ವಿದ್ಯಾಕಲ್ಪಕ ಸ್ಕಾಲರ್‌ಶಿಪ್ ಯೋಜನೆರಿ ವೆವೆಗಳೆ ಕಾಲೇಜಾ ಥಾವನ ವಿದ್ಯಾರ್ಥಿ ವೇತನಾಕ ವಿಂಚುನ ಆಯಿಲೆ ನೂರೈವತ್ತು ಛಾತ್ರಾಂಕ ‘ಕ್ಷಿತಿಜ’ ಮ್ಹಳೆಲೆ ದೋನಿ ದಿವಸಾಚೆ ಕೌಶಲ್ಯ ತರಬೇತ ಕಾರ್ಯಾವಳ ವಿಶ್ವ ಕೊಂಕಣಿ ಕೇಂದ್ರ ಹಾಂಗಾಸರ ಮಾಂಡುನ ಹಾಳೆಲೆಂ. ಹೆಂ ಕಾರ್ಯಾವಳ ಮಂಗಳೂರಚೆ ನಾಮಾನೆಚೆ ಯುವ ಒಲಿಂಪಿಯನ್ ಅಂತರಾಷ್ಟ್ರೀಯ ಟೆಬಲ್ ಟೆನ್ನೀಸ್ ಕ್ರೀಡಾಪಟು ಅರ್ಚನಾ ಕಾಮತ್ ಹಾಂಗೆಲೆ ಉಪಸಸ್ಥಿತಿರಿ ಉಗ್ತಾವಣ ಜಾಲ್ಲೆಂ. ಹ್ಯಾ ಸಂದರ್ಭಾರಿ ಲ್ಹಾನ ವಯಾರಿಚ ಆಪಣಾನ ಘೆತ್ತಿಲೆ ಅದ್ಭುತ ಸಾಧನೆಕ ಅರ್ಚನಾಕ ಮಾನ ದಿವನ ಸನ್ಮಾನ ಕೆಲೆಂ. ಆಯಚೆ ಯುವ ಪೀಳಿಗೆಕ ಹೆ ಕ್ರೀಡಾರ್ಥಿಲೆ ಸಾಧನಾ ಎಕ್ ಮೊಲಾಧಿಕ ಮಾದರಿ ಜಾಲಾಂ ಅಶಿಂ ವಿಶ್ವ ಕೊಂಕಣಿ ಕೇಂದ್ರ ಅಧ್ಯಕ್ಷ ನಾಮನೆಚೆ ಲೇಕ ತಪಾಸಕ ತಶೀಂಚಿ ‘ವಿದ್ಯಾಕಲ್ಪಕ’ ರೂವಾರಿ ಸಿಎ ನಂದಗೋಪಾಲ್ ಶೆಣೈ ಹಾನ್ನಿ ಪ್ರಶಂಸಾ ಕೆಲೆಂ.
ಉಳ್ಳಾಲ ಲಕ್ಷ್ಮೀನರಸಿಂಹ ದೇವಳಾಚೆ ತಂತ್ರಿ ಮಾನೆಸ್ತ್ ಗಣಪತಿ ಭಟ್ ಹಾನ್ನಿ ಶುಭ ಸಾಂಗಲೆಂ. ಕೇಂದ್ರಾಚೆ ಉಪಾಧ್ಯಕ್ಷ ಗಿಲ್ಬರ್ಟ್ ಡಿ ಸೋಜ. ಟ್ರಸ್ಟೀ ಶಕುಂತಲಾ ಆರ್ ಕಿಣಿ, ಮ್ಹಾಲ್ಗಡೆ ಸಲಹಗಾರ ಗಣೇಶ ಭಟ್, ಡಾ ಬಿ ದೇವದಾಸ ಪೈ ಆನಿ ಅಂತರಾಷ್ಟ್ರೀಯ ಟೆಬಲ್ ಟೆನ್ನೀಸ್ ಕ್ರೀಡಾಪಟು ಅರ್ಚನಾಲೆ ಆವಸು ಬಾಪುಸು ಉಪಸ್ಥಿತ ಆಶಿಲಿಂಚಿ. ಸಂಪನ್ಮೂಳ ವ್ಯಕ್ತಿ ಜಾವನು ಸುಮತಿ ಗಜಾನನ ಪೈ ಹಾಂಗೆಲೆ ಕೌನ್ಸಿಲಿಂಗ್ ಸೆಷನ್ -“ನಿಮ್ಮ ಮನಸ್ಸನ್ನು ತರಬೇತಿ ಮಾಡಿ” ಮ್ಹಳೆಲೆ ವಿಚಾರ ವಿನಿಮಯ ಚಲೆಂ. ಮಂಗಳೂರು ತ್ರಿಶಾ ಕಾಲೇಜು ಸಂಸ್ಥಾಚೆ ಸ್ಥಾಪಕ ಅಧ್ಯಕ್ಷ ಸಿಎ ಗೋಪಾಲಕೃಷ್ಣ ಭಟ್ ಹಾನ್ನಿ “ಉನ್ನತ ಶಿಕ್ಷಣವನ್ನು ಮುಂದುವರಿಸುವ ಅವಶ್ಯಕತೆ” ಮ್ಹಳೇಲ ವಿಚಾರಾಂತ ಭಾಸಾ ಭಾಸ ಕೆಲೆಂ. ಪ್ರೀತಂ ಕಾಮತ್ ಆನಿ ವಿದ್ಯಾ ಶೆಣೈ ಹಾನ್ನಿ “ನಿಮ್ಮ ಭವಿಷ್ಯವನ್ನು ದೃಶ್ಯೀಕರಿಸಿ ಯುವ ವಾಣಿಜ್ಯೋದ್ಯಮಿಗಳಿಂದ ವೃತ್ತಿಜೀವನ, ಉದ್ಯಮಶೀಲತೆ, ವರ್ಕಿಂಗ್ ವರ್ಲ್ಡ್‌ಗಾಗಿ ಸಿದ್ಧರಾಗಿ” ಹೆಂ ವಿಚಾರಾಂತ ಅನುಭವ ಸಾಂಗಲೆಂ.
“ಕ್ಷಿತಿಜ” ಶಿಬಿರಾಚೆ ದೊನ್ನಿ ದಿವಸು ಇಂಜಿನಿಯರ್ ಗೌರೀಶ್ ಪ್ರಭು ಹಾನ್ನಿ “ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್” ವಿಷಯಾರ ಮಸ್ತ ಇತಲೆ ಮಾಹಿತಿ ದಿಲೆಂ. ಕಾರ್ಕಳಾಚೆ ಅತ್ಯುತ್ತಮ ಶಿಕ್ಷಕ ಪ್ರಶಸ್ತಿ ಪುರಸ್ಕೃತ, ರಾಷ್ಟ್ರೀಯ ಮಟ್ಟಾಚೆ ಜೇಸಿ ತರಬೇತುದಾರ ರಾಜೇಂದ್ರ ಭಟ್ ಕೆ ಹಾನ್ನಿ “ಮೌಲ್ಯಗಳು ಮತ್ತು ಬದುಕಿನ ಸ್ಪೂರ್ತಿ ” ಮ್ಹಳೆಲೆ ವಿಚಾರಾಂತ ದೋನಿ ಗಂಟೊ ಸಂವಾದ ಚಲಾಯಸುನ ದಿಲೆಂ. “ಸ್ವಯಂ ಪ್ರೇರಣೆ ವೃತ್ತಿ ಆಯ್ಕೆಯಾಗಿ ಯೂಟ್ಯೂಬ್” ಮ್ಹಳೆಲೆ ವಿಚಾರಾಂತ ಪ್ರೊ. ಮಂಜುನಾಥ್ ಕಾಮತ್, ನಿಟ್ಟೆ ಹಾನ್ನಿ ವಿಚಾರ ವಿನಿಮಯ ಕೆಲೆಂ.
ಅಶಿಂ ವಿದ್ಯಾಕಲ್ಪಕ “ಕ್ಷಿತಿಜ” ಶಿಬಿರಾಂತ್ ಯುವ ಛಾತ್ರಾಂಕ ಶಿಕ್ಷಣ ಆನಿ ಉದ್ಯೋಗ ಮಾರ್ಗದರ್ಶನ, ಉದ್ಯಮ ಕ್ಷೇತ್ರ ಬದ್ದಲ ಚರ್ಚಾಗೋಷ್ಟಿ, ನಾಯಕತ್ವ ಕೌಶಲ್ಯ, ಉದ್ಯಮಾಕ ಬ್ಯಾಂಕ್‍ಸೌಲಭ್ಯ, ಯುವ ಯಶಸ್ವಿ ಉದ್ಯಮಿಂಗೆಲೊ ಅನುಭವ ವಾಂಟಪ, ಉನ್ನತ ಶಿಕ್ಷಣ ಬದ್ದಲ ಅವಕಾಶ್, ಕೃತಕ ಬುದ್ದಿವಂತಿಕಾ ಅಸಲೆ ಮಸ್ತ ಇತಲೆ ಯುವ ಛಾತ್ರಾಂಕ ಉಪಯೋಗ ಆಶಿಲೆಂ ವಿಚಾರಾಂತ ಸಂಪನ್ಮೂಲ ವ್ಯಕ್ತಿನಿಂ ಯೆವನು ಮಾಹಿತ ದಿಲೆಲೆಂ. ಸಂಜೆ ವೇಳಾ ಯು. ಸಮರ್ಥ ಶೆಣೈ ಯುವ ಕಲಾವಿದ ತಂಡಾ ಥಾವನ ಕೊಳಲು ವಾದನ, ಹಿಂದೂಸ್ಥಾನಿ ಸಂಗೀತ ಕಾರ್ಯಕ್ರಮ ಆನಿ ಕ್ವಿಜ್ ಯ್ ಚಲ್ಲೆಲೆಂ. ಅಶಿಂ ಹೆಂ ದೋನಿ ದಿವಸಾಚೆ ಕಾರ್ಯಾವಳಾಂತ ಛಾತ್ರಾಂನಿಂ ಮಸ್ತ ಉಮೇದ್ ದಿವನ ಭಾಗಿ ಜಾವನ ಸಬಾರ ವಿಷಯು ಆಪಣಾವನ ಘೆತಲೆಂ
