ಸಮಾಜೆಚ್ಯಾ ಖಂಚ್ಯಾಯೀ ಕ್ಶೇತ್ರಾಂತ್…ದೇವ್ ಭಿರಾಂತ್ ಯಾ ಕಾನೂನೆಚೆಂ ಭೆಂ ಮ್ಹಳ್ಳೆಂ ಆಸಾತ್ ತರ್… ತವಳ್ ಸಮಾಜ್ ನಿತಳ್-ನಿಸ್ಕಳ್, ಪ್ರಮಾಣಿಕ್ ನಿತಿಚ್ಯಾ ವರ್ತುಲಾಕ್ ಸ್ಪಂದನ್ ಜಾವ್ನ್ ಆಸ್ತಾ. ಜರ್ ಧಾರ್ಮಿಕ್ ಯಾ ರಾಜಕೀಯ್, ಉದ್ಯಮ್ ವೆವಹಾರ್ ಯಾ ಶಿಕ್ಪಾಕ್ಶೇತ್ರ್ , ಹೆಂ ಸಗ್ಳೆಂ ಸತಾ ನಿತಿಚ್ಯಾ ಪ್ರಮಾಣಿಕ್ ಮೌಲ್ಯಾಂನಿಂ ರೂಪಿತ್ ಜಾವ್ನ್ ಆಸಾತ್ ತರ್… ಸಮಾಜ್ – ಶಾಂತ್ ಸಮಧಾನ್ ನಿತಳ್ ವಾತಾವರಣಾಂತ್ ಮಿಸ್ಳೊನ್ ಆಸ್ತಾ.
ಸಂಸಾರಾಚಾ ಖಂಯ್ಚ್ಯಾ ಕೊನ್ಶಾಂತ್ ತರೀ ಪಳೆಯಾ…ಕಠಿಣ್ ಕಾನೂನ್ ನಾಸ್ತಾಂ…ಕಾನೂನೆಚೆಂ ಭೆಫಿಕೆರ್ ಕರುನ್ ಆಸ್ಚ್ಯಾ ಗಾಂವಾಂನಿ, ಶಾಂತ್ ಸಮಾಧಾನ್ ನಾಸ್ತಾಂ ಸಮಾಜೆಚಿ ಪರಿಗತ್ ಆಸ್ತ್ ವೆಸ್ತ್ ಜಾವ್ನ್ ಆಸ್ತಾ. ಥಂಯ್ಸರ್ ಅನೈತಿಕ್ ತಶೆಂ ಅಸಮಧಾನೆಚೆಂ ವಾತಾವರಣ್ ಆಸೊನ್, ಶಿಸ್ತ್ ನಾತ್ಲೆಲೆಂ, ಅಪ್ರಾಮಾಣಿಕ್ ಕೀಳ್ ಮಟ್ಟಾಚೆಂ ಜೀವನ್ ರಾಜ್ ಕರುನ್ ಆಸ್ತಾ.
ಗಲ್ಫ್ ರಾಶ್ಟ್ರಾಂನಿಂ ಕಾನೂನ್ ಬೋವ್ ಕಠಿಣ್ ತಶೆಂ ಅಮಾನವೀಯ್ ಮ್ಹಣ್ಯೆತ್ ತಸಲೆಂ ಜಾವ್ನ್ ಆಸ್ತಾ. ಥಂಯ್ಸರ್ ಕಾಳಿಜ್ ಥರ್ಥರಾಂವ್ಚಿ ಶಿಕ್ಶೆ ವೆವಸ್ಥಾ ಆಸಾ. ಹೆಂ ವಿಪರೀತ್ ಮ್ಹಣ್ ಭೊಗ್ತಾ ತರೀ, ಥಂಯ್ಸರ್ಚಿ ಸಮಾಜೆಚಿ ಶಿಸ್ತೆ-ವೆವಸ್ತಾ ಬೋವ್ ಉಂಚ್ಲಿ, ತಶೆಂ ಖಂಚ್ಯಾಯೀ ವಿಶಯಾಂನಿಂ ಥಂಯ್ಚೊ ನಾಗರಿಕ್ ಬೋವ್ ಜಾಗ್ರೂತ್ಕಾಯೆನ್ ಆಸ್ತಾ. ಆನಿ ಥಂಯ್ಚಿ ವೆವಸ್ತಾ ಆಪ್ಣಾ ಥಂಯ್ ರೂಪಿತ್ ಕರುನ್ ತ್ಯಾ ಪರ್ಮಾಣೆಂ ಜಿಯೆತಾ.
ತ್ಯಾ ದೆಕುನ್, ಥಂಯ್ಚೊ ನಾಗರಿಕ್… ಅನ್ಯಾಯ್ ಅನೀತೆವಿಶಿಂ, ಭೆಂ-ಭಿರಾಂತ್ ನಾಸ್ತಾಂ, ಶಾಂತ್ ಸಮಧಾನ್, ಶಾಭೀತಾಯೆನ್ ಜಿಯೆವ್ನ್ ಆಸಾ. ತೆಂಚ್ಚ್ ಆಮೇರಿಕಾ…ತಸಲ್ಯಾ ಯುರೋಪಿ ಗಾಂವಾಂನಿ, ಲ್ಹಾನಾ ಥಾವ್ನ್ ವ್ಹಡಾಂಚ್ಯಾ ಹಾತಿಂ ಆಸ್ಚಿ ರಿವಾಲ್ವರ್ ಸಮಾಜೆಚ್ಯಾ ಸಮಧಾನೆಚೆರ್ ಆವಾಜ್ ದಿತಾ ಆನಿ ಸಮಾಜೆಕ್ ಭೆಶ್ಟಾಯ್ತ್ ಆಸ್ತಾ. ಅಶೆಂ ಥಂಯ್ಸರ್ ಅನ್ಯಾಯ್ ಅನೀತ್ ಅತ್ಯಾಚಾರ್ ಅನಿಸ್ಕಳ್ಪಣಾಚಿ ಘಡಿತಾಂ, ಖುನಿಯೊ ಜಾತೇ ಆಸ್ತಾತ್.
ಹ್ಯಾಚ್ಚ್ ಪರಿಂ, ಆಜ್ ಆಮ್ಚಾ ರಾಶ್ಟ್ರಾಚ್ಯಾ ಮಾದ್ಯಮಾಂಕ್ ಆಮಿ ಕಾನ್ ದೊಳೆ ದೀವ್ನ್ ಆಸಾಂವ್ ತರ್…ಅನೀತ್ ಅತ್ಯಾಚಾರ್ ಕೋಮುಗಲಾಟೊ, ಲೂಟ್, ಖುನ್, ವಂಚನ್, ಬ್ಲೂಫಿಲ್ಮ್, ಡ್ರಗ್ಸ್ … ಹಿಂಸರ್ವ್ ಅನಾಹುತಾಂ ಘಡ್ತಾತ್. ತ್ಯಾ ವಿಶಿಂ…ಸದಾಂನೀತ್ ವಿವರ್ ಲಾಬ್ತೇ ಆಸ್ತಾ. ಹೆಂ ಆಮ್ಕಾಂ, ಆಮ್ಚ್ಯಾ ಕುಟ್ಮಾಕ್, ತಶೆಂ ಸಮಡ್ತೆಕ್…ಆಸ್ಚ್ಯಾ ಸ್ವಾತಂತ್ರಾವಿಶಿಂ, ಭದ್ರತೆವಿಶಿಂ, ಸುರಕ್ಶಾನಾತ್ಲೆಲೆಂ ಭೆಂ ಉಟೊವ್ನ್ ಆಸ್ತಾ.
ದೋನ್ ವರ್ಸಾಂ ಆದಿಂ ಹಾಂವ್ ಆಬುದಾಬಿ ಆಸ್ಲೆಲ್ಯಾ ತವಳ್ ಥಂಯ್ಸರ್ ಘಡ್ಲೆಲೆಂ ಏಕ್ ಘಡಿತ್, ಮ್ಹಜ್ಯಾ ಮತಿಂತ್ ಆತಾಂಯ್ ಆಸಾ. ತ್ಯಾಎಕಾ ದಿಸಾ ಥಂಯ್ಸರ್…ಬಾಲ್ಕನಿಂತ್ ಆಸ್ಲೆಲ್ಯಾವೆಳಾ, ಮ್ಹಜಿದೀಶ್ಟ್ ಎಕಾಎಕಿ ಥಂಯ್ಚ್ ಆಸ್ಲೆಲ್ಯಾ ಸುಪರ್- ಮಾರ್ಕೆಟಿ ಥಂಯ್ ಗೆಲಿ. ತವಳ್ ಅಬುದಾಬಿಂತ್ ಅಪ್ರೂಪ್ ಮ್ಹಳ್ಳೆಪರಿಂ ದಿಶ್ಟೆಕ್ ಪಡ್ಚೆಂ ಪೋಲಿಸ್ ಕಾರ್, ಥಂಯ್ಸರ್ ಯೇವ್ನ್ ಉಬೆಂ ಜಾಲೆಂ!
ಗಾಂವಾಂತ್ ತರ್, ಅಸಲ್ಯಾ ಸಂಗ್ತೆಕ್ ಘಡ್ಯೆನ್ ಲೋಕ್ ಜಮೊ ಜಾತಾ. ಪೂಣ್ ಹಾಂಗಾಸರ್ಚೊ ಲೋಕ್, ಕಸಲೆಂ ತರೀ ಅಪ್ರಾಧಾಚೆಂ ಘಡಿತ್ ಘಡ್ಲಾಂ ಮ್ಹಳ್ಳ್ಯಾ ದುಬಾವೆನ್… ಥಂಯ್ಸರ್ ದೊಳೆ ಖಂಚೊನ್ ಆಸ್ತಾ ತರೀ, ಜಮೊ ಜಾಯ್ನಾಂ!
ಆತಾಂ ಸುಪರ್-ಮಾರ್ಕೆಟಿ ಥಂಯ್ ಪಳೆತಾ ಪಳೆತಾಂ…ಥಂಯ್ಚ್ಯಾ ಮೆನೆಜರಾಕ್ ಭೆಟ್ ದಿಲ್ಲೊ ಪೊಲಿಸ್, ತಾಚೆಲಾಗಿಂ ಕಸಲೆಂಗೀ ಗಂಭೀರಾಯೆನ್ ಉಲಯ್ತ್, ಸಟ್ಟ್ ಕರುನ್ ದೆಗೆಕ್ ಗೆಲೊ. ಆನಿಂ ಥಂಯ್ಸರ್ ಅಸ್ಲೆಲ್ಯಾ ಎಕಾ ಸುಮಾರ್ ಚಾಳಿಸ್ ವರ್ಸಾಂ ಪ್ರಾಯೆಚಾ ವೆಕ್ತಿಕ್ ತಾಣೆಂ ಹಾತ್(ಶೇಖ್-ಹ್ಯಾಂಡ್) ದಿಲೊ. ತವಳ್‌ಚ್ಚ್ ಮ್ಹಾಕಾ ಕಳಿತ್ ಜಾಲೆಂಕೀ ತೊಚ್ಚ್ ತೊ ಅಪ್ರಾದಿ ವೆಕ್ತಿ ಮ್ಹಣ್!
ಕಿತ್ಯಾ ಹಾಚೆ ಆದಿಂ ಹಾಂವೆಂ ಆಯ್ಕಾಲ್ಲೆಂ…ಥಂಯ್ಸರ್ ಕಸಲೆಂಯೀ ಅಪ್ರಾಧ್ ಕೆಲ್ಲ್ಯಾಕ್, ಪ್ರಥಮ್ ಜಾವ್ನ್ ಪೊಲಿಸ್ ಆಯಿಲ್ಲ್ಯಾಪರಿಂಚ್ ತಾಕಾ ಹಾತ್ ದಿತಾತ್. ಆನಿ ನಂತರ್ ತಾಕಾ ತೆ ಕಯ್ದ್ ಕರ್ತಾತ್. ತಿ ಥಂಯ್ಚಿ ಪೊಲಿಸ್ ರಿವಾಜ್.
ಆತಾಂ ಹಾಂಗಾಯೀ, ಉಪ್ರಾಂತ್ಲ್ಯಾ ಥೊಡ್ಯಾಚ್ಚ್ ಘಡಿಯಾಂನಿಂ ಪೊಲಿಸಾಂನಿ ತ್ಯಾ ಸದ್ರಿ ಮನ್ಶಾಕ್ ಕೈದ್ ಕರುನ್ ತಾಂಚಾ ಪೊಲಿಸ್ ವಾಹನಾಚೆರ್ ಬಸವ್ನ್ ವ್ಹೆಲೆಂ.
ಘಡ್ಯೆನ್ ಹ್ಯಾವಿಶಿಂ ಕುತೂಹಲಾನ್ ಬುಡ್ಲೊಲೊಂ ಹಾಂವ್, ದುಸ್ರ್ಯಾಚ್ಚ್ ಘಡ್ಯೆ ಫ್ಲೆಟಾ ಭಾಯ್ರ್ ಪಾವ್ಲೊಂ. ಆನಿ ತ್ಯಾ ವಿಶಿಂ ಖಬರ್ ಕಾಡ್ತಾಸ್ತಾಂ… ಸುಪರ್-ಮಾರ್ಕೆಟಿಕ್, ಆವಯ್ ಸಂಗಿಂ ಶೊಪಿಂಗಾಕ್ ಆಯ್ಲೆಲ್ಲ್ಯಾ ತಿಚ್ಯಾ ಸಾತಾಟ್ ವರ್ಸಾಂಚಾ ಚೆಡುಂ ಭುರ್ಗ್ಯಾಚ್ಯಾ ಆಂಗಾರ್…ತ್ಯಾಫಲಾಣ್ಯಾ ಸೇಲ್ಸ್-ಮೇನ್ ವೆಕ್ತಿನ್ ಹಾತ್ ಘಾಲೊ ಮ್ಹಣ್ ಆವಯ್ನ್, ಥಂಯ್ಚ್ಯಾ ಮೆನೆಜರಾಲಾಗಿಂ ಕಂಪ್ಲೇಂಯ್ನ್ ದಿಲ್ಲೆಂ.
ಆನಿ ಥಂಯ್ಚ್ಯಾ ಕಾನೂನೆ ಭಿರಾಂತೆನ್, ಮೆನೆಜರಾನ್ ಘಡ್ಯೆನ್ ಪೊಲಿಸಾಂಕ್ ಖಬರ್ ತಿಳ್ಸಿಲ್ಲಿ. ಹಾಚೊ ಪರಿಣಾಮ್ ಜಾವ್ನ್ ತೊ ಫಲಾಣೊ ವೆಕ್ತಿ ಪೊಲಿಸಾಂಚೊ ಕೈದಿ ಜಾಲ್ಲೊ.
ನಂತರ್ ಪಾಂಚ್ ಸ ಮಹಿನೆ ಪರ್ಯಾಂತ್ ಜೈಲಾಂತ್ ಆಸ್ಲೊಲೊ ತೊ ಭಾಯ್ರ್ ಯೆತಚ್ಚ್, ತಾಚಿ ವೀಜಾ ಕ್ಯಾನ್ಸಲ್ ಕರುನ್, ತಾಕಾ ತಾಚ್ಯಾ ಮಾಯ್ ಗಾಂವಾಕ್ ಪಾಟಿಂ ಧಾಡ್ಲಾ ಮ್ಹಣ್ ಖಬರ್ ಮೆಳ್ಳಿ.
ಅಸಲ್ಲ್ಯಾ ಸರ್ವ್ ಥಂಯ್ಚ್ಯಾ ಘಡಿತಾಂವರ್ವಿಂ ಕಳ್ತಾಗೀ…ಗಲ್ಫಾಂತ್ ಲೋಕ್ ಕಾನೂನೆಚ್ಯಾ ಭಿರಾಂತೆನ್ ಆಸ್ತಾ ದೆಕುನ್ … ಸಮಾಜ್ ಅಪ್ರಾದೆಂಚ್ಯಾ ಅಪಾಯೆವಿನ್ಹಾ ಶಾಂತ್–ಸಮಧಾನೆನ್ ಆನಿ ಸುಶೆಗಾನ್ ಜಿಯೆತಾ.
ಪೂಣ್ ಹಾಂಗಾಸರ್…ಕಾನೂನೆಕ್ ಬೆಫಿಕೆರ್ ಕರುನ್, ವಿಸ್ರೊನ್ ಚಲ್ಚಾ, ರಾಜಕೀಯ್ ಪ್ರಭಾವ್ ತಶೆಂ ದುಡ್ವಾ ಬಳ್ ಆಸ್ಚ್ಯಾ, ಅಪ್ರಾಮಾಣಿಕ್ ಮನ್ಶಾಂವರ್ವಿಂ, ಆಮ್ಚಿ ಸಮಾಜ್ ಅಶಾಂತ್ ಆಕಾಂತೆಚಾ ಸಾವ್ಳೆಂತ್ ಜಿಯೆವ್ನ್ ಆಸಾ.
ಹಾಂಗಾಸರ್ ಚಲೊನ್ ಆಸ್ಚಿಂ ಭೀಭತ್ಸ್ ಅತ್ಯಾಚಾರಾಂ, ಸಮಾಜೆಂತ್ ಗುಪಿತ್ ಥರಾನ್ ವ್ಹಾಳೊನ್ ಆಸ್ಚಿಂ ಡ್ರಗ್ಸ್, ಅನೈತಿಕ್ ಅಶ್ಲೀಲ್ ಘಡಿತಾವಿಶಿಂ, ಮೊಬಾಯ್ಲಾರ್ ವ್ಹಾಳೊನ್ ಆಸ್ಚಿಂ ವಿಡಿಯೊ ದೃಶ್ಯಾಂ…ಹ್ಯಾವಿಶಿಂ ಯುವಜನಾಂಗಾಚಿ ಅತೀವ್ ಅಭಿರುಚ್, ತಾಂಚಿ ಪ್ರಕ್ರಿಯಾ ಹ್ಯಾ ಸರ್ವಾವರ್ವಿಂ ಜಾಂವ್ಚಿಂ ಅನಾಹುತಾಂ, ಹೆಂ ಸಗ್ಳೆಂ ಆಯ್ಕಾತಾನಾಂ…ಮುಕ್ಲ್ಯಾ ಜನಾಂಗಾಚಿ ಪರಿಗತ್ ಚಿಂತುನ್ ಆಮ್ಟ್ಯಾ ಕಾಳ್ಜಾಂತ್ ಧಡ್ಧಡೆ ಉಟ್ತಾತ್!
ಪೊರ್ಚ್ಯಾ ಪೊಯ್ರ್ ಏಕ್ ಸೋಶಿಯಲ್ ವರ್ಕರ್ ತರ್ನಾಟೊ, ಆಪ್ಲ್ಯಾ ಘರಾ ಸರ್ಶಿಂ ಚಲುನ್ ವೆತಾಸ್ತಾಂ, ವಾಟೆರ್ ಎಕಾ ದೆಗೆನ್ ದೊಗಿ ಚಲಿಯೊ, ಮೊಬಾಯ್ಲಾರ್ ಕಸಲ್ಯಾಗಿ ಸಂಗ್ತೆವಿಶಿಂ ಗಂಬೀರ್ ತಶೆಂ ಕುತೂಹಲಾನ್ ಮಿಸ್ಳೊನ್ ಆಸ್ಚೆಂ ತಾಣೆಂ ಪಳೆಲೆಂ.
ತಾಂಚಾ ಮುಖಮಳಾ ವಯ್ಲೊ ಕುತೂಹಲ್ ಪಾರ್ಕಿತಾನಾಂ, ದುಬಾವಾಂತ್ ಬುಡ್ಲೊಲೊ ತೊ, ಘಡ್ಯೆನ್ ತಾಂಚೆಸರ್ಶಿಂ ವಚೊನ್ ತಾಂಚ್ಯಾ ಮೊಬಾಯ್ಲಾರ್ ತಿಳುಂಕ್ ಲಾಗ್ಲೊ. ಖಿಣಾಕ್ ತೊ ಥಟಕ್ಲೊ. ತಾಂತುನ್ ದೊಗಾಂ ಚಲಿಯೊ ಆನಿ ದೋಗ್ ಚಲೆ, ಶೆಹರಾಂತ್ಲ್ಯಾ ಎಕಾ ಪಾರ್ಕಾಂತ್ಲ್ಯಾ ಆಡೋಸಾರ್…ಡ್ರಗ್ಸ್ ಸೆವಾತ್ತ್, ಅಶ್ಲೀಲ್ ಚಟುವಟಿಕೆರ್ ಮಿಸ್ಳೊನ್ ಆಸ್ಚಿಂ ದೃಶ್ಯಾಂ! ಹಿಂ ಕೀಳ್-ಅಶ್ಲೀಲ್ ದೃಶ್ಯಾಂ, ಹ್ಯೊ ಚಲಿಯೊ ಇತ್ಲಿಂ ಕುತೂಹಲಾನ್ ಪಳೆತ್ತ್ ಆಸ್‌ಲ್ಲಿಂಗೀ … ತಾಂಕಾ ಹೊ ತರ್ನಾಟೊ ದೆಗೆನ್ ರಾವೊನ್ ಆಸ್ಚೊಚ್ಚ್ ಕಳಿತ್ ಜಾಲೆಂ ನಾಂ!
ಘಡ್ಯೆನ್ ಚುರುಕ್ ಜಾಲ್ಲೊ ತರ್ನಾಟೊ ದುಸ್ರ್ಯಾಚ್ಚ್ ದಿಸಾ…ಯುವಜನಾಂಗಾಕ್ ಮಾರೆಕಾರ್ ಜಾಲ್ಲ್ಯಾ ಮೊಬಾಯ್ಲಾರ್ ವ್ಹಾಳೊನ್ ಆಸ್ಚ್ಯಾ ತ್ಯಾ ಅಶ್ಲೀಲ್ ದೃಶ್ಯಾವಿಶಿಂ ಕಂಪ್ಲೇಂಯ್ನ್ ದೀಂವ್ಕ್ ಪೊಲಿಸ್ ಸ್ಟೇಶನಾಕ್ ಗೆಲ್ಲ್ಯಾವೆಳಾ, ದೋನ್ ಪೊಲಿಸ್ ಸ್ಟೇಶನಾಂನಿ ತ್ಯಾವಿಶಿಂ ಬೆಫಿಕೆರ್ ಕರುನ್ ತಾಕಾ ಪಾಟಿಂ ಧಾಡ್ಲೊ!.
ಪೂಣ್ ಶೆಹರಾಂತ್‌ಚ್ ಚಲುನ್ ಆಸ್ಚೆಂ ಅಸಲೆಂ ಯುವಜನಾಂಗಾಕ್ ಮಾರೆಕಾರ್ ಗಜಾಲೆವಿಶಿಂ ತೊ, ಉಂಚ್ಲ್ಯಾ ಪೊಲಿಸ್ ಆಧಿಕಾರಿಕ್ ಭೆಟ್ಲೊ. ಆನಿ ಸಮಾಜೆಕ್ ಮಾರೆಕಾರ್ ಜಾವ್ನ್ ಆಸ್ಲೆಲ್ಯಾ ಹ್ಯಾ ಸಂಗ್ತೆವಿಶಿಂ … ತಶೆಂಚ್ಚ್ ಶೆಹರಾಂತ್ ವಿಧ್ಯಾರ್ಥಿಂ ಮದೆಂ ಚಲಾವಣೆರ್ ಆಸ್ಚೆಂ ಹೆರ್ ಡ್ರಗ್ಸ್ ತಶೆಂ ಅಮಾಲ್ ಪಿಯೊಣ್ಯಾಂ ವಿಶಿಂ ಆಯ್ಕೊನ್, ತೊ ಧಿಗ್ಭ್ರಾಂತ್ ಜಾಲೊ.
ಘಡ್ಯೆನ್ ತ್ಯಾ ಮೊಬಾಯ್ಲ್ ದೃಶ್ಯಾಂ ತಶೆಂ ಶೆಹರಾಂತ್ ಚಲೊನ್ ಆಸ್ಚ್ಯಾ ಹೆರ್ ಅನೀತೆಚ್ಯಾ ಚಟುವಟಿಕ್ಯಾವಿಶಿಂ ಸಬಾರ್ ಕಡೆಂ ‘ರೈಡ್’ ಕೆಲೆಂ. ತಶೆಂಚ್ಚ್, ಮುಕಾರ್ ಘಡಾನಾಶೆಂ ನಿರ್ಬಂದ್ ಘಾಲ್ಚೆಂ ಕಾರ್ಯೆಂ ಆರಂಭ್ ಕೆಲೆಂ. ಪೂಣ್ ಅಸಲ್ಯಾ ವಿಶಯಾಂನಿಂ, ಸಬಾರ್ ಕೊಲೆಜ್ – ಇಸ್ಕೊಲಾಚ್ಯಾ ಮೆನೆಜ್‌ಮೆಂಟಾನ್, ಆಪಾಪ್ಲ್ಯಾ ‘ಇಗೊ’ ದಿಶ್ಟೆನ್, ಪೊಲಿಸ್ ಡಿಪಾರ್ಟ್‌ಮೆಂಟಾಕ್ ಜಾಯ್ ಪುರ್ತೊ ಸಹಕಾರ್ ದಿಲೊ ನಾಂ!
ನೀಜ್ ತರ್ ಹ್ಯಾ ವರ್ವಿಂ ಲುಕ್ಸಾಣ್ ಅನ್ಯಾಯ್ ಜಾಂವ್ಚೆಂ ಯುವಜಣಾಂಕ್ ಮ್ಹಣ್ ಪ್ರಮಾಣಿಕ್‌ಪಣಿಂ ತಿಂ ಮತಿಕ್ ವ್ಹರಿನಾಂತ್. ‘ಕೊಣಾಯ್ಚಿಂ ತಿಂ ಭುರ್ಗಿಂ …ಆಪ್ಣಾಕ್ ಕಿತೆಂ?!’ ಮ್ಹಳ್ಳೊ ಮನೋಭಾವ್ ತಾಂಚೊ. ಜರ್ ಆಪ್ಣಾಚಿಂಚ್ಚ್ ಭುರ್ಗಿಂ ತರ್ ‘ಆಮಿ ತಸಲೊ ಬೆಫಿಕೆರ್ ಕರ್ತ್ಯಾಂವ್‍‌ಗೀ?!’ ಮ್ಹಳ್ಳೆಂ ತೆ/ತಿಂ ಚಿಂತಿನಾಂತ್!
ಕಿತ್ಲೆಶೆ ಯುವಜಣ್, ಅಶ್ಲೀಲ್ ಅನೀತೆಚ್ಯಾ ವಿಶಯಾಂಚ್ಯಾ ಆಭಿರುಚಿನ್ ಮನೋದಬಾವೆಂತ್ ಚಡ್ಪಡೊನ್ ಆಸ್ತಾತ್. ವ್ಹಡಿಲಾಂಕ್ ಹೆಂ ಕಳಿತ್‌ಚ್ಚ್ ಆಸಾ ನಾಂ. ಹಾಚೊ ಪರಿಣಾಮ್ ಜಾವ್ನ್…ತಾಂಚೆ ಥಂಯ್ ವಿಪರೀತ್ ಲೈಂಗಿಕ್ ಅಭಿರುಚ್, ಡ್ರಗ್ಸ್ ಅಮಾಲಾವರ್ವಿಂ, ತಾಂಚೆ ಥಂಯ್ ವಿಚಿತ್ರ್ ವಿಭಿನ್ನ್ ಮನೋ ದಬಾವ್ ಉದೆತಾ. ಹ್ಯಾ ವರ್ವಿಂ ತೆ ಧೆಧೆಸ್ಪರ್ ಜಾತಾತ್.
ಆನಿ ಅಸಲ್ಯಾ ಮನೋ-ದಬಾವಾವೆನ್ ಖಿನ್ನತೆಕ್ ಒಳಗ್ ಜಾವ್ನ್…ಥೊಡೆಪಾವ್ಟಿಂ ಥೊಡೆ ವಿಚಿತ್ರ್ ಕ್ರೂರತೆನ್ ಬುಡ್ತಾತ್. ಥೊಡೆ ಜಿವ್ಘಾತೆಚ್ಯಾ ದಬಾವೆಕ್ ಒಳಗ್ ಜಾವ್ನ್ ಕಠಿಣ್ ದೆದೆಸ್ಪರಾರ್ ಆಸ್ತಾತ್. ಅಸಲ್ಯಾ ಸರ್ವ್ ವಾಯ್ಟ್ ಪರಿಣಾಮೆನ್, ಯುವಜಣಾ ಥಂಯ್ ಲೂಟ್, ಖುನಿ, ಜಿವ್ಘಾತ್ ಅಸಲಿಂ ಸರ್ವ್ ಭಿರಾಂಕುಳ್ ಘಡಿತಾಂ ಘಡ್ತಾತ್!
ದೆಕುನ್ ಪ್ರತ್ಯೇಕ್ ಜಾವ್ನ್ ಆವಯ್-ಬಾಪುಯ್, ಪೋಶಕಾಂನಿ ತಶೆಂಚ್ಚ್, ಧಾರ್ಮಿಕ್ ತಶೆಂ, ಶಿಕ್ಪಾ ಕ್ಶೇತ್ರಾಚ್ಯಾ ವ್ಹಡಿಲಾಂನಿ, ಯುವಜಣಾಂಚ್ಯಾ ಫುಡಾರಾಖಾತಿರ್ ತಾಂಚೆರ್ ಜಾಗರಣೆಚೊ ದೊಳೊ ದವರ್ನ್ ಆಸ್ಚೆಂ ಬೋವ್ ಗರ್ಜೆಚೆಂ ಜಾವ್ನಾಸಾ. ಆಪ್ಲೆಂ ಭುರ್ಗೆಂ – ಭುರ್ಗೊ ಪಾಟಿಂ ಜಾಪ್ ದಿತಾ ಯಾ ವೇಳ್ ಚುಕೊನ್ ಘರಾ ಯೆತಾ … ಅಸಲೆಂ ಸರ್ವ್ ದುಬಾವಿ ನಡ್ತೆಂ ತಾಂಚೆ ಥಂಯ್ ದಿಸೊನ್ ಯೆತಾನಾಂಚ್ಚ್ ತಾಂಚೆರ್ ನಿಯಂತ್ರಣ್ ಘಾಲಿಜಾಯ್. ನಾಂತರ್ ಫುಡಾರಾಂತ್ ವ್ಹಡಿಲಾಂ ಚುರ್ಚುರ್ತೆಲಿಂ ಖಂಡಿತ್!
ಸಮಾಜ್… ನೈತಿಕ್ ಮೌಲ್ಯಾಂನಿಂ ಎಕಾಮೆಕಾಚಾ ನಿತಳ್ ಪ್ರಮಾಣಿಕ್ ಸೊಡ್ದೊಡೆನ್, ಶಾಂತ್ ಸಮಾಧಾನೆನ್ ಮುಂದರುನ್ ವೊಚಾಜಾಯ್ ತರ್, ಪ್ರಮಾಣಿಕ್ಪಣಾಚಿ ಶಿಕ್ಪಿ ಸಮಾಜ್ ಬೋವ್ ಗರ್ಜೆಚೆಂ ಜಾವ್ನ್ ಆಸಾ.
ಪೂಣ್ ಪುರ್ವಾಜಾಂನಿಂ ಬಾಂದುನ್ ಹಾಡ್ಲೆಲಿ ತಿ ಶಿಸ್ತೆಚಾ ಭಿರಾಂತೆನ್ ತಶೆಂ ನೈತಿಕ್ ಮೌಲ್ಯಾಂನಿಂ ಮಿಸ್ಳೊನ್ ಆಸ್ಲೆಲ್ಯಾ ತಸಲ್ಯಾ ತ್ಯಾ ಊಂಚ್ ಶಿಸ್ತೆಚ್ಯಾ ಶಿಕ್ಪಾ ಸಂಸ್ಕ್ರತಿಕ್…ಆದುನಿಕ್ ಶಿಕ್ಪಾ ವೆವಸ್ಥಾನ್, ಬೆಫಿಕೆರ್ ಕರುನ್, ಮುಕ್ಲ್ಯಾ ಜನಾಂಗಾಚೊ ಫುಡಾರ್ ರಿಸ್ಕೆಕ್ ಘಾಲಾಂ.
ಆಧುನಿಕ್ ಶಿಕ್ಪಾ ಕ್ಶೇತ್ರಾಂತ್… ಪ್ರಸ್ತುತ್ ಕಾನೂನಾಚಾ ಭಿರಾಂತೆನ್ ಶಿಕ್ಶಕ್, ಭುರ್ಗ್ಯಾಂಚ್ಯಾ ಅಶಿಸ್ತ್ ಅನೈತಿಕ್ ತಶೆಂ ಬೇಜವಾಬ್ದಾರೆ ಥಂಯ್ ದೊಳೆ ಧಾಂಪುನ್, ಆಪ್ಲ್ಯಾ ಅಂತಸ್ಕರ್ನಾಕ್ ವಿರೋಧ್ ಜಾವ್ನ್ ದೀಸ್ ಕಾಡುನ್ ಆಸ್ಚೆಂ ಅನಿವಾರ್ಯ್ ಜಾಲಾಂ. ತರೀ ಶಿಕ್ಶಕಾಂನಿ…ಭುರ್ಗ್ಯಾಂಚ್ಯಾ ಕೀಳ್ ನಡ್ತ್ಯಾವರ್ವಿಂ ಜಾಂವ್ಚಿ ಅನಾಹುತಾಂ, ತಶೆಂ ಜಿವಿತಾಚ್ಯಾ ಅಪಾಯೆವಿಶಿಂ…ತಾಂಚ್ಯಾ ಕಾಳ್ಜಾಕ್ ರೊಂಬಾಸರ್ಕೆಂ, ಸಾಕ್ಸ್ ದೀವ್ನ್ ವಿವರಿಲೆಂ ತರ್, ತಾಂಚೆಥಂಯ್ ಬದ್ಲಾವಣ್ ಜಾಂವ್ಚಿ ಸಾಧ್ಯತಾ ಖಂಡಿತ್ ಆಸಾ.
ಆಧುನಿಕ್ ಶಿಕ್ಪಾ ವೆವಸ್ತಾ ತಶೆಂ ಧಾರ್ಮಿಕ್ ವಲಯಾಚ್ಯಾ ಪರಿಗತೆಂತ್, ಮುಕ್ಲ್ಯಾ ಜನಾಂಗಾವಿಶಿಂ ಹಾಂವೆಂ ಆನಿಂ ತುವೆಂ ಕಿತೆಂ ಕರ್ಯೆತಾ ಮ್ಹಣ್ ಜಾಪ್ ಸೊಧುನ್ ಗೆಲ್ಲ್ಯಾಂವ್ ತರ್, ಪರತ್ ಪರತ್ ಸವಾಲ್‌ಚ್ಚ್ ಧೊಸ್ತಾ ಶಿವಾಯ್, ತಾಕಾ ಪರಿಹಾರ್ ಮೆಳೊಂಕ್ ಕಶ್ಟ್. ಸವಾಲ್ ತೆಂ ಸವಾಲ್ ಜಾವ್ನ್‌ಚ್ ಉರ್ತಾ.
ದೆಕುನ್ ಸವಾಲಾಂ ಘಾಲ್ನ್‌ಚ್ ರಾಂವ್ಚೆಂ ನ್ಹಂಯ್. ಬದ್ಲಾಕ್ ಯುವಜನಾಂಗಾಕ್ ನಿತಳ್ ಲೌಕಿಕ್ ಪ್ರಮಾಣಿಕತೆಚಿ ಮಾಹೆತ್ ತವಳ್ ತವಳ್ ದೀವ್ನ್ ಆಸ್ತಾಂವ್ ತರ್…ತಾಂಕಾ ಜಿವಿತಾಂತ್ಲ್ಯಾ ಅಪಾಯೆವಿಶಿಂ ಜಾಗರಣ್ ದೀವ್ನ್, ತಾಂಕಾ ನಿತಿಚ್ಯಾ ಪ್ರಮಾಣಿಕ್ ವಾಟೆಕ್ ಹಾಡ್ಚೆಂ ಉದಾರ್ಪಣ್ ದಾಕಯ್ಲೆಂ ತರ್…ಹ್ಯಾ ಉದಾರ್ಪಣಾ ಖಾತಿರ್, ದೆವಾಚಿ ಕುರ್ಪಾ ಆನಿ ಬರೆಪಣ್ ಲಾಭ್ತೆಲೆಂ. ಆನಿ ಯುವಜನಾಂಗಾಕ್‌ಯೀ ಬರೆಪಣ್ ಲಾಭ್ತೆಲೆಂ.
ಅಸಲೆಂ ಜಾಗರಣೆಚೆಂ ಉದಾರ್ಪಣ್ ಯುವಜನಾಂಗಾಕ್ ಲಾಭ್ಲೆಂತರ್…ತೆಯೀ ಜಾಗರಣೆಚೆಂ ಉದಾರ್ಪಣ್, ಎಕಾಮೆಕಾ ಥಂಯ್ ವಾಂಟ್ತೆಲೆ. ಆನಿ ಅಶೆಂ ಏಕ್ ಪ್ರಮಾಣಿಕ್, ನಿತಳ್-ನಿಸ್ಕಳ್ ನಿತಿಚೆಂ ಯುವ ಜನಾಂಗ್…ಸಮಾಜೆಂತ್ ರೂಪಿತ್ ಜಾತೆಲೆಂ!
- ರೋನ್ ರೋಚ್ ಕಾಸ್ಸಿಯಾ
1 comment
ಸಮಾಜಿಂತ್ ಆಜ್-ಕಾಲ್ ಘಡ್ಚಾ ಮಾರೆಕಾರ್ ಘಡಿತಾಂ ಪಯ್ಕಿ, ಯುವಜಣಾನಿ, ಅವನತೆಕ್ ವೆಚೆಂ ನಿಜಾಯ್ಕಿ ವಿಶೇಸ್ ಬೆಜಾರಾಯೆಚಿ ಗಜಾಲ್. ಹ್ಯಾ ಸಂಗ್ತಿ ವಿಶಿಂ ಬರಯಿಲ್ಲ್ಯಾ ರೊನ್ ರೋಚ್ ಕಾಸ್ಸಿಯಾಕ್ ದೇವ್ ಬರೆಂ ಕರುಂ.
ಜೊಸೆಫ್ ಡಿ’ಮೆಲ್ಲೊ