‘ಗೌರವ ಪಿ.ಎಚ್. ಡಿ ಪ್ರಶಸ್ತಿ ಪ್ರದಾನ : ಒಂದು ನವ ಉದ್ಯಮ’ ಮ್ಹಳ್ಳ್ಯಾ ಲೇಖನಾಂತ್ ಡಾ| ಬಿ. ಭಾಸ್ಕರ್ ರಾವ್ (ವಾರ್ತಾ ಭಾರತಿ 4 ಸಪ್ಟೆಂಬರ್ 2019) ಬರಯ್ತಾ “ನಲವತ್ತೈದು ವರ್ಷ ವಯಸ್ಸು ದಾಟಿದವರು ಪದವಿಗಾಗಿ ಅರ್ಜಿ ಸಲ್ಲಿಸಲು ಅರ್ಹರು ಮತ್ತು ಅದಕ್ಕೆ ರೂ. 25 ಸಾವಿರ ತೆರಬೇಕಾಗುತ್ತದೆ. ರೂ. 5 ಸಾವಿರ ನೋಂದಣಿ ಶುಲ್ಕ, ರೂ. 10 ಸಾವಿರ ಗೌರವ ಡಾಕ್ಟರೇಟ್ ಪ್ರಮಾಣ ಪತ್ರದ ಬಾಬ್ತು, ರೂ. 5 ಸಾವಿರ ಘಟಿಕೋತ್ಸವದಲ್ಲಿ ಗೌನ್ ಬಾಬ್ತು ಮತ್ತು ಅಭ್ಯರ್ಥಿಗಳ ಸಾಧನೆಗಳನ್ನು ಅಧಿಕೃತ ವೆಬ್‌ಸೈಟ್‌ನಲ್ಲಿ ಅಪ್ಲೋಡ್ ಮಾಡಲು ರೂಪಾಯಿ ಐದು ಸಾವಿರ. ಅಧಿಕೃತ ಮೂಲಗಳ ಪ್ರಕಾರ ಗೌರವ ಪಿ.ಎಚ್.ಡಿ ಒಂದರ ಬೆಲೆ 35 ಸಾವಿರದಿಂದ 1.5 ಲಕ್ಷ ರೂಪಾಯಿವರೆಗೆ ಇದೆ”
ಹ್ಯಾಚ್ ಲೇಖನಾಂತ್ ಮುಕಾರುನ್ ಡಾ| ರಾವ್ ಮ್ಹಣ್ತಾ : “ಏಜೆಂಟರು ಸಿರಿವಂತ ಕುಳಗಳನ್ನು ಸಂಪರ್ಕಿಸಿ ಅವರು ಸಲ್ಲಿಸಿರುವ ಸಮಾಜ ಸೇವೆಗಾಗಿ ಅವರಿಗೆ ಗೌರವ ಡಾಕ್ಟರೇಟ್ ಪದವಿ ಕೊಡಿಸಿವುದಾಗಿ ಹೇಳುತ್ತಾರೆ. ಡಾಕ್ಟರ್ ಎಂಬ ಶಬ್ದಕ್ಕೆ ಇರುವ ಪ್ರತಿಷ್ಠೆ ಮತ್ತು ಫ್ಲೆಕ್ಸ್ ಬೋರ್ಡುಗಳಲ್ಲಿ ಹಾಗೂ ಅಹ್ವಾನ ಪತ್ರಿಕೆಗಳಲ್ಲಿ ತಮ್ಮ ಹೆಸರಿನ ಮುಂದೆ ಬಳಸಬಹುದಾದ ‘ಡಾ’ ಎಂಬ ಹೆಮ್ಮೆಯ ಪದಕ್ಕಾಗಿ ಹಲವು ಸಿರಿವಂತರು ಏಜೆಂಟರು ಕೇಳುವಷ್ಟು ಹಣ ತೆತ್ತು ಗೌರವ ಪದವಿಗಳನ್ನು ಪಡೆಯುತ್ತಾರೆ.” ಸಂಪೂರ್ಣ್ ಲೇಖನ್ ವಾಚುಂಕ್ ಜಾಯ್ ತರ್ ಗಾಂಚ್ ಹಾಂಗಾಸರ್ ಆಸಾ : ‘ಗೌರವ ಪಿ.ಎಚ್. ಡಿ ಪ್ರಶಸ್ತಿ ಪ್ರದಾನ : ಒಂದು ನವ ಉದ್ಯಮ’
ಆಜ್, ಹಿ ಗಜಾಲ್ ಫಕತ್ ಗೌರವ್ ಡಾಕ್ಟರೇಟಾಕ್ ಸೀಮಿತ್ ಉರೊಂಕ್ ನಾ. ಬಿರುದಾಂ, ಪ್ರಮಾಣ್ ಪತ್ರಾಂ ಪರ್ಯಾಂತ್ ತಿ ಪಾವ್ಲ್ಯಾ. ವರ್ತ್ಯಾ ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ ಸ್ವಭಾವಾನ್ ಶಾಂತ್ ಆನಿ ಬೊಳೊ ಮಂಗ್ಳುರಿ ಕಥೊಲಿಕ್ ಸಮಾಜ್ ಸಯ್ತ್ ಅಸಲ್ಯಾ ಗಜಾಲಿಂ ಪಾಟ್ಲ್ಯಾನ್ ಧಾಂವ್ಚೆಂ ದಿಸೊನ್ ಯೆತಾ.
ಕೊಣೆ ದುಡ್ವಾದಾರಾನ್ ತಾಚ್ಯಾ ಪಯ್ಶ್ಯಾನ್ ಗೌ. ಡಾ. ಪದ್ವಿ ಘೆತ್ಲಿ, ಸ್ವತಾಚ್ಯಾ ಖರ್ಚಾರ್ ಫ್ಲೆಕ್ಸ್ ಉಭೆಂ ಕೆಲೆಂ, ಬಿರುದ್, ಪ್ರಮಾಣ್ ಪತ್ರ್, ಸನ್ಮಾನ್ ಘೆತ್ಲೊ, ದಾಕ್ಲೊ ರಚ್ಲೊ ತರ್ ಕಾಂಯ್ ನಶ್ಟ್ ನಾ. ಪೂಣ್ . . . ಕಥೊಲಿಕ್ ಸಮಾಜೆಂತ್ ಹೆಂಚ್ ಏಕ್ ವ್ಹಡ್ ಅನುಕರಣೀಯ್ ಸಾಧನ್ ಆನಿ ಸರ್ವಾಂಕ್ ಪ್ರೇರಣ್ ಮ್ಹಣ್ ಪಿಂತ್ರಾವ್ನ್, ಪ್ರದರ್ಶನ್ (Show off) ಕೆಲೆಂ ತರ್, ಕಥೊಲಿಕ್ ಸಮಾಜಾಕ್ ಮುಕ್ಲ್ಯಾ ದಿಸಾಂನಿ ಹೊ ಏಕ್ ವ್ಹಡ್ ಸಮಾಜಿಕ್ ಸಮಸ್ಸೊ ಜಾಂವ್ಚಿ ಸಾದ್ಯತಾ ಆಸಾ. ಮಾತ್ ನಯ್, ಅಸಲ್ಯಾ ಪ್ರದರ್ಶನಾಚೆಂ ಮೋಲ್ ಕಥೊಲಿಕ್ ಸಮಾಜೆನ್ ಫಾರಿಕ್ ಕರಿಜೆ ಪಡೊಂಕ್ ಆಸಾ.
ಹಾಂವೆ ಎದೊಳ್ಚ್ಯಾಕ್ ಪಾರ್ಕಿಲ್ಲೆಪರಿಂ, ಆಮ್ಚ್ಯಾ ಭೊಂವಾರಾಂತ್ಲೊ ಹೆರ್ ಸಮಾಜಾಚೊ ಲೋಕ್, ತಾಂಚ್ಯಾ ಸಮಾಜಾಂತ್ಲ್ಯಾ ಕೊಣಾಯ್ಕೀ ಪದ್ಮ ಪ್ರಶಸ್ತೀಚ್ ಆಯ್ಲಿ ಜಾಲ್ಯಾರೀಯ್ ಪ್ರದರ್ಶನ್ (Show off) ಕರುಂಕ್ ವಚಾನಾ. ಥೊಡ್ಯಾಚ್ ತೆಂಪಾ ಆದಿಂ ಕರಾವಳೆಕ್ ಪದ್ಮ ಪ್ರಶಸ್ತ್ಯೊ ಆಯ್ಲ್ಯೊ. ತಾಂಚ್ಯಾ ಸಮಾಜ್ ಬಾಂದವಾಂನಿ ಪ್ರಚಾರ್ – ಪ್ರದರ್ಶನಾಂ ಕೆಲ್ಲಿಂ ಮ್ಹಜ್ಯಾ ಗುಮಾನಾಕ್ ಯೇಂವ್ಕ್ ನಾ. ತಾಂಚ್ಯಾ ಸಮಡ್ತೆಚೆ ವ್ಹಡಿಲ್‌‌‌ಯೀ ಸುತಾರಾಂ ಅಸಲ್ಯಾ ಗಜಾಲಿಕ್ ಸೊಪ್ ಘಾಲಿನಾಂತ್. ಪೂಣ್ ಕಥೊಲಿಕ್ ಸಮಡ್ತೆಚೆ ವ್ಹಡಿಲ್?
ಬೋವ್ ವಿಪರ್ಯಾಸಾಚಿ ಗಜಾಲ್ ಮ್ಹಳ್ಯಾರ್ ಕಾರ್ಯಾಂನಿ ಸೊರೊ ವಾಂಟ್ಚೆವಿಶಿಂ ಉಲಯ್ತೆಲ್ಯಾ ದಿಯೆಸೆಜಿಚ್ಯಾ ಪಾದ್ರಿವರ್ಗಾಕ್ ಆನಿ ವ್ಹಡಿಲಾಂಕ್, ಕಥೊಲಿಕ್ ಸಮಾಜೆಚ್ಯಾ ಅಸ್ತಿತ್ವಾಚೆರ್‌ಚ್ ಕುರಾಡ್ ಮಾರ್ಚ್ಯಾ show off ಮ್ಹಣ್ಚ್ಯಾ ಮಾರೆಕಾರ್ ಅಮಾಲಾ ವಿಶ್ಯಾಂತ್ ಉಲಂವ್ಚಿ ತಾಂಕ್ ಜಾಂವ್ ಸಮ್ಜಣಿ ನಾ. ಖೊಲಾಯೇನ್ ಪಳಯ್ಲ್ಯಾರ್ ಕಾರ್ಯಾಂನಿ ಸೊರೊ ವಾಂಟ್ಚೇಂಯ್ ವ್ಹಡ್ವಿಕಾಯೆಚೆಂ ಪ್ರದರ್ಶನ್. ತಾಣೆ ಬ್ಲ್ಯಾಕ್ ಲೇಬಲ್ ದಿಲಾ, ಹಾಂವ್ ಬ್ಲೂ ಲೇಬಲ್ ದಿತಾಂ. ವೈರಲ್ ವಿಡಿಯೊಂನಿ ಸೊರೊ ವಾಂಟ್ಚೆಂ ‘ಪ್ರದರ್ಶನ್’ ವಿರೋದ್ ಕರ್ಚೆ ಪುರ್ವಿತ್ ಆನಿ ಸೆಲೆಬ್ರಿಟಿ, show off ಅಮಾಲಾಚೆರ್ ಉಲಯ್ನಾಂತ್. ಬದ್ಲಾಕ್ ಕಾನಾ ಶಹರಾಚ್ಯಾ ಲಗ್ನಾ ಮಾಟ್ವಾಂತ್ ವಾಯ್ನ್ ಉಣೊ ಪಡ್ಲಲೆ ತವಳ್ ಜೆಜುನ್ ಉದಕ್ ಆಸ್‌ಲ್ಲೆಂ ವಾಯ್ನ್ ಕರ್ನ್ ಕಾರ್ಯಾಚಿ ಮರ್ಯಾದ್ ರಾಕ್‌ಲ್ಲೆಪರಿಂ (ತಶೆಂ ಪುರ್ವಿತ್ ಮ್ಹಣ್ತಾತ್), ಕಾರ್ಯಾಕ್ ಲೋಕ್ ಉಣೊ ಪಡೊಂಕ್ ನಜೊ ಮ್ಹಣೊನ್ ಫಿರ್ಗಜ್, ಸಂಸ್ಥೆ, ಕೊವೆಂತಾಂ ಥಾವ್ನ್ ಲೋಕ್ ಧಾಡ್ಚ್ಯಾ ಕಾಮಾಕ್ ಕುಮಕ್ ಕರ್ತಾತ್.
ತರ್ – ಆಮ್ಚ್ಯಾ ಮನ್ಶ್ಯಾಂನಿ ದಾಕ್ಲೊ ರಚ್‌ಲ್ಲೆ ತವಳ್ ದಬಾಜೊ ಕರ್ಚೊ ಚುಕಿಚೆಂಗೀ ?
ಖಂಡಿತ್ ನಯ್, ಪೂಣ್ ‘ಕದ್ನೆ’ ಫುಟ್ತಾನಾ ಸಹಜ್ಪಣಿ ಲೋಕ್ ‘ಕಿತ್ಯಾಕ್?’ ಮ್ಹಣ್ ವಿಚಾರ್ತಾ. ಮಾಧ್ಯಮಾಂನಿಂ – ಸಮಾಜಿಕ್ ಮಾದ್ಯಮಾಂನಿ ಗಜಾಲ್ ಗಾಜ್ತಾನಾ ‘ಫ್ಯಾಕ್ಟ್ ಚೆಕ್’ ಕರ್ತಾ. ಆಜ್ ಫಟ್ ಖಬ್ರೊ ಫಾಯ್ಲಾಂವ್ಚಿಂ ಕಾರ್ಖಾಂನಿ ಕಿತ್ಲ್ಯಾ ವೆಗಾನ್ ಕಾಮ್ ಕರ್ತಾತ್‌ಗೀ, ತಾಚೆ ಪ್ರಾಸ್ ದೊಡ್ತ್ಯಾ ವೆಗಾನ್ ‘ಫ್ಯಾಕ್ಟ್ ಚೆಕ್’ ಉಪಕ್ರಮಾಂಯ್ ಕಾಮ್ ಕರ್ತಾತ್. ಡಿಜಿಟಲ್ ಮಾಧ್ಯಮಾಂಕ್ ಪ್ರಾಪ್ತ್ ಜಾಲ್ಲ್ಯಾ ಆಧುನಿಕ್ ಉಪಲಬ್ದ್ಯಾಂನಿ ಹೆಂ ಕಾಮ್ ಆತಾಂ ಪಯ್ಲೆಂಚೆಂ ಪ್ರಾಸ್ ಚಡ್ ಸಲೀಸ್ ಜಾಲಾಂ.
ಅಸಲ್ಯಾ ‘ಪ್ರತಿಕೂಲ್’ ಪರಿಸ್ಥಿತೆಂತ್ ‘ಕದ್ನೆ’ ಮಾರ್ಲ್ಯಾರ್, ತಾಚೊ ಪರಿಣಾಮ್ ಕಥೊಲಿಕ್ ಸಮಾಜಾನ್ ಭೊಗಿಜೆ ಪಡ್ತಾ. ‘ಎಂಚಿನ ಮಾರಾಯಾ ನಿಕ್ಲೆನ ಪೊರ್ಬುನಕ್ಲೆನ’ ಮ್ಹಣ್ಚ್ಯೊ ತುಕ್ಲಾವ್ಣ್ಯೊ, ದಬಾಜ್ಯಾಕ್ ಪಯ್ಸಾಪಯ್ಸ್ ಕಸಲೋಚ್ ಸಂಬಂದ್ ನಾತ್ಲೆಲ್ಯಾ ಸಾಮಾನ್ಯ್ ಮನ್ಶ್ಯಾಕ್ ಸಯ್ತ್ ‘ಕಥೊಲಿಕ್’ ಮ್ಹಳ್ಳ್ಯಾ ಕಾರಣಾಕ್ ಲಾಗೊನ್ ಆಯ್ಕಾಜೇ ಪಡ್ತಾತ್. ಸಮಡ್ತೆಚ್ಯಾ ವ್ಹಡಿಲಾಂನಿ ಆನಿ ಕಥೊಲಿಕ್ ಸಮಾಜಾಚ್ಯಾ ಮುಕೆಲ್ಯಾಂನಿ ಹೆ ವಿಶ್ಯಾಂತ್ ಕೆದ್ನಾಂ ತರೀ ಚಿಂತಪ್ ಆಟಯಿಲ್ಲೆಂ ಆಸಾಗೀ ?
ಡಿಜಿಟಲ್ ಮೀಡಿಯಾ ಆನಿ ತಾಂತ್ರಿಕತಾ ಆಜ್ ಇತ್ಲಿ ವಾಡೊನ್ ರಾವ್ಲ್ಯಾಗೀ – ಖಂಯ್ಚೇಂಯ್ ಬಿರುದ್, ಮಾನ್, ಪ್ರಮಾಣ್ ಪತ್ರ್ ಖಂಯ್ ಥಾವ್ನ್ ಯೆತಾ ಆನಿ ತೆಂ ಕಶೆಂ ಪ್ರಾಪ್ತ್ ಕರ್ಯೆತ್ ಮ್ಹಣ್ ಸೊಧುನ್ ಕಾಡುಂಕ್ ವೇಳ್‌ ಲಾಗಾನಾ. ಸನದ್ – ಸಂಸ್ತ್ಯಾಂಚೆಂ ನಾಂವ್ ಗೂಗಲ್ ಕೆಲ್ಯಾರ್ ಪುರೊ – ಚರಿತ್ರಾಚ್ ಉಗ್ತಿ ಜಾತಾ. ಲೊಕಾಚ್ಯಾ ಹಾತಾಕ್ ಸ್ಮಾರ್ಟ್ ಫೊನಾಂ ಆಯ್ಲ್ಯಾ ಉಪ್ರಾಂತ್ ಲೋಕ್‌ಯೀ ಸ್ಮಾರ್ಟ್ ಜಾಲಾ!
ಹಾಂಗಾಸರ್ ವಯ್ರ್ ಉಲ್ಲೇಕ್ ಕೆಲ್ಲೆಂ – ಡಾ| ಬಿ. ಭಾಸ್ಕರ್ ರಾವ್ ಹಾಣೆ ‘ಗೌರವ ಪಿ.ಎಚ್. ಡಿ ಪ್ರಶಸ್ತಿ ಪ್ರದಾನ : ಒಂದು ನವ ಉದ್ಯಮ’ ಲೇಖನ್ ಬರಯಿಲ್ಲ್ಯಾಚ್ ವರ್ಸಾ ಅಮೆರಿಕಾ ಮುಳಾಚೆಂ ಡಿಜಿಟಲ್ ಮಾದ್ಯಮ್ Huff Post ಹಾಣಿ ವಿಶ್ವ್ ದಾಕ್ಲ್ಯಾ ಬುಕಾಚೆಂ ಪ್ರಮಾಣ್ ಪತ್ರ್ ದಿಂವ್ಚ್ಯಾ ಸಂಸ್ಥ್ಯಾ ವಿಶ್ಯಾಂತ್ ಫ್ಯಾಕ್ಟ್ ಚೆಕ್ ವರ್ದಿ ಫಾಯ್ಸ್ ಕೆಲ್ಲಿ ಗೂಗಲಾರ್ ಆಸಾ. ಗಾಂಚ್ – Needy BJP Boasts Of ‘World Records’ From ‘London’ Firm Based In Indore
Huff Post ವರ್ದಿ ಭಾರತಾಂತ್ ಸತ್ತೆರ್ ಆಸ್ಚಿ ಬಾಜಪಾ ಪಾಡ್ತ್ ಅಂತರಾಷ್ಟ್ರೀಯ್ ಪಾಂವ್ಡ್ಯಾರ್ ಆಪ್ಲೆಂ ಬ್ರಾಂಡ್ ಬಾಂದುನ್ ಹಾಡುಂಕ್ ‘ವಿಶ್ವ ಬೂಕ್ ದಾಕ್ಲೊ’ ಹಾಚೊ ವಾಪರ್ ಕರುನ್ ಆಸಾ ಮ್ಹಣ್ತಾ. ಪ್ರಮಾಣ್ ಪತ್ರ್ ಪ್ರದಾನ್ ಕಾರ್ಯಾಂನಿ ಉಟೊನ್ ದಿಸ್ಚೆಂ ಮಾಲ್ಘಡ್ಯಾ ಬಾಜಪಾ ಮುಕೆಲ್ಯಾಂಚೆಂ ಹಾಜರ್ಪಣ್ ವರ್ದೆಂತ್ ಉಲ್ಲೇಕ್ ಕೆಲ್ಲ್ಯೊ ಗಜಾಲಿ ಪಾತ್ಯೆಂವ್ಕ್ ಕರ್ತಾ. ವಿಪರ್ಯಾಸಾಚಿ ಗಜಾಲ್ ಮ್ಹಳ್ಯಾರ್ ಕಾರ್ಯಾಕ್ ಹಾಜರ್ ಜಾಂವ್ಚ್ಯಾ ವಾ ಕಾರ್ಯೆಂ ಮಾಂಡುನ್ ಹಾಡ್ಚ್ಯಾ, ಭಾಜಪಾಕ್ ನಿಕಟ್ ರಾಜಕೀ ಪ್ರತಿಸ್ಪರ್ಧಿ ಕೊಂಗ್ರೆಸ್ ಪಾಡ್ತಿಚ್ಯಾ ಕಿತ್ಲ್ಯಾ ಮುಕೆಲ್ಯಾಂಕ್ ಹಿ ಖಬರ್ ಆಸಾ? – ಕಳಿತ್ ನಾ. ಎಕಾ ರಾಷ್ಟ್ರೀಯ್ ಪಾಡ್ತಿನ್, ರಾಷ್ಟ್ರ್ ಮಟ್ಟಾರ್ ಆಪ್ಲ್ಯಾ ನಿಕಟ್ ಪ್ರತಿಸ್ಪರ್ಧಿ ಪಾಡ್ತಿಚ್ಯಾ ಎಜೆಂಡಾಕ್ ಪ್ರಚಾರ್ ದಿಂವ್ಚೆಂ ತಸಲೆಂ ಉಪಕ್ರಮ್ ಕರಾವಳೆಂತ್, ಹ್ಯಾ ಆದಿಂ ಮ್ಹಜ್ಯಾ ಗುಮಾನಾಕ್ ಆಯಿಲ್ಲೆಂ ನಾ.
ರಾಜಕೀಯ್ ಆನಿ ಸಮಾಜಿಕ್ ಮಾಳಾರ್, ತಂತ್ರ್‌ಗಾರಿಕಾ ಕಶೆಂ ಕಾಮ್ ಕರ್ತಾ – ಮ್ಹಳ್ಳೆವಿಶ್ಯಾಂತ್ ಕಥೊಲಿಕ್ ಸಮಾಜಾಂತ್ ನೆಣಾರ್ಪಣ್ ಆಸಾ. ಲೆಕಾಪ್ರಾಸ್ ಚಡ್ Show off ಕೆಲ್ಯಾರ್ ತೆಂ ಅಖ್ಖ್ಯಾ ಸಮಾಜಾಕ್ ಕಶೆಂ ಪಾಟಿಂ ಮಾರ್ತಾ ಆನಿ ಸಮಾಜೆಚ್ಯಾ ಸಾಮಾನ್ಯ್ ಮನ್ಶ್ಯಾಕೀ ತಾಚೆಂ ಮೋಲ್ ಕಶೆಂ ಫಾರಿಕ್ ಕರುಂಕ್ ಪಡ್ತಾ ಮ್ಹಳ್ಳೆ ವಿಶ್ಯಾಂತ್ ಕಥೊಲಿಕ್ ಸಮಾಜಾನ್ ಕೆದಾಳಾಯ್ ಚಿಂತಪ್ ಆಟಯಿಲ್ಲೆಂ ನಾ. ಎದೊಳ್ಚ್ಯಾಕ್ ಕೊಂಗ್ರೆಸ್ ಪಾಡ್ತಿಂತ್ ಲೈಟ್ ಖಾಂಬೊ ಉಬೊ ಕೆಲ್ಯಾರೀ ಜಿಕ್ತಾ ಮ್ಹಳ್ಳೆಭಾಶೆನ್ ಚಡಾವತ್ ಕಥೊಲಿಕ್ ಅಭ್ಯರ್ಥಿ ಕೊಂಗ್ರೆಸ್ ಪಾಡ್ತಿಂತ್ ಜಿಕೊನ್ ಆಯಿಲ್ಲೆ ಸೊಡ್ಲ್ಯಾರ್, ಫಾವೊತಿ ಚುನಾವಿ ತಂತ್ರಗಾರಿಕಾ ಕರುನ್ ಜಿಕ್‌ಲ್ಲೆ ದಾಕ್ಲೆ ಉಣೆಂ. ಜರಿ ಫಾವೊತಿ ಚುನಾವಿ ತಂತ್ರಗಾರಿಕಾ ಕರುನ್ ಕ್ರಿಸ್ತಾಂವ್ ಅಭ್ಯರ್ಥಿಂಕ್ ಜಿಕೊಂಕ್ ಸಾಧ್ಯ್ ಆಸ್‌ಲ್ಲೆಂ ವ್ಹಯ್ ತರ್, ಆಜ್ ತೆ ಫಕತ್ ಕೊಂಗ್ರೆಸ್ ಎಕಾ ಪಾಡ್ತಿಚೆ ಮಾತ್ರ್ ಜಾವ್ನ್ ಉರ್ತೆನಾಂತ್. ಆನಿ ಹ್ಯಾಚ್ ಕಾರಣಾಕ್ ಲಾಗೊನ್ ಕರಾವಳೆಂತ್ ಕೊಂಗ್ರೆಸಾ ಭಾಯ್ರ್ ಹೆರ್ ಪಾಡ್ತಿಂನಿ ಕಥೊಲಿಕ್ ಮುಕೆಲ್ಯಾಂಚಿಂ ಗತ್ – ಖೆಳಾಕ್ ಆಸಾತ್ , ಲೆಕಾಕ್ ನಾಂತ್ – ಮ್ಹಳ್ಳೆಪರಿಂ ಆಸಾ.
ಕಥೊಲಿಕ್ ಮುಕೆಲ್ಯಾಂಕ್ ಕಳಿತ್ ಆಸ್ಚಿ ಏಕ್ ಮಾತ್ ಚುನಾವಿ ತಂತ್ರ್‌ಗಾರಿಕಾ ಮ್ಹಳ್ಯಾರ್ ಬಿಸ್ಪಾಂಚೆಂ ಬೆಸಾಂವ್ ಘೆಂವ್ಚೆಂ ಆನಿ ತಾಂಕ್ತಾ ತಿತ್ಲ್ಯಾ ಬಿಸ್ಪಾಂಕ್ ಜಮವ್ನ್ ‘ಸಮಾವೇಶ್’ ಕರ್ಚೆ. ವಿಶ್ವ್ ದಾಕ್ಲ್ಯಾಂ ಬುಕಾಥಾವ್ನ್ ಪ್ರಮಾಣ್ ಪತ್ರ್ ಮೆಳ್ಳಾಂ ಮ್ಹಣ್, ಸುತ್ತೂರಾಂತ್ಲ್ಯಾ ಚಡಾವತ್ ಬಿಸ್ಪಾಂಕ್, ರಾಜ್ಯಾಚಾ ಆರ್ಚ್ ಬಿಸ್ಪಾಕೀ ಆಪವ್ನ್, ಲೊಕಾಕ್ ಸಾಂಗಾತಾ ಘಾಲ್ಚಿ ಅಲೊಚೆನ್‌ಯೀ ಹ್ಯಾಚ್ ವಾಯ್ದೊ ಉತರ್ಲೆಲ್ಯಾ ಚುನಾವಿ ತಂತ್ರ್‌ಗಾರಿಕೆಚೊ ವಾಂಟೊಚ್ ಕಶೆಂ ದಿಸ್ತಾ. ಜಾತ್ – ಕಾತ್ – ಧರ್ಮ್ ಖಂಯ್ಚೇಂಯ್ ಲೆಕಿನಾಸ್ತಾನಾ ಸಂಸಾರ್‌ಭರ್ ದಾನ್ – ಧರ್ಮ್ ಕರ್ನ್, ಲವ್ಕಿಕ್ ಸನ್ಮಾನಾಂಕ್ ಮಿಕ್ವೊನ್ ವಾಡ್‌ಲ್ಲ್ಯಾ ಮಹಾದಾನಿಕ್ ಬೋ‍ವ್‍‍ಶಾ ಅಸಲ್ಯಾ ಎಕಾ ಸನ್ಮಾನಾಚಿ ಗರ್ಜ್‌ಯೀ ಆಸ್ಚಿ ನಾ ಕೊಣ್ಣಾ. ತಾಚ್ಯಾ ನಾಂವಾನ್ ಪ್ರಚಾರ್ ಜೊಡುಂಕ್ ಸೊಧ್ತೆಲ್ಯಾಂನಿ ಕಥೊಲಿಕ್ ಸಮಾಜ್ ರಿಸ್ಕೆರ್ ಘಾಲ್ಚಿ ಸಾರ್ಕೆಂ ದಿಸಾನಾ.
ಕೊಣಾಯ್ಕೀ ಕರ್ಚೊ ಪರ್ಗಟ್ ಮಾನ್ ವಿರೋದ್ ಕರ್ಚೊ ಹ್ಯಾ ಬರ್ಪಾಚೊ ಉದ್ದೇಶ್ ನಯ್. ಬಗಾರ್ ಎಕಾ ದಿಸಾಚ್ಯಾ ದಬಾಜ್ಯಾಚೆಂ ಮೋಲ್ ಸಮಾಜಿಕ್ ಆನಿ ರಾಜಕೀ ಮಾಳಾರ್, ಪ್ರತೇಕ್ ಜಾವ್ನ್ ಯೇಂವ್ಕ್ ಆಸ್ಚ್ಯಾ ಎಲಿಸಾಂವಾಚ್ಯಾ ಪಾಟಿಥಳಾರ್, ಕಥೊಲಿಕ್ ಸಮಾಜಾನ್ ಫಾರಿಕ್ ಕರ್ಚೆಂಪರಿಂ ಜಾಂವ್ಕ್ ನಜೊ ಮ್ಹಳ್ಳೊ ಪ್ರಾಮಾಣಿಕ್ ಹುಸ್ಕೊ ಮಾತ್ ಪ್ರಾಮಾಣಿಕ್ ಇರಾದೊ. ಕಥೊಲಿಕ್ ಸಮಾಜಾಂತ್ಲ್ಯಾ ಮಾಲ್ಘಡ್ಯಾ ಆನಿ ಅನ್ಭೊಗಿ ಮುಕೆಲ್ಯಾಂನಿ, ತಶೆಂಚ್ ಸಮಡ್ತಿಚ್ಯಾ ವ್ಹಡಿಲಾಂನಿ ಹೆ ವಿಶ್ಯಾಂತ್ ಗಂಬೀರ್ ಚಿಂತಪ್ ಆಟಯ್ಲ್ಯಾರ್ ಬರೆಂ ಮ್ಹಣ್ ಮ್ಹಜಿ ಖಾಲ್ತಿ ಅಭಿಪ್ರಾಯ್. ಕಾರಣ್ – ಸೊರ‍್ಯಾಪ್ರಾಸ್ ಚಡ್ ಮಾರೆಕಾರ್ ಸಮಡ್ತಿಕ್ ಧೊಸ್ಚೆಂ ಅಮಾಲ್ ಆಸಾ ಜಾಲ್ಯಾರ್ ತೇಂ – Show off ! ಖೊಲಾಯೇನ್ ಪಳಯ್ಲ್ಯಾರ್ ಸೊರೊಯ್ ಹ್ಯಾಚ್ ಅಮಾಲಾಚೊ ಏಕ್ ವಾಂಟೊಚ್!
► ಎಚ್ಚೆಮ್
3 comments
Sobar disam uprant HM tujem khodakhod lekhon vachunk mellem Ani mhaka vhod kuxi zali. Osolim chintun vorounk korchin lekhona on line aslear Pavana. Tem lekhon sorvank vachunk mellazai. Print mediant ailelem tor anikui borem zatem. Amchea konkani lokank hea torachim lekhona pavonk zai. Amchea samajechea zannvai aslelea zannareanim vachunk zai. Porbhim tuka amkam zagoilleak.
ಪಯ್ಶ್ಯಾಂವಾಲೆ ಅಸಲ್ಯಾ ಪ್ರದರ್ಶನಾಂತ್ thrill ಜೊಡ್ತಾತ್ ತರ್, ಮಧ್ಯಮ್ ವರ್ಗಾಚೆ ರೆಸ್ಪೆರಾಕ್, ಘರ್ ವೊಕ್ಲಾಕ್, ಮರ್ಣಾಕ್ ಇತ್ಲೆ ಪಾದ್ರಿ (ಮಾದ್ರಿಂಚೆ ಚಡ್ ಉಲ್ಲೇಕ್ ಕರ್ನಾಂತ್) ಆನಿ ಭಿಸ್ಪ್ ಆಯ್ಲೆ ಮ್ಹಣೊನ್ ಕೊಲರ್ ನೀಟ್ ಕರ್ತಾತ್!
ಮ್ಹಜ್ಯಾ ತೊಂಡಾಂತ್ಲಿಂ ಉತ್ರಾಂ ಕಾರ್ಲೊ ಸಾಯ್ಬಾನ್ ಉಚಾರ್ನ್ ಜಾಲಿಂ.