ಗೋಡ್ ಜಿವಿತಾಚಿ ತಡ್ – ಅಮಾಲ್ಫಿ

61

ಅಮಾಲ್ಫಿ ಕೋಸ್ಟ್, ಇಟೆಲಿಚ್ಯಾ ದಕ್ಶಿಣ್ ಭಾಗಾಕ್ ಅಸ್ಚಿ ಮಸ್ತ್ ವ್ಹಡ್ಲಿ ಸೊಭಿತ್ ದರ್ಯಾ ತಡ್. ಹ್ಯಾ ಜಾಗ್ಯಾಚಿ ಸೊಭಾಯ್ ಪಳೆಂವ್ಕ್ ದೋನ್ ದೊಳೆ ಪಾವಾನಾಂತ್. ರಸ್ತ್ಯಾಚ್ಯಾ ಎಕಾ ಕುಶಿಕ್ ದರ್ಯಾ ತರ್ ಅನ್ಯೇಕಾ ಕುಶಿಕ್ ಗುಡ್ಯಾ ದೊಂಗ್ರಾರ್ ಸೊಭ್ಚಿಂ ರಂಗ್ ರಂಗಾಳ್ ಘರಾಂ. ಹ್ಯಾ ಲಾಂಬ್ ದರ್ಯಾ ತಡಿರ್ ಸಬಾರ್ ಶಹರಾಂ ಆಸಾತ್. ನಾಂವಾಂ ದುಸ್ರಿಂ ತರೀ ಪಳೆಂವ್ಕ್ ಸಗ್ಳಿಂ ಶಹರಾಂ ಎಕ್‌‍ಚ್ ಲೇಕ್ ದಿಸ್ತಾತ್. ಅಮಾಲ್ಫಿ ಕೋಸ್ಟಾಂತ್ಲ್ಯಾ ಶಹರಾಂಚಿಂ ನಾಂವಾಂ ಅಶಿಂ ಅಸಾತ್. ಪೋಸಿಟಾನೊ, ಪ್ರಾಯಾನೊ, ಫುರೋರ್, ಕೋನ್ಕ ಡೆಯ್ ಮರಿನಿ, ಅಮಾಲ್ಫಿ, ಅತ್ರಾನಿ, ಸ್ಕಾಲಾ, ಮಿನೋರಿ, ಟ್ರಾಮೊಂಟಿ, ಮಯೋರಿ, ಸೆಟಾರಾ, ವಿಯೆಟ್ರಿ ಸುಲ್ ಮಾರೆ, ಸಲೇರ್ನೊ ಆನಿ ರಾವೆಲ್ಲೊ.

ಕಾಮಾಚ್ಯಾ ದಬಾವಾ ಥಾವ್ನ್ ಸುಟ್ಕಾ ಜೊಡುಂಕ್ ಆಮಿ ಆಟ್ ಚಲಿಯಾನಿಂ ಥೊಡ್ಯಾ ದಿಸಾಂ ಖಾತಿರ್ ಇಟೆಲಿ ವೆಚಿ ಅಲೋಚನ್ ಕೆಲಿ. ಘಡ್ಯೆ ಬಿತರ್ ಟಿಕೆಟ್ ಬುಕ್ ಜಾಲಿ, ತಶೆಂಚ್ ಬ್ಯಾಗಾಂಯ್ ಪ್ಯಾಕ್ ಜಾಲಿಂ. ಎಪ್ರಿಲ್ ತೀಸ್ ತಾರಿಕೆರ್ ಸಕಾಳಿಂ ಧಾ ವರಾರ್ ಪಾವ್ಲ್ಯಾಂವ್ ಇಟೆಲಿಚ್ಯಾ ನೇಪಲ್ಸ್ ಶಹರಾಕ್. ಆಮಿ ಪಯ್ಲೆಂಚ್ ವಾಹನಾಚಿ ವಿಲೆವಾರಿ ಕೆಲ್ಲ್ಯಾನ್ ಅಮ್ಚೊ ಡ್ರೈವರ್ ಏರ್‌ಪೋರ್ಟಾಂತ್ ಆಮ್ಕಾಂ ರಾಕ್ತಾಲೊ. ಹಾತ್ ಮೆಳವ್ನ್ ಎಕಾಮೆಕಾಚಿ ಒಳಕ್ ಕರ್ನ್ ಘೆವ್ನ್ ಅಪ್ಲಿ ಗಾಡಿ ತಾಣೆಂ ಹೋಟೆಲ್ ಮೇರಿ ತೆವ್ಶಿಂ ದಾಂವ್ಡಾಯ್ಲಿ. ವಾಟೆರ್ ಅಸ್ತಾನಾ ತೆಣೆಂಚ್ ಲಾಗ್ಸಾರ್ ಅಸ್‌ಲ್ಲ್ಯಾ ಥೊಡ್ಯಾ ಪಸಿದ್ದ್ ಜಾಗ್ಯಾಂ ವಿಶಿಂಯ್ ಮಾಹೆತ್ ದಿಲಿ.

ಎರ್ ಪೋರ್ಟ್ ಆನಿ ಅಮಾಲ್ಫಿ ಕೋಸ್ಟಾಚ್ಯಾ ಮದೆಗಾತ್ ದೊಂಗ್ರಾಚೆರ್ ಸೊಬ್ತಾ ‘ಹೋಟೆಲ್ ಮೇರಿ’. ರಿಸೆಪ್ಶನಿಸ್ಟಾನ್ ತುಮ್ಚೆಂ ರೂಂ – 3 ಮ್ಹಣ್ತಾನಾ ಅಮ್ಚೆಂ ರೂಮ್ ಕಿತೆಂ ದರ್ಣಿ ಪದಾಂ ಅಸಾಗಿ? ಮ್ಹಣ್ ಅಜ್ಯಾಪ್ ಜಾಲೆಂ. ಉಪ್ರಾಂತ್ ಕಳ್ಳೆಂ ಅಮಿಂ ದೊಂಗ್ರಾರ್ ಆಸಾಂವ್ ಮ್ಹಣ್. ಸೊಬಿತ್ ರೂಮ್, ರುಮಾಚ್ಯಾ ಭಾಯ್ರ್ ಸ್ವಿಮ್ಮಿಂಗ್ ಪೂಲ್ ಆನಿ ವೋತ್ ಶೆಕುಂಕ್ ಸನ್ನ್ ಬೆಡ್ಡಾಂ. ಅನಿಕೀ 250 ಮೆಟಾಂ ಸಕಯ್ಲ್ ಗೆಲ್ಯಾರ್ ಬೀಚ್, ಬೀಚ್ ಕ್ಲಬ್ಬ್ ಆನಿ ಹೆರ್ ಸವ್ಲತಾಯೊ ಅಸಾತ್.

ಪಯ್ಣಾಚಿ ಪುರಾಸಣ್ ಕಾಡುಂಕ್ ಅಮಿ ಥೊಡೊ ವೇಳ್ ರುಮಾಂತ್ ಆರಾಮ್ ಕರ್ನ್ ಉಪ್ರಾಂತ್ ದೊನ್ಪಾರಾಂಚ್ಯಾ ಜೆವ್ಣಾಕ್ ಲಾಗಿಂಚ್ ಅಸ್ಚ್ಯಾ ಸಿಟಿಕ್ ಗೆಲ್ಯಾಂವ್. ಥಂಯ್ಸರ್ ಸಬಾರ್ ದುಕಾನಾಂ ಆನಿ ರೆಸ್ಟೊರೆಂಟಾ ಅಸ್ಲ್ಯಾರೀ ಲೋಕಾಚಿ ಖೆಟ್‌ಯ್ ತಶಿಚ್ ಆಸ್‌ಲ್ಲಿ. ತೊ ಜಾಗೊ ಪಿಜ್ಜಾ ಆನಿ ಪ್ಯಾಸ್ಟಾಕ್ ನಾಂವಾಡ್‌ಲ್ಲ್ಯಾನ್ ಆಮಿ ಎಕಾ ರೆಸ್ಟೊರೆಂಟಾ ಭಿತರ್ ರಿಗೊನ್ ತೆಂಚ್ ಆರ್ಡರ್ ಕರ್ನ್ ಜೆವ್ಲ್ಯಾಂವ್ ಲೆಮೆನ್ಚೆಲ್ಲೊ ಮ್ಹಳ್ಳೆಂ ಥಂಯ್ಚೆಂ ಪ್ರಸಿದ್ದ್ ಪೀವನ್‌ಯ್ ಪಿಯೆಲ್ಯಾಂವ್. ದುಕಾನಾಂಕ್ ಹಾಜ್ರಿ ಘಾಲ್ನ್, ಪೆಂಟೆಂತ್ ಭಂವೊನ್, ಉಪ್ರಾಂತ್ ದರ್ಯಾ ತಡಿರ್ ರೆಂವೆಚಿ ರಾವ್ಳೆರಾಂ ಬಾಂದುನ್, ರಾತ್ಚೆಂ ಜೆವಾಣ್ ಸಂಪವ್ನ್ ಪಾವ್ಲ್ಯಾಂವ್ ಪಾಟಿಂ ಅಮ್ಚ್ಯಾ ರುಮಾಕ್.

ದುಸ್ರ್ಯಾ ದಿಸಾ ಪ್ರಕೃತೆಚಿ ಸೊಭಾಯ್ ಚಾಕ್ತಾಸ್ತಾಂ ಸಕಾಳಿಂಚೊ ನಾಸ್ಟೊ ತಿರ್ಸುನ್ ಬಾಯ್ರ್ ಸರ್ಲ್ಯಾಂವ್ ಪೋಸಿಟಾನೊ ಮ್ಹಳ್ಳ್ಯಾ ಜಾಗ್ಯಾಕ್. ರಸ್ತ್ಯಾಚ್ಯಾ ಎಕಾ ಕುಶಿಕ್ ದರ್ಯಾ ತರ್ ಅನ್ಯೇಕಾ ಕುಶಿಕ್ ರಾನ್ ಆನಿ ದೊಂಗೊರ್. ದೊಂಗ್ರಾ ಮದೆಗಾತ್ ಟನೆಲ್ ಕರ್ನ್ ರಸ್ತೊ ನಿರ್ಮಿಲ್ಲೊ ಪಳೆವ್ನ್ ಅಜ್ಯಾಪ್ ಜಾಲೆಂ. ಎಕಾ ಶಹರಾ ಥಾವ್ನ್ ಅನ್ಯೇಕಾ ಶಹರಾಕ್ ವಚೊಂಕ್ ಟನೆಲಾ ಬಿತರ್ಲ್ಯಾನ್ ವೆಚಿ ವ್ಯವಸ್ಥಾ ಆಸ್ಲಿ.

ಸಕಯ್ಲ್ ಪೋಸಿಟಾನೊ ಮ್ಹಳ್ಳ್ಯಾ ತ್ಯಾ ಜಾಗ್ಯಾಕ್ ವೆಚ್ಯಾ ಪಯ್ಲೆಂ ವರ್ಯ್ ಗುಡ್ಯಾರ್ ಗಾಡಿ ರಾವವ್ನ್ ಆಮ್ಚ್ಯಾ ಡ್ರೈವರಾನ್ ಪೋಸಿಟಾನೊ ವಿಶ್ಯಾಂತ್ ಸಗ್ಳೆಂ ಸಮ್ಜಾಯ್ಲೆಂ. ಉಪ್ರಾಂತ್ ಆಮಿ ತ್ಯಾ ಸೊಭಿತ್ ಜಾಗ್ಯಾಕ್ ಪಾವ್ಲ್ಯಾಂವ್. ಹೆಂ ಅಮಾಲ್ಫಿ ಕೋಸ್ಟಾಂತ್ಲೆಂ ಪಯ್ಲೆಂ ಲ್ಹಾನ್ ಶಹರ್. ಪಯ್ಲೆಂ ಹಿ ಮಾಸ್ಳಿ ಪಾಗ್ಪ್ಯಾಂಚಿ ಲಾನ್ಶಿ ಹಳ್ಳಿ ಜಾವ್ನಾಸ್ಲಿ. ವಿಸಾವ್ಯಾ ಶತಮಾನಾಂತ್ ವಿದೇಶಿ ಪಯ್ಣಾರ‍್ಯಾಂಚೆಂ ಯೆಣೆಂ ಹ್ಯಾ ಹಳ್ಳೆಕ್ ಗ್ರೇಸ್ತ್ ಕರುಂಕ್ ಪಾವ್ಲೆಂ. ದೊಂಗ್ರಾರ್ ದಿಸ್ಚಿಂ ರಂಗ್ ರಂಗಾಳ್ ಘರಾಂ ಅನಿಂ ಮುಖಾರ್ ದಿಶ್ಟಿಚ್ಯಾ ಅಂತ್ಯ್ ಪರ್ಯಾಂತ್ ದಿಸ್ಚೊ ದರ್ಯೊ. ಮೋಗ್ ಕರ್ಣಾರಾಂಚೊ ಮೊಗಾಚೊ ಜಾಗೊ ಹೊ. ಹಾಂಗಾ ಥಾವ್ನ್ ಫೆರಿ ಕ್ಯಾಪ್ರಿ ಐಲ್ಯಾಂಡಾಕ್ ವೆತಾತ್. ಮಧೆಂ ದರ್ಯಾ ಥಾವ್ನ್ ದೊಂಗ್ರಾ ವಯ್ಲ್ಯಾ ಹ್ಯಾ ಘರಾಂಚಿ ಸೊಭಾಯ್‌ಚ್ ವೆಗ್ಳಿ. ಆಮ್ಚಿ ದಿಸ್ಪಡ್ತಿ ಮಾತ್ಶಿ ಟೈಟ್ ಆಸ್ಲಿ ದೆಕುನ್ ಅಮ್ಕಾಂ ಕ್ಯಾಪ್ರಿ ಐಲ್ಯಾಂಡಾಕ್ ವೆಚೊ ಅವ್ಕಾಸ್ ಲಾಬೊಂಕ್ ನಾಂ. ತೆಂ ಶಹರ್ ಆಮಿ ಪಾಂಯ್ ವಾಟೆನ್ ಭೊಂವ್ಲ್ಯಾಂವ್ ಉಪ್ರಾಂತ್ ಥಂಯ್ಚ್ಯಾ ಪ್ರಸಿದ್ಧ್ ಇಗರ್ಜೆ ಬಿತರ್ ರಿಗ್ಲ್ಯಾಂವ್.

ಮರಿಯೆಚ್ಯಾ ಸ್ವರ್ಗಾರೋಹಣಾಚಿ ಹಿ ಇಗರ್ಜ್ ಪೋಸಿಟಾನೊಂತ್ಲೆಂ ಪಯ್ಣಾರ‍್ಯಾಂಚೆಂ ಪ್ರಮುಕ್ ಆಕರ್ಶಣ್ ಜಾವ್ನಾಸಾ. ಹ್ಯಾ ಇಗರ್ಜೆಚಿ ತಕ್ಲಿ (ಡೋಮ್) ಹಳ್ದುವ್ಯಾ, ಪಾಚ್ವ್ಯಾ ಆನಿ ನಿಳ್ಶ್ಯಾ ಮಜೊಲಿಕ ಟೈಲ್ಸಾಂನಿ ಸೊಭಯ್ಲ್ಯಾ ದೆಕುನ್ ಹ್ಯಾ ಇಗರ್ಜೆಚಿ ಸೊಭಾಯ್ ದೊಡ್ತಿ ಜಾಲ್ಯಾ. ಇಗರ್ಜೆ ಬಿತರ್ ಬಾಳ್ಕಾ ಜೆಜುಕ್ ಹಾತಿಂ ಘೆತ್‌ಲ್ಲಿ ತೆರಾವ್ಯಾ ಶತಾಮಾನಾಚಿ ಮರಿಯೆಚಿ ಇಮಾಜ್ ದಿಶ್ಟಿಕ್ ಪಡ್ತಾ. ತಾರ್ವೊಟಿ ಮರಿಯೆಚಿ ಇಮಾಜ್ ಘೆವ್ನ್ ಪಯ್ಣಾರ್ ಆಸ್ತಾನಾ ಏಕ್ ತಾಳೊ ಅಯ್ಕಾಲೊ “ಪೋಸಾ, ಪೋಸಾ” ಮ್ಹಣ್. ಮ್ಹಳ್ಯಾರ್ “ಮ್ಹಕಾ ಸಕಯ್ಲ್ ದವರಾ” ದೆಕುನ್ ಹ್ಯಾ ಜಾಗ್ಯಾಕ್ “ಪೋಸಿಟಾನೊ” ಮ್ಹಣ್ ಆಪಯ್ತಾತ್ ಮ್ಹಳ್ಳಿ ಸಾಂಗ್ಣಿ ಆಸಾ.

ಹಿ ಇಗರ್ಜ್ ದರ್ಯಾ ತಡಿರ್ ಆಸ್‌ಲ್ಲ್ಯಾನ್ ಸಭಾರ್ ಲೋಕ್ ಹಾಂಗಸರ್ ಭೆಟ್ ದಿತಾ. ಥೊಡೊ ವೇಳ್ ಮೌನ್‌ಪಣಿ ಮಾಗ್ಣೆಂ ಕೆಲ್ಲೆಂಚ್ ಆಮಿ ದರ್ಯಾ ತಡಿಚೆಂ ಥಂಡ್ ವಾರೆಂ ಸೆಂವ್ಕ್ ದರ್ಯಾ ತಡಿ ತೆವ್ಶಿಂ ಮೆಟಾಂ ಕಾಡ್ಲಿಂ. ಥಂಯ್ಸರ್ ಆಮಿ ಲಿಂಬ್ಯಾಚೆಂ ಸೋರ್ಬೆ ಮ್ಹಳ್ಳೆಂ ಐಸ್ ಕ್ರೀಂ ಟ್ರೈ ಕೆಲೆಂ. ಲಿಂಬ್ಯಾ ರೋಸ್. ಸಾಕರ್ ಆನಿ ನಾರ್ಲಾಚೆಂ ಕ್ರೀಂ ಘಾಲ್ನ್ ಕೆಲ್ಲೆಂ ಹೆಂ ಸೊರ್ಬೆ ಇಲ್ಲೆಂ ಅಂಬೊಟ್ ಅಸ್ಲ್ಯಾರೀ ತ್ಯಾ ಕಟ್ಕಟ್ಯಾ ವೊತಾಂತ್ ಕುಡಿಕ್ ಥಂಡಾಯ್ ದಿಲಾಗ್ಲೆಂ.

ಉಪ್ರಾಂತ್ ಆಮಿ ಪಾವ್ಲ್ಯಾಂವ್ ಸೊರೆಂಟೊ. ದಕ್ಶಿಣ್ ಇಟೆಲಿಚೆಂ ಅನ್ಯೇಕ್ ಶಹರ್. ಥಂಯ್ಸರ್ ಆಮಿ ಲಿಂಬ್ಯಾಚ್ಯಾ ಮಾಟ್ವಾ ಪಂದಾ ದೊನ್ಪಾರಾಚೆಂ ಜೆವಾಣ್ ಪಯ್ಲೆಂಚ್ ಬುಕ್ ಕರ್ನ್ ದವರ್‌ಲ್ಲೆಂ. ಥಂಯ್ ಪಾವ್ ಲ್ಲೆಂಚ್ ಅಮ್ಕಾಂ ಬರೊ ಸ್ವಾಗತ್ ಲಾಬ್ಲೊ. ಖಾಣ್-ಪೀವನ್ ಜಾಲ್ಲೆಂಚ್ ಥಂಯ್ಚ್ ಅಸ್ಲ್ಯಾ ಲಿಂಬ್ಯಾಚ್ಯಾ ಗಾರ್ಡನಾಂತ್ ತಸ್ವೀರ‍್ಯೊ‌ಯ್ ಕಾಡ್ಲ್ಯೊ.

ಉಪ್ರಾಂತ್ ಥಂಯ್ಚ್ ಬಾಯ್ರ್ ಅಸ್ಚ್ಯಾ ಥೊಡ್ಯಾ ದುಕಾನಾಂ ಥಾವ್ನ್ ತ್ಯಾ ಗಾಂವ್ಚ್ಯಾ ಉಡಾಸಾಚೆ ವಸ್ತುಯ್ ಕಾಣ್ಗೆಲೆ. ಉಪ್ರಾಂತ್ ವಿಲ್ಲಾ ಕೊಮುನಾಲೆ ದಿ ಸೊರೆಂಟೊ ಮ್ಹಳ್ಳ್ಯಾ ಜಾಗ್ಯಾಕ್ ಗೆಲ್ಯಾಂವ್. ದರ್ಯಾ ತಡಿರ್ ಉಬಾರಾಯೆರ್ ಬಾಂದ್‌ಲ್ಲೆಂ ತೆಂ ಪಾರ್ಕ್ ಬೋವ್ ಆಕರ್ಶಿತ್ ಜಾವ್ನಾಸಾ. ಥೊಡೊ ವೇಳ್ ಥಂಯ್ ಪಾಶಾರ್ ಕರ್ನ್ ಸಾಂಜೆಚೆಂ ಜೆವಾಣ್ ತಿರ್ಸುನ್ ಉಪ್ರಾಂತ್ ಹೊಟೆಲಾಕ್ ಪಾಟಿಂ ಆಯ್ಲ್ಯಾಂವ್.

ಅಮಾಲ್ಫಿ ಕೋಸ್ಟಾಂತ್ಲೆಂ ದುಸ್ರೆಂ ಶಹರ್, ಅಮಾಲ್ಫಿ. ಹೆಂ ಶಹರ್ ಅಮಾಲ್ಫಿ ಕೋಸ್ಟಾಚೆಂ ಐತಿಹಾಸಿಕ್ ಅನಿಂ ಸಾಂಸ್ಕ್ರತಿಕ್ ಕೇಂದ್ರ್ ಜಾವ್ನಾಸಾ. ಹಾಂಗಾಚೆಂ ಪ್ರಮುಖ್ ಆಕರ್ಶಣ್ ಡುವೊಮೊ ದಿ ಸಾಂಟ್ ಅಂಡ್ರೆಯ (ಸಾಂತ್ ಆಂಡ್ರು ಅಪೊಸ್ತಲಾಚೆಂ ಕ್ಯಾಥೆಡ್ರಲ್) ಸಬಾರ್ ಮೆಟಾನಿಂ ಉಬಾರ್ ಸುವಾತೆರ್ ಹಿ ಕೆಥೆಡ್ರಲ್ ಉಬಿ ಅಸಾ.

ನವ್ಯಾ ಶತಮಾನಾಚೆಂ ರೋಮನ್ ಕ್ಯಾಥೊಲಿಕ್ ಕ್ಯಾಥೆಡ್ರಲ್ ಅಮಾಲ್ಫಿಚ್ಯಾ ಮೈನ್ ಸ್ಕ್ವೇರಾಂತ್ ಉಬೆಂ ಆಸಾ. ಪರ್ನ್ಯಾ ಇಗರ್ಜೆಚೆಂ ಬಾಂದಾಪ್, ಇಮಾಜ್ಯೊ ಆನಿ ಇತರ್ ವಸ್ತು ಮ್ಯೂಸಿಯಮ್ ಜಾವ್ನ್ ಪರಿವರ್ತಿತ್ ಕರ್ನ್ ಸರ್ವ್ ವಸ್ತು ಅರ್ಸ್ಯಾ ಬಿತರ್ ಸಾಂಬಾಳ್ನ್ ದವರ್ಲ್ಯಾತ್. ಆನಿ ಕುಶಿಕ್‌ಚ್ ನವೆಂ ಕ್ಯಾಥೆಡ್ರಲ್ ಉಬೆಂ ಕೆಲಾಂ. ಥಂಯ್ಸರ್ ಅಪೋಸ್ತಲ್ ಸಾಂತ್ ಆಂಡ್ರುಚಿ ಇಮಾಜ್ ಆನಿ ತಾಚೆ ರೆಲಿಕ್ಸ್ ಪಳೆಂವ್ಕ್ ಮೆಳ್ತಾತ್. ಥಂಯ್ಸರ್ ನಾಂವಾಡ್ದಿಕ್ ಪಾರಂಪರಿಕ್ ಪೇಸ್ಟ್ರಿಚೆಂ ದುಕಾನ್ ಆಸಾ. ಫರ್ಮಳ್ ಯೆತಾನಾ ಖಾಂವ್ಯಾ ಮ್ಹಣ್ ಭೊಗ್ತಾ. ದೆಕುನ್ ಆಮಿ ಥೊಡೆ ತಾಜಾ ತಯಾರ್ ಕೆಲ್ಲ್ಯಾ ಪೇಸ್ಟ್ರಿಚಿಂಯ್ ರೂಚ್ ಚಾಕ್ಲಿ.

ಅಮಾಲ್ಫಿ ದರ್ಯಾ ತಡಿರ್ ಆಸ್ಚೆಂ ಅನ್ಯೇಕ್ ಭೊವ್ ಸುಂದರ್ ಶಹರ್ ಮಯೋರಿ. ಪೋಸಿಟಾನೊಂತ್ ಅಸ್ಲ್ಯಾ ಬರಿಂ ಹಾಂಗಾ ಚಡ್ಣಿ ನಾಂ. ಸಮಾತಳ್ ಸುವಾತ್, ಶಾಂತ್ ವಾತಾವರಣ್ ಆನಿ ಬೀಚಾರ್ ಚಲೊಂಕ್ ಸೊಭಿತ್ ವಾಟ್. ಹಾಂಗಾಸರ್ ಟೊರೆ ನೊರ್ಮಾನ್ನಾ ಮ್ಹಳ್ಳೆಂ ಐತಿಹಾಸಿಕ್ ವಾಚ್ ಟವರ್ ಅಸಾ. ತಡಿ ಥಾವ್ನ್ ಇಲ್ಲೆಂ ಮುಕಾರ್ ದರ್ಯಾಂತ್ ಅಸ್ಚೆಂ ಬಾಂದಾಪ್ ದುಸ್ಮಾನಾ ಥಾವ್ನ್ ಅಮಾಲ್ಫಿ ತಡಿಚಿಂ ಶಹರಾಂ ರಾಕೊಂಕ್ ಬಾಂದ್‌ಲ್ಲೆಂ. ತೆಂ ವಾಚ್ ಟವರ್ ಆಜ್ ರೆಸ್ಟೋರೆಂಟ್ ಜಾವ್ನ್ ಬದಲ್ಲಾಂ. ಥಂಯ್ ಥಾವ್ನ್ ದರ್ಯಾಚಿ ಆನಿ ತಡಿಚ್ಯಾ ಶಹರಾಚಿ ಸೊಭಾಯ್ ವರ್ಣುಂಕ್ ಉತ್ರಾಂ ಮೆಳಾನಾಂತ್.

ಕಾಜಾರಾಂ ತಶೆಂಚ್ ಹೆರ್ ಕಾರ್ಯಿಂ ಹಾಂಗಾಸರ್ ಜಾತಾತ್. ಆಮಿ ದೊನ್ಪಾರಾಚೆಂ ಜೆವಾಣ್ ಹಾಂಗಾಸರ್ ಅಮಾನತ್ ಕೆಲ್ಲೆಂ. ತ್ಯಾ ದೀಸ್ ಥಂಯ್ ಕಾಜಾರಾಚೆಂಯ್ ಜೆವಾಣ್ ಆಸ್ಲೆಂ. ಆಮಿ ಹೊಕಾಲ್ ನೊವ್ರ್ಯಾ ಸಾಂಗಾತಾ ತ್ಯಾಚ್ ಸಾಲಾಂತ್ ಬಸೊನ್ ಜೆವ್ಲ್ಯಾಂವ್. ಆಮ್ಚ್ಯಾ ಜೆವ್ಣಾಚೆ ಪಯ್ಶೆ ಮಾತ್ರ್ ಅಮಿಂಚ್ ದಿಲೆ. ಹಾಂಗಾಚಿಂ ಕಾಜಾರಾಂ ಕೊಡ್ಯಾಳ್ಚ್ಯಾ ಕಾಜಾರಾ ಬರಿಂ ನ್ಹಂಯ್. ಹ್ಯಾ ಕಾಜಾರಾಂತ್ ಹೊಕಾಲ್ ನೊವ್ರ್ಯಾಕ್ ದರ್ನ್ ವೀಸ್ ಜಣಾಂ ಮಾತ್ರ್ ಅಸ್ಲಿಂ. ರೆಸ್ಪೆರ್ ಜಾವ್ನ್ ಜೇಂವ್ಕ್ ತಿಂ ತ್ಯಾ ಜೆವ್ಣಾ ಸಾಲಾಕ್ ಆಯಿಲ್ಲಿಂ ಮ್ಹಣ್ ಆಮಿ ಸಮ್ಜಲ್ಯಾಂವ್.

ತೆಂ ರೆಸ್ಟೋರೆಂಟ್ ಮಾಸ್ಳೆಚ್ಯಾ ಜೆವ್ಣಾಕ್ ಪ್ರಸಿದ್ದ್ ಅಸಾ. ದೆಕುನ್ ಆಮಿಯ್ ತಾಜಾ ಮಾಸ್ಳೆಚಿ ರೂಚ್ ಚಾಕ್ಲಿ.

ಜೆವಾಣ್ ಜಾವ್ನ್ ಹಿಲ್ ಟೋಪ್ ಟೌನ್ ರಾವೆಲ್ಲೊಕ್ ಪಾವ್ಲ್ಯಾಂವ್. ಮಸ್ತ್ ಉಬಾರಾಯೆರ್ ಆಸ್ಚೊ ಹೊ ಜಾಗೊ. ಹಾಂಗಾ ಥಾವ್ನ್ ಅಮಾಲ್ಫಿ ತಡಿಚಿ ಸಗ್ಳಿಂ ಶಹರಾಂ ದಿಸ್ತಾತ್. ಪೂಣ್ ಥಂಯ್ಸರ್ ಪಾವೊಂಕ್ ರಾನಾ ಬಿತರ್ಲ್ಯಾನ್ ಪಂದ್ರಾ ವೀಸ್ ಮಿನುಟಾಂಚಿ ಘುಂವ್ಡೆಚಿ ವಾಟ್. ವಯ್ರ್ ವಯ್ರ್ ಪಾವ್ತಾನಾ ಬಾಯ್ಲಿಂ ದ್ರಶ್ಯಾಂ ಲೋಂವ್ ಉಬಿ ಕರ್ತಾತ್. ಹಾಂಗಾಚೆಂ ಪ್ರಮುಖ್ ಆಕರ್ಶಣ್ ವಿಲ್ಲಾ ರುಫೊಲ್ಲೊ.

ಹಾಂಗಾ ಸೊಬಿತ್ ಫುಲಾಂಚೆಂ ಟೆರೆಸ್ ಗಾರ್ಡನ್ ಅಸಾ. ಹ್ಯಾ ವಿಲ್ಲಾಂತ್ ದಿಸಾಕ್ ಏಕ್ ಬೆಡ್ ರೂಮ್ ಆಸಾ. ಮ್ಹಳ್ಯಾರ್ 365 ಬೆಡ್ ರುಮಾಂ ಅಸ್ ಲ್ಲಿಂ. ಆತಾಂ ಬಾಂದಪ್ ಪರ್ನೆಂ ಜಾವ್ನ್ ಥೊಡೆ ವೊಣ್ದಿ ಮಾತ್ರ್ ಉಬೆ ಆಸಾತ್. ಹ್ಯಾ ವಿಲ್ಲಾಂತ್ ಏಕ್ ಟವರ್ ಆಸಾ ಸಬಾರ್ ಮೆಟಾಂ ಚಡೊನ್ ತುದಿಯೆಕ್ ಪಾವ್ತಾನಾ ತಿ ಸೊಭಾಯ್ ಪಳೆಂವ್ಕ್ ದೋನ್ ದೊಳೆ ಪಾವ್ಲೆ ನಾಂತ್.

79 AD ವ್ಯಾ ವರ‍್ಸಾ ವೆಸುವಿಯಸ್ ಪರ್ವತಾಂತ್ ಜ್ವಾಲಾಮುಖಿ ಫುಟೊನ್ ಪರ್ವತಾ ಮುಳಾಂತ್ ಅಸ್ಚೊ ಪೋಂಪೈ ಮ್ಹಳ್ಳೊ ಪುರಾತನ್ ರೋಮನ್ ಗಾಂವ್ ಜ್ವಾಲಾಮುಖಿಚ್ಯಾ ಗೊಬ್ರಾನ್ ದಾಂಪೊನ್ ಗೆಲ್ಲೊ. ತೊ ಗೊಬೊರ್ ಐಸ್ ಜಾವ್ನ್ ಪರಿವರ್ತಿತ್ ಜಾವ್ನ್ 1700 ವರ್ಸಾಂ ಪರ್ಯಾಂತ್ ಸರ್ವ್ ಮನ್ಶ್ಯಾಂ ಮನ್ಜಾತೆಚ್ಯೊ ಆಕೃತ್ಯೊ ಐಸ್ ಜಾವ್ನ್ ತಶೆಚ್ ಉರ್ಲ್ಯೊ. ಥೊಡಿಂ ನಿದೊನ್ ಆಸ್ಲಿಂ. ಥೊಡಿಂ ರಾಂದುನ್ ಆಸ್ಲಿಂ. ತಾಂಚ್ಯೊ ಆಕೃತ್ಯೊ ಅಜೂನ್ ತಶೆಚ್ ಜೋಗಾಸಣೆನ್ ಸಾಂಬಾಳ್ಳ್ಯಾತ್. ಭಿತರ್ ವಚೊಂಕ್ ಕಾಳಿಜ್ ಘಟ್ ನಾತ್‌ಲ್ಲ್ಯಾನ್ ಭಾಯ್ರ್ ಥಾವ್ನ್ ಪಳೆವ್ನ್‌ಚ್ ಭಾಯ್ರ್ ಆಯ್ಲ್ಯಾಂವ್.

ವೆಸುವಿಯಸ್ ಹೊ ಪರ್ವತ್ ದರ್ಣಿ ಥಾವ್ನ್ ಸುಮಾರ್ ಚಾರ್ ಹಜಾರ್ ದೊನ್ಶಿಂ ಫೀಟ್ ಉಬಾರಾಯೆರ್ ಅಸಾ. ಅರ್ದ್ಯಾ ಮ್ಹಣಾಸರ್ ಬಸ್ಸ್ ವೆತಾ ಉಪ್ರಾಂತ್ ಏಕ್ ಘಂಟೊ ಚಲಾಜಯ್. ಆನಿ ಪ್ರವೇಶ್ ಟಿಕೆಟ್ ವೆಗ್ಗಿಂ ವಿಕೊನ್ ವೆತಾತ್ ದೆಕುಕ್ ಪಯ್ಲೆಂಚ್ ಕಾಡಿಜಯ್ ಪಡ್ತಾ. ಏಕ್ ಪಾವ್ಟಿಂಚ್ಯಾಕ್ ಕೇವಲ್ ಪಂದ್ರಾ ಜಣಾಂಕ್ ಭಿತರ್ ಸೊಡ್ತಾತ್ ದೆಕುನ್ ಪ್ರವೇಶ್ ಮೆಳ್ಚೊ ಸಂಭವ್ ಮಸ್ತ್ ಉಣೊ ಮ್ಹಣ್ ಆಮ್ಚೊ ಡ್ರೈವರ್ ಸಾಂಗಾಲಾಗ್ಲೊ. ಹೊ ದೊಂಗೊರ್ ಆನಿ ನಾಸ್ ಜಾಲ್ಲೆಂ ಪೋಂಪೈ ಶಹರ್ ತಶೆಂಚ್ ಬಗ್ಲೆನ್ ಆಸ್ಚೆಂ ನವೆಂ ಪೋಂಪೈ ಶಹರ್ ವಿಮಾನ್ ವಯ್ರ್ ಉಬ್ತಾನಾ ಕಾಡ್‌ಲ್ಲ್ಯಾ ವಿಡಿಯೋಂತ್ (ಹಾಂಗಾಸರ್ ಸಕಯ್ಲ್ ಚಿಡ್ಕಾಯ್ಲಾ) ಪಳೆಂವ್ಕ್ ಮೆಳ್ತಾ.

ದೋನ್ ದೀಸ್ ಭೊಂವೊನ್ ಪುರಾಸಣ್ ಜಾಲ್ಲ್ಯಾನ್ ಆಮಿ ಹೊಟ್ಲಾಂತ್‌‍ಚ್ ರಾತ್ಚೆಂ ಜೆವಾಣ್ ಕರ್ಚೊ ನಿರ್ಧಾರ್ ಕೆಲೊ. ಉಗ್ತೆಂ ರೆಸ್ಟೋರೆಂಟ್, ಪಯ್ಶಿಲ್ಯಾನ್ ದರ್ಯಾನ್ ಸುರ್ಯಾಕ್ ವೆಂಗ್ಚಿಂ ದೃಶ್ಯಾಂ ಆನಿ ಮೆನೆಜರಾಚೊ ಮೊಗಾಚೊ ಅದಾರಾತಿತ್ಯ್ ಆಮ್ಕಾಂ ತೆಂ ಜೆವಾಣ್ ಉಡಾಸಾಬರಿತ್ ಕರುಂಕ್ ಪಾವ್ಲೆಂ.

ಆನಿ ಅಬ್ಳೆ ಆಮ್ಚ್ಯಾ ಮೊಗಾಚ್ಯಾ ಸುಂದರ್ ಶಹರಾಕ್ ಅದೇವ್ಸ್ ಮಾಗ್ಚೊ ದೀಸ್ ಉದೆಲ್ಲೊ. ಸಾಟ್ಲಿ ಪೊಟ್ಲಿ ಬಾಂದುನ್ ವಯ್ರ್ ವಿಮಾನಾರ್ ಥಾವ್ನ್ ತ್ಯಾ ಗಾಂವ್ಚಿ ಸೊಭಾಯ್ ಆಮ್ಚ್ಯಾ ದೊಳ್ಯಾಂನಿ ಭರುನ್ ಉಬ್ಲ್ಯಾಂವ್ ಪಾಟಿಂ ಡಬ್ಲಿನಾಕ್.

■ ಮೊನಿಕ ಡೇ’ಸಾ ಮಥಾಯಸ್