“ಪಾಪಾ ಫ್ರಾನ್ಸಿಸ್ ತಾಳೊ ನಾತ್ಲೆಲ್ಯಾಂಚೊಂ ತಾಳೊ ಜಾವ್ನಾಸ್ಲೊ. ದುಬ್ಳ್ಯಾ – ಧಾಕ್ಟ್ಯಾಂ ಥಂಯ್ ತಾಣೆ ಖರ‍್ಯಾ ಕ್ರೀಸ್ತಾಕ್ ಪಳಯ್ಲೊ. ಆಪ್ಲ್ಯಾ ಸಾದ್ಯಾ ಆನಿ ಖಾಲ್ತ್ಯಾ ಜಿಣ್ಯೆಂತ್ ಆಸ್ಸಿಸಿಚ್ಯಾ ಫ್ರಾನ್ಸಿಸಾಚೆಂ ಪ್ರತಿರೂಪ್ ತೋ ಜಾವ್ನಾಸ್ಲೊ ” ಮ್ಹಣಾಲೊ ಮಾ| ಬಾ| ಫಾವುಸ್ತಿನ್ ಲೋಬೊ, ಫಾ| ಮುಲ್ಲರ್ ಸಂಸ್ಥ್ಯಾಂಚೊಂ ನಿಯೋಜಿತ್ ನಿರ್ದೇಶಕ್. ಮಾ| ಬಾ| ಲೋಬೊ ಸಹಕಾರಿ ಶೆತಾಂತ್ ರೋಮಿ ಕಥೊಲಿಕಾಂಚೆಂ ಏಕ್ ಮಾತ್ ಬಳ್ವಂತ್ ಬ್ಯಾಂಕ್ – ಎಮ್. ಸಿ.ಸಿ. ಬ್ಯಾಂಕ್ ಲಿಮಿಟೆಡ್ ಆಡಳ್ತ್ಯಾ ದಫ್ತರಾಂತ್ ಪಾಪಾ ಫ್ರಾನ್ಸಿಸಾಚ್ಯಾ ಮಾನಾಕ್ ಮಾಂಡುನ್ ಹಾಡ್ಲೆಲ್ಯಾ ಶೃದ್ದಾಂಜಲಿ ಸಭೆಂತ್ ಬ್ರೇಸ್ತಾರಾ 24 ಸಾಂಜೆರ್, ಪಾಪಾ ಫ್ರಾನ್ಸಿಸಾಕ್ ನಮಾನ್ ಪಾಟವ್ನ್ ಉಲಯ್ತಾಲೊ.
“ಪಾಪಾ ಫ್ರಾನ್ಸಿಸಾನ್ ಇಗರ್ಜ್‌ಮಾತೆಂತ್ ಗರ್ಜೆಭಾಯ್ಲ್ಯಾ ಆನಿ ಅಪ್ರಸ್ತುತ್ ಆಚರಣಾಂನಿ ಸುಧ್ರಾಪ್ ಹಾಡ್ಚೆಂ ಪ್ರಾಮಾಣಿಕ್ ಪ್ರೇತನ್ ಕೆಲೆಂ. ಝುಜಾಂನಿಮ್ತಿಂ ಸಂಸಾರ್‌ಭರ್ ವಳ್ವಳ್ಚ್ಯಾ ಮನ್ಶ್ಯಾಕುಳಾಚೆರ್ ತಾಕಾ ವರ್ತಿ ಕಾಕುಳ್ತ್ ಆಸ್ಲಿ. ದೆಕುನ್ ತಾಣೆ ಅಂತರ್‌ಧರ್ಮೀಯ್ ಸಂವಾದ್ ಸುರ್ವಾತ್ಲೆ. ಶಾಂತಿ ಖಾತಿರ್ ಪಾವ್ಲಾಂ ಕಾಡ್ಲಿಂ. ಮನ್ಶ್ಯಾಕುಳಾಚ್ಯಾ ಬರೆಪಣಾಖಾತಿರ್ ಖರ‍್ಯಾ ಅರ್ಥಾನ್ ವಾವುರ್ಲಲೊ ವಿಶ್ವಮಾನವ್ ವ್ಯಕ್ತಿತ್ವಾಚೊ ಜಾವ್ನಾಸ್ಲೊ – ಪಾಪಾ ಫ್ರಾನ್ಸಿಸ್. ತಾಚ್ಯಾ ನಿರ್ಗಮನಾನ್ ಸಂಸಾರ್ ಅನಾಥ್ ಜಾಲಾ. ತಾಣೆ ಜಿಯೆವ್ನ್ ದಾಖಯಿಲ್ಲಿಂ ಆದರ್ಶಾಂ ಆಮ್ಚ್ಯಾ ಜಿವಿತಾಕ್ ವಾಟೆದಿವೊ ಜಾಂವ್ಕ್ ಜಾಯ್” ಮ್ಹಣಾಲೊ ಮಾ| ಬಾ| ಲೋಬೊ, ಪಾಪಾ ಫ್ರಾನ್ಸಿಸಾ ಸಾಂಗಾತಾ ತಾಣೆ ಖರ್ಚಿಲ್ಲೆ ಥೊಡ್ಯೊ ಆಪುರ್ಬಾಯೆಚ್ಯೊ ಘಡಿಯೊ ಯಾದ್ ಕರುನ್.
ಕ್ಯಾರೆನ್ ಕ್ರಾಸ್ತಾ ಆನಿ ಪಂಗ್ಡಾಚ್ಯಾ ಪ್ರಾರ್ಥನ್ ಗೀತಾಸವೆಂ ಸುರ್ವಾತ್ಲೆಲ್ಯಾ ಕಾರ್ಯಾಂತ್ ಬ್ಯಾಂಕಾಚಿ ನಿರ್ದೇಶಕಿ ಐರಿನ್ ರೆಬೆಲ್ಲೊ ಹಿಣೆ ಪಾಪಾ ಫ್ರಾನ್ಸಿಸಾಚ್ಯಾ ಜಿಣ್ಯೆಚೆರ್ ಉಜ್ವಾಡ್ ಫಾಂಕವ್ಚೆಂ ಅಡಿಯೊ – ವಿಡಿಯೊ ಸಾದರ್‌ಪಣ್ ಪ್ರಸ್ತುತ್ ಕೆಲೆಂ.
ಬ್ಯಾಂಕಾಚೊ ಅಧ್ಯಕ್ಶ್ ಸಹಕಾರ ರತ್ನ ಅನಿಲ್ ಲೋಬೊ ಹಾಣಿ ಬ್ಯಾಂಕಾಚೆ ಸರ್ವ್ ನಿರ್ದೇಶಕ್, ಗ್ರಾಹಕ್, ಸಿಬ್ಬಂದಿ ತರ್ಫೆನ್ ಪಾಪಾಚ್ಯಾ ತಸ್ವಿರೆಕ್ ಫುಲಾಂ ಅರ್ಪುನ್ ನಮಾನ್ ಪಾಟಯ್ಲೊ. ಹ್ಯಾ ವೆಳಿಂ ಮಾ| ಬಾ| ಪಾವುಸ್ತಿನ್ ಲೋಬೊ ಆನಿ ಉಪಾಧ್ಯಕ್ಷ್ ಜೆರಾಲ್ಡ್ ಜೂಡ್ ಡಿಸಿಲ್ವಾ ಹಾಣಿ ಸಾಂಗಾತ್ ದಿಲೊ.
ಬ್ಯಾಂಕಾಚೆ ಸರ್ವ್ ನಿರ್ದೇಶಕ್, ಅಡಳ್ತ್ಯಾ ದಫ್ತರ್ ಆನಿ ಸಂಸ್ಥಾಪಕ್ ಶಾಖ್ಯಾಚೆ ಶಿಬಂದಿ ಸಭೆಂತ್ ಹಾಜರ್ ಆಸ್ಲೆ. ಮಹಾಪ್ರಬಂಧಕ್ ಸುನಿಲ್ ಮಿನೇಜಸ್ ಹಾಣಿ ದಿನ್ವಾಸ್ ಪಾಟಯ್ಲೆ. ವರಿಷ್ಠ್ ಪ್ರಬಂಧಕ್ ಡೇರಿಲ್ ಲಸ್ರಾದೊ ಹಾಣಿ ನಿರೂಪಣ್ ಕೆಲೆಂ.
