ಅಸ್ತಮ್ತೆ ಕುಶಿನ್ ಆಸ್ಚೊ ಇಸ್ಲಾಮಿಕ್ ರಾಷ್ಟ್ರ್ ಮೊರೊಕ್ಕೊಕ್ Al-Maghrib, ಸುರ್ಯೊ ಬುಡ್ಚೊ ದೇಶ್ ಮ್ಹಣ್ತಾತ್. ಹ್ಯಾ ವರ್ಸಾಚ್ಯಾ ಸಿಂಜಿಚ್ಯಾ ಬುದ್ವಾರಾ ಮುಸಿಮ್ ಸಮಾಜಾಚೆಂ ರಾಮದಾನ್ ಆನಿ ಕ್ರೀಸ್ತಾಂವ್ ಸಮಾಜಾಚೊ ಕರೆಜ್ಮ್ ಸಾಂಗಾತಾ ಸುರು ಜಾಲ್ಲೆ. ಆಮಿ ಚಲಿಯಾನಿಂ ಮುಸ್ಲಿಂ ದೇಶ್ ಮೊರೊಕ್ಕೊ ಭೆಟ್ ಕರುಂಕ್ ಚಿಂತ್ಲೆಂ ಆನಿ ಮಾರ್ಚ್ಯಾಚ್ಯಾ ತೆರಾ ತಾರಿಕೆರ್ ಆಮಿ ಪಾಂಯ್ ತೆಂಕ್ಲೊ ಮೊರೊಕ್ಕೊಚಿ ರಾಜದಾನಿ ರಾಬಾಟಾಂತ್. ಏರ್ಪೋರ್ಟಾ ಥಾವ್ನ್ ಭಾಯ್ರ್ ಯೆತಾನಾ ಆಮ್ಕಾಂ ಆಪವ್ನ್ ವರುಂಕ್ ಆಯಿಲ್ಲೊ ಡ್ರೈವರ್ ವಾಟ್ ರಾಕ್ತಾಲೊ. ತಾಕಾ ಇಂಗ್ಲೀಶ್ ಯೇನಾತ್ಲೆಂ ಆನಿ ಆಮ್ಕಾಂ ಮೊರೊಕ್ಕೊಚಿ ಭಾಸ್! ಕಶೆಂಯ್ ಹಾತ್ ಭಾಶೆನ್ ತಾಚ್ಯಾ ಸಂಗಿ ಸಂಭಾಶಣ್ ಕರ್ನ್ ಆಮಿ ಆಮಾನತ್ ಬುಕ್ ಕೆಲ್ಲ್ಯಾ ವಿಲ್ಲಾಕ್ ಪಾವ್ಲ್ಯಾಂವ್. ಥಂಯ್ಸರ್ ವಿಲ್ಲಾಚೊ ಧನಿ ಆನಿ ಧನಿನ್ ಆಮ್ಕಾಂ ಯೆವ್ಕಾರ್ ಮಾಗೊಂಕ್ ರಾಕೊನ್ ರಾವ್ಲ್ಲಿಂ. ಆಮ್ಕಾಂ ಸಗ್ಳೆಂ ಘರ್ ದಾಕವ್ನ್ ಥಂಯ್ಚಿ ನಿಯಮಾಂ ಸಾಂಗೊನ್, ತೀನ್ ದಿಸಾಂ ಉಪ್ರಾಂತ್ ಮೆಳ್ಯಾಂ ಮ್ಹಣ್ ತಿಂ ಪಾಟಿಂ ಗೆಲಿಂ.
ವಾಹನ್ ಚಾಲಕಾ ಸಾಂಗಾತಾ
ವಿಲ್ಲಾ ಮಾಲಕಾಂ ಸಾಂಗಾತಾ
ವಿಲ್ಲಾ
ವಿಲ್ಲಾ ಟೆರೆಸ್ – ಪಾಟ್ಲ್ಯಾನ್ ದರ್ಯಾ ತಡ್
ಆಮಿ ಕುಡಿಚಿ ನಿತಳಾಯ್ ತಿರ್ಸುನ್ ಸಾಂಜೆರ್ ಶಹರ್ ಬೊವೊಂಕ್ ಭಾಯ್ರ್ ಸರ್ಲ್ಯಾಂವ್. ರಾತ್ಚೆಂ ಜೆವಾಣ್ ಕರುಂಕ್ “ದಾರ್ ನಾಜಿ” ಮ್ಹಳ್ಳ್ಯಾ ರೆಸ್ಟೊರೆಂಟಾಕ್ ಪಾವ್ಲ್ಯಾಂವ್. ಥಂಯ್ಸರ್ ಆಮಿ ಆರ್ಡರ್ ಕರ್ಚ್ಯಾ ಪಯ್ಲೆಂಚ್ ಅಮ್ಕಾಂ ಮೆಜಾರ್ ಜೆವಾಣ್ ತಯಾರ್ ಆಸ್ಲೆಂ. ಅಮ್ಕಾಂ ಹಾಚೆ ಪಾಟ್ಲೊ ಮಿಸ್ತೆರ್ ಸಮ್ಜೊಂಕ್ ನಾ. ಉಪ್ರಾಂತ್ ಆಮಿಂಚ್ ತಕ್ಲಿ ಆಟಯ್ಲಿ. ತೊ ವೇಳ್ ಇಫ್ತಾರಾಚೊ ಜಾವ್ನಾಸ್ಲೊ. ಮುಸ್ಲಿಂ ಲೋಕ್ ರಾಮಾದಾನಾ ವೇಳಾರ್ ಸಗ್ಳೊ ದೀಸ್ ಭುಕೊ ರಾವ್ತಾ. ಸಾಂಜೆರ್ ಸುರ್ಯೊ ಬುಡ್ಲ್ಯಾ ಉಪ್ರಾಂತ್ ಜೆವ್ತಾ. ಉಪಾಸ್ ಮೊಡುಂಕ್ ಸೆಂವ್ಚ್ಯಾ ಪಯ್ಲ್ಯಾ ಖಾಣಾಕ್ ತೆ ಇಫ್ತಾರ್ ಮ್ಹಣ್ತಾತ್. ಭುಕೆನ್ ಆಯಿಲ್ಲ್ಯಾ ಲೋಕಾಕ್ ಆರ್ಡರ್ ದೀವ್ನ್ ಘಂಟೊ ಭೊರ್ ರಾಕಯ್ತಾನಾ ಮೆಜಾರ್ ಅಸ್ಲ್ಯಾ ಖಾಣ್ ಪೀವನಾನ್ ಉಪಾಸ್ ಮೊಡ್ತಾತ್ ಆಸ್ತಾಲೊ ಮ್ಹುಣ್ ಚಿಂತುನ್ ಆಮಿ ಮೆಜಾರ್ ಅಸ್ಲೆಂ ಖಾಣ್ ಪೀವನ್ ಸೆವ್ಲೆಂ. ತೆಂ ಫಕತ್ ಸುರ್ವಾತ್ಚೆಂ ಖಾಣ್. ಉಪ್ರಾಂತ್ ಆಮಿ ‘ಮೇಯ್ನ್ ಕೋರ್ಸ್’ ಆರ್ಡರ್ ಕರ್ನ್ ಜೆವ್ಲ್ಯಾಂವ್. ತಿತ್ಲ್ಯಾರ್ ಮೊರೊಕ್ಕೊಚಿ ಚಾಯ್ ಮೆಜಾರ್ ಪಾವ್ಲಿ. ಜೆವ್ಣಾ ಉಪ್ರಾಂತ್ ಜಿರ್ವಣೆಕ್ ಬರಿ ಮ್ಹಣ್ ವೈಟರಾನ್ ಆಮ್ಕಾಂ ಸಮ್ಜಯ್ಲೆಂ. ನಿಜಾಯ್ಕೀ ತಸಲಿ ಚಾ ಹಾಂವೆ ತೆದೊಳ್ ಪರ್ಯಾಂತ್ ಪಿಯೆಂವ್ಕ್ ನಾತ್ಲಿ.
ರೆಸ್ಟೊರೆಂಟಾ ಭಿತರ್ ರಿಗ್ತಾನಾ ಆನಿ ಭಾಯ್ರ್ ಯೆತಾನಾ ಬಾಗ್ಲಾರ್ ಹಾತ್ ನಿತಳಾಯೆ ಖಾತಿರ್ ಏಕ್ ವ್ಯಕ್ತಿ ಚೆಂಬಾಂತ್ ಉದಾಕ್ ಘೆವ್ನ್ ಉಬೊ ಆಸ್ಲೊ. ಆನಿ ಹಾತಾಕ್ ಸುಗಂದ್ ದ್ರವ್ಯ್ಯ್ ತೋ ಶಿಂಪ್ಡಾಯ್ತಾಲೊ. ರೆಸ್ಟೊರೆಂಟಾಚ್ಯಾ ಧನಿಯಾನ್ ಆಮ್ಚ್ಯಾ ಸಾಂಗಾತಾ ತಸ್ವಿರ್ಯೊಯ್ ಕಾಡ್ಲ್ಯೊ. ತ್ಯಾ ರೆಸ್ಟೊರೆಂಟಾಚೊ ಭಾಯ್ಲೊ ತಸೊಚ್ ಭಿತರ್ಲೊ ಸುಂರ್ಗಾರ್ ಇತ್ಲೊ ಸೊಭಿತ್ ಆಸ್ಲೊ ಕೀ, ವಾಟೆನ್ ವೆಚ್ಯಾ ವಾಟ್ಸುರ್ಯಾಕೀ ಭಿತರ್ ಅಪಯ್ತಾಲೊ.
ತೆಂ ರೆಸ್ಟೊರೆಂಟ್ ದರ್ಯಾ ತಡಿರ್ ಅಸ್ಲೆಲ್ಯಾನ್ ಆನಿ ಅಮ್ಚೊ ಡ್ರೈವರ್ ತಾಚ್ಯಾ ಕುಟ್ಮಾ ಸಾಂಗಾತಾ ಜೆವಾಣ್ ಕರುಂಕ್ ಗೆಲ್ಲ್ಯಾನ್ ಆಮಿ ದರ್ಯಾ ತಡಿರ್ ಥಂಡ್ ವಾರೆಂ ಸೆವುನ್ ಜೆವಾಣ್ ಜಿರಂವ್ಕ್ ಥೊಡೆಂ ಚಲ್ಲ್ಯಾಂವ್. ಸುಮಾರ್ ಧಾ ವರಾ ರಾತಿಕ್ ಪಾಟಿಂ ವಿಲ್ಲಾಕ್ ಯೇವ್ನ್ ಪಾವ್ಲ್ಯಾಂವ್.
ದುಸ್ರೊ ದೀಸ್ ಸಕಾಳಿಂ ಉಟೊನ್ ಐಯರ್ಲ್ಯಾಂಡಾ ಥಾವ್ನ್ ಬಾಂದುನ್ ಹಾಡ್ಲ್ಲೆ ಹುನೊನಿ ಗೋಡ್ ನಾರ್ಲಾಚೆ ಅಪೆ ಖಾವ್ನ್ ರಾಬಾಟ್ ಬೊವೊಂಕ್ ಬಾಯ್ರ್ ಸರ್ಲ್ಯಾಂವ್.
ಚೆಲ್ಲಾ ಯಾ ಶೆಲ್ಲಾ
ಪಯ್ಲೆಂ ಪಾವ್ಲ್ಯಾಂವ್ ಚೆಲ್ಲಾ ಯಾ ಶೆಲ್ಲಾ ಮ್ಹಳ್ಳ್ಯಾ ರಾವ್ಳೆರಾಕ್. ಪುರಾತನ್ ರೋಮನ್ ಕಾಳಾಚೆ ಅವಶೇಷ್ ಅಜೂನ್ ಹಾಂಗಾಸರ್ ದಿಶ್ಟಿಕ್ ಪಡ್ತಾತ್. ಮರಿನಿಡ್ ಮ್ಹಳ್ಳಿ ಬಳಿಶ್ಟ್ ರಾಯ್ಕುಳಿ ಹಾಂಗಾಸರ್ ರಾಜ್ ಕರ್ತಾಲಿ. ಮಜ್ಬೂತ್ ವಣದಿಂನಿ ಬಾಂದ್ಲ್ಲೆಂ ಹೆಂ ರಾವ್ಳೆರ್ ಆಜ್ ಫಕತ್ ಏಕ್ ಪಯ್ಣಾರ್ರ್ಯಾಂಚೆ ಆಕರ್ಶಣ್ ಜಾಂವ್ಕ್ ಪಾವ್ಲಾಂ. ಸೊಬಿತ್ ರುಕಾ – ಝಡಾನಿಂ, ಫುಲಾನಿಂ ಆನಿ ಫಳಾನಿಂ ಹೊ ಜಾಗೊ ಅಜೂನ್ ಜಿವಾಳ್ ಅಸಾ. ರಾವ್ಳೆರಾಚ್ಯಾ ವೊಣ್ದಿ ವಯ್ರ್ ಸುಕ್ಣ್ಯಾನಿಂ ಆಪ್ಲೆ ಘೊಂಟೆರ್ ಬಾಂದ್ಚೆಂ ಪಳೆವ್ನ್ ಭೊವ್ ಸಂತೊಸ್ ಜಾಲೊ. ಥಂಯ್ಸರ್ ಏಕ್ ವಿಕಾಳ್ ಫುಲಾಚಿಯ್ ವಳಕ್ ಜಾಲಿ. ಹ್ಯಾ ಫುಲಾಚೆಂ ನಾಂವ್ ‘ಬ್ರುಗ್ಮಾನ್ಸಿಯಾ’ ಹಾಕಾ ‘Angel’s trumpet’ ಮ್ಹುಣ್ಯ್ ಅಪಯ್ತಾತ್. ದವ್ಶ್ಯಾ ರಂಗಾಚೆಂ ಟ್ರಂಪೆಟಾ ಬರಿಂ ಉಮ್ಕಾಳ್ಚೆಂ ಹೆಂ ಫುಲ್ ಭಾರಿಚ್ ವಿಕಾಳ್. ಸಾಂಜೆರ್ ಹಾಚೊ ಫರ್ಮಳ್ ಚಡ್ತಾ. ಹೆಂ ಫುಲ್ ಯಾ ಹ್ಯಾ ರುಕಾಚಿಂ ಪಾನಾಂ ಸೆವ್ಲ್ಯಾರೀ ಮೊರ್ಚಿ ಸಾದ್ಯತಾ ಆಸಾ.
ವಿಕಾಳ್ ಫುಲ್ – ಬ್ರುಗ್ಮಾನ್ಸಿಯಾ
ಹಸಾನ್ನ್ ಬುರುಜ್ + ಮಸೀದ್
ಉಪ್ರಾಂತ್ ಆಮಿ ಹಸಾನ್ನ್ ಬುರುಜ್ ಪಳೆಂವ್ಕ್ ಗೆಲ್ಯಾಂವ್. ಬಾರಾವ್ಯಾ ಶೆಕ್ಡ್ಯಾಂತ್ ಅಬು ಯುಸುಫ್ ಯಾಕುಬ್ ಅಲ್-ಮನ್ಸೂರ್ ಹಾಣೆ ಸಂಸಾರಾಂತ್ಲಿ ಅಧಿಕ್ ವ್ಹಡ್ಲಿ ಮಸೀದ್ ಬಾಂದ್ಚೆಂ ಯೋಜನ್ ಘಾಲ್ಲೆಂ. ಹಾಚೊ ಬುರುಜ್ ಸುಮಾರ್ 86 ಮೀಟರ್ ಉಬಾರಾಯೆರ್ ಬಾಂದ್ಚಿ ತಾಚಿ ಅಲೋಚನ್ ಅಸ್ಲಿ. ಪೂಣ್ 1199 ವ್ಯಾ ವರ್ಸಾ ತೊ ಅಂತರ್ಲೊ ದೆಕುನ್ ಹ್ಯಾ ಬಾಂದ್ಪಾಚೆಂ ಕಾಮ್ ರಾವ್ಲೆಂ. ಆನಿ ಉಪ್ರಾಂತ್ 1755 ವ್ಯಾ ವರ್ಸಾ ಅಯಿಲ್ಲ್ಯಾ ಭುಂಯ್ಕಾಂಪ್ಣೆನ್ ಆಜ್ ಹೊ ಬುರುಜ್ ಫಕತ್ 44 ಮೀಟರ್ ಮಾತ್ರ್ ಉರ್ಲಾ. ಹೊ ಬುರುಜ್ ಮೊರೊಕ್ಕೊಚೆಂ ಐತಿಹಾಸಿಕ್ ಲ್ಯಾಂಡ್ ಮಾರ್ಕ್ ಜಾವ್ನ್ ನಾಂವಾಡ್ಲಾ. ಹಾಚ್ಯಾ ಭೊಂವ್ತೊಣಿ ಆಸ್ಚೆ ಕುಂದೆ ಹಾಚಿ ಸೊಭಾಯ್ ವಾಡಯ್ತಾತ್.
ಮೊಹಮ್ಮದ್ 5 – ರಾಶ್ಟ್ರಾಚೊ ಬಾಪುಯ್
ಮೊಹಮ್ಮದ್ 5 ಹಾಣೆಂ ಮೊರೊಕ್ಕೊಕ್ ವಸ್ಣುಕೆಚ್ಯಾ ರಾಜ್ಯಾ (colonial rule) ಥಾವ್ನ್ ಸ್ವತಂತ್ರ್ ಲಾಬಯಿಲ್ಲೆಂ. 1957 ವ್ಯಾ ವರ್ಸಾ ಸ್ವತಂತ್ರಾ ಉಪ್ರಾಂತ್ ತೊ ಪಯ್ಲೊ ಅಧುನಿಕ್ ರಾಯ್ ಜಾಲೊ. ಹಾಣೆಂ ಅಧುನಿಕ್ ಮೊರೊಕ್ಕೊಚಿ ಬುನ್ಯಾದ್ ಘಾಲಿ. ದೆಕುನ್ ತಾಕಾ ರಾಶ್ಟ್ರಾಚೊ ಬಾಪುಯ್ ಮ್ಹಣ್ ನಾಂವ್ ದಿಲಾಂ. 1961 ವ್ಯಾ ವರ್ಸಾ ತೊ ಮರಣ್ ಪಾವ್ಲೊ. ತಾಕಾ ನಿಕೆಪಿಲ್ಲ್ಯಾ ಜಾಗ್ಯಾರ್, ದವ್ಯಾ ಮಾರ್ಬಲ್ ಫಾತ್ರಾರ್, ಪಾಚ್ವೆಂ ನಳ್ಯಾಂಚೆಂ ಪಾಕೆಂ ಆಸಾ ಆನಿ ರಾಯಾಳ್ ಗಾರ್ಡ್ ಹ್ಯಾ ಸಮಾದಿಚಿ ರಾಕ್ವಲಿ ಕರ್ತಾತ್. ಹಸಾನ್ನ್ ಬುರುಜಾಚ್ಯಾ ಬಗ್ಲೆಕ್ಚ್ ಆಸಾ ಮೊಹಮ್ಮದ್ 5 ಚಿ ಸಮಾದಿ. ತಾಚ್ಯಾ ಮೊರ್ನಾ ಉಪ್ರಾಂತ್ ಹಸಾನ್ನ್ 2 ತಾಚೊ ಪೂತ್ ರಾಯ್ ಜಾಲೊ. ಆನಿ ಆಜ್ ತಾಚೊ ನಾತು ಮೊಹಮ್ಮದ್ 6 ರಾಯ್ ಜಾವ್ನ್ ಆಡಳ್ತೆಂ ಚಲಯ್ತೆ ಆಸಾ.
ಓಲ್ಡ್ ಟೌನ್ ಓಪನ್ ಮಾರ್ಕೆಟ್
ಉಪ್ರಾಂತ್ ಆಮಿ ಪಾವ್ಲ್ಯಾಂವ್ ರಾಬಾಟಾಚ್ಯಾ ಪರ್ನ್ಯಾ ಶಹರಾಕ್ (Medina, old town) ಮಜ್ಬೂತ್ ಪರ್ನೆ ವೊಣದಿ ಹಾಂಗಾಸರ್ ಪಳೆಂವ್ಕ್ ಮೆಳ್ಳೆ. ಚಲೊನ್ ಮುಖಾರ್ ವೆತಾನಾ ಓಲ್ಡ್ ಟೌನ್ ಓಪನ್ ಮಾರ್ಕೆಟ್ ಅಸ್ಲಿ. ಏಕ್ ಪಾವ್ಟಿಂಚ್ಯಾಕ್ ಮ್ಹಕಾ ಬೊಂಬಯ್ಚ್ಯಾ ಚೋರ್ ಬಜಾರಾಕ್ ರಿಗ್ಲ್ಲೊ ಅನುಭವ್ ಜಾಲೊ. ಥೊಡಿಂ ಪೇಂಯ್ಟಿಂಗಾ ತಶೆಂಚ್ ಹೆರ್ ವಸ್ತು ಆಮಿ ಮೋಲಾಕ್ ಘೆತ್ಲಿಂ.
ಚಲೊನ್ ಚಲೊನ್ ಅಮ್ಕಾಂ ಭುಕ್ ಲಾಗೊಂಕ್ ಸುರು ಜಾಲ್ಲಿ. ಮೊರೊಕ್ಕೊಚೆಂ ಜೆವಾಣ್ ಕಾಲ್ ಜೆವ್ಲ್ಲ್ಯಾಂವ್ ಆಜ್ ಮಾಂಯ್ಗಾಂವ್ಚೆಂ ಜೆವಾಣ್ ಜೇಂವ್ಕ್ ಅಶಾ ಆಯ್ಲಿ ದೆಕುನ್ ರಿಗ್ಲ್ಯಾಂವ್ “ಕ್ಲೇ ಒವನಾ” ಬಿತರ್. ರುಚಿಕ್ ಬಿರಿಯಾನಿ, ಚಿಕನ್ ಫ್ರೈ ಜಾಯ್ ಜಾಲ್ಲೆಂ ಖಾವ್ನ್ ಅನ್ಯೇಕಾ ಜಾಗ್ಯಾಕ್ ಪಾವ್ಲ್ಯಾಂವ್.
ಕಸ್ಬಾ ಆಫ್ ಉದಯಾಸ್
ನಂಯ್ – ದರ್ಯಾ ಸಂಗಮ್
ಕಸ್ಬಾ ಆಫ್ ಉದಯಾಸ್ ಅಟ್ಲಾಂಟಿಕ್ ತಡಿರ್ ಬೌ ರೆಗ್ರೆಗ್ ನಂಯ್ ದರ್ಯಾಕ್ ಮೆಳ್ಚ್ಯಾ ಜಾಗ್ಯಾರ್ ಉಬೊ ಅಸ್ಚೊ ಭೊವ್ ಸೊಬಿತ್ ಐತಿಹಾಸಿಕ್ ಜಾಗೊ ಜಾವ್ನಾಸಾ. ಬಾರಾವ್ಯಾ ಶತಮಾನಾಂತ್ ಅಲ್ಮೊಹಾಡ್ ರಾಯ್ ಕುಳಿಯೆನ್ ಬಾಂದ್ಲ್ಲೆಂ ಬಾಂದಾಪ್. ಉಪ್ರಾಂತ್ ಹೊ ಜಾಗೊ ಅಂಡಲುಸಿಯನ್ ಆಸ್ರೊ ಸಾಂಡ್ಲ್ಲ್ಯಾ ಲೋಕಾಕ್ ಘರ್ ಜಾಂವ್ಕ್ ಪಾವ್ಲೊ. ಸತ್ರಾವ್ಯಾ ಶತಮಾನಾಂತ್ ಸುಮಾರ್ ಘರಾಣ್ಯಾಂಕ್ ಸ್ಪೇನಾ ಥಾವ್ನ್ ದಾಂವ್ಡಾಯಿಲ್ಲೆಂ ತೊ ಲೋಕ್ ತಾಂಚೆ ಸಂಗಿ ತಾಂಚಿ ಜಿಣ್ಯೆ ಶೈಲಿಯ್ ಘೆವ್ನ್ ಆಯಿಲ್ಲೊ. ದೆಕುನ್ ಹಾಂಗಾಸರ್ ಆಮ್ಕಾಂ ದವ್ಯಾ ತಶೆಂಚ್ ನಿಳ್ಶ್ಯಾ ರಂಗಾನಿ ಬಾಂದ್ಲ್ಲಿಂ ಘರಾಂ ದಿಸ್ತಾತ್. ತಾಂಚ್ಯಾ ಚಿಂತ್ನಾ ಪರ್ಮಾಣೆಂ ನಿಳ್ಸೊ ರಂಗ್ ಥಂಡಾಯ್ ದಿತಾ ತಶೆಂಚ್ ದವ್ಸೊ ರಂಗ್ ನಿತಳಾಯ್ ಸಾಂಬಾಳ್ತಾ. ಏಕ್ ಕೊಲೇಜಿಕ್ ವೆಚ್ಯಾ ಚಲ್ಯಾನ್ ಅಮ್ಕಾಂ ಹಾಂಗಾಚೊ ಸಗ್ಳೊ ಇತಿಹಾಸ್ ಸಾಅಂಗ್ಲೊಂ. ತಾಚೆಂ ಇಂಗ್ಲೀಶ್ ಬರೆಂ ಆಸ್ಲ್ಲ್ಯಾನ್ ಆಮ್ಕಾಂ ಸಮ್ಜೊಂಕ್ ಕಶ್ಟ್ ಜಾಲೆ ನಾಂತ್.
ಸಾಂಜ್ ಜಾವ್ನ್ ಯೆತಾನಾ ಥಂಡ್ ವಾರೆಂ ವಾಳ್ತಾಲೆಂ ಆನಿ ಪಾವ್ಸ್ಯ್ ಶೆಣಾಂವ್ಕ್ ಲಾಗ್ಲೊ. ದೆಕುನ್ ಆಮಿ ಆಜ್ ವೆಗ್ಗಿಂ ಘರಾ ಪಾಟಿಂ ವೆಚಿ ಅಲೋಚನ್ ಕೆಲಿ. ಘರಾ ಪಾವೊನ್ ಕುಡಿಚಿ ನಿತಳಾಯ್ ತಿರ್ಸುನ್ ಥಂಡಿ ಪಯ್ಸ್ ಕರುಂಕ್ ರಾಂದ್ಣಿಕ್ ಉಜೊ ಪೆಟವ್ನ್ ದೊಳೆ ಆಡ್ ಜಾತಾ ಪರ್ಯಾಂತ್ ಗಪ್ಪೆ ಮಾರ್ನ್ ಬಸ್ಲ್ಯಾಂವ್.
ತಿಸ್ರೊ ದೀಸ್ ಆಮಿ ಲಾಗ್ಶಿಲ್ಯಾ ಕಾಸಾಬ್ಲಾಂಕಾ ಮ್ಹಳ್ಳ್ಯಾ ಅನ್ಯೇಕಾ ಗಾಂವಾಕ್ ವೆಚೊ ನಿರ್ದಾರ್ ಕೆಲ್ಲೊ. ಸಕಾಳಿಂ ಉಟೊನ್ ಸಜ್ಜಿ-ಪೊವ್ ಆನಿ ಮಂಡಾಸ್ ಖಾವ್ನ್ ಭಾಯ್ರ್ ಸರ್ಲ್ಯಾಂವ್ ಕಾಸಾಬ್ಲಾಂಕಾ ಪಳೆಂವ್ಕ್.
ಕಾಸಾಬ್ಲಾಂಕಾ ಹಸನ್ 2 ಮಸೀದ್
ಸಂಸಾರಾಂತ್ಲ್ಯಾ ಮಸಿದೆ ಪಯ್ಕಿಂ ತಿಸ್ರಿ ವ್ಹಡ್ಲಿ ಮಸಿದ್ ಹಿ. ಹಾಚೊ ಬುರುಜ್ 210 ಮೀಟರ್ ಲಾಂಬ್ ಅಸಾ. ಹ್ಯಾ ಮಸಿದೆ ಬಿತರ್ ಪಂಚ್ವೀಸ್ ಹಜಾರ್ ಲೋಕಾಕ್ ಮಾಗ್ಣೆಂ ಕರುಂಕ್ ಜಾಗೊ ಅಸಾ. ಹಾಚ್ಯಾ ಬೇಸ್ ಮೆಂಟಾಂತ್ ಮಾಗ್ಣ್ಯಾ ಪಯ್ಲೆಂ ಹಾತ್ ಆನಿ ಆಂಗ್ ನಿತಳ್ ಕರುಂಕ್ ಹಜಾರೋಂ ಉದ್ಕಾ ಫಾವ್ರೆ (fountain) ಅಸಾತ್. ಹ್ಯಾ ಬಾಂದ್ಪಾಚೆಂ ಕಾಮ್ 1993 ವ್ಯಾ ವರ್ಸಾ ಸಂಪ್ಲೆಂ. ಮಾರ್ಬಲಾಚಿ ದರ್ಣ್ ತರ್ ಹಾತಾನಿಂ ಕಾಂತಾಯಿಲ್ಲೆಂ ಪಾಕೆಂ ಗಿಮಾಳ್ ದಿಸಾನಿಂ ಲೋಕ್ ಭರ್ತಾನಾ ಹೆಂ ಪಾಕೆಂ ಉಗ್ತೆಂ ಕರ್ಚಿ ವ್ಯವಸ್ತಾಯ್ ಆಸಾ. ಬೊಂವ್ತೊಣಿಂ ಅಸ್ಚೊ ಅಟ್ಲಾಂಟಿಕ್ ದರ್ಯಾ ಹ್ಯಾ ಮಸೀದೆಚಿ ಸೊಭಾಯ್ ಚಡಯ್ತಾ.
ಅಖಂಡ್ ಮಾಸ್ಳೆಚೆಂ ಭೊಶಿಭರ್ ಜೆವಣ್
ಮಾರ್ಚ್ ತಿಸ್ರೊ ಅಯ್ತಾರ್ ಯುರೋಪಾಂತ್ ಅವಯಾಂಚೊ ದೀಸ್ ಜಾವ್ನ್ ಸಂಭ್ರಮ್ತಾತ್. ದೆಕುನ್ ಆಮಿ ಆವಯೊ ಅಮ್ಕಾಂಚ್ ಸಂಭ್ರಮುಂಕ್ ದೊನ್ಪಾರಾಂ ಬರ್ಯಾ ಮಾಸ್ಳೆಚ್ಯಾ ರೆಸ್ಟೋರೆಂಟಾಕ್ ಜೆವ್ಣಾಕ್ ಗೆಲ್ಯಾಂವ್. ಸಗ್ಳಿ ಮಾಸ್ಳಿ ಬೊಶಿಯೆಂತ್ ಪಳೆವ್ನ್ ಅಜ್ಯಾಪ್ ಜಾಲ್ಯಾರೀ ತಾಚಿ ರೂಚ್ ಭಾರಿಚ್ ಸ್ವಾದಿಶ್ಟ್ ಆಸ್ಲ್ಲಿ.
ಸೇಕ್ರೆಡ್ ಹಾರ್ಟ್ ಕೆಥೆಡ್ರಲ್
ಹಾಂಗಾಚೊ ಪ್ರಮುಖ್ ಧರ್ಮ್ ಇಸ್ಲಾಂ ತರೀ ಹಾಂಗಸರ್ ಥೊಡೆ ಕ್ರೀಸ್ತಾಂವ್ ಧರ್ಮಾಕ್ ಕನ್ವಡ್ತರ್ ಜಾಲ್ಲೆ ಆಸಾತ್. ಹೆರಾಂ ಥಾವ್ನ್ ವಾಂಚೊಂಕ್ ತಾಣಿಂ ಆಪ್ಲೊ ಧರ್ಮ್ ಲಿಪಯ್ಜಯ್ ಪಡ್ತಾ. 1930 ವ್ಯಾ ವರ್ಸಾ ಹ್ಯಾ ಕೆಥೆಡ್ರಲಾಚೆಂ ಬಾಂದಾಪ್ ಸಂಪೂರ್ಣ್ ಜಾಲೆಂ. ಮೊರೊಕ್ಕೊಚ್ಯಾ ಸ್ವತಂತ್ರಾ ಉಪ್ರಾಂತ್ ಹಿ ಇಗರ್ಜ್ ಏಕ್ ಸಾಂಸ್ಕ್ರತಿಕ್ ಕೆಂದ್ರ್ ಜಾಂವ್ಕ್ ಪಾವ್ಲಿ.
ಅರಬ್ ಲೀಗ್ ಪಾರ್ಕ್
ಕಾಸಾಬ್ಲಾಂಕಾ ಶಹರಾಚ್ಯಾ ಮದೆಗಾತ್ 75 ಎಕ್ರೊ ಸುವಾತೆರ್ ಅಸ್ಚೆಂ ಹೆಂ ಪಾರ್ಕ್ ಬೊವ್ ಆಕರ್ಶಕ್ ಜಾವ್ನಾಸಾ. ಲಾಂಬಾಯೆಕ್ ಮಾಡಿಯೊ, ಮಧೆಂ ಉದ್ಕಾ ವಾಳೊ, ಬಸೊಂಕ್ ಬಾಂಕ್ ಆನಿ ಪಾಚ್ವೆಂ ತಣ್, ಮತಿಕ್ ಹಾಸಯ್ತಾ ತಶೆಂಚ್ ಕಾಳ್ಜಾಕ್ ನಾಚಯ್ತಾ.
ಉಪ್ರಾಂತ್ ಅಮಿಂ ಕಾಸಾಬ್ಲಾಂಕಾ ಮಾರ್ಕೆಟಿಚಿ ವಾಟ್ ದರ್ಲಿ. ಮಾಸ್ ಮಾಸ್ಳೆಚಿಂ, ವಸ್ತುರಾಂಚಿಂ, ದಾಂದ್ವಯೆಚ್ಯಾ ದುಕಾನಾಂನಿ ಲೋಕಾಚಿ ಖೆಟ್ ಆಸ್ಲಿ. ಏಕಾ ದುಕಾನಾಂತ್ ನಮುನ್ಯಾವಾರ್ ಒಲಿವ್ಸ್ ಪಳೆವ್ನ್ ಇತ್ಲ್ಯಾ ನಮುನ್ಯಾಚೆ ಆಲಿವ್ಸ್ ಅಸಾತ್ಗೀ ಮ್ಹಣ್ ಚಿಂತುನ್ ವಿಜ್ಮಿತ್ ಪಾವ್ಲಿಂ. ಮೋಲಾಕ್ ಘೆವ್ಯಾಂ ಮ್ಹಣ್ ಆಶಾ ಜಾಲ್ಯಾರೀ ಏರ್ ಪೋರ್ಟಾಂತ್ ಕಾಡ್ನ್ ಉಡಯ್ತಿತ್ ಮ್ಹಳ್ಳ್ಯಾ ಬಿಂಯಾನ್ ದೊಳೆಭರ್ ಪಳೆವ್ನ್ ಪಾಟಿಂ ಪರ್ತಾಲ್ಯಾಂವ್.
ಚೊವ್ತ್ಯಾ ದಿಸಾ ಗೋಡ್ ನಾರ್ಲಾಚ್ಯಾ ಮುಟ್ಲ್ಯಾಂಚೊ ನಾಸ್ಟೊ ಕರ್ನ್, ಆಮ್ಚ್ಯಾ ವಿಲ್ಲಾಕ್ ಅಸ್ಲ್ಯಾ ಪ್ರೈವೆಟ್ ಬೀಚಾರ್ ವೇಳ್ ಪಾಶಾರ್ ಕರುಂಕ್ ಚಿಂತ್ಲೆಂ. ತೀನ್ ದೀಸಾಂಚಿ ಪುರಾಸಣ್ ತ್ಯಾ ಥಂಡ್ ದರ್ಯಾ ತಡಿಚ್ಯಾ ಲಾರಾನಿಂ ಆನಿ ಶೀತಳ್ ವಾರ್ಯಾನ್ ಮಾಯಾಕ್ ಕೆಲ್ಲಿ. ಸಾಂಜ್ ಜಾವ್ನ್ ಆಯ್ಲಿ ಮೊರೊಕ್ಕೊಕ್ ಅದೇವ್ಸ್ ಮಾಗ್ಚೊ ವೇಳ್ ಲಾಗಿಂ ಪಾವ್ಲ್ಲೊ. ಮನ್ ನಾತ್ಲ್ಲ್ಯಾ ಮನಾನ್ ಆಮಿ ಏರ್ಪೋರ್ಟಾಚಿ ವಾಟ್ ದರ್ಲಿ. ರಾತಿಂ ಮೊಳ್ಬಾರ್ ಥಾವ್ನ್ ವೀಜ್ ದಿವೆ ಮೊರೊಕ್ಕೊಚಿ ಸೊಭಾಯ್ ಅನಿಕೀ ಚಡಯ್ತಾಲೆ.
