ರೊಬೊಟ್ ಮನ್ಶ್ಯಾಚೆಂ ಜಯ್ತ್ ವ ನಾಸಾಚಿ ಸುರ್ವಾತ್?

2

ಮನ್ಶ್ಯಾನ್ ಕರ್ಚಿಂ ಸಧಾಂಚಿಂ ಕಾಮಾಂ ಕರುಂಕ್ ಸಕ್ಚೆಂ ಮೆಶಿನ್ ವ ಯಂತ್ರಾಕ್, ‘ರೊಬೊಟ್’ ಮ್ಹಣ್ತಾತ್. ಹ್ಯಾ ರೊಬೊಟಾಕ್, ಮನ್ಶ್ಯಾ ಬರಿ ಹಾತ್-ಪಾಯ್, ಕೂಡ್, ತಕ್ಲಿ, ದೊಳೆ ಆನಿ ಕಾನ್ ಸಗ್ಳೆಂ ಆಸಾ ಮಾತ್ರ್ ನ್ಹಯ್, ಆಜ್-ಕಾಲ್ಚೆಂ ರೊಬೊಟ್, ಪರ್ಮಳ್ ಸೈತ್ ಹುಂಗೊಂಕ್ ಸಕ್ತಾ ಮ್ಹಳ್ಯಾರ್ ಅಜಾಪ್ ಜಾಯ್ತ್.

ರೊಬೊಟಾಚಿ ಸುರ್ವಾತ್ ಆತಾಂ ಪಳೆಂವ್ಕ್ ಮೆಳ್ಚಾ ರುಪಾರ್ ಸುರು ಜಾಲ್ಲಿ ಖಂಡಿತ್ ನ್ಹಯ್. ಕ್ರಿಸ್ತಾ-ಪುರ್ವಿಂಚಾ ತಿಸ್ರ್ಯಾ ಶೆಕ್ಡ್ಯಾಂತ್, ಅಲೆಕ್ಸಾಂಡರ್ ದ ಗ್ರೇಟ್ ಮ್ಹಳ್ಳ್ಯಾ ರಾಯಾಚಾ ಅಲೆಕ್ಸಾಂಡ್ರಿಯಾಂತ್ (Hellenistic Alexandria), ‘ಹೆರೊ’ ನಾಂವಾಚಾ ಇಂಜಿನಿಯರಾನ್, ಉದ್ಕಾಚಾ ಉಬೆನ್ ಚಲ್ಚೆ ತಸಲ್ಯೊ, ಖೆಳ್ಚ್ಯೊ ವಸ್ತು ಸೊಧುನ್ ಕಾಡ್‌ಲ್ಲ್ಯೊ ಮ್ಹಣ್ತಾತ್. ಇಸ್ಲಾಮ್ ಧರ್ಮಾಂತ್ಲ್ಯಾ, ‘ಅಲ್-ಜಝಾರಿ’ (Al-Jazari) ಮ್ಹಳ್ಳ್ಯಾನ್ ಆನಿ ತಾಚಾ ಪಾಟ್ಲ್ಯಾ ಹೆರಾಂನಿ, ಆಟ್ವ್ಯಾ ಆನಿ ತೆರಾವ್ಯಾ ಶೆಕ್ಡ್ಯಾಂ ಮಧೆಂ, ಉದ್ಕಾ ದ್ವಾರಿಂ ಚಲ್ಚೆಂ ಘಡಿಯಾಳ್, ಸಂಗೀತ್ ವಾಜಂವ್ಚಿಂ ಮೆಶಿನಾಂ ಆನಿ ವಸ್ತುರ್ ಉಂಬೊಳ್ಚೆಂ ಮೆಶಿನ್‌ಯೀ ಸೊಧುನ್ ಕಾಡ್‌ಲ್ಲೆಂ ಕಂಯ್! ಹ್ಯಾ ಮೆಶಿನಾನಿ, ಗಿಯರಿ ಆನಿ ಹಾತಾಳೆ (gears and levers) ಸೈತ್ ಆಸ್‌ಲ್ಲೆ ಕಂಯ್!

ಕ್ರಮೇಣ್, ಯುರೊಪಾಂತ್, ಸಂಸ್ಕ್ರತಿ ಸುಧಾರೊನ್ ಆಯಿಲ್ಲೆಬರಿ, ತಾಂತ್ರಿಕ್ ಜಾಣ್ವಾಯ್ ಚಡೊನ್ ಆಯ್ಲಿ ಆನಿ ಆದ್ಲ್ಯಾಂಚೆಂ ಚಿಂತಾಪ್ ರೂಪಿತ್ ಕರುನ್ ಆಧುನಿಕ್ ಯಂತ್ರಾಂ ಕಿತ್ಯಾಕ್ ಘಡುಂಕ್ ನಜೊ ಮ್ಹಳ್ಳಿಂ ಚಿಂತ್ನಾ ಉದೆಲಿಂ. ಅಸಲಿಂ ಚಿಂತ್ನಾ ಫಳಾಧಿಕ್ ಕರ್ಚಾ ವಾಟೆನ್ ಗರ್ಜೆಚ್ಯೊ ನಕ್ಷಾ (sketch) ಆಸಾ ಕೆಲ್ಲಿ ಕೀರ್ತ್, ಪಂದ್ರಾವ್ಯಾ ಶೆಕ್ಡ್ಯಾಂತ್ಲ್ಯಾ ಇಟೆಲಿಚಾ, ಲಿಯೊನಾರ್ಡೊ ದ ವಿನ್ಚಿಕ್ (Leonardo da Vinci) ಫಾವೊ ಜಾತಾ. ತಾಣೆ ತಾಚಾ ನಕ್ಷಾನಿ, ಎಕಾ ಯಾಂತ್ರಿಕ್ ಸೊಜೆರಾನ್ ಉಟ್ಚಿ ಆನಿ ಬಸ್ಚೆ ತಸಲಿ ಚಲಾವಣ್ ಮಾತ್ ನ್ಹಯ್, ಹಾತ್ ಕಶೆ ಹಾಲಂವ್ಚೆ, ತಕ್ಲಿ ಕಶಿ ಘುಂವ್ಡಾಂವ್ಚಿ ಆನಿ ತೋಂಡ್ ಕಶೆಂ ಉಗ್ತೆಂ ಕರುನ್ ಧಾಂಪ್ಚೆಂ ತೆಂ ದಾಕಯ್ಲೆಂ.

ತಾಚೆಂ ಚಿಂತಾಪ್, ತೊ ಜಿವಂತ್ ಆಸ್ತಾನಾ ಫಳಾಧಿಕ್ ಜಾಲೆಂನಾ ತರೀ, ಮುಕ್ಲ್ಯಾ ಪಿಳ್ಗೆಕ್ ಹೆಂ ಏಕ್ ಮಾರ್ಗ್-ದರ್ಶನ್ ಜಾಂವ್ಕ್ ಪಾವ್ಲೆಂ ಮ್ಹಣ್ಯೆತ್. 18 ಥಾವ್ನ್ 19-ವ್ಯಾ ಶೆಕ್ಡ್ಯಾ ಮಧೆಂ ಸುರು ಜಾಲ್ಲ್ಯಾ ಕೈಗಾರಿಕ್ ಕ್ರಾಂತಿಕ್ (The Industrial Revolution) ಲಾಗೊನ್, ನವಿಂ-ನವಿಂ ಯಂತ್ರಾಂ ರಚ್ಚಿ ಗರ್ಜ್ ಉಬ್ಜಾಲಿ ಆನಿ ಅಶೆಂ ಏಕ್ ನವೊ ಕಾಳ್ ಸುರು ಜಾಲೊ. ಉದ್ಕಾಚಾ ಉಬೆನ್ ಚಲ್ಚಿಂ ದರ್ಯಾ ತಾರ್ವಾಂ, ರಯ್ಲಾಂ ಮಾತ್ ನ್ಹಯ್ ಆಸ್ತಾಂ, ಫೆಕ್ಟರಿನಿ ಹಾತಾಂನಿ ಕರ್ಚಿಂ ಥೊಡಿಂ ಕಾಮಾಂ, ಮೆಶಿನಾಂ ಮುಕಾಂತ್ರ್ ಕರ್ಚಾ ವಾಟೆನ್, ಉದ್ಕಾಚಾ ಉಬೆನ್ ಚಲ್ಚಿಂ ನವಿಂ ಯಂತ್ರಾಂ ಸೊಧುನ್ ಕಾಡ್ಲಿಂ. ರಯ್ಲಾಚೆ ಭಾಗ್ (Spare Parts) ಕರ್ಚಾ ಆನಿ ಹಾತಾನ್ ವೊಳ್ಚಾ ಮಾಗಾಚಾ ಲುಗ್ಟಾಂ ಬದ್ಲಾಕ್, ಯಾಂತ್ರಿತ್ ಮಾಗಾಂ ತಸಲ್ಯಾ ಮೆಶಿನಾಂಕ್ ಖಾಯ್ಸ್ ಚಡ್ಲೊ.

1801 ಇಸ್ವೆಂತ್, ಜೊಸೆಫ್ ಜೆಕಾರ್ಡ್ (Joseph Jacquard) ಮ್ಹಳ್ಳ್ಯಾನ್, ಲುಗಾಟ್ ಕರ್ಚಾ ‘ಯಾಂತ್ರಿಕ್ ಮಾಗಾ’ ಮುಕಾಂತ್ರ್, ಲುಗ್ಟಾಂತ್ ವಿವಿಧ್ ರಿತಿಚೆಂ ವೊಳಾಪ್ ಆಸಾ ಕರ್ಚೆಂ ‘ಪ್ರೊಗ್ರಾಮ್’ ವ ಡಿಸಾಯ್ನ್ ಬದ್ಲುಂಕ್ ಗರ್ಜೆಚಿ ವೆವಸ್ಥಾ ಸೊಧುನ್ ಕಾಡ್ಲಿ. ಆರಂಭಾರ್, ಕಂಪ್ಯೂಟರಾಂ ನಾತ್‌ಲ್ಲೆ ವರ್ವಿಂ, ಫಕತ್ ಕಾಗ್ದಾರ್ ಆಸಾ ಕೆಲ್ಲ್ಯಾ ಫಲಾಣ್ಯಾ ರಿತಿಚಾ ರಂದ್ರಾಂ ಮುಕಾಂತ್ರ್ ಆಸಾ ಕೆಲ್ಲೆಂ ಹೆಂ ಪ್ರೊಗ್ರಾಮ್, ಕ್ರಮೇಣ್ ಆಜ್-ಕಾಲ್ ಕಂಪ್ಯೂಟರಾ ದ್ವಾರಿಂ ಕರ್ಚಾ ಪ್ರೊಗ್ರಾಮಾಂಕ್ ಏಕ್ ಥಳ್ ಜಾಲೆಂ ಮಾತ್ ನ್ಹಯ್, ರೊಬೊಟ್ ಕರ್ಚಾ ಕಾಮಾಂತ್ ಏಕ್ ಗರ್ಜೆಚೆಂ ಹಾತೆರ್ ಜಾಲೆಂ.

ರೊಬೊಟ್ ಮ್ಹಳ್ಳೊ ಸಬ್ದ್ ಅಸ್ತಿತ್ವಾಕ್ ಆಯಿಲ್ಲೊ, 1921 ಇಸ್ವೆಂತ್. ಝೆಕ್ (Czech) ದೇಶಾಂತ್ಲ್ಯಾ, ‘ಕೆರಲ್ ಕ್ಯಾಪೆಕ್’ (Karel Čapek) ನಾಂವಾಚಾ ಎಕಾ ನಾಟಕ್‌ಕರ್ತಾನ್, ಆಪ್ಲ್ಯಾ ‘ರೋಸಮ್ಸ್ ಯುನಿವರ್ಸಲ್ ರೊಬೊಟ್ಸ್’ (Rossum’s Universal Robots) ನಾಟಕಾಕ್ ಅಸಲೆಂ ನಾಂವ್ ದಿಲ್ಲೆಂ ತೆಂ ಮುಕಾರ್ ಯಂತ್ರ್ ಮಾನವಾಕ್ ರಚ್ಚಿ ಬುನ್ಯಾದ್ ಜಾಲೆಂ ಮ್ಹಣ್ಯೆತ್. ಹ್ಯಾ ನಾಟಕಾಂತ್, ಯಂತ್ರ್ ಮಾನವಾನಿ ಮನ್ಶ್ಯಾಚಿ ಸೆವಾ ಕರ್ಚೆಂ ರೂಪಿತ್ ಕರ್ಚಾ ಸಂಗಿಂ, ಕ್ರಮೇಣ್ ಯಂತ್ರ್ ಮಾನವ್ ಕಸೊ ಮನ್ಶ್ಯಾಕ್ ಉಳ್ಟೊ ರಾವ್ತಾ ತೆಂ ನಿರೂಪಣ್ ಕೆಲಾಂ.

1930 ಆನಿ 1939 ಇಸ್ವೆಂ ಮಧೆಂ ಸಭಾರ್ ಪ್ರಯೋಗ್ ಚಲವ್ನ್, 1939 ಇಸ್ವೆಂತ್, ಅಮೆರಿಕಾಚಾ ಒಹಾಯೊಂತ್ ಆಸ್ಚಾ ಮ್ಯಾನ್ಸ್‌ಫೀಲ್ಡ್ ಮ್ಹಳ್ಳೆಕಡೆನ್, ಎಲೆಕ್ಟ್ರೊ (Elektro) ನಾಂವಾಚಾ, ಭೋವ್‌ಚ್ ಮಹತ್ವಾಕಾಂಕ್ಶೆಚಾ ರೊಬೊಟಾಕ್ ಪ್ರದರ್ಶನಾಕ್ ಘಾಲೊ. ಹ್ಯಾ ರೊಬೊಟಾನ್, ಚಲ್ಚೆಂ, ಉಲಂವ್ಚೆಂ ಆನಿ ಸಿಗ್ರೆಟಿಚೆಂ ಧುವ್ರಾಪಾನ್ ಸೈತ್ ಕರ್ಚೆಂ, ತ್ಯಾ ಕಾಳಾರ್ ಲೊಕಾಕ್ ವಿಜ್ಮಿತ್ ಕರುಂಕ್ ಸಕ್ಲೆಂ.

1950 ಆನಿ 1960 ಇಸ್ವ್ಯಾಂ ಮಧೆಂ, ಕಂಪ್ಯೂಟರ್ ಆನಿ ನಿಯಂತ್ರಣ್ ಪದ್ದತಿ (control systems) ಚಲಾವಣೆಂತ್ ಯೇಂವ್ಕ್ ಸುರು ಜಾಂವ್ಚಾ ಸಂಗಿಂ, ರೊಬೊಟಾಚಿ ಚಲಾವಣ್ ಕುತೂಹಲಾಚಿ ಜಾಲಿ. 1954 ಇಸ್ವೆಂತ್, ಅಮೆರಿಕಾಚಾ, ‘ಜೋರ್ಜ್ ಡೆವೊಲ್’ (George Devol) ನಾಂವಾಚಾ ‘ಆವಿಷ್ಕಾರ್ ಕರ್ಪ್ಯಾನ್’ (inventor) ಕಂಪ್ಯೂಟರಾಚಾ ಪ್ರೊಗ್ರಾಮಾ ಮುಕಾಂತ್ರ್ ರೂಪಿತ್ ಕೆಲ್ಲೊ, ರೊಬೊಟಾಕ್ ಸಜ್ಚೆ ತಸಲೊ ಬಾವ್ಳೊ (robotic arm) ಆಸಾ ಕೆಲೊ. ಹ್ಯಾ ಬಾವ್ಳ್ಯಾನ್, ಏಕ್ ಕಾಮ್ ಚುಕಿವಿಣೆ ಪರತ್-ಪರತ್ ಕರ್ಚೆಂ ತೆಂ ಆಜ್-ಕಾಲ್ ಲಾಖೊಂ ವಸ್ತು ಕರುಂಕ್ ವಾಪರ್ಚಾ ಅಟೊಮ್ಯಾಟಿಕ್ ಮೆಶಿನಾಂಕ್ ಏಕ್ ಬುನ್ಯಾದ್ ಜಾಂವ್ಕ್ ಪಾವ್ಲೆಂ ಮ್ಹಣ್ಯೆತ್. ಥೊಡ್ಯಾ ತೆಂಪಾನ್, ಜೋರ್ಜ್ ಡೆವೊಲ್ ಆನಿ ಜೊಸೆಫ್ ಎಂಗೆಲ್‌ಬರ್ಗರ್ (Joseph Engelberger) ಸಾಂಗಾತಾ ಮೆಳ್ಳೆ ಆನಿ ತಾಣಿಂ, ‘ಯುನಿಮೇಟ್’ (Unimate robot) ನಾಂವಾಚೆಂ ರೊಬೊಟ್ ಆಸಾ ಕೆಲೆಂ. 1961 ಇಸ್ವೆಂತ್ ಅಮೆರಿಕಾಚಾ ಜನರಲ್ ಮೊಟರ್ಸ್ (General Motors) ಕಂಪೆನಿನ್, ಕಾಮಾಗಾರಾಂಕ್ ಅಪಾಯಾಕ್ ಕಾರಾಣ್ ಜಾಲ್ಲ್ಯೊ ಹುನೊನಿ ವಸ್ತು ಸಾಗ್ಸುಂಕ್, ಯುನಿಮೇಟಾಚೊ ಉಪ್ಯೋಗ್ ಕೆಲೊ. ಅಶೆಂ ಸುರು ಜಾಲ್ಲೊ ತೊ ಪ್ರಯೋಗ್, ಆಜ್-ಕಾಲ್ ಹರ‍್ಯೆಕಾ ವಾಹನಾಂ ಕರ್ಚಾ ಫೆಕ್ಟರಿನಿ ಮಾತ್ ನ್ಹಯ್, ಹೆರ್ ಸಕ್ಕಡ್ ಥರಾಂಚಾ ಉದ್ಯಮಾನಿ ಸೈತ್ ವಾಪರ್ತಾತ್.

1970 ಆನಿ 1980 ಇಸ್ವೆಂ ಮಧೆಂ, ಪ್ರಯೋಗಾಲಯಾನಿ, ಗುದಾಂವಾಂನಿ ಆನಿ ಲ್ಹಾನ್ ಮಟ್ಟಾರ್ ಥೊಡ್ಯಾ ಘರಾಂನಿ ಸೈತ್ ರೊಬೊಟಾಚೊ ಉಪ್ಯೋಗ್ ಜಾಂವ್ಕ್ ಸುರು ಜಾಲೊ. ದುಸ್ರ್ಯಾ ಮಹಾಝುಜಾಂತ್ ಹದಾ ಜಾಲ್ಲೆಂ ಜಪಾನ್, ಅಮೆರಿಕಾಚಿ ತಾಂತ್ರಿಕತಾ ಭಾರಿಚ್ ತ್ವರಿತಾಯೆನ್ ಶಿಕ್ಲೆಂ ಮಾತ್ ನ್ಹಯ್, ಅಮೆರಿಕಾಚಿ ತಾಂತ್ರಿಕತಾ ವಾಪರ್ನ್, ತಾಣಿ ಭಾರಿಚ್ ಉಣ್ಯಾ ಖರ್ಚಾರ್ ಕಾರಾಂ ಉತ್ಪಾದನ್ ಕೆಲಿಂ. ಟೊಯೊಟಾ ಕಾರಾಚಿ ಸುರ್ವಾತ್ ಅಸಲ್ಯಾ ಸಂದರ್ಭಾರ್ ಜಾಲ್ಲಿ. ರೊಬೊಟಾಚಿ ಜಾಣ್ವಾಯ್ ಜಪಾನಾಚಾನಿ ಆಪ್ಣಾಯ್ಲಿ ಆನಿ 1980 ವ್ಯಾ ದಶಕಾಯಿತ್ಲ್ಯಾಕ್, ಜಪಾನ್, ರೊಬೊಟಾಂ ಕರ್ಚಾಂತ್ ಸಂಸಾರಾಂತ್ ಪ್ರಮುಖ್ ಜಾವ್ನ್ ಆಯ್ಲೆಂ. ಜಪಾನಾಚಾ ’ಫಾನೂಕ್’ (FANUC) ಆನಿ ಕಾವಾಸಾಕಿ (Kawasaki) ಕಂಪೆನ್ಯಾನಿ, ಕಾರಾಂ ಕರುಂಕ್ ಗರ್ಜ್ ಪಡ್ಚೆ ರೊಬೊಟ್ ತಯಾರ್ ಕೆಲೆ ಆನಿ ಹ್ಯಾ ರೊಬೊಟಾಂಕ್ ಲಾಗೊನ್, ಕಾರಾಂಚೆಂ ಉತ್ಪಾದನ್ ತ್ವರಿತ್ ಜಾಲೆಂ ಮಾತ್ ನ್ಹಯ್, ಕಾರಾಂನಿ ಘಡ್ಚೆ ಊಣ್ ಉಣೆ ಜಾಲೆ ಆನಿ ಕಾರಾಂ ಉಣ್ಯಾ ವೆಳಾನ್ ಕರುಂಕ್ ಸಾಧ್ಯ್ ಜಾಲೆಂ ಜಾಲ್ಲ್ಯಾನ್, ಕಾರಾಂಚೆಂ ಮೋಲ್ ಉಣೆಂ ಜಾವ್ನ್ ಆಯ್ಲೆಂ.

ತೆಣೆ 1960 ಉಪ್ರಾಂತ್, ಅಮೆರಿಕಾಂತ್ ಸಂಶೋಧನಾ ಮುಂದರುನ್ ವೆಚಾ ಸಂಗಿಂ, ಶೇಕೀ (Shakey) ನಾಂವಾಚೊ ರೊಬೊಟ್ ಸೊಧುನ್ ಕಾಡ್ಲೊ. ಹೊ ರೊಬೊಟ್ ರೊದಾಂ ಸವೆಂ, ಭವೊಂಕ್ ಸಕ್ಲೊ ಆನಿ ಹ್ಯಾ ರೊಬೊಟಾಂತ್ ಆಸಾ ಕೆಲ್ಲ್ಯಾ ಸೆನ್ಸರಾಂ ದ್ವಾರಿಂ, ಭಂವ್ತಿಂ ಕಿತೆಂ ಆಸಾ ತೆಂ ಸಮ್ಜೊಂಕ್ ಸಕ್ಲೊ.

1990 ಆನಿ 2000 ಇಸ್ವೆಯಿತ್ಲ್ಯಾಕ್, ಕಂಪ್ಯೂಟರ್ ತಾಂತ್ರಿಕತೆಂತ್ ವಿಶೇಸ್ ಬದ್ಲಾವಣ್ ಜಾಂವ್ಚಾ ಸಂಗಿಂ, ರೊಬೊಟ್ ಆಸಾ ಕರ್ಚಾ ವಿಧಾನಾನಿ ಆಧುನಿಕತಾ ಆಯ್ಲಿ. ಹ್ಯಾ ಆಧುನಿಕತೆಕ್ ಲಾಗೊನ್, ಮನ್ಶ್ಯಾಬರಿ ದಿಸ್ಚಾ ಯಂತ್ರ್ ಮಾನವಾಕ್ ಮಾತ್ ನ್ಹಯ್, ಆಪ್ಣಾಯಿತ್ಲ್ಯಾಕ್ (Automatic) ಕಾಮ್ ಕರುಂಕ್ ಸಕ್ಚಾ ಹೆರ್ ವಸ್ತುಂಕೀ ರೊಬೊಟ್ ಮ್ಹಣ್ ಆಪಂವ್ಕ್ ಸುರು ಕೆಲೆಂ. ಕೊಣೆಂಯ್ ವೋಡ್ನ್ ವ್ಹರ್ಚಿ ಗರ್ಜ್ ನಾಸ್ತಾಂ, ಆಪ್ಣಾಯಿತ್ಲ್ಯಾಕ್ ಘರಾಂತ್ಲೊ ಕೋಯ್ರ್ ಆರಾಂವ್ಚೆಂ ’ರೂಂಬಾ ವ್ಯಾಕ್ಯೂಮ್ ಕ್ಲೀನರ್’ (Roomba vacuum cleaner) ಲೊಕಾಮೊಗಾಳ್ ರೊಬೊಟ್ ಜಾಲೆಂ!

1. ಕೈಗಾರಿಕ್ ರೊಬೊಟ್.

ಸಾಮಾನ್ಯ್ ಜಾವ್ನ್ ವಾಪರ್ಚಾ ರೊಬೊಟಾಂ ಪಯ್ಕಿ ಅಸಲ್ಯಾ ರೊಬೊಟಾಂಚೊ ಉಪ್ಯೋಗ್, ಕೈಗಾರಿಕ್ ಕ್ಶೇತ್ರಾಂತ್ ಸಗ್ಳ್ಯಾನ್ ಜಾತಾ. ಅಸಲೆ ರೊಬೊಟ್, ಫೆಕ್ಟರಿನಿ, ವೆಲ್ಡಿಂಗ್ ಕರುಂಕ್, ಪೇಂಯ್ಟಿಂಗ್ ಕರುಂಕ್, ವಿವಿಧ್ ಭಾಗ್ ಘಡ್ಸುನ್ ಎಸೆಂಬ್ಲಿ ಕರುಂಕ್ ತಶೆಂಚ್ ತಯಾರ್ ಜಾಲ್ಲ್ಯೊ ವಸ್ತು ಪ್ಯಾಕ್ ಕರುಂಕ್ ಸಕ್ತಾತ್. ಅಸಲ್ಯಾ ರೊಬೊಟಾಂಕ್ ಫಲಾಣೆ ಕಾಮ್ ಕರ್ಚೆಬರಿ ಪ್ರೊಗ್ರಾಮ್ ಕೆಲ್ಯಾರ್, ಕಸಲೆಂಯ್ ಕಾಮ್, ನಾಜೂಕಾಯೆನ್ ಮಾತ್ ನ್ಹಯ್ ಬರ‍್ಯಾಚ್ ವೇಗಾನ್ ಕರುಂಕೀ ಸಕ್ತಾತ್.

2. ಸರ್ವಿಸ್ ರೊಬೊಟ್.

ಹೆ ರೊಬೊಟ್, ಘರಾಂನಿ ವ ಸಾರ್ವಜನಿಕ್ ವಾತಾವರಣಾನಿ ಕುಮಕ್ ದೀಂವ್ಕ್ ಸಕ್ತಾತ್. ದ್ರಷ್ಟಾಂತಾಕ್, ವ್ಯಾಕ್ಯೂಮ್ ಕ್ಲೀನರಾಂ, ತಣ್ ಕಾಡ್ಚಿಂ ಮೆಶಿನಾಂ ಆನಿ ಜನೆಲಾಂಚೆ ಆರ್ಶೆ ನಿತಳ್ ಕರ್ಚಿಂ ಮೆಶಿನಾಂ. ಹೊಟೆಲಾನಿ, ವಿವಿಧ್ ವಸ್ತು ತ್ಯಾ-ತ್ಯಾ ಕುಡಾಂಕ್ ಪಾವಂವ್ಕ್, ಹೊಟೆಲಾಂತ್ಲ್ಯಾ ಸೈರ‍್ಯಾಂಕ್ ಗರ್ಜೆಚಿ ಮಾಹೆತ್ ದೀಂವ್ಕ್ ಆನಿ ಹೆರ್ ಸಾಧ್ಯಾ ಕಾಮಾಂಕ್ ರೊಬೊಟ್ ವಾಪರ್ತಾತ್.

3. ಮೆಡಿಕಲ್ ರೊಬೊಟ್.

ಎದೊಳ್ ಭಾರಿಚ್ ಮಿನತೆನ್ ಕರುಂಕ್ ಪಡ್ಚಿಂ ಒಪರೇಶನಾಂ, ರೊಬೊಟಾಚಾ ಕುಮ್ಕೆನ್ ತ್ವರಿತಾಯೆನ್ ಆನಿ ಚಡಿತ್ ಕಾತ್ರಾಪ್ ಗರ್ಜ್ ನಾಸ್ತಾಂ ಕರುಂಕ್ ಜಾತಾತ್. ಅವ್ಘಡಾ ವರ್ವಿಂ ವ ಇತರ್ ಕಾರಾಣಾಂ ವರ್ವಿಂ ಚಲೊಂಕ್ ಕಷ್ಟ್ ಜಾಲ್ಲ್ಯಾ ಪಿಡೆಸ್ತಾಂಕ್ ಗರ್ಜೆಚಾ ಚಲನ್-ವಲನಾಚಾ ವ್ಯಾಯಾಮಾಂತ್ ರೊಬೊಟ್ ಗರ್ಜೆಚಿ ಕುಮಕ್ ದಿತಾತ್. ಆಸ್ಪತ್ಯ್ರಾನಿ ಒಕ್ತಾಂ ಆನಿ ಗರ್ಜೆಚ್ಯೊ ಹೆರ್ ವಸ್ತು ವಿವಿಧ್ ಜಾಗ್ಯಾಂಕ್ ತ್ವರಿತಾಯೆನ್ ಪಾವಂವ್ಕ್ ಆನಿ ಥೊಡೆ ಪಾವ್ಟಿಂ ಚಡ್ ಜಡಾಯೆಚಾ ಪಿಡೆಸ್ತಾಂಕ್ ಉಕ್ಲುಂಕ್, ರೊಬೊಟಾಂಚೊ ಉಪ್ಯೋಗ್ ಜಾತಾ.

4. ಮಿಲಿಟರಿ ಆನಿ ಅಂತ್ರಳ್ ಯಾನಾಚೆ ರೊಬೊಟ್.

ದುಸ್ಮಾನಾ ವಿಶಿಂ ಮಾಹೆತ್ ಆಪ್ಣಾಂವ್ಕ್, ದುಸ್ಮಾನಾಚೆಂ ಠಿಕಾಣೆ ಸೊಧುನ್ ಕಾಡುಂಕ್ ಆನಿ ಥೊಡೆ ಪಾವ್ಟಿಂ ದುಸ್ಮಾನಾಕ್ ಲಗಾಡ್ ಕಾಡುಂಕೀ ರೊಬೊಟಾಚೊ ವ ಡ್ರೋನಾಂಚೊ ಪ್ರಯೋಗ್ ಜಾತಾ.ಭಾರಿಚ್ ಅಪಾಯಾಚೆ ಮಾತ್ ನ್ಹಯ್, ಜೀವ್ ಹೊಗ್ಡಾಂವ್ಕೀ ಕಾರಾಣ್ ಜಾಂವ್ಚೆ ತಸಲೆ ಬೋಂಬ್, ಫುಟಾನಾತ್‌ಲ್ಲೆಬರಿ ಮೆಕ್ಳೆ ಕರುಂಕ್ ರೊಬೊಟ್ ವಾಪರ್ತಾತ್. ಅಂತ್ರಳಾರ್ ಪಯ್ಶಿಲ್ಯಾ ಗ್ರಹಾಂಕ್ ಧಾಡ್ಚಾ ಉಪಗ್ರಹಾಂನಿ, ಮನ್ಶ್ಯಾಂ ಬದ್ಲಾಕ್ ರೊಬೊಟಾಂಕ್ ಧಾಡುನ್, ಗರ್ಜೆಚಿ ಮಾಹೆತ್ ಆಪ್ಣಾಯ್ತಾತ್.

5. ಸರ್ವಾಂ ಸಂಗಿಂ ಭರ್ಸೊಂಚೆ, ಮನ್ಶ್ಯಾ ಸ್ವಭಾವಾಚೆ ರೊಬೊಟ್.

ಅಸಲ್ಯಾ ರೊಬೊಟಾಂಕ್ ’ಹ್ಯುಮನೊಯ್ಡ್ ರೊಬೊಟ್’ (Humanoid robot) ಮ್ಹಣ್ತಾತ್. ಅಸಲೆ ರೊಬೊಟ್, ಸಂಶೊಧನಾನಿ, ಶಾಳಾಂನಿ, ಆಸ್ಪತ್ರ್ಯಾನಿ ಆನಿ ಮನೋರಂಜನ್ ದಿಂವ್ಚಾ ಜಾಗ್ಯಾಂನಿ ವಾಪರ್ತಾತ್.

6. ವಸ್ತು ರವಾನ್ ಆನಿ ಸಂಚಾರ್ ಕರ್ಚೆ ರೊಬೊಟ್.

ಆಜ್-ಕಾಲ್, ರೊಬೊಟಾಂ ಮುಕಾಂತ್ರ್ ಖಾಣ್ ವ ಹೆರ್ ಪಾರ್ಸೆಲಾಂ ವಿತರಣ್ ಕರ್ಚಿ ವಿಲೆವಾರಿಯೀ ಚಲ್ತಾ. ತಿತ್ಲೆಂಚ್ ನ್ಹಯ್, ಚಾಲಕ್ ನಾಸ್ತಾನಾ ಧಾಂವ್ಚಿಂ ಕಾರಾಂ ಭವಿಶ್ಯಾಂತ್ ಯೆಂವ್ಚಾ ವಿಶಿಂ ಜಾಯಿತ್ತೆ ಪ್ರಯೋಗ್ ಚಲೊನ್ ಆಸಾತ್. ಚಾಲಕ್ ನಾಸ್ತಾಂ ಚಲ್ಚಿಂ ಮೆಟ್ರೊ ರಯ್ಲಾಂ, ಸಂಸಾರಾಂತ್ ಸಗ್ಳ್ಯಾನ್ ಎದೊಳ್‌ಚ್ ಪ್ರಖ್ಯಾತ್ ಜಾಲ್ಯಾಂತ್.

7. ಕ್ರಶಿಯೆಕ್ ವಾಪರ್ಚೆ ಆನಿ ವಾತಾವರಣ್ ಸಮ್ಜೊಂಚೆ ರೊಬೊಟ್.

ಎದೊಳ್‍ಚ್, ‘ಡ್ರೋನ್’ (Drone) ನಾಂವಾಚೆ, ಉಬ್ಚೆ ರೊಬೊಟ್ ವಾಪರ್ನ್ ವಿಸ್ತಾರ್ ಬೆಳ್ಯಾಚೆರ್ ಕ್ರಿಮಿನಾಶಕಾಂ ಶಿಂಪ್ಡಾಂವ್ಚೆಂ ಮಾತ್ ನ್ಹಯ್ ಆಸ್ತಾಂ ತ್ಯಾ ಬೆಳ್ಯಾಚಿ ಭಲಾಯ್ಕಿ ಆನಿ ಲುಂವೊಂಕ್ ಸಾರ್ಕ್ಯಾ ಆವ್ದೆಚಿ ಮಾಹೆತ್ ಜಾಣಾಂ ಜಾಂವ್ಕೀ ಸಾಧ್ಯ್ ಜಾಲಾಂ. ವಿಸ್ತಾರ್ ಸುವಾತೆರ್ ಫಳ್-ವಸ್ತು ಆನಿ ರಾಂದ್ವಯ್ ಖುಂಟುಂಕ್, ಥೊಡೆ ಪಾವ್ಟಿಂ ಮನಿಸ್ ಮೆಳಾನಾಸ್ತಾನಾ, ಬೆಳ್ಯಾಚೊ ವಿಭಾಡ್ ಜಾಂವ್ಚೆಕಡೆ, ಆಜ್-ಕಾಲ್ ರೊಬೊಟಾಂಕ್ ವಾಪರುಂಕ್ ಸುರು ಕೆಲಾಂ. ತಶೆಂಚ್, ರಾನಾಂಚೊ ಆನಿ ತಾಂತ್ಲ್ಯಾ ಮನ್ಜಾತಿಂಚೆಂ ಬರೆಪಣ್ ಪಳೆಂವ್ಕ್ ಆನಿ ತಾಂಚೊ ಸಂಖೊ ವಾಡ್ಲಾಗೀ ನಾ ತೆಂ ಪಳೆಂವ್ಕ್ ಗರ್ಜೆಚಿ ಮಾಹೆತ್ ಆರಾಂವ್ಚಾ ಸಂಗಿಂ, ವಾತಾವರಣಾಂತ್ ಮ್ಹೆಳ್ಯಾಚೊ ಅಂಶ್ ಪಳೆಂವ್ಕ್, ಉದ್ಕಾಂತ್ ಕಸಲೋಯ್ ದೋಶ್ ಆಸ್ಲ್ಯಾರ್ ಘಳಾಯೆವಿಣೆ ಖಬರ್ ದೀಂವ್ಕ್, ರೊಬೊಟಾಂಕ್ ವಾಪರ್ತಾತ್.

ಮನ್ಶ್ಯಾ ಜೀವನಾಂತ್ ರೊಬೊಟ್ ಚಡ್ ಆನಿ ಚಡ್ ಮೆತೆರ್ ಜಾಂವ್ಚಾ ಸಂಗಿಂ ಥೊಡಿಂ ನೈತಿಕ್ ಸವಲಾಂ ಆಮ್ಚಾ ಮುಕಾರ್ ಉದೆತಾತ್. ರೊಬೊಟಾಂ ದ್ವಾರಿಂ ಮನ್ಶ್ಯಾ ಜೀವನ್ ಸುಗಮ್ ಜಾಲಾಂ ಖರೆಂ ತರೀ, ಮನ್ಶ್ಯಾಕ್ ಹಾಂಗಾಸರ್ ಕಸಲಿ ಜವಾಬ್ದಾರಿ ಆಸಾ, ಮನ್ಶ್ಯಾನ್ ಹರ‍್ಯೇಕೀ ರೊಬೊಟಾ ಕರ್ನಾ ಕರಯ್ಲೆಂ ತರ್, ಮನ್ಶ್ಯಾಚಾ ಅನುಭವಾಕ್ ಕಸೊ ಮಾರ್ ಬಸೊಂಕ್ ಆಸಾ, ರೊಬೊಟ್ ದೀಸ್ ವೆತಾಂ-ವೆತಾಂ ಮನ್ಶ್ಯಾಚಾಕೀ ಬುದ್ವಂತ್ ಜಾಲೊ ತರ್, ಮನ್ಶ್ಯಾಚಾ ಹಕ್ಕಾಂಕ್ ಮೋಲ್ ಆಸಾತ್‌ಗೀ, ಮನಿಸ್ ಕ್ರಮೇಣ್ ಆಪ್ಣಾಯಿತ್ಲ್ಯಾಕ್ ಕಿತೆಂಚ್ ಕರುಂಕ್ ಸಕಾನಾಸ್ತಾಂ, ರೊಬೊಟಾಚೊ ಗುಲಾಮ್ ಜಾಯ್ತ್‌ಗೀ, ಮ್ಹಳ್ಳಿಂ ಚಿಂತ್ಪಾಂ ಉದೆಂವ್ಕ್ ಲಾಗ್ಲ್ಯಾಂತ್.

ವ್ಹಡ್ಲ್ಯಾ ಮೆಶಿನ್-ಶೊಪಾಂನಿ ವಾಪರ್ಚೆ ರೊಬೊಟ್, ಚುಕಾಮುಕಿಂ ಪಾಡ್ ಜಾತಾತ್. ಥೊಡೆ ಪಾವ್ಟಿಂ ಪ್ರೊಗ್ರಾಮ್ ಕರ್ತೆಲ್ಯಾಚಾ ಚುಕಿಕ್ ಲಾಗೊನ್, ಅವ್ಘಡಾಂ ಘಡ್ತಾತ್ ಆನಿ ಅಸಲ್ಯಾ ಅವ್ಘಡಾಂನಿ, ತ್ಯಾ ರೊಬೊಟಾಂ ಸಾಂಗಾತಾ ಕಾಮ್ ಕರ್ಚಾ ಮನ್ಶ್ಯಾನ್ ಅಡ್ಚೊಂಚೆಂ ವ ಹಾತ್, ಬೊಟಾಂ ಆನಿ ಪಾಯ್ ಕಾತ್ರೊನ್ ಚಲ್ಚೆ, ಥೊಡಿಂ ಉಬ್ಚಿಂ ರೊಬೊಟಾಂ ಎಕಾಮೆಕಾ ಆಪ್ಟೊಂಚಿಂ, ಆನಿ ಆಸ್ಪತ್ರ್ಯಾಂನಿ ಶಸ್ತ್ರ್ ಚಿಕಿತ್ಸಾ ಕರ್ತಾನಾ ರೊಬೊಟಾನ್ ಚುಕಿ ಕರ್ನ್ ಪಿಡೆಸ್ತಾನ್ ಮೊರ್ಚೆಂ ಅಶೆಂ ಕಿತೆಂಯ್ ಘಡೊಂಕ್ ಸಾಧ್ಯ್ ಆಸಾ.

ಚಡ್ ಆನಿ ಚಡ್ ಉದ್ಯಮಾನಿ ರೊಬೊಟಾಕ್ ವಾಪರ್ಚೆ ವರ್ವಿಂ, ಲೊಕಾಕ್ ಕಾಮಾಂ ಮೆಳೊಂಕ್ ಕಷ್ಟಾಂಚೆಂ ಜಾಂವ್ಚಿ ಸಾಧ್ಯತಾ, ಖಳ್ಮಿತ್ ನಾಸ್ತಾಂ ಕಾಮ್ ಕರ್ಚಾ ರೊಬೊಟಾಕ್ ಆನಿ ದಿಸಾಚಿಂ ಆಟ್ ವ್ಹರಾಂ ಕಾಮ್ ಕರ್ಚಾ ಕಾಮೆಲ್ಯಾಕ್ ತುಲನ್ ಕರುನ್, ಸಾಂಭಾಳಾಂತ್ ಕಾತ್ರಾಪ್ ಜಾಂವ್ಕ್ ಪುರೊ ಮ್ಹಳ್ಳೆಂ ಭ್ಹೆಂ, ಸಮಾಜಿಂತ್ ಲೊಕಾ ಮಧೆಂ ಅಸಮಧಾನ್ ಉಬ್ಜಂವ್ಕೀ ಸಾಧ್ಯ್ ಆಸಾ.

ಝುಜಾ ಥಳಾರ್, ಆಜ್-ಕಾಲ್ ರೊಬೊಟಾಂಕ್ ವಾಪರ್ಚೆಂ ಸಧಾಂಚೆಂ ಜಾಲಾಂ. ಎದೊಳ್ ಮನ್ಶ್ಯಾ ಮಧೆಂ ಚಲೊನ್ ಆಸ್‌ಲ್ಲೆಂ ಝುಜ್, ರೊಬೊಟಾಂ ದ್ವಾರಿಂ ಚಲಯ್ತಾನಾ, ನಿರಾಪ್ರಾಧಿ ಮನ್ಶ್ಯಾಂನಿ ಮೊರೊಂಕ್ ಸಾಧ್ಯ್ ಆಸಾ ಮಾತ್ ನ್ಹಯ್, ಕಾಂಯ್ ತರೀ ಸಾರ್ಕೆಂ ಕಾಮ್ ಕರಿನಾತ್‌ಲ್ಲ್ಯಾ ರೊಬೊಟಾನ್ ಕೆಲ್ಲ್ಯಾ ಚುಕಿ ಧರ್ಮಾನ್, ಸರ್ಕಾರಾಂಕ್ ತಕ್ಲೆ ಫಡಾಪಡಿಂಚಿಂ ಸಮಸ್ಯಿಂ ಉದೆಂವ್ಕ್ ಆಸಾತ್. ಆನ್ಯೇಕಾ ವಾಟೆನ್, ಅಸಲೆ ರೊಬೊಟ್ ಭಯೋತ್ಪಾದಕಾಂಚಾ ಹಾತಿಂ ಪಡ್ಲೆ ತರ್, ಕಸಲಿ ಮಲಾಮತ್ ಜಾಯ್ತ್ ಮ್ಹಳ್ಳೆಂ ದೇವ್‌ಚ್ ಜಾಣಾಂ.

ಎದೊಳ್ ಪಳೆಂವ್ಕ್, ಆಯ್ಕೊಂಕ್, ಉಲಂವ್ಕ್, ಉಕ್ಲುಂಕ್, ವ್ಹಾವಂವ್ಕ್ ಆನಿ ಶಸ್ತ್ರ್ ಚಿಕಿತ್ಸಾ ಸೈತ್ ಕರುಂಕ್ ಸಕ್ಚೊ ರೊಬೊಟ್ ಆರ್ವಿಲ್ಯಾ ದಿಸಾಂನಿ ಹುಂಗೊನ್ ಪರ್ಮಳ್ ಘೆಂವ್ಕೀ ಸಕ್ತಾ ಮ್ಹಳ್ಯಾರ್ ಕೊಣಾಯ್ಕಿ ಅಜಾಪ್ ಜಾಂವ್ಚಾಂತ್ ನವಾಲ್ ನಾ. ಅಸಲ್ಯಾ ರೊಬೊಟಾಂಚಿ, ರಾಸಾಯನಿಕಾಂಚಾ ಫೆಕ್ಟರಿನಿ, ರಾಸಾಯನಿಕಾಂ ಪಾಜಾರ್ಚೆಂ ಆನಿ ಗೇಸ್ ಲೀಕ್ ಜಾಂವ್ಚಿಂ ಖುಣಾಂ ಪಾರ್ಕುಂಕ್ ವಾಪರ್ತಾತ್. ಖಾಣಾ ಉದ್ಯಮಾಂತ್, ಪಾಡ್ ಜಾಲ್ಲ್ಯಾ ಖಾಣಾಚಿ ಒಳೊಕ್ ಧರುಂಕ್ ಆನಿ ವಿಂಗಡ್ ಕರುಂಕ್, ಆಸ್ಪತ್ರ್ಯಾಂನಿ, ಫಕತ್ ಪಿಡೆಸ್ತಾಚೊ ಉಸ್ವಾಸ್ ಪಾರ್ಕುನ್ ತಾಚಾ ಪಿಡೆಚಿ ಮಾಹೆತ್ ಘೆಂವ್ಕ್, ಹವಾಮಾನಾಚೊ ವಿವರ್ ದಿತೆಲ್ಯಾಂಕ್, ವಾತಾವರಣಾಂತ್ ಕಸಲಿ ಪುಣಿ ವಿಕಾಳಾಯ್ ಆಸಾ ತರ್ ಮುಂಗಡ್ ಹಿಶಾರೊ ದಿಂವ್ಚಾಕ್, ಅವ್ಘಡಾಂ ಘಡ್‌ಲ್ಲೆಕಡೆನ್ ಫಯರ್ ಸರ್ವಿಸಾಚಾಂಕ್ ಕುಮಕ್ ಕರುಂಕ್, ರೊಬೊಟಾಚೊ ಚಡ್ ಆನಿ ಚಡ್ ಪ್ರಯೋಗ್ ಚಲೊನ್ ಆಸಾ.

ಎಕ್ವಟಾನ್ ಸಭಾರ್ ಸಂಗ್ತಿ ಸಾಧ್ಯ್ ಜಾತಾತ್ ಕಂಯ್, ತಶೆಂಚ್ ಸಗ್ಳ್ಯಾ ಸಂಸಾರಾಚಾ ರಾಷ್ಟ್ರಾಂನಿ ಎಕ್ವಟೊನ್, ಹಿ ಮಹತ್ವಾಚಿ ತಾಂತ್ರಿಕತಾ, ಮನ್ಶ್ಯಾಕುಳಾಚಾ ನಾಸಾಕ್ ವಾಪರಿನಾಸ್ತಾಂ, ಜಾಗತಿಕ್ ಬರೆಪಣಾ ಖಾತಿರ್ ವಾಪರ್ಚಿ ವರ್ತಿ ಗರ್ಜ್ ಆಸಾ.

■ ಸುನಂದ್