ಸ್ವಿಟ್ಜರ್ಲ್ಯಾಂಡಾಚೆಂ ಪಯ್ಣ್ ಹರ್ಯೇಕಾ ವ್ಯಕ್ತಿಚೆಂ ಸ್ವಪಾಣ್ ಮ್ಹುಣ್ ಹಾಂವ್ ಚಿಂತ್ತಾ. ಥೊಡ್ಯಾಂಕ್ ಹೆಂ ನಶೀಬ್ ಫಾವೊ ಜಾತಾ, ಅನಿಂ ಥೊಡ್ಯಾಂಚೆಂ ಸ್ವಪಾಣ್, ಸ್ವಪಾಣ್ ಜಾವ್ನ್ ಚ್ ಉರ್ತಾ. ಅನಿಂ ತಸಲ್ಯಾಂ ಖಾತಿರ್ ಹಾಂವ್ ಘೆವ್ನ್ ಅಯ್ಲ್ಯಾಂ ಸ್ವಿಟ್ಜರ್ಲ್ಯಾಂಡಾಚೆಂ ಪಯ್ಣಾ ಕಥನ್. ಸ್ವಿಟ್ಜರ್ಲ್ಯಾಂಡಾಕ್ ಪಾಂಯ್ ತೆಂಕ್ಚೆಂ ಮ್ಹಜೆಂಯ್ ಸಬಾರ್ ವರ್ಸಾಂಚೆಂ ಸ್ವಪಾಣ್ ಜಾವ್ನಾಸ್ಲೆಂ. ತ್ಯಾ ಗಾಂವಾಕ್ ಪಯಣ್ ಕರ್ಚೆಂ ಭೊವ್ ಮಾರಗ್ ಜಾಲ್ಲ್ಯಾನ್ ಮ್ಹಜೆಂ ಸ್ವಪಾಣ್, ಸ್ವಪಾಣ್ ಜಾವ್ನ್ ಚ್ ಉರ್ ಲ್ಲೆಂ. ಹ್ಯಾ ಗಿಮಾಳ್ಯಾ ರಜೆರ್ ಜಾಲ್ಲೆಂ ಜಾತಾ ಮ್ಹುಣ್ ಚಿಂತುನ್ ಭಾಯ್ರ್ ಸರ್ಲ್ಯಾಂವ್ ಅಮಿಂ ಸ್ವಿಟ್ಜರ್ಲ್ಯಾಂಡಾಕ್.
ಅಮ್ಚೆಂ ವಿಮಾನ್ ಪಾವ್ಲೆಂ ಝ್ಯುರಿಕ್ ಏರ್ ಪೋರ್ಟಾಕ್. ಥಂಯ್ ಪಾವ್ತಾನಾ ದೊನ್ಪಾರ್ ಜಾಲ್ಲೊ. ಥಂಯ್ ಏರ್ ಪೋರ್ಟಾಕ್ ಲಾಗೊನ್ ಚ್ ವ್ಹಡ್ಲೆಂ ಜಯ್ತ್ ಶೊಪಿಂಗ್ ಸೆಂಟರ್ ಅಸ್ಲೆಂ. ಥಂಯ್ ಥೊಡೊ ವೇಳ್ ಖರ್ಚುನ್ ದೊನ್ಪಾರಾಂಚೆಂ ಜೆವಾಣ್ ಸಂಪಯ್ಲೆಂ. ಸ್ವಿಟ್ಜರ್ಲ್ಯಾಂಡಾ ವಿಶಿಂ ಪಯ್ಲೆಂಚ್ ಮಾಹೆತ್ ಎಕ್ಟಾಂಯ್ ಕೆಲ್ಲ್ಯಾನ್ ಥಂಯ್ ಪಾವೊನ್ ಕಿತೆಂ ಕಿತೆಂ ಕರಿಜಯ್ ಮ್ಹುಳ್ಳ್ಯಾಚಿ ಪಟ್ಟಿ ಪಯ್ಲಿಚ್ ತಯಾರ್ ಜಾಲ್ಲಿ. ಸ್ವಿಟ್ಜರ್ಲ್ಯಾಂಡಾಚೊ ಪಬ್ಲಿಕ್ ಟ್ರಾನ್ಸ್ ಪೋರ್ಟ್ ನಂಬರ್ ವನ್ ಮ್ಹುಣ್ಯೆತ್. ತ್ಯಾ ಮಾರಗ್ ದೇಶಾಂತ್ ಟ್ಯಾಕ್ಸೆಂತ್ ಪಯ್ಣ್ ಕರ್ಚೆ ಬರಿಂ ನಾಂ. ಪಂದ್ರಾ ಮಿನುಟಾಂಚ್ಯಾ ವಾಟೆಕ್ ಪಾಂಚ್ ಹಜಾರ್ ರುಪಯ್ ಜಾತಾತ್. ದೆಕುನ್ ಅಮಿಂ ಲೇಖ್ ಘಾಲ್ನ್ ಟ್ರಾವೆಲ್ ಪಾಸ್ ಕಾಡ್ಚೊ ನಿರ್ದಾರ್ ಪಯ್ಲೆಂಚ್ ಕೆಲ್ಲೊ. ಹೊ ಪಾಸ್ ಅಸ್ಲ್ಯಾರ್ ಬಸ್ಸ್, ರೈಲ್, ಬೋಟ್ ಸಗ್ಳೆಂ ಫ್ರಿ. ಪಾಸ್ ಇಲ್ಲೊ ಮಾರಗ್ ಅಸ್ತಾ ದೆಕುನ್ ಅಮಿಂ ತಾಚೊ ಬರೊ ಉಪ್ಯೋಗ್ ಕರಿಜಯ್ ಪಡ್ತಾ.
ಥಂಯ್ ವೆಚ್ಯಾ ಪಯ್ಲೆಂ ಯಸ್.ಬಿ.ಬಿ ಮ್ಹುಳ್ಳೆಂ ಏಕ್ ಆಪ್ ಡೌನ್ ಲೋಡ್ ಕರಿಜಯ್ ಪಡ್ತಾ. ಹಾಂತು ಬಸ್ಸ್, ರೈಲಾಚಿ ವೇಳಾ ಪಟ್ಟಿ ಅನಿಂ ಇತರ್ ಮಾಹೆತ್ ಅಸ್ತಾ. ಪೋನಾಂಕ್ ಡೇಟಾ, ಸ್ವಿಸ್ ಟ್ರಾವೆಲ್ ಪಾಸ್ ಅನಿಂ ಪಯ್ಶೆ ಎಕ್ಸ್ ಚೇಂಜ್ ಕರ್ನ್ ಭಾಯ್ರ್ ಸರ್ಲ್ಯಾಂವ್ ಅಮ್ಚ್ಯಾ ಹೊಟೆಲಾಕ್.
ಜುಂಗ್ ಫ್ರಾವ್ ಜೋಖ್, ಟೋಪ್ ಆಫ್ ಯುರೋಪ್ (ಯುರೋಪಾಚಿ ತುದಿ)
ಸರಿ ಸುಮಾರ್ 11,362 ಫೀಟ್ ಉಬಾರಾಯೆರ್ ಅಸ್ಚೊ ನಾಂವಾಡ್ದಿಕ್ ಪರ್ವತ್ ಜುಂಗ್ ಫ್ರಾವ್ ಜೋಖ್. ಹಾಕಾ “ಟೋಪ್ ಆಫ್ ಯುರೋಪ್” ಮ್ಹುಣ್ ಯ್ ಅಪಯ್ತಾತ್. ಹಾಂಗಾಚೆಂ ಅನ್ಯೇಕ್ ಆಕರ್ಶಣ್ ಜುಂಗ್ ಫ಼್ರಾವ್ ರೈಲ್ ನಿಲ್ದಾಣ್. ಯುರೋಪಾಂತ್ಲೆಂ ಅತೀ ಊಂಚ್ ರೈಲ್ ನಿಲ್ದಾಣ್ ಹೆಂ. ಪರ್ವತಾ ಬಿತರ್ಲ್ಯಾನ್ ಬಾಂದ್ ಲ್ಲ್ಯಾ ಮಾಟ್ಯಾನಿಂ ಹೆಂ ರೈಲ್ ಮನ್ಶ್ಯಾಂಕ್ ಪರ್ವತಾಚ್ಯಾ ಮುಳಾ ಥಾವ್ನ್ ತುದ್ಯೆಕ್ ಪಾವಯ್ತಾ. ಹಾಚೆಂ ನಿರ್ಮಾಣ್ ಸುರು ಜಾಲ್ಲೆಂ 1896 ಂತ್ ಅನಿಂ ಸಂಪ್ ಲ್ಲೆಂ 1912 ಂತ್. ಹೊ ಜಾಗೊ ಮಸ್ತ್ ಉಂಚಾಯೆರ್ ಅಸ್ಲೆಲ್ಯಾನ್ ಗರ್ಮೆಚ್ಯಾ ದಿಸಾನಿಂಯ್ ಥಂಯ್ಸರ್ ಥಂಡ್ ಅನಿಂ ಸ್ನೋ ಪಳೆಂವ್ಕ್ ಮೆಳ್ತಾ. ಹೆಂ ಸ್ವಿಟ್ಜರ್ಲ್ಯಾಂಡಾಚೆಂ ಪ್ರಮುಖ್ ಆಕರ್ಶಣ್ ಜಾವ್ನಾಸೊನ್ ಸಂಸರಾಚ್ಯಾ ಕೊನ್ಶ್ಯಾ ಕೊನ್ಶ್ಯಾ ಥಾವ್ನ್ ಲೋಕ್ ಹಾಂಗಾಸರ್ ಪ್ರವಾಸ್ ಕರ್ತಾ.
ದುಸ್ರ್ಯಾ ದಿಸಾ ಅಮಿಂಯ್ ಯುರೋಪಾಚ್ಯಾ ತುದ್ಯೆಕ್ ವೆಚೊ ನಿರ್ದಾರ್ ಕೆಲ್ಲೊ. ಸಕಾಳಿಚೊಂ ನಾಸ್ಟೊ ಕರ್ನ್ ಟ್ರಾಮ್ ದರ್ನ್ ಝ್ಯುರಿಖ್ ಹೆಚ್ ಬಿ (ಮೈನ್ ಟ್ರೈನ್ ಸ್ಟೇಶನ್)ಕ್ ಪಾವ್ಲ್ಯಾಂವ್. ರೈಲ್ ಪಯ್ಣಾಚೊ ಪಯ್ಲೊ ದೀಸ್ ಜಾಲ್ಲ್ಯಾನ್ ಅಮ್ಚೆಂ ರೈಲ್ ಸೊದುನ್ ಕಾಡುಂಕ್ ಥೊಡೆ ತ್ರಾಸ್ ಭೊಗ್ಲೆ. ತರೀ ಸೊದುನ್ ಕಾಡ್ನ್ ಜನೆಲಾಚಿ ಬಸ್ಕಾ ಘೆವ್ನ್ ಸ್ವಿಟ್ಜರ್ಲ್ಯಾಂಡಾಚಿ ಸೊಭಾಯ್ ದೊಳ್ಯಾನಿಂ ಭರ್ಲಿ. ಗ್ರೀಂಡಲ್ವಾಲ್ಡ್ ಟರ್ಮಿನಲಾಂತ್ ದೆಂವೊನ್ ಕೇಬಲ್ ಕಾರಾಚೆರ್ ಚಡ್ಲ್ಯಾಂವ್. ಕೇಬಲ್ ಕಾರಾಚೆರ್ ವಯ್ರ್ ವೆತಾನಾ ಸಕಯ್ಲ್ ದಿಸ್ಚಿ ಸೊಭಾಯ್ ವರ್ಣುಂಕ್ ಅಸಾದ್ಯ್. ಸರ್ಗಾಕ್ ಏಕ್ ಚ್ ಮೇಟ್ ಮ್ಹುಳ್ಳ್ಯಾ ಬರಿಂ ಭೊಗ್ಲೆಂ. ವಯ್ರ್ ತುದ್ಯೆಕ್ ಪಾವೊನ್ ಉಡಾಸಾಕ್ ಥೊಡೆ ತಸ್ವೀರ್ಯೊ ಕಾಡ್ಲ್ಯೊ. ಉಪ್ರಾಂತ್ ದವೆಂ ಹಾಂತುಳ್ನ್ ಪಾಂಗುರ್ಲೆಲ್ಯಾ ದೊಂಗ್ರಾಚಿ ಸೊಭಾಯ್ ಚಾಕ್ಲಿ. ವಯ್ರ್ ವೆತಾನಾ ಕೇಬಲ್ ಕಾರಾಚೆರ್ ಚಡ್ಲ್ಯಾಂವ್ ಸಕಯ್ಲ್ ದೆಂವ್ತಾನಾ ರೈಲಾಚ್ಯಾ ಪಯ್ಣಾಚಿ ಮಜಾ ಭೊಗ್ಲಿ. ವೆಗ್ಳೊಚ್ ಅನುಭವ್. ಪ್ರಕ್ರತೆಚ್ಯಾ ಸೊಭಾಯೆನ್ ಮ್ಹಕಾ ಪಿಶ್ಯಾರ್ ಘಾಲ್ಲೆಂ. ಸಗ್ಳಿಂ ಸ್ವಿಟ್ಜರ್ಲ್ಯಾಂಡ್ ಯೇಂವ್ಕ್ ಕಿತ್ಯಾಕ್ ಸ್ವಪ್ಣೆತಾತ್ ಮ್ಹುಳ್ಳೆಂ ಮ್ಹಕಾ ತವಳ್ ಕಳ್ಳೆಂ.
ಗ್ರಿಂಡೆಲ್ ವಾಲ್ಡ್ ಆನಿ ಆರೆ ಗೋರ್ಜ್
ಐಗರ್, ಮೋನ್ಖ್ ಅನಿಂ ಜುಂಗ್ ಫ಼್ರಾವ್ ಪರ್ವತಾ ಮದೆಂ ಸೊಬ್ಚಿ ಏಕ್ ಲ್ಹಾನ್ ಹಳ್ಳಿ ಗ್ರಿಂಡೆಲ್ ವಾಲ್ಡ್. ಗ್ರಿಂಡೆಲ್ ವಾಲ್ಡ್ ಫಸ್ಟ್ ಕ್ಲಿಫ್ ವಾಕ್ ಹ್ಯಾ ಜಾಗ್ಯಾಚೆಂ ಪ್ರಮುಖ್ ಆಕರ್ಶಣ್ ಜಾವ್ನಾಸಾ. ಹಿಂವಾಳ್ಯಾ ದಿಸಾನಿಂ ಹೊ ಜಾಗೊ ಸ್ಕೀ ರಿಸೋರ್ಟ್ ಜಾವ್ನ್ ಲೋಕಾಂಕ್ ಆಕರ್ಶಣ್ ಕರ್ತಾ.
ಸುಮಾರ್ 1.5 ಕಿಲೋ ಮೀಟರ್ ವಾಳ್ಚಿ ಆರೆ ನ್ಹಂಯ್ ಅನಿಂ ದೆಗೆನ್ ಸುಮಾರ್ 200 ಮೀಟರ್ ಉಬಾರಾಯೆಚೆಂ ಫಾತ್ರಾಚಿಂ ನೈಸರ್ಗಿಕ್ ವಣದ್. ಹಾಕಾ ಗೋರ್ಜ್ ಮ್ಹುಣ್ ಆಪಯ್ತಾತ್. ನ್ಹಂಯ್ ಚ್ಯಾ ಬಗ್ಲೆಕ್ ಟನೆಲ್ ಅನಿಂ ಸಂಕೊವ್ ಅಸ್ಚಿ ಬಾರಿಕ್ ವಾಟ್. ತಾಚಿ ಸೊಭಾಯ್ ವರ್ಣುಂಕ್ ಅಸಾದ್ಯ್. ಹೊ ಜಾಗೊ ಸ್ವಿಟ್ಜರ್ಲ್ಯಾಂಡಾಚ್ಯಾ ಮಿರಿಂಗನ್ ಮ್ಹುಳ್ಳ್ಯಾ ಗಾಂವಾಂತ್ ಅಸಾ.
ತಿಸ್ರ್ಯಾ ದಿಸಾ ಅಮಿಂ ಝ್ಯುರಿಖ್ ಥಾವ್ನ್ ರೈಲ್ ದರ್ನ್ ಮಿರಿಂಗನ್ ಪಾವ್ಲ್ಯಾಂವ್. ಆರೆ ಗೋರ್ಜ್ ಪಳೆವ್ನ್ ವಿಸ್ಮಿತ್ ಜಾಲ್ಯಾಂವ್. ಮಿರಿಂಗನಾಂತ್ ದನ್ಪಾರಾಂಚೆಂ ಜೆವಾಣ್ ತಿರ್ಸುನ್ ಐಸೆಲ್ಟ್ವಾಲ್ಡ್ ಅನಿಂ ಬ್ರಿಯೆನ್ಜ್ ತಳ್ಯಾಚ್ಯಾ ಉದ್ಕಾಂತ್ ಬೋಟಿರ್ ಬೊಂವ್ಲ್ಯಾಂವ್.
ಲೇಕ್ ಬ್ರಿಯೆನ್ಜ್ (ಬ್ರಿಯೆನ್ಜ್ ತಳೆಂ) ಆನಿ ಇಂಟರ್ಲೇಕನ್
ಪಾಚ್ವ್ಯಾ ಅನಿಂ ನಿಳ್ಶೆಂ ಬರ್ಶಿಕ್ ಉದ್ಕಾ ರಂಗ್ ಪಳೆಯ್ತೆಲ್ಯಾಂಚೆಂ ಮನ್ ಪಿಸ್ವಾಯ್ತಾ. ಹ್ಯಾ ತಳ್ಯಾಚಿ ಲಾಂಬಾಯ್ ಚೊವ್ದಾ ಕಿಲೊ ಮೀಟರ್. ಅನಿಂ ಗುಂಡಾಯ್ 260 ಮೀಟರ್. ಸ್ವಿಟ್ಜರ್ಲ್ಯಾಂಡಾಚೆಂ ಉದಾಕ್ ಭೊವ್ ನಿತಳ್.
ಪರ್ವತಾ ವಯ್ರ್ ಮಾಂಡ್ ಲ್ಲೆಂ ಐಸ್ ಪಿಗ್ಳೊನ್ ತೆಂ ಉದಾಕ್ ತಳ್ಯಾಕ್ ಮೆಳ್ತಾನಾ ತ್ಯಾ ಉದ್ಕಾಂತ್ ಬರ್ಸಾಲ್ಲೊ ಐಸ್ ಫಾತ್ರಾ ಪಿಟೊ ಸುರ್ಯಾಚ್ಯಾ ಕಿರ್ಣಾಂಕ್ ಪರ್ಜಳ್ತಾನಾ ತಳ್ಯಾಚ್ಯಾ ಉದ್ಕಾಕ್ ವೆಗ್ಳೊಚ್ ರಂಗ್ ಅನಿಂ ವೆಗ್ಳಿಚ್ ಸೊಭಾಯ್ ದಿತಾ.
ಸ್ವಿಟ್ಜರ್ಲ್ಯಾಂಡಾಂತ್ಲೊ ಭೊವ್ ಲೋಕಾ ಮೊಗಾಳ್ ಗಾಂವ್ ಇಂಟರ್ಲೇಕನ್. ಬೊಂವ್ತೊಣಿ ಐಸಾಚೆ ದೊಂಗೊರ್ (ಆಲ್ಪ್ಸ್) ತಳೆಂ ತನ್ ಅನಿಂ ತಳೆಂ ಬ್ರಿಯೆನ್ಜಾ ಮದೆಂ ಸೊಬ್ಚೊ ಹೊ ಗಾಂವ್ ಸಾದಾರಣ್ ಮನ್ಶ್ಯಾಚೆಂಯ್ ಮನ್ ಪಿಸ್ವಾಯ್ತಾ. ಹಾಂಗಾಚ್ಯೊ ಮುಖ್ಯ್ ಚಟುವಟಿಕ್ಯೊ ಮ್ಹುಳ್ಳ್ಯಾರ್, ಸ್ಕೈ ಡೈವಿಂಗ್ (ಮೊಳ್ಬಾರ್ ಥಾವ್ನ್ ಉಡಿ ಮಾರ್ಚೆಂ), ಪ್ಯಾರಾ ಗ್ಲೈಡಿಂಗ್ (ಉದ್ಕಾ ವಯ್ಲ್ಯಾನ್ ಪ್ಯಾರಾಚ್ಯೂಟಾಚೆರ್ ಉಬ್ಚೆಂ), ಹೈಕಿಂಗ್ (ದೊಂಗೊರ್ ಚಡ್ಚೆಂ), ಕ್ಯಾನಿಯೋನಿಂಗ್ (ಪರ್ವತಾ ಥಾವ್ನ್ ದೊರಿಯೆರ್ ಉದ್ಕಾಂತ್ ದೆಂವ್ಚೆಂ), ಸ್ಕೀಯಿಂಗ್ (ಐಸಾಚೆರ್ ದಾಂವ್ಚೆಂ) ಇತ್ಯಾದಿ.
ಇಂಟರ್ಲೇಕನಾಂತ್ ದೋನ್ ಪ್ರಮುಖ್ ರೈಲ್ ನಿಲ್ದಾಣ್ ಅಸಾತ್. ಇಂಟರ್ಲೇಕನ್ ಓಯಸ್ ಟಿ ಅನಿಂ ಇಂಟರ್ಲೇಕನ್ ವೆಸ್ಟ್. ಸ್ವಿಟ್ಜರ್ಲ್ಯಾಂಡಾಚ್ಯಾ ಪ್ರಮುಖ್ ಆಕರ್ಶಣಾಂಕ್ ಅನಿಂ ಫಾಮಾದ್ ಪರ್ವತ್ ಆಕರ್ಶಣಾಂಕ್ ಹಿಚ್ ವಾಟ್ ದೆಕುನ್ ಚಡ್ತಾವ್ ಲೋಕ್ ಇಂಟರ್ಲೇಕನಾಂತ್ ಚ್ ವಸ್ತಿ ಸೊದ್ತಾ. ದೆಕುನ್ ಹೊ ಜಾಗೊ ಉರ್ ಲ್ಲ್ಯಾ ಜಾಗ್ಯಾಂ ಪಯ್ಕಿಂ ಚಡ್ ಮಾರಗ್.
ಝರ್ಮಾಟ್
ಝರ್ಮಾಟ್ ಏಕ್ ವಾಹನಾಂ ನಾತ್ಲೆಲಿ ಹಳ್ಳಿ. ಹಾಂಗಾಸರ್ ಏಕ್ ರೈಲ್ ಸೊಡ್ಲ್ಯಾರ್ ದುಸ್ರಿಂ ಕಸಲಿಂಚ್ ವಾಹನಾಂ ಪಳೆಂವ್ಕ್ ಮೆಳಾನಾಂತ್. ಹಾಕಾ ಪರ್ವತಾ ಗಾಂವ್ ಮ್ಹುಣ್ ಯ್ ಆಪಯ್ತಾತ್ (ಮೌಂಟೆನ್ ವಿಲೇಜ್). ಹ್ಯಾ ಗಾಂವಾಕ್ ರಿಗ್ತಾಸ್ತಾನಾ ಪಯ್ಶಿಲ್ಯಾನ್ ಪಿರಮಿಡ್ ಶೇಪಾರ್ ದಿಸ್ಚೊ ಪರ್ವತ್ ಮ್ಯಾಟರ್ ಹೋರ್ನ್. ಹಿಸ್ಟ್ರಿ ಬುಕಾಂತ್ ವಾಚ್ ಲ್ಲೊ ಉಡಾಸ್ ಅಯ್ಲೊ ಮ್ಹುಣ್ ಚಿಂತ್ತಾ. 4478 ಮೀಟರ್ಸ್ ಹಾಚಿ ಉಂಚಾಯ್. ಹಾಚಿ ಸೊಭಾಯ್ ಚಾಕೊಂಕ್ ಹೊ ಪರ್ವತ್ ಚಡಜೆ ಚ್ ಮ್ಹುಣ್ ನಾಂ.
ಹ್ಯಾ ಗಾಂವಾಂತ್ ಸಭಾರ್ ವಿವ್ ಪೋಂಯ್ಟ್ ಅಸಾತ್. ಥಂಯ್ ಥಾವ್ನ್ ಹೊ ಪರ್ವತ್ ಬರೊ ದಿಸ್ತಾ. ಗೋರ್ನರ್ ಗ್ರಾಟ್ ಪರ್ವತ್ ಚಡ್ಚೆಂ ರೈಲ್ ಪಯ್ಣಾರ್ರ್ಯಾಂಕ್ ಝರ್ಮಾಟ್ ಥಾವ್ನ್ 3000 ಮೀಟರ್ ಉಂಚಾಯೆಕ್ ಪಾವಯ್ತಾ. ಉಂಚಾಯೆರ್ ಥಾವ್ನ್ ತ್ಯಾ ಗಾಂವ್ಚಿ, ಮ್ಯಾಟರ್ಹೋರ್ನ್ ಪರ್ವತಾಚಿ ಅನಿಂ ಇತರ್ ಪರ್ವತಾಂಚಿ ಸೊಭಾಯ್ ಪಳೆಂವ್ಕ್ ದೋನ್ ದೊಳೆ ಪಾವಾನಾಂತ್.
ರೈಲಾರ್ ಪಯ್ಣ್ ಕರ್ನ್ ಅಸ್ತಾನಾ ಅಮ್ಚ್ಯಾ ಸಾಂಗಾತಿ ಪಯ್ಣಾರ್ರ್ಯಾನ್ ಸಾಂಗ್ಲೆಂ ತೊ ದುಸ್ರ್ಯಾ ದಿಸಾ ಮ್ಯಾಟರ್ ಹೋರ್ನ್ ಪರ್ವತ್ ಚಡ್ತಾ ಮ್ಹುಣ್. ಅಮ್ಕಾಂ ಭೊವ್ ಅಜ್ಯಾಪ್ ಜಾಲೆಂ ಸಾಂಗಾತಾ ತಾಚಿ ವಳಕ್ ಜಾಲ್ಲಿ ಖುಶಿಯ್ ಜಾಲಿ. ಥೊಡ್ಯಾ ದಿಸಾಂ ಉಪ್ರಾಂತ್ ತಾಚ್ಯಾ ಫೇಸ್ಬ್ಕುಕಾಚೆರ್ ತಾಚೊ ಪರ್ವತ್ ಚಡ್ ಲ್ಲೊ ಅನುಭವ್ ಪಳೆವ್ನ್ ಅನಿಂ ವಾಚುನ್ ಅಂಗಾಚಿ ಲೋಂವ್ ನೀಟ್ ಜಾಲಿ. ಹಿಂವಾಳ್ಯಾ ದಿಸಾನಿಂ ಹೊ ಜಾಗೊ ಸ್ಕೀಯಿಂಗಾಕ್ ಪ್ರಸಿದ್ದ್ ಜಾಲಾ. ಪರ್ವತಾಚೆರ್ ಐಸ್ ಪಾಂಗುರ್ತಾನಾ ಐಸಾಂತ್ ಖೆಳೊಂಕ್ ಸಭಾರ್ ಲೋಕ್ ಹಾಂಗಾಸರ್ ಯೆತಾ. ತವಳ್ ಹಾಂಗಾಸರ್ ಐಸಾಚೆ ವಿವಿದ್ ಚಟುವಟಿಕ್ಯೊ ಚಲ್ತಾತ್. ಗಿಮಾಳ್ ದಿಸಾನಿಂ ಐಸ್ ಚಡ್ ಪಳೆಂವ್ಕ್ ಮೆಳ್ನಾ ದೆಕುನ್ ಹೈಕಿಂಗ್ ಚಡ್ ಲೋಕಾ ಮೋಗಾಳ್ ಅಸ್ತಾ.
ಬರ್ನ್
ಬರ್ನ್ ಸ್ವಿಟ್ಜರ್ಲ್ಯಾಂಡಾಚಿ ರಾಜದಾನಿ ಜಾವ್ನಾಸಾ. ಹೊ ಜಾಗೊ ಸ್ವಿಟ್ಜಾರ್ಲ್ಯಾಂಡಾಚ್ಯಾ ಇತರ್ ಜಾಗ್ಯಾಂ ಪಯ್ಕಿಂ ವಿಭಿನ್ನ್ ಜಾವ್ನಾಸಾ. ಹೆಂ ಯುರೋಪಾಚೆಂ ಐತಿಹಾಸಿಕ್ ಶಹರ್ ಜಾವ್ನಾಸಾ. ಹಾಂಗಾಸರ್ ಐತಿಹಾಸಿಕ್ ಕಟ್ವಣಾಂ ಅನಿಂ ಪಾರ್ಲಿಮೆಂಟ್ ಬಿಲ್ಡಿಂಗಾ ಪಳೆಂವ್ಕ್ ಮೆಳ್ತಾತ್. ಹೆಂ ಶಹರ್ ಆರೆ ನ್ಹಂಯ್ ಚ್ಯಾ ತಡಿರ್ ಅಸಾ. ಹ್ಯಾ ಶಹರಾಚೆಂ ಡ್ರೊನ್ ಶೂಟ್ ತುಮ್ಕಾಂ ಸಕಯ್ಲ್ ಚಿಡ್ಕಾಯಿಲ್ಲ್ಯಾ ವಿಡಿಯೋಂತ್ ಪಳೆಂವ್ಕ್ ಮೆಳ್ತಾ.
ಹಾಂಗಾಸರ್ ಶೆಂಬೊರಾಚ್ಯಾಕೀ ಚಡ್ ಪಬ್ಲಿಕ್ ಫವಾರೆ ಅಸಾತ್. ರೋಸೆನ್ ಗಾರ್ಡನ್ ಮ್ಹುಳ್ಳ್ಯಾ ಸುವಾತೆರ್ ಬಸ್ಲ್ಯಾರ್ ಸಗ್ಳೆಂ ಶಹರ್ ದಿಸ್ಟಿಕ್ ಪಡ್ತಾ. ಪ್ರಸಿದ್ದ್ ವಿಜ್ನಾನಿ ಐನ್ ಸ್ಟಾಯ್ನ್ ವೈಜ್ನಾನಿಕ್ ಸಂಶೋದನಾ ವೆಳಾರ್ ಹಾಂಗಸರ್ ವಸ್ತಿ ಕರ್ತಾಲೊ. ಅತಾಂ ತಾಚ್ಯಾ ಅಪಾರ್ಟ್ ಮೆಂಟಾಕ್ ಐನ್ ಸ್ಟಾಯ್ನ್ ಹೌಸ್ ಮ್ಹುಣ್ ನಾಂವ್ ದಿಲಾಂ. ಶಹರಾಚ್ಯಾ ಮದೆಗಾತ್ ಐನ್ ಸ್ಟಾಯ್ನ್ ಘರ್ ದಿಸ್ಟಿಕ್ ಪಡ್ತಾ. ಹ್ಯಾ ಶಹರಾಂತ್ ಸಬಾರ್ ಮ್ಯುಸಿಯಮಾಯ್ ದಿಸ್ಟಿಕ್ ಪಡ್ತಾತ್.
ಜಿನೇವಾ ಆನಿ ಜೆಟ್ ಡಿವ್ ( Jet d’Eau)
ಜಿನೇವಾ ತಳ್ಯಾಚ್ಯಾ ತಡಿರ್ ಸೊಬ್ಚೆಂ ಸ್ವಿಟ್ಜರ್ಲ್ಯಾಂಡಾಂತ್ಲೆಂ ಅನ್ಯೇಕ್ ಸೊಬಿತ್ ಶಹರ್ ಜಿನೇವಾ. ಹೆಂ ಶಹರ್ ಊಂಚ್ ಫವಾರೊ, ಮೊಲಾದಿಕ್ ರೊಲೆಕ್ಸ್ ವಾಚಾಂ ಅನಿಂ ಅಂತರಾಶ್ಟ್ರೀಯ್ ನಾಂವಾಡ್ದಿಕ್ ಕಂಪೆನಿಂಕ್ ಪಸಿದ್ದ್ ಜಾವ್ನಾಸಾ.
ಜಿನೇವಾ ತಳ್ಯಾಂತ್ ಬೋಟಿರ್ ಬೊಂವಾಡೊ ಕಾಡ್ನ್ ಉದ್ಕಾ ಮದೆಗಾತ್ ಥಾವ್ನ್ ಹ್ಯಾ ಶಹರಾಚಿ ಸೊಭಾಯ್ ಚಾಕ್ಲಿ.
ಜೆಟ್ ಡಿವ್ ಜಿನೇವಾ ತಳ್ಯಾ ಮದೆಂ ಸೊಬ್ಚೊ ಪ್ರಚಂಡ್ ಉದ್ಕಾ ಫವಾರೊ. ಸುಮಾರ್ 140 ಮೀಟರ್ ಉಬಾರಾಯೆಕ್ ಅಸಾ. 1886 ಂತ್ ವಿವಿದ್ ಕಂಪೆನಿಂಕ್ ವೀಜ್ ಸಕತ್ ವಿತರಣಾಕ್ ಮ್ಹುಣ್ ರಚ್ ಲ್ಲೊ ಹೊ ಫವಾರೊ ಉಪ್ರಾಂತ್ ಭೊವ್ ಲೊಕಾ ಮೊಗಾಳ್ ಜಾವ್ನ್ ಅತಾಂ ಸ್ವಿಟ್ಜರ್ಲ್ಯಾಂಡಾಚೆಂ ಪ್ರಮುಖ್ ಆಕರ್ಶಣ್ ಜಾಂವ್ಕ್ ಪಾವ್ಲಾ. ಹೊ ಫವಾರೊ ಎಕಾ ಸೆಕುಂಡಾಕ್ ಪಾಂಯ್ಶಿ ಲೀಟರ್ ಉದಾಕ್ ದೊನ್ಶಿಂ ಕಿಲೋ ಮೀಟರ್/ಘಂಟ್ಯಾಚ್ಯಾ ವೇಗಾರ್ ಉಸ್ಳಾಯ್ತಾ. ರಾತಿಕ್ ರಂಗ್ ರಂಗಾಚ್ಯಾ ವೀಜ್ ದಿವ್ಯಾನಿಂ ಹಾಚಿ ಸೊಭಾಯ್ ಅನಿಕೀ ಚಡ್ತಾ. ಅಂತರಾಶ್ಟ್ರೀಯ್ ಫೆಸ್ತಾಂ ಯಾ ಇತರ್ ಕಾರಣಾಂಕ್ ಲಾಗೊನ್ ಹಾಚೊ ರಂಗ್ ಬದಲ್ತೇ ಅಸ್ತಾ.
ಝ್ಯರಿಖ್
ಸಿಟ್ಜರ್ಲ್ಯಾಂಡಾಂತ್ಲೆಂ ವ್ಹಡ್ಲೆಂ ಶಹರ್ ಝ್ಯರಿಖ್. ಹೆಂ ಸ್ವಿಟ್ಜರ್ಲ್ಯಾಂಡಾಚೆಂ ಆರ್ಥಿಕ್ ಅನಿಂ ವ್ಯವಹಾರ್ ಕೇಂದ್ರ್ ಜಾವ್ನಾಸಾ. ಸ್ವಿಟ್ಜರ್ಲ್ಯಾಂಡಾಚ್ಯಾ ಇತರ್ ಶಹರಾಂಕ್ ಪಾವೊಂಕ್ ಅತ್ಯುತ್ತಮ್ ರೈಲ್ ಕನೆಕ್ಶನ್ ಹಾಂಗಾಸರ್ ಅಸಾ. ದೆಕುನ್ ಚಡಾವತ್ ಲೋಕ್ ಹಾಂಗಾಸರ್ ರಾವೊನ್ ರೈಲಾ ಮುಕಾಂತ್ರ್ ಸಗ್ಳೆಂ ಸ್ವಿಟ್ಜರ್ಲ್ಯಾಂಡ್ ಬೊಂವ್ತಾತ್. ಅಮಿಂ ಬಸ್ಸಾರ್ ಬಸೊನ್ ಝ್ಯರಿಖಾಚ್ಯಾ ಆಕರ್ಶಣಾಂಚಿ ಭೆಟ್ ಕೆಲಿ. ಅಮ್ಚ್ಯಾ ಟೂರ್ ಗೈಡಾನ್ ಅಮ್ಕಾಂ ಮಸ್ತ್ ಶಿಕವ್ಣ್ ದಿಲಿ. ಉಪ್ರಾಂತ್ ಝ್ಯರಿಖ್ ತಳ್ಯಾಂತ್ ಕ್ರೂಜಾಚೆರ್ ಚಡೊನ್ ತಡಿರ್ ಸೊಬ್ಚ್ಯಾ ಝ್ಯರಿಖ್ ಶಹರಾಚಿ ಸೊಬಾಯ್ ಚಾಕ್ಲಿ. ಅಮ್ಚ್ಯಾ ಕಡೆ ಸ್ವಿಸ್ ಪಾಸ್ ಅಸ್ಲ್ಯಾನ್ ಬಸ್ಸ್, ರೈಲ್, ಬೋಟ್, ಕ್ರೂಜ್ ಸಗ್ಳೆಂ ದರ್ಮಾರ್ಥ್ ಜಾಲೆಂ. ಅಮಿಂ ಸ್ವಿಸ್ ಪಾಸಾಚೊ ಬರ್ಪೂರ್ ಫಾಯ್ದೊ ಜೊಡ್ಲೊ. ಅಖ್ರೇಖ್ ಅಮಿಂ ಲಿಂಟ್ ಚೊಕ್ಲೆಟ್ ಫ್ಯಾಕ್ಟರಿಕ್ ರಿಗ್ಲ್ಯಾಂವ್.
ಲಿಂಟ್ ಅಮ್ಚೆಂ ಮೊಗಾಚೆಂ ಚೊಕ್ಲೆಟ್. ಥಂಯ್ ಜಾಲ್ಲೊ ಅನುಭವ್ ವರ್ಣುಂಕ್ ಅಸಾದ್ಯ್. ಬಿತರ್ ರಿಗ್ತಾನಾಂಚ್ ದಿಸ್ಚೊ ಊಂಚ್ ಚೊಕ್ಲೆಟ್ ಫವಾರೊ ಮನ್ ಪಿಸ್ವಾಯ್ತಾ. ಕೊಕೊ ಬಿಯೆ ಥಾವ್ನ್ ಚೊಕ್ಲೆಟ್ ತಯಾರ್ ಜಾಂವ್ಚ್ಯಾ ಪರ್ಯಾಂತ್ಲೆಂ ಪಯ್ಣ್ ಖಂಡಿತ್ ವಿಸ್ರೊಂಕ್ ಜಾಯ್ನಾ ತಸಲೆಂ. ತುಮ್ಕಾಂಯ್ ಮ್ಹಜ್ಯಾ ವಿಡಿಯೋಂತ್ ಹೆಂ ಪಳೆಂವ್ಕ್ ಮೆಳ್ತಾಲೆಂ. ಚೊಕ್ಲೆಟ್ ಟೂರಾಚ್ಯಾ ಅಖೇರಿಕ್ ದರ್ಮಾಚಿಂ ಚೊಕ್ಲೆಟಾಂ ಪೊಟಾಕೀ ಖುಶ್ ಕರುಂಕ್ ಪಾವ್ಲಿಂ. 500 ಮೀಟರಾರ್ ವಿಸ್ತಾರ್ ಲ್ಲೆಂ ಸಂಸಾರಾಂತ್ಲೆಂ ಅತೀ ಉನ್ನತ್ ಲಿಂಟ್ ಚೊಕ್ಲೆಟ್ ದುಕಾನ್ ಪಳೆಂವ್ಕ್ ಮೆಳ್ಳೆಂ. ಹಾಂಗಾಸರ್ ನಮುನ್ಯಾ ನಮುನ್ಯಾಚಿಂ ಲಿಂಟ್ ಚೊಕ್ಲೆಟಾಂ ಪಳೆವ್ನ್ ದೊಳೆಯ್ ಥಂಡ್ ಜಾಲೆ. ಥೊಡಿಂ ದರ್ಮಾಚಿಂ ಅನಿಂ ಥೊಡಿಂ ಮೊಲಾಚಿಂ ಚೊಕ್ಲೆಟಾಂ ಘೆವ್ನ್ ಥಂಯ್ ಥಾವ್ನ್ ಭಾಯ್ರ್ ಅಯ್ಲ್ಯಾಂವ್.
ರೈನ್ ಫಾಲ್ಸ್
ರೈನ್ ಫಾಲ್ಸ್ ಸ್ವಿಟ್ಜರ್ಲ್ಯಾಂಡಾಚೆಂ ನೈಸರ್ಗಿಕ್ ಆಕರ್ಶಣ್. ಗಿಮಾಳ್ಯಾ ದಿಸಾನಿಂ ಸೆಕುಂಡಾಕ್ 600,000 ಲೀಟರ್ ಉದಾಕ್ ಭೊವ್ ವೇಗಾನ್ ವಾಳ್ತಾ. ಹಾಚಿ ಉಂಚಾಯ್ 23 ಮೀಟರ್ ಅನಿಂ ರುಂದಾಯ್ 150 ಮೀಟರ್. ಭೊವ್ ಲಾಗಿಂ ಥಾವ್ನ್ ಅಮಿಂ ಹಾಚೊ ಅನ್ಬೋಗ್ ಜೊಡ್ಲೊ.
ಸಂತೊಸ್ ಭೊಗ್ತಾನಾ ದೀಸ್ ಪಾಶಾರ್ ಜಾಲ್ಲೆ ಕಳಾನಾಂತ್ ಮ್ಹುಳ್ಳ್ಯಾ ಬರಿಂ ಕಸೊ ಏಕ್ ಹಪ್ತೊ ದಾಂವ್ಲೊ ಕಳ್ಳೊಚ್ ನಾಂ. ಸ್ವಿಟ್ಜರ್ಲ್ಯಾಂಡಾಚಿ ಸೊಭಾಯ್ ಅಮ್ಚ್ಯಾ ಕಾಳ್ಜಾಂತ್ ಅನಿಂ ಕ್ಯಾಮರಾಂತ್ ಕೈದ್ ಕರ್ನ್ ಉಬ್ಲ್ಯಾಂವ್ ಪಾಟಿಂ ಅಮ್ಚ್ಯಾ ಘೊಂಟೆರಾಕ್.
