ನಾಮ್ಣೆಚೊ ಕೊಂಕ್ಣಿ ಕಾರ್ಭಾರಿ , ನಾಟಕ್ ನಿರ್ದೇಶಕ್ ಆನಿ ನಟ್ , ಲೇಖಕ್ , ಸಾಮಾಜಿಕ್ ಕಾರ್ಯಕರ್ತ್ , ದಾಯ್ಜಿ ದುಬಾಯ್ ಲೇಖಕಾಂಚೊ ಎಕ್ತಾರ್ ಹಾಚೊ ಸ್ಥಾಪಕ್ ಸಂಚಾಲಕ್ ಡಯಾನ್ ಡಿ’ಸೋಜಾ ಮುಕಾಮರ್ ಹಾಕಾ ಯು.ಎ.ಇಂತ್ಲೊ ಕೊಂಕ್ಣಿ ಲೇಖಕಾಂಚೊ ಎಕ್ತಾರ್ ದಾಯ್ಜಿ ದುಬಾಯ್ ಕೊಂಕ್ಣಿ ಲೇಖಕಾಂಚೊ ಎಕ್ತಾರ್ ಹಾಚೊ ಸಂಚಾಲಕ್ ಜಾವ್ನ್ ಪರ್ತುನ್ ಆವಿರೋಧ್ ಜಾವ್ನ್ ವಿಂಚವ್ಣ್ ಕೆಲ್ಯಾ. ಕವಿ ಆರ್ಥರ್ ಪಿರೇರಾ ಒಮ್ಜೂರ್ ಹಾಕಾ ಸಹ ಸಂಚಾಲಕ್ ಜಾವ್ನ್ ಆನಿ ಆಲ್ವಿನ್ ಪಿಂಟೊ ಹಾಕಾ ಖಜಾನ್ದಾರ್ ಜಾವ್ನ್ ಡಯಾನ್ ಡಿ’ಸೋಜಾಕ್ ಸಾಂಗಾತ್ ದಿಂವ್ಕ್ ನಿಯುಕ್ತ್ ಕೆಲಾಂ. ಪಾಟ್ಲ್ಯಾ ದಿಸಾಂನಿ ದುಬಾಯಾಂತ್ ಚಲ್‍ಲ್ಲ್ಯಾ ದಾಯ್ಜಿ ದುಬಾಯ್ ಜೆರಾಲ್ ಜಮಾತೆ ವೆಳಿಂ 2024 – 26 ಚ್ಯಾ ಆವ್ದೆಕ್ ಹ್ಯಾ ಸಮಿತಿಚಿ ವಿಂಚೊವ್ಣ್ ಕೆಲ್ಯಾ.
ಡಯಾನ್ ಡಿ’ಸೋಜಾ ಮುಕಾಮರ್ ಕೇವಲ್ ಮಂಗ್ಳೂರಿ ಕೊಂಕ್ಣಿ ಸಮುಧಾಯೆಂತ್ ಮಾತ್ರ್ ನ್ಹಂಯ್ ಆಸ್ತಾಂ , ಗೊಂಯ್ಕಾರ್ ತಶೆಂಚ್ ಇತರ್ ಮಂಗ್ಳುರ್ಚ್ಯಾ ಸಮುಧಾಯಾಂ ಮದೆಂ ಆಪ್ಲ್ಯಾ ಪುಡಾರ್ಪಣಾ ಲಾಗೊನ್ ಭೊವ್‍ಚ್ ಮಾನಾಚೆಂ ನಾಂವ್. ಕಲಾ ತಶೆಂಚ್ ಸಾಮಾಜಿಕ್ ಚಟುವಟಿಕ್ಯಾಂನಿ ಆಪಾರ್ ಆನ್ಭೊಗ್ ತಾಕಾ ಆಸಾ. ತಾಣೆ ನಟನ್ ಕರುನ್ ನಿರ್ದೇಶಿತ್ ಕೆಲ್ಲೆ ಭೊವ್ ಯಶಸ್ವಿ ನಾಟಕ್ “ಆಮಿಂ ನಾತ್‍ಲ್ಲ್ಯಾ ವೆಳಾರ್” ಆನಿ “ಮಮ್ಮಾ ರಿಟಾಯರ್ಡ್ ಜಾತಾ” ಯು.ಎ.ಇ. ಮಾತ್ರ್ ನ್ಹಂಯ್ ಆಸ್ತಾಂ ಇತರ್ ಗಲ್ಫ್ ರಾಷ್ಟ್ರಾಂನಿ ತಶೆಂಚ್ ಭಾರತಾಚ್ಯಾ ಸಭಾರ್ ಶಹರಾಂನಿ ಹೌಸ್‍ಫುಲ್ ಪ್ರದರ್ಶನಾಂ ಜಾಲ್ಯಾಂತ್. ತಾಚ್ಯಾ ವಿಶಿಶ್ಟ್ ಮುಖೆಲ್ಪಣಾಚ್ಯಾ ಗುಣಾಂಕ್ ಸಗ್ಳಿ ಸಮಾಜ್ ತಾಕಾ ಮಾಂದ್ತಾ. ಆಪ್ಲ್ಯಾ ರುಪ್ಯಾಳಾ ಉತ್ಸವಾಚ್ಯಾ ಹುಂಬ್ರಾರ್ ಆಸ್ಚ್ಯಾ ದಾಯ್ಜಿ ದುಬಾಯ್ ಸಂಘಟನಾಕ್ ಡಯಾನ್ ಡಿ’ಸೋಜಾಚೆಂ ಮುಖೆಲ್ಪಣ್ ಆನಿ ಆಪಾರ್ ಜಾಣ್ವಯ್ ದಾಯ್ಜಿ ದುಬಾಯ್ ಸಂಘಟನಾಕ್ ಆಪಾರ್ ಗರ್ಜೆಕ್ ಪಡ್ತಾಲಿ. ದಾಯ್ಜಿ ದುಬಾಯ್ ಸಂಘಟನಾನ್ ಎದೊಳ್‍ಚ್ಚ್ ದುಬಾಯಾಂತ್ ತಶೆಂಚ್ ಮಂಗ್ಳೂರಾಂತ್ ಆಪ್ಲ್ಯಾ ರುಪ್ಯಾಳಾ ಉತ್ಸವಾಚ್ಯಾ ಉಗ್ಡಾಸಾಕ್ ಸಭಾರ್ ಕಾರ್ಯಾಂಚಿ ಮಾಂಡಾವಾಳ್ ಎದೊಳ್‍ಚ್ಚ್ ಕೆಲ್ಯಾ.
ಆರ್ಥರ್ ಪಿರೇರ್ ಒಮ್ಜೂರ್ ಆಪ್ಲ್ಯಾ ಭಾವನಾತ್ಮಕ್ ಆನಿ ಆರ್ಥ್‍ಪೂರ್ಣ್ ಕವಿತೆಂ ಲಾಗೊನ್ ನಾಂವ್ ವೆಲ್ಲೊ ನಾಮ್ಣೆಚೊ ಕವಿ. ಜಿಲ್ಲಾ ಮಟ್ಟಾಚಿ ರಾಜ್ಯೊತ್ಸವ್ ಪ್ರಶಸ್ತಿ ಆಪ್ಣಾಯ್ಲ್ಯಾ ಮಾತ್ರ್ ನ್ಹಂಯ್ ಆಸ್ತಾಂ ತೊ ನಾಮ್ಣೆಚೊ ಪದಾಂ ಘಡ್ಣಾರ್. ಆಪ್ಲ್ಯೊ 3 ಪದಾಂಚ್ಯೊ C.D. ಕಾಡ್ಲ್ಯಾತ್ ಮಾತ್ರ್ ನ್ಹಂಯ್ ಆಸ್ತಾಂ 1 ಭಕ್ತಿಕ್ ಗಿತಾಂಚಿ C.D. ಸಾಂಗಾತ್ಪಣಾಂತ್ ಕಾಡ್ಲ್ಯಾ. ತಾಣೆ ಘಡ್‍ಲ್ಲಿಂ ಸಭಾರ್ ಪದಾಂ ಆನಿ ಕವಿತಾ ಸಭಾರ್ ಸ್ಪರ್ದ್ಯಾಂನಿ ಸ್ಪರ್ದಿಕಾಂಕ್ ಸಭಾರ್ ಬಹುಮಾನಾಂ ಆಪ್ಣಾಂವ್ಕ್ ಕಾರಣ್ ಜಾಲ್ಯಾಂತ್. ಕವಿತಾ ವಾಚನಾಂತ್ ಆಪ್ಲಿಚ್ಚ್ ಎಕ್ ಶೈಲಿ ಆಸಾ ಕೆಲ್ಲ್ಯಾ ಆರ್ಥರಾನ್ ದುಬಾಯಾಂತ್ಲೆಂ ಆಪ್ಲ್ಯಾ ಗಾಂವ್ಚೆಂ ಸಂಘಟನ್ ಒಮ್ಜುರ್ಚೆ ದಿವೆ ಹಾಂತುಂ ಆಪ್ಲೊ ಸಕ್ರೀಯ್ ವಾವ್ರ್ ದಿಲಾ. ತಾಚೆ ಉತ್ತೀಮ್ ನಾಯಕತ್ವಚೆ ಗೂಣ್ ಖಂಡಿತ್ ಜಾವ್ನ್ ದಾಯ್ಜಿ ದುಬಾಯ್ ಸಂಘಟನಾಕ್ ಆನಿಕೀ ಉಂಚ್ಲ್ಯಾ ಪೌಂವ್ಡ್ಯಾಕ್ ಪಾವೊಂಕ್ ಆಧಾರ್ ಜಾತೆಲೆ.
ಆಲ್ವಿನ್ ಪಿಂಟೊ ದುಬಾಯಾಂತ್ಲೊ ಭೊ‍ವ್‍ಚ್ಚ್ ಆನ್ಭೊಗಿ ಆನಿ ಜಾಣ್ತೊ ಸಂಘಟಕ್. ದುಬಾಯಾಂತ್ಲೆಂ ಪ್ರಖ್ಯಾತ್ ಸಂಘಟನ್ ಮಂಗ್ಳೂರ್ ಕೊಂಕಣ್ಸ್ ಹಾಚೊ ಸ್ಥಾಪಕ್ ಸಾಂದೊ ಮಾತ್ರ್ ನ್ಹಂಯ್ ಆಸ್ತಾಂ ಆಧ್ಯಕ್ಷ್ ಜಾವ್ನ್ ತಾಣೆ ಆಪ್ಲಿ ಸೆವಾ ದಿಲ್ಯಾ.ಎಕ್ ಚತುರ್ ಸಂಘಟಕ್ , ಬರೊವ್ಪಿ ಆನಿ ನಾಂವಾಡ್ದಿಕ್ ರಂಗ್ ನಟ್. ಲೇಖ್ ಪಾಕ್ ತಾಚೆಂ ಮೊಗಾಚೆಂ ಕ್ಷೇತ್ರ್ ಜಾಲ್ಲ್ಯಾನ್ ಹ್ಯಾ ರುಪ್ಯಾಳಾ ಉತ್ಸವಾಚ್ಯಾ ವರ್ಸಾ ಖಜಾನ್ದಾರ್ ಜಾವ್ನ್ ತಾಚಿ ಸೆವಾ ದಾಯ್ಜಿ ದುಬಾಯ್ ಸಂಘಟನಾಕ್ ವ್ಹಡಾ ಉಪ್ಕಾರಾಚಿ ಜಾತಾಲಿ.
1999 ಇಸ್ವೆಂತ್ ಆಸ್ಥಿತ್ವಾಕ್ ಆಯಿಲ್ಲೊ ದಾಯ್ಜಿ ಲೇಖಕಾಂಚೊ ಎಕ್ತಾರ್ ಪಾಶಾರ್ ಜಾಲ್ಲ್ಯಾ 24 ವರ್ಸಾಂನಿ ಮಂಗ್ಳೂರಿಯನ್ ಕೊಂಕ್ಣಿ ಸಂಸಾರಾಕ್ ದಿಲ್ಲಿ ಸೆವಾ ಕೊಣಾಕೀ ಚಿಂತುಂಕ್ ಜಾಯ್ನಾ ತಸಲಿ. ಕೊಂಕ್ಣಿ ಸಾಹಿತ್ಯ್ ಸಂಸಾರಾಂತ್ ದಾಯ್ಜಿ ದುಬಾಯ್ ಸಂಘಟನಾಚಿ ವಾಡಾವಾಳ್ ಚಿಂತ್ಪಾ ಬಾಯ್ಲಿ. ಹಾಂತುಂ ದಾಯ್ಜಿ ದುಬಾಯ್ ಸಾಹಿತಿಕ್ ಪ್ರಶಸ್ತಿ , ಜಿಣಿಯೆ ಸಾಧಕ್ ಪ್ರಶಸ್ತ್ಯೊ. ಕೊಂಕ್ಣಿ ಸಾಹಿತ್ಯ್ ಆನಿ ಕವಿತಾಂ ವಯ್ರ್ ವಿವಿಧ್ ಕಾರ್ಯಾಗಾರಾಂ. ಹಾಸ್ಯ್ ಕಾರ್ಯಕ್ರಮಾಂ, ವಿವಿಧ್ ಸಾಂಸ್ಕ್ರತಿಕ್ ಕಾರ್ಯಿಂ, ನವ್ಯಾ ಬುಕಾಂಚೆಂ ಪ್ರಕಟಣ್, ಗರ್ಜೆವಂತ್ ಕೊಂಕ್ಣಿ ಬರೊವ್ಪಿ ಆನಿ ವಾವ್ರಾಡ್ಯಾಂಚೆಂ ಗರ್ಜೆಕ್ ಪಾಂವ್ಚೆಂ ಆಶೆಂ ಕೊಂಕ್ಣೆಕ್ ಸಂಬಂದ್ ಜಾಲ್ಲ್ಯಾ ಹರ್ಯೆಕ್ ಕಾರ್ಯಾಂನಿ ದಾಯ್ಜಿ ದುಬಾಯ್ ಸಂಘಟನಾನ್ ಆಪ್ಲೆಂ ಮೆತೆರ್ಪಣ್ ಘೆತ್ಲಾಂ.
ಡಯಾನ್ ಡಿ’ಸೋಜಾ ಹಾಣೆ ಸಂಚಾಲಕ್ ಜಾವ್ನ್ ಆಪ್ಲ್ಯಾ ಉಲೊವ್ಪಾಂತ್ ಆದ್ಲೊ ಸಂಚಾಲಕ್ ನಾನು ಮರೋಲ್ ತೊಟ್ಟಾಮ್ , ಸಹ ಸಂಚಾಲಕ್ ಸುನಿಲ್ ಫೆರ್ನಾಂಡಿಸ್ ಕೊಟಾ ತಶೆಂಚ್ ಖಜಾನ್ದಾರ್ ಸಂತೊಶ್ ಪೆರ್ಲಾ ಹಾಣಿ ದಿಲ್ಲ್ಯಾ ಸೆವೆಚೊ‌ಉಗ್ಡಾಸ್ ಕಾಡ್ನ್ ತಾಂಕಾಂ ಧಿನ್ವಾಸ್ ಪಾಟಯ್ಲೆ.
