಾತಾ ಝಾಡಾಂ ಲಾಂವ್ಕ್ ಜಾಯ್, ಡಾರ್ಲಿಂಗ್, ಕಿತ್ಲೊ ಹ್ಯಾಪ್ಪಿ ಅಸಾ ಪಳೆ ತೊ!” ವಿಲ್ಫಿನ್ ಹಾಸೊನ್ ಮ್ಹಳ್ಳೆಂ, ಮಾತಿಯೆಂತ್ ಬುಡ್ಲ್ಲ್ಯಾ ಪೆಟ್ಯಾಕ್ ಪಳೆವ್ನ್.
ವ್ಹಡ್ ಜಾಲ್ಲಿಂ ಭುರ್ಗಿಂ, ಕಾಜಾರ್ ಜಾವ್ನ್ ಗೆಲ್ಲಿಂ. ಸಬಾರ್ ವರ್ಸಾಂ ತಾಂಕಾಂ ಸಾಂಗಾತ್ ದಿಲ್ಲೊ ಪೆಟೊಯೀ ಮರೊನ್ ಜಾಲ್ಲೊ. ಆತಾಂ ಎಕಾಮೆಕಾ ಸಾಂಗಾತ್ ದೀಂವ್ಕ್ ಉರುಲ್ಲಿಂ ಮ್ಹಳ್ಯಾರ್, ತಿಂ ದೊಗಾಂಚ್.
ಜಿಣಿ ಪರ್ನಿ ಜಾವ್ನ್ ಯೆತಾನಾ, ಎಕಾ ನ್ಹಯ್ ತರ್ ಎಕಾ ಕಾರಣಾಕ್ ಲಾಗುನ್, ವಿನ್ನಿಕ್ ವಿಲ್ಫಿಚ್ಯೆರ್ ತಾತ್ಸಾರ್ ಚಡೊನ್ ಯೆಂವ್ಚ್ಯಾ ಸಂಗಿಂ, ಘರಾ ಮುಕ್ಲ್ಯಾ ಚಿಂಚ್ಯೆ ರುಕಾನ್ ತಾಚ್ಯಾ ಸೊಸ್ಣಿಕಾಯೆಚಿ ಮೀತ್ ಪಾರ್ಕಿಲ್ಲಿ.
ಖಂಚ್ಯಾ ಸುಕ್ಣ್ಯಾನ್ ಹಾಗ್ಲ್ಲ್ಯಾ ಗುವಾಂತ್ ತೊ ಚಿಂಚಾರೊ ಆಸ್ಲ್ಲೊಗೀ ಕೋಣ್ ಜಾಣಾಂ, ತಾಂಚ್ಯಾ ಘರಾ ಮುಕಾರ್ ಏಕ್ ಚಿಂಚ್ಯೆಚ್ಯೆಂ ಝಡ್ ಕಿರ್ಲಾಲ್ಲೆಂ. ಪೆಟೊ ಜೀವ್ ಅಸ್ತಾನಾ ತೆಂ ಕಿರ್ಲಾಲ್ಲೆಂ ತರೀ, ಪೆಟ್ಯಾನೀ ತೆಂ ಉಸ್ತುಂಕ್ ನಾತ್ಲ್ಲೆಂ. ಘರಾ ಮುಕಾರ್ ಏಕ್ ದೀಸ್ ಹೊ ರೂಕ್ ವಾಡೊನ್ ಬರಿಚ್ ಸಾವ್ಳಿ ದಿತಲೊ ಮ್ಹಳ್ಳೆಂ ಚಿಂತುನ್, ವಿಲ್ಫಿನ್ ತೆಂ ಝಡ್ ಹುಮ್ಟುನ್ ಕಾಡುಂಕ್ ನಾತ್ಲ್ಲೆಂ.
ಆತಾಂ ಇತ್ಲ್ಯಾಂ ವರ್ಸಾಂ ಉಪ್ರಾಂತ್, ತೆಂ ಝಡ್ ವಾಡೊನ್ ಅಂತ್ರಳಾಕ್ ಪಾವ್ಲ್ಲೆಂ.
ತ್ಯಾ ರುಕಾಚ್ಯೆ ಫಾಂಟೆ ವಿಸ್ತಾರೊನ್, ಸಗ್ಳ್ಯಾನೀ ಖೊಲಿ ಪಡ್ತಾಲಿ, ಚಿಂಚೊ ಪಡ್ತಾಲ್ಯೊ. ಸುಕ್ಣ್ಯಾಂಕ್ ತ್ಯಾ ರುಕಾರ್, ಫೈವ್ ಸ್ಟಾರ್ ಹೊಟೆಲಾಬರಿ ಜಾತಾಲೆಂ ಜಾಯ್ಜೆ, ಧಾರಾಳ್ ಸುಕ್ಣ್ಯಾಂನಿ ತ್ಯಾ ರುಕಾರ್ ಘುಡ್ ಬಾಂದ್ಲ್ಲೆ. ಸಗ್ಳೊ ದೀಸ್ ಆನಿ ಥೊಡೆ ಪಾವ್ಟಿಂ ರಾತಿಕೀ ತ್ಯಾ ಸುಕ್ಣ್ಯಾಂಚ್ಯೆಂ ಚಿರಿಪಿರಿ ಮಾತ್ರ್ ನ್ಹಯ್, ತಾಂಚೊ ಗೂ ಪಡುನ್, ಘರಾ ಮುಕಾರ್ ಕೊಣಾಯ್ಕಿ ಚಲೊಂಕ್ ಕಷ್ಟ್ ಜಾತಾಲೆ. ವಿನ್ನಿನ್ ಕಿತ್ಲೆಂ ಸಾಂಗ್ಲ್ಯಾರೀ, ವಿಲ್ಫಿನ್ ತ್ಯಾ ವಿಶಿಂ ಕಾನ್ ಹಾಲಂವ್ಕ್ ನಾತ್ಲ್ಲೆ.
ತಿತ್ಲೆಂಚ್ ನ್ಹಯ್, ಪೊಕ್ರಿ ಭುರ್ಗ್ಯಾಂಚ್ಯೆ ಉಪದ್ರ್ಯೀ ಸುರು ಜಾಲ್ಲೆ.
ಶಾಳಾಚೊ ವೇಳ್ ಜಾವ್ನ್ ಘರಾ ವೆಚ್ಯಾ ಭುರ್ಗ್ಯಾಂಕ್, ಫಾತೊರ್ ಉಡವ್ನ್ ಥೊಡ್ಯೊ ಪುಣಿ ಚಿಂಚೊ ಝಡಯ್ಲ್ಯಾ ಶಿವಾಯ್ ನೀದ್ ಪಡಾನಾತ್ಲ್ಲಿ. ಅಶೆಂ ತಾಣಿಂ ಚಿಂಚೊ ಝಡಯ್ತಾನಾ, ಫಾತೊರ್ ಟೆರೆಸಾಚ್ಯೆರ್ ಆನಿ ಜನೆಲಾಚ್ಯಾ ಆರ್ಶ್ಯಾಂಚ್ಯೆರ್ ಪಡ್ತನಾ, ವಿನ್ನಿನ್ ದೆದೆಸ್ಪ್ರಾರ್ ಜಾಲ್ಲ್ಯಾಂತ್ ನವಾಲ್ ನಾತ್ಲ್ಲೆಂ.
“ವಿಲ್ಫಿ!” ರಾಗಾನ್ ಬೊಬಾಟ್ಲ್ಲೆಂ ತೆಂ ಎಕಾ ದಿಸಾ. “ಭುರ್ಗ್ಯಾಂನಿ ತಿಸ್ರ್ಯೆ ಪಾವ್ಟಿಂ ಜನೆಲ್ ಫುಟಯ್ಲಾಂ, ಕಿತೆಂ ಪುಣಿ ಕರ್, ಮ್ಹಜಿ ತಕ್ಲಿ ವಿರ್ಯಾರ್ ಜಾಲ್ಯಾ.”
ಘರಾ ಥಾವ್ನ್ಂಚ್ ಕಾಮ್ ಕರ್ಚೊ ವಿಲ್ಫಿ, ವಿನ್ನಿಕ್ ಸಮಧಾನ್ ಕರ್ಚ್ಯಾ ಖಾತಿರ್ ಭಾಯ್ರ್ ಗೆಲ್ಲೊ ತರೀ, ಭಾಯ್ರ್ ಕೊಣೀ ಭುರ್ಗಿಂ ನಾತ್ಲ್ಲಿಂ ಪಳೆವ್ನ್ ಭುಜಾಂ ಹಾಲವ್ನ್ ಭಿತರ್ ಆಯಿಲ್ಲೊ.
ಚಿಂಚ್ಯೆಚ್ಯಾ ರುಕಾಚ್ಯೆರ್ ವಿನ್ನಿಕ್ ಮಾತ್ರ್ ನ್ಹಯ್, ತಾಂಚ್ಯಾ ಸೆಜಾರ್ಯಾಕ್ ಬೆಜ್ಮಿಕೀ ರಾಗ್ ಆಯಿಲ್ಲೊ. ಚಿಂಚ್ಯೆ ರುಕಾಚ್ಯೆ ಫಾಂಟೆ ಬೆಜ್ಮಿಚ್ಯಾ ಆಂಗ್ಣಾ ಪರ್ಯಾಂತ್ ಪಾವ್ಲ್ಲೆ. ಖೊಲಿ, ಚಿಂಚೊ ಆನಿ ಸುಕ್ಣ್ಯಾಂಚೊ ಗೂ ತಾಂಚ್ಯಾ ವೊಡ್ತಾಂತ್ ಪಡ್ಚಿ ವಿರಾರಾಯ್ ಮಾತ್ರ್ ನ್ಹಯ್ ಆಸ್ತಾಂ, ರುಕಾಚ್ಯಾ ಪಾಳಾಂನಿ, ತಾಂಚ್ಯಾ ಧರ್ನಿ ಪಂದ್ಲೆ ಉದ್ಕಾಚ್ಯೆ ನಳ್ ಫುಟಯಿಲ್ಲೆ. ಪ್ಲಂಬರಾಕ್ ಪಯ್ಶೆ ಖರ್ಚುಂಕ್ ಪಡ್ತನಾ, ಕೊಣಾಕ್ ರಾಗ್ ಯೇನಾಸ್ತಾಂ ರಾವಾತ್?
ಬೆಜ್ಮಿ ವಿಲ್ಫಿಕಡೆನ್ ತಾಪೊನ್ಂಚ್ ಉಲಯಿಲ್ಲ್ಯಾಕ್ ಲಾಗುನ್, ವಿಲ್ಫಿನ್ ತಾಕಾ ಥೊಡಿ ಪಯ್ಶ್ಯಾಂಚಿ ಕುಮಕ್ ದಿಲಿ ತರೀ, ರೂಕ್ ಮಾತ್ರ್ ತಸೊಚ್ ಉರ್ಲೊ.
ವಿನ್ನಿನ್ ಏಕ್ ದೀರ್ಘ್ ಶ್ವಾಸ್ ಸೊಡ್ಲ್ಲೊ. ಸೆಜಾರ್ಯಾಚಿಂ ದುರಾಂ ಆಯ್ಕೊನ್ ವಿನ್ನಿಕೀ ಪಾಕಾಂ ಆಯಿಲ್ಲಿಂ. “ತುಂ ತ್ಯಾ ರುಕಾಕ್ ತುಜ್ಯಾ ಭುರ್ಗ್ಯಾಂಬರಿ ಕರ್ತಾಯ್ಮೂ?” ವಿನ್ನಿನ್ ಮ್ಹಳ್ಳೆಂ ತಾಚ್ಯೆಲಾಗಿಂ, ಪರತ್ ಪ್ರಸ್ತಾಪ್ ಕಾಡುನ್. “ತುಕಾ ಜಾಲಾಂ ತರೀ ಕಿತೆಂ? ಸಕ್ಡಾಂಕ್ ತೊ ರೂಕ್ ವಿರಾರಾಯ್ ಜಾವ್ನ್ ಗೆಲಾ ತೆಂ ತುಕಾ ದಿಸನಾ?”
“ಪಳೆ ವಿನ್ನಿ ಡಾರ್ಲಿಂಗ್,” ತಾಣೆ ಮ್ಹಳ್ಳೆಂ ಸಮಧಾನೆನ್. “ತೊ ರೂಕ್ ಆಮ್ಕಾಂ ದುರ್ಸಾಲ್ಲೊ ನಾ. ತೊ ಆಮ್ಕಾಂ ಒಕ್ಸಿಜನ್ ದಿತಾ, ಹ್ಯಾ ರಸ್ತ್ಯಾಕ್ ಜಿವಾಳ್ ದಿತಾ, ಸುಕ್ಣ್ಯಾಂಕ್ ಆಸ್ರೊ ದಿತಾ. ತಿತ್ಲೆಂಚ್ ನ್ಹಯ್, ಘರಾಕ್ ಸಾವ್ಳಿಯೀ ದಿತಾ. ಎಕಾಚ್ಚಾಣೆಂ ಕಾತ್ರುನ್ ಉಡಂವ್ಚ್ಯಾಂತ್ ರಾಜಾಂವ್ ಕಸಲೆಂ? ಏಕ್ ದೀಸ್, ಹೊಚ್ಚ್ ರೂಕ್ ತುಕಾ ಸಂತೊಸ್ ದೀಂವ್ಕೀ ಪುರೊ, ಕೋಣ್ ಜಾಣಾಂ? ತೆದಳಾ ತುಕಾ ಸಗ್ಳೆಂ ಅರ್ಥ್ ಜಾತೆಲೆಂ.”
ಪುಣ್ ತ್ಯಾ ಉತ್ರಾಂನಿ ವಿನ್ನಿಚ್ಯೆಂ ಮನ್ ಕುಸ್ಕಾಲ್ಲೆಂ. ಸಂಗತ್ ಲ್ಹಾನ್ ತರೀ, ಮತಿಂತ್ ರಿಗ್ಲ್ಲೊ ಕಿಡೊ, ತಾಂಚ್ಯಾ ಸಂಬಂದಾಕ್ ಯೇರ್ ಯೇಂವ್ಕ್ ಕಾರಣ್ ಜಾಲ್ಲೊ. ತಾಚೊ ಆನಿ ವಿಲ್ಫಿಚೊ ಸಂಬಂದ್ ಚಡ್ ತೇಂಪ್ ಉರ್ಚೊನಾ ಮ್ಹಣ್ ಆಪ್ಲ್ಯಾ ಮಿತ್ರಿಣ್ಯಾಂಲಾಗಿಂ ಉಲಂವ್ಚ್ಯಾ ಪರ್ಯಾಂತ್ ಪಾವ್ಲ್ಲ್ಯಾ ತಾಚಿಂ ಭೊಗ್ಣಾಂ ಸಮ್ಜೊಂಕ್ ವಿಲ್ಫಿ ಸಕೊಂಕ್ ನಾತ್ಲ್ಲೊ.
ಏಕ್ ದೀಸ್ ವಿಲ್ಫಿ ಘರಾ ಮುಕ್ಲ್ಯಾ ಝಡಾಂಚ್ಯೆರ್ ಉದಕ್ ಶಿಂಪ್ಡಾಯ್ತಾನಾ, ಸೆಜಾರಿ ಬೆಜ್ಮಿ ಪರತ್ ಚಿಂಚ್ಯೆ ರುಕಾ ವಿಶಿಂ ಪ್ರಸ್ತಾಪ್ ಕಾಡಿಲಾಗ್ಲೊ.
ಎದೊಳ್ ಪರತ್-ಪರತ್ ಬೆಜ್ಮಿಚಿಂ ದುರಾಂ ಆಯ್ಕೊನ್ ಪುರೊ ಜಾಲ್ಲ್ಯಾ ವಿನ್ನಿನ್, ಆಪ್ಲಿ ಕರಂದಾಯ್ ವಾಂಟುನ್ ಘೆಂವ್ಚ್ಯಾ ಖಾತಿರ್, ಆಪ್ಲ್ಯಾ ಮಿತ್ರಿಣಿಕ್, ಮೀರಾಕ್ ಫೊನ್ ಕೆಲೆಂ.
“ಮ್ಹಾಕಾ ಹಿ ವಿರಾರಾಯ್ ಸೊಸುನ್ ಗಳ್ಯಾ ಪರ್ಯಾಂತ್ ಆಯ್ಲಾಂ, ಮೀರಾ,” ತೆಂ ಮ್ಹಣಾಲೆಂ, ಸಂಸಾರಾಂತ್ ಆಪ್ಣಾ ತಸಲೆಂ ವೊಜೆಂ ಹೆರ್ ಕೊಣಾಯ್ಕಿ ನಾ ಮ್ಹಳ್ಳೆಬರಿ. “ಆಜ್ ಪರತ್ ಆಮ್ಚೊ ಸೆಜಾರಿ, ಗಲಾಟೊ ಕರುಂಕ್ ಆಯ್ಲಾ. ಮ್ಹಾಕಾ ಹೆಂ ಸೊಸುನ್ ಪುರೊ ಜಾಲಾಂ. ಹಾಂವೆಂ ವಚೊನ್, ಮ್ಹಜ್ಯಾ ಧುವೆ ಸಂಗಿಂ ರಾವ್ಲ್ಯಾರ್ ಕಶೆಂ?”
“ವಿನ್ನಿ ಮ್ಹಾಕಾ ಆಯ್ಕ್,” ಮೀರಾನ್ ಚತ್ರಾಯ್ ದಿಲ್ಲಿ. “ಆತಾಂಚ್ಯಾ ಭುರ್ಗ್ಯಾಂಕ್ ತಾಂಚ್ಯಾ ವ್ಹಡಿಲಾಂಕ್ ಪಳೆಂವ್ಚಿ ಜವಾಬ್ದಾರಿ ನಾಕಾ. ತುಂ ವಚೊನ್ ಥೊಡ್ಯಾಚ್ ದಿಸಾಂನಿ ಫಟ್ವೊನ್ ಪಡ್ಶಿ. ತಶೆಂ ವಿಲ್ಫಿ ಕಾಂಯ್ ತುಕಾ ಮಾರಿನಾ, ವ್ಹಯ್ಮೂ?”
“ನಾ ಹಾಬಾ, ತಶೆಂ ಕಾಂಯ್ ನಾ… ಪುಣ್ ದಾದ್ಲೊ ಮ್ಹಣ್ತನಾ, ತಾಕಾಯೀ…”
ತಿತ್ಲ್ಯಾರ್, ತಿಚ್ಯಾ ಉತ್ರಾಂಕ್ ಖಾಡುಂ ಘಾಲುಂಕ್ ಮ್ಹಳ್ಳೆಬರಿ, ಎಕಾಚ್ಚಾಣೆಂ ದಾಂಬ್ಲ್ಲ್ಯಾ ವಾಹನಾಚ್ಯಾ ಬ್ರೇಕಿಚೊ ಕಿಳಂಚ್ಯೆ ತಸ್ಲೊ ಆವಾಜ್, ಟಯರಾಂ ರಭಸಾನ್ ರಸ್ತ್ಯಾಕ್ ಘಸ್ಟೊಂಚೊ ಆವಾಜ್ ಆನಿ ತ್ಯಾ ಸಾ-ಸಾಂಗಾತಾಚ್ ಮನ್ಶ್ಯಾಂಚಿ ಕಿಂಕ್ರಾಟ್ ಆನಿ ಕಾನ್ಪೆ ಫುಟಂವ್ಚೊ ವಾಹನ್ ಆಪ್ಟಾಲ್ಲೊ ಆವಾಜ್, ಏಕ್ ದೋನ್ ಸೆಕುಂದಾಂ ಭಿತರ್ ಘಡೊನ್ ಗೆಲೊ.
ಆಪ್ಣೆಂ ಫೊನ್ ಕಶೆಂ ಬಂದ್ ಕೆಲೆಂ ತೆಂ ವಿನ್ನಿಕ್ ಕಳ್ಳೆಂಚ್ನಾ. ತೆಂ ಅಕಾಂತಾನ್ ಘರಾ ಮುಕ್ಲ್ಯಾ ಆಂಗ್ಣಾಕ್ ಧಾಂವ್ಲೆಂ. ಘರಾ ಮುಕ್ಲಿ ದೆಸ್ವಾಟ್ ಪಳೆವ್ನ್, ವಿನ್ನಿಚಿ ಝಿಂಟ್ ಉಡ್ಲಿ. ಏಕ್ ಕಾರ್ ತಾಂಚ್ಯಾ ಚಿಂಚ್ಯೆ ರುಕಾಕ್ ಆಪ್ಟಾಲ್ಲೆಂ. ಥಂಯ್ಸರ್ ಜಾಲ್ಲ್ಯಾ ದೆಸ್ವಾಟೆಕ್ ಪಳೆವ್ನ್ ತಾಚೊ ಹಾತ್ ತೊಂಡಾಚ್ಯೆರ್ ಗೆಲೊ. ಕಾರಾಂತ್ ಶಿರ್ಕಾಲ್ಲಾಂಕ್ ಕುಮಕ್ ಕರ್ಚೆ ವಿಲ್ಫಿ ಆನಿ ಬೆಜ್ಮಿ, ವಿನ್ನಿಕ್ ದಿಸೊಂಕ್, ಥೊಡ್ಯೊ ಘಡಿಯೊ ಗೆಲ್ಯೊ.
ತಿತ್ಲ್ಯಾರ್, ಪೊಲಿಸಾಂಚ್ಯೆಂ ಕಾರ್, ಸಾಯ್ರನಾ ಸಂಗಿಂ ತಾಂಚ್ಯಾ ಘರಾ ಮುಕಾರ್ ಯೇವ್ನ್ ಥಾಂಬ್ಲೆಂ. ಹೆಣೆ-ತೆಣೆಂಚ್ಯೆ ಸೆಜಾರಿ ಧಾಂವೊನ್ ಆಯ್ಲೆ.
ಕಾರ್ ರುಕಾಕ್ ಆಪ್ಟಾಲ್ಲೊ ರಭಸ್ ಇತ್ಲೊ ಕಠೀಣ್ ಆಸ್ಲ್ಲೊ ಕೀ, ರುಕಾಚ್ಯೊ ಸಾಲಿ ತುಟೊನ್ ಗೆಲ್ಲ್ಯೊ, ಹಸ್ತಿನ್ ರೂಕ್ ಹಾಲಯಿಲ್ಲೆಬರಿ ಜಾವ್ನ್, ಚಿಂಚೊ ಝಡ್ಲ್ಲ್ಯೊ ಆನಿ ಕಾರ್ ಅರ್ಧ್ಯಾಕ್ ಅರ್ಧೆಂ ಚಟ್ಟ್ ಜಾಲ್ಲೆಂ. ಕಾರಾ ಭಿತರ್ ಶಿರ್ಖಾಲ್ಲ್ಯಾ ಚಾಲಕಾಕ್ ಭಾಯ್ರ್ ಕಾಡುಂಕ್, ಒದ್ದಾಡ್ಚ್ಯಾ ವಿಲ್ಫಿಕ್, ಪೊಲಿಸಾಂನಿ ರಾವಯ್ಲೊ.
ತೆಂ ಕಾರ್ ಚೊರುನ್ ಧಾಂವ್ಚ್ಯಾ ತ್ಯಾ ಚೊರಾಕ್ ಧರುಂಕ್ ಪೊಲಿಸ್ ಪಾಟ್ಲಾವ್ ಕರುನ್ ಆಯಿಲ್ಲಿ ಗಜಾಲ್, ಪೊಲಿಸಾಂನಿ ಥಂಯ್ಸರ್ ಜಮ್ಲ್ಲ್ಯಾಂಕ್ ಸಾಂಗ್ಲಿ ಆನಿ ತ್ಯಾ ಬರಾಬರ್, ಫಾಯರ್ ಬ್ರಿಗೆಡಿಕ್ ಆನಿ ಎಂಬುಲೆನ್ಸಾಕ್ ಉಲೊ ಧಾಡ್ಲೊ. ಕಾರಾಂತ್ಲೊ ಪೆಟ್ರೊಲ್ ವ್ಹಾಳೊನ್ ಆಸ್ಲ್ಲೊ ಜಾಲ್ಲ್ಯಾನ್, ಪೊಲಿಸಾಂನಿ ಸಕ್ಡಾಂಕ್ ಪಯ್ಸ್ ರಾವೊಂಕ್ ಚತ್ರಾಯ್ ದಿಲಿ.
ಕಂಗಾಲ್ ಜಾಲ್ಲ್ಯಾ ವಿನ್ನಿಕ್ ಪಳೆವ್ನ್, ಎಕಾ ಪೊಲಿಸಾನ್ ಮ್ಹಳೆಂ, “ಹೆಂ ತುಮ್ಚ್ಯೆಂ ಘರ್ಗೀ ಮೇಡಮ್?”
ವಿನ್ನಿ ಆನಿ ವಿಲ್ಫಿನ್ ಸಾಂಗಾತಾಚ್ ತಕ್ಲಿ ಹಾಲಯ್ಲಿ.
ತುಮ್ಚ್ಯೆಂ ನಶಿಬ್ ಬರೆಂ ಆಸಾ. ಹೊ ರೂಕ್ ಪುಣಿ ನ್ಹಯ್ ಜಾಲ್ಲೊ ತರ್, ಹೆಂ ಕಾರ್ ಖಂಡಿತ್ ತುಮ್ಚ್ಯಾ ಘರಾ ಭಿತರ್ ರಿಗ್ತೆಂ. ತುಮ್ಚ್ಯಾ ಜಿವಾಕೀ ಅಪಾಯ್ ಜಾತೊ ಕೊಣ್ಣಾ!”
ತಾಚಿಂ ಉತ್ರಾಂ ಆಯ್ಕೊನ್ ಸನಿನ್ ಜಾಲ್ಲ್ಯಾ ವಿನ್ನಿನ್, ಎಕಾಚ್ಚಾಣೆಂ ವಿಲ್ಫಿಕ್ ವೇಂಗ್ ಮಾರ್ಲಿ. “ತುಕಾ ದೆವಾನ್ಂಚ್ ರಾಕ್ಲೊ” ತೆಂ ಮ್ಹಣಾಲೆಂ, ಆಪ್ಲ್ಯಾ ದೊಳ್ಯಾಂನಿ ಭರುನ್ ಆಯಿಲ್ಲಿಂ ದುಕಾಂ ಪುಸುನ್.
ವಿಲ್ಫಿನ್ ಕಿತೆಂಚ್ ಮ್ಹಳೆಂನಾ. ಜಾಂವ್ಚ್ಯೆಂ ಸಗ್ಳೆಂ ಬರ್ಯಾಕ್ಚ್ ಮ್ಹಣ್ ಸಾಂಗೊಂಕ್ ತಾಕಾ ಜಾಯ್ ಆಸ್ಲ್ಲೆಂ ತರೀ, ಹೊ ವೇಳ್ ಫಕತ್ ಮೌನ್ ಸಾಂಭಾಳ್ಚೊ ಮ್ಹಣ್ ತೊ ಜಾಣಾಸ್ಲ್ಲೊ.
ಬೆಜ್ಮಿಯೀ ಹ್ಯಾ ಘಡಿತಾಕ್ ಲಾಗೊನ್ ಕಾಣ್ಶಿರೊನ್ ಗೆಲ್ಲೊ. ತೊ ಚಡಿತ್ ಉಲಯ್ನಾಸ್ತಾಂ ತಕ್ಲಿ ಪಂದಾಕ್ ಘಾಲುನ್ ಆಪ್ಲ್ಯಾ ಘರಾ ಕುಶಿನ್ ಚಲ್ಲೊ.
ಥೊಡ್ಯಾ ವೆಳಾನ್, ಧುಸ್ಪಾಟೊನ್ ಧಾಂವ್ಲ್ಲಿಂ ಸುಕ್ಣಿಂ, ಎಕಾಪಾಟ್ ಏಕ್ ಪಾಟಿಂ ಯೇಂವ್ಕ್ ಸುರು ಜಾಲಿಂ.
ವಿನ್ನಿಚ್ಯಾ ಮತಿಂತ್ ಆಸ್ಲ್ಲ್ಯೊ, ವಿಲ್ಫಿ ವಿಶ್ಯಾಂತ್ಲ್ಯೊ ಖೊಡಿ ನಪಂಯ್ಚ್ ಜಾಲ್ಯೊ.
ರುಕಾಚ್ಯಾ ಸಾವ್ಳೆಂತ್ ರಾವ್ಲ್ಲ್ಯಾ ವಿನ್ನಿಕ್, ಸುಕ್ಣ್ಯಾಂಚ್ಯೆಂ ಚಿರಿಪಿರಿ, ಸಂಗೀತಾಬರಿ ಆಯ್ಕಲೆಂ!
ಎಕಾಚ್ಚ್ ಘಡಿತಾನ್, ತಾಚ್ಯಾ ಮತಿಂತ್ಲೆಂ ಮೋಡ್ ನಿತ್ಳಾಯಿಲ್ಲೆಂ.
■ ಸುನಂದ್
