ಆಧುನಿಕ್ ಕೊಂಕ್ಣಿ ವಿನೋದಿಕ್ ಸಾಹಿತ್ಯಾಂತ್ ಅತ್ವಿಚ್ ವಾಟ್ ರುತಾ ಕರುನ್ ಆಪ್ಲಿ ಖಾಸ್ ಮ್ಹೊರ್ ಮಾರ್‌ಲ್ಲ್ಯಾ ರೋಶು, ಬಜ್ಪೆ ಹಾಚ್ಯಾ ಹಾಸ್ಯ್ ಬರ್ಪಾಂಚೆಂ ಪಾಂಚ್ವೆಂ ಪುಸ್ತಕ್ ಕೊಂಕ್ಣಿ ಸರ್ಕಸ್, ಸನ್ವಾರಾ, 2025 ಎಪ್ರಿಲ್ 19 ವೆರ್ ಪಾಸ್ಖಾಂ ಫೆಸ್ತಾಚಾ ಸಂಭ್ರಮಿಕ್ ಮಿಸಾ ಉಪ್ರಾಂತ್, ಬಜ್ಪೆ, ಸಾಂ ಜುಜೆ ಫಿರ್ಗಜೆಚ್ಯಾ ಮಯ್ದಾನಾರ್ ಫಿರ್ಗಜೆಚೊ ವಿಗಾರ್ ಮಾ| ದೊ| ಬಾಪ್ ರೊನಾಲ್ಡ್ ಕುಟಿನ್ಹಾ ಹಾಂಚ್ಯಾ ಹಸ್ತುಕಿಂ ಮೊಕ್ಳಿಕ್ ಜಾಲೆಂ.
ಹ್ಯಾ ಸಂದರ್ಭಾರ್ ಫಿರ್ಗಜೆಚೊ ಕಾಜಿತೊರ್ ಬಾ| ವಿವಿಯನ್ ರೊಡ್ರಿಗಸ್, ಸಾಂ ಜುವಾಂವ್ ಪಾವ್ಲ್ ದುಸ್ರೊ ಪೂನ್‌ಶೆತಾಚೊ ಚಾಪ್ಲೇಯ್ನ್ ಬಾ| ರೋಶನ್ ಲೋಬೊ, ಫಿರ್ಗಜೆಚೊ ಉಪಾಧ್ಯಕ್ಷ್ ಮಾನೆಸ್ತ್ ಸ್ಟೇನಿ ಡಿಸೋಜಾ, ಕಾರ್ಯದರ್ಶಿ ಮಾನೆಸ್ತಿಣ್ ಗ್ರೇಸಿ ಸಿಕ್ವೇರಾ ತಶೆಂಚ್ ಲೇಖಕ್ ರೋಶು, ಬಜ್ಪೆ ಹಾಜರ್ ಆಸ್‌ಲ್ಲೆ.
ಕೊಂಕ್ಣಿ ಸರ್ಕಸ್ – ರೋಶು ಬಜ್ಪೆಚೆಂ 9 ವೆಂ ಪ್ರಕಾಶಿತ್ ಪುಸ್ತಕ್ ಆಸುನ್, ಹಾಸ್ಯ್ ಪ್ರಕರಾಂತ್ ಪಾಂಚ್ವೆಂ ಪುಸ್ತಕ್ ಜಾವ್ನಾಸಾ. ಎಕಾ ಸಾಹಿತಿಚ್ಯಾ ಜಿವಿತಾ ಭೊಂವಾರಿ ವಿಣ್ಲೆಲಿಂ 20 ಕುರ‍್ಕುರಿತ್ ಆನಿ ಮಝೆದಾರ್ ವಿನೋದಿಕ್ ಬರ್ಪಾಂ ಹಾಂತುನ್ ಆಟಾಪುನ್ ಆಸಾತ್. ಕೊಂಕ್ಣಿ ಲೇಖಕಾಚೊ ಬೊಡಿಗಾರ್ಡ್, ಕೊಂಕ್ಣಿ ಲೇಖಕಾಂಚೊಂ ದಾಕ್ತೆರ್, ಕೊಂಕ್ಣಿ ಲೇಖಕಾಂಚೆಂ ಬ್ಯಾನರ್, ರಾವ್ಲಾ ವೊಟಾಕ್ ಕೊಂಕ್ಣಿ ಲೇಖಕ್, ಹಾಂವ್ ಹಾಸ್ಯ್ ಬರಯ್ಣಾರ್ ಜಾಲೊಂ … ಇತ್ಯಾದಿ ಹಾಂತು ಪ್ರಮುಕ್ ಜಾವ್ನಾಸಾತ್. ಕೊಂಕ್ಣಿ ಲೊಕಾನ್ ರೋಶುಕ್ ಹಾಸ್ಯ್ ಶೆತಾಂತ್ ಮಾನುನ್ ಘೆತ್ಲಾ ಆಸ್ತಾಂ ತಾಚೆಂ ಹಾಸ್ಯ್ ಬರಪ್ ನಿಜಾಯ್ಕಿ ಹಾಸೊಂಕ್ ಲಾಯ್ತಾ, ಕುಸಾಳಾಂ ದುಕಯ್ತಾ ಆನಿ ವಿಜ್ಮಿತ್ ಕರ್ತಾ. ಪ್ರಸ್ತುತ್ ಕೊಂಕ್ಣೆಂತ್ ರೋಶುಚಿಂ ವಿನೋದಿಕ್ ಬರ್ಪಾಂ ಫಾಯ್ಸ್ ಕರಿನಾತ್ಲಿಂ ಪತ್ರಾಂ ನಾಂತ್ ಮ್ಹಳ್ಯಾರೀ ಚೂಕ್ ಜಾಂವ್ಚಿ ನಾ.
ಹ್ಯಾ ಪುಸ್ತಕಾಂತ್ಲಿಂ ಸಗ್ಳಿಂ ವಿನೋದಿಕ್ ಬರ್ಪಾಂ ಖ್ಯಾತ್ ಚಿತ್ರ್‌ಕಾರ್ / ಕಲಾಶಿಕ್ಶಕ್ ಜೋನ್ ಚಂದ್ರನ್ ಹಾಣಿ ವಿಶಿಷ್ಟ್ ರೇಖಾಚಿತ್ರಾಂನಿಂ ಸಜಯ್ಲ್ಯಾಂತ್ ಆನಿ ಮುಖ್‌ಪಾನ್ ಪಿಂತ್ರಾಯ್ಲಾಂ. ಪುಸ್ತಕಾಚೊ ವಿನ್ಯಾಸ್ ಕಲಾಕಾರ್ ಎಡ್ಡಿ ಸಿಕ್ವೇರಾ ಹಾಣಿ ಕೆಲ್ಲೊ ಆಸುನ್, ಕಿಟಾಳ್ ಪ್ರಕಾಶನಾನ್ ಹೆಂ ಪುಸ್ತಕ್ ಉಜ್ವಾಡಾಯ್ಲಾಂ.
ಪುಸ್ತಕಾಕ್ ಥಿಕ್ ಕಶೆಂ ಕವಿ / ಚಿಂತ್ಪಿ ಟಾಯ್ಟಸ್ ನೊರೊನ್ಹಾ, ತಾಕೊಡೆ ಹಾಣಿ ಪ್ರಸ್ತಾವನ್ ಬರಯ್ಲಾಂ.
“ರೋಶುಚ್ಯಾ ಸಾಹಿತ್ಯಾಂತ್ ಹಾಸೊ ಆನಿ ವಿಡಂಬನ್ ದರಬಸ್ತ್ ಆಸಾ. ತಾಚಿಚ್ ಮ್ಹಳ್ಳಿ ಶೈಲಿ ತಾಣೆಂ ರುತಾ ಕೆಲ್ಯಾ. ತಾಚೆಚ್ ಮ್ಹಳ್ಳೆ ವಾಚ್ಪಿ ತಾಣೆಂ ಬಾಂಧುನ್ ಕಾಣ್ಘೆಲ್ಯಾತ್. ತೊ ನಿರಂತರ್ ಬರಯ್ತಾ, ವಾಚುಂಕ್ ಬರೆಂ ಲಾಗ್ತಾ. ರೋಶುಚ್ಯಾ ಜಿನೊಸಾಂತೀ ಹಾಸ್ಯ್, ಮನ್ಶ್ಯಾಪಣ್ ಆನಿ ಲಾನ್ವಿಕಾಯ್ ಆಸಾ.
ರೋಶು ತಾಚ್ಯಾ ಬರ‍್ಪಾಂನಿ ಕೊಂಕ್ಣಿ ಲೊಕಾಚೊ ಭಂವಾರ್, ಕೊಂಕ್ಣಿ ಧರ್ಮಾಚೊ ಭಂವಾರ್, ಕೊಂಕ್ಣಿ ಇಗರ್ಜೆಚೊ ಭಂವಾರ್ ಆನಿ ಥಳೀಯ್ ರಾಜಕೀಯ್ ತಶೆಂ ಸಾಮಾಜಿಕ್ ಭಂವಾರ್ ಬಾಂಧುನ್ ದಿತಾ ಜಾಲ್ಲ್ಯಾನ್, ಏಕ್ ಅತ್ವೆಂ ಸಾಹಿತ್ಯ್ ರುತಾ ಜಾವ್ನ್ ದರಬಸ್ತ್ ಸೋಶಿಯಲ್ ಮೀಡಿಯಾಚ್ಯಾ ಗಲಾಟ್ಯಾಂತೀ ಕೊಂಕ್ಣಿ ಮ್ಹನ್ಶ್ಯಾಂಚ್ಯಾ ಮ್ಹನಾಂತ್ ತಶೆಂ ತೊಂಡಾರ್ ಹಾಸೊ ಹಾಡುಂಕ್ ರೋಶುಕ್ ಸಾಧ್ಯ್ ಜಾಂ. ದೆಕುನ್ ರೋಶುಚೆಂ ಹಾಸ್ಯ್ ಸಾಹಿತ್ಯ್ ಬರೆಂ ಲಾಗ್ತಾ.”
■ ಟಾಯ್ಟಸ್ ನೊರೊನ್ಹಾ, ತಾಕೊಡೆ
ಹ್ಯಾ ಪುಸ್ತಕಾಚೆಂ ಮೋಲ್ ರು. 200/- ಆಸೊನ್ ಪ್ರತಿಯಾಂ ಖಾತಿರ್ ರೋಶು, ಬಜ್ಪೆಕ್ 9880119515 ಹ್ಯಾ ನಂಬ್ರಾರ್ ಸಂಪರ್ಕ್ ಕರ್ಯೆತ್. ಪುಸ್ತಕಾಚೆಂ ಮೋಲ್ ಪಾವಿತ್ ಕರುಂಕ್ ಹಾಂಗಾಸರ್ ದಿಲ್ಲೊ ಕ್ಯೂ ಆರ್ ಕೋಡ್ ವಾಪಾರ್ಯೆತ್. ಪುಸ್ತಕ್ ತಪ್ಪಲಾರ್ ಧಾಡ್ನ್ ದಿಂವ್ಚಿ ವೆವಸ್ತಾ ಆಸಾ.
ವಿನೋದಿಕ್ ಬರ್ಪಾಂ ಥಾವ್ನ್ ಸುರ್ವಾತುನ್, ಪಾಟ್ಲ್ಯಾ ದೋನ್ ದಶಕಾಂ ಥಾವ್ನ್ ಕೊಂಕ್ಣೆಂತ್ ಸರಾಗ್ ಬರವ್ನ್ ಆಸ್ಚ್ಯಾ ರೋಶು, ಬಜ್ಪೆ ಹಾಣೆ ಮಟ್ವ್ಯೊ ಕಾಣಿಯೊ, ಕವಿತಾ, ಗಝಲ್, ಬಾಳ್ ಸಾಹಿತ್ಯ್, ಕಾದಂಬರಿ ಆನಿ ಪ್ರಬಂದ್ ಅಶೆಂ ಸಾಹಿತ್ಯಾಚಾ ಹರ್ ಪ್ರಕಾರಾಂನಿ ಕೃಶಿ ಕೆಲ್ಯಾ. ಕನ್ನಡ ನಾಟಕ್ ತಾಣೆ ಕೊಂಕ್ಣೆಕ್ ಅನುವಾದ್ ಕೆಲ್ಯಾತ್. ಗೀತ್ ಸಾಹಿತ್ಯಾಂತೀ ಆಪ್ಲಿ ಒಳಕ್ ರುತಾ ಕೆಲ್ಲ್ಯಾ ತಾಣೆ ಬರಯಿಲ್ಲಿಂ ಪದಾಂ ಕೊವ್ಳೆಂನಿ, ಯೂ ಟ್ಯೂಬಾಚೆರ್ ಸಾದರ್ ಜಾಲ್ಯಾಂತ್.
2018 ವ್ಯಾ ಕವಿತಾ ಟ್ರಸ್ಟಾನ್ ಫಾಯ್ಸ್ ಕೆಲ್ಲ್ಯಾ ತೀಂತ್ ಜಾಲೆಂ ರಗತ್ – ಹ್ಯಾ ತಾಚ್ಯಾ ಕವಿತೆಚ್ಯಾ ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ವರ್ಸಾಚೊ ಉತ್ತೀಮ್ ಪುಸ್ತಕ್ ಪುರಸ್ಕಾರ್, ಗೋವಾ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ ಥಾವ್ನ್ ವರ್ಸಾಚೊ ಉತ್ತೀಮ್ ಪುಸ್ತಕ್ ಪುರಸ್ಕಾರ್ ಆನಿ ಡಾ| ಟಿ.ಎಂ.ಎ.ಪೈ. ಪ್ರಶಂಸಾರ್ಹ್ ಪುರಸ್ಕಾರ್ ಫಾವೊ ಜಾಲಾ. 2022 ವ್ಯಾ ವರ್ಸಾ ಕಿಟಾಳ್ ಪ್ರಕಾಶನಾ ಥಾವ್ನ್ ಫಾಯ್ಸ್ ಜಾಲ್ಲ್ಯಾ ತಾಚ್ಯಾ ಪೇಯಿಂಗ್ ಗೆಸ್ಟ್ ಆನಿ ಹೆರ್ ಕಥಾ ಮಟ್ವ್ಯಾ ಕಾಣಿಯಾಂ ಪುಸ್ತಕಾಕೀ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ವರ್ಸಾಚೊ ಉತ್ತೀಮ್ ಪುರಸ್ಕಾರ್ ಪಾವೊ ಜಾಲಾ. ಗಿರ್ಬುಜಿ (2021) ಭುರ್ಗ್ಯಾಂ ಖಾತಿರ್ ತಾಣೆ ರಚ್ಲೆಲ್ಯಾ ಕವಿತೆಂಚೊಂ ಸಚಿತ್ರ್ ಪುಂಜೊ. ಹೆಂ ಪುಸ್ತಕ್ ಬೆಂಗ್ಳುರ್ಚ್ಯಾ ಧ್ಯಾನವನ ಪ್ರಕಾಶನಾನ್ ಫಾಯ್ಸ್ ಕೆಲಾಂ. ಸಾಂಡುನ್ ಘಾಲ್ಲಿ ಶೆಳಿ (2024) ಗಲ್ಫ್ ಸಾಂಡುನ್ ಜಿಯೆಂವ್ಚಿಂ ಸಪ್ಣಾಂ ಘೆವ್ನ್ ಗಾಂವಾಂಕ್ ಆಯಿಲ್ಲ್ಯಾ ದಾದ್ಲ್ಯಾಚಿ ಪರಿಸ್ಥಿತಿ ದಾಖಲ್ ಕೆಲ್ಲಿ ತಾಚಿ ಕಾದಂಬರಿ.
ಹಾಸ್ಯ್ ಎಟ್ಯಾಕ್ (2015), ಓಪನ್ ಹಾಸ್ಯ್ ಸರ್ಜರಿ (2017), ಫೆಲಿಸ್ ನವಿಡಾಡ್ (2020),ಪೋಲಿ-ಟಿಕಲ್ (2023) – ತಾಣೆ ಬರಯಿಲ್ಲಿಂ ವಿನೋದಿಕ್ ಸಾಹಿತ್ಯಾಚಿಂ ಪುಸ್ತಕಾಂ ಆಸುನ್, ಹ್ಯಾ ಪುಸ್ತಕಾಂನಿ ದಾಕ್ಲ್ಯಾಂಚೊಂ ವಿಕ್ರೊ ದಾಖಲ್ ಕೆಲಾ. ಚಡಾವತ್ ಪುಸ್ತಕಾಂಚ್ಯೊ ದೋನ್ ಆವೃತ್ತ್ಯೊ ಫಾಯ್ಸ್ ಜಾಲ್ಯಾತ್.
ರೋಶುಚ್ಯಾ ಸಾಹಿತಿಕ್ ವಾವ್ರಾಕ್ ಸಮನ್ವಯ ಸಂಸ್ಥ್ಯಾಥಾವ್ನ್ 2013 ವರ್ಸಾ ಯುವಕಿರಣ್ ಪುರಸ್ಕಾರ್ ಆನಿ 2017 ವ್ಯಾ ವರ್ಸಾ ಕಿಟಾಳ್ ಯುವ ಪುರಸ್ಕಾರ್ ಫಾವೊ ಜಾಲಾ.
2 comments
ಹಾಸ್ಯ್ ಸಂಸಾರಾಂತ್ ಆಪ್ಲಿಚ್ ವಿಶಿಷ್ಟ್ ಶೈಲಿ ರುತಾ ಕರುನ್, ವಾಚ್ಪ್ಯಾಂಕ್ ಮೆಚ್ವಣೆಚೊ ಜಾಲ್ಲ್ಯಾ ’ರೋಶು ಬಜ್ಪೆ’ ಚೊ ’ಸರ್ಕಸ್’ ಬೂಕ್ ಹುನೊನಿ ಪೊಳ್ಯಾಂಬರಿ ವಿಕೊನ್ ವೆಚಾಕ್ ದುಬಾವ್ ನಾ! ಸಕ್ಡಾಂವರ್ವಿಂ ಹಾಸ್ಯ್ ಬರ್ಪಾಂ ಬರಂವ್ಕ್ ಸಾದ್ಯ್ ಜಾಯ್ನಾ ಆನಿ ಬರಂವ್ಚೆಂ ಸುಲಭಾಯೆಚೆಂಯೀ ನ್ಹಯ್. ರೋಶು ಬಜ್ಪೆಕ್, ಸರ್ವ್ ಜೈತ್ ಮಾಗ್ತಾಂ.
Congratulations on reaching another milestone and making konkani rich again.